To The Word – Day 22

₁Morena a re go Moshe: “Tloga felo fa, wena le setšhaba se o se ntšhitšego nageng ya Egepeta, o ye nageng ye ke enetšego Abrahama le Isaka le Jakobo ka re ke tla e fa bona le ditlogolo tša bona. ₂Ke tla roma morongwa a go eta pele, gomme ke tla leleka Bakanana le Baamore le Bahete le Baperise le Bahibe le Bajebuse. ₃Le ya nageng ya mokhora le monono. Eupša nna nka se ye le lena, ka gobane le setšhaba sa melala ye methata, gomme nka le feleletša tseleng.”

₄Ge setšhaba se ekwa taba ye thata ye, sa thoma go itshola gomme sa se hlwe se apara dikgabišo. ₅Morena o be a laetše Moshe gore a ba botše go re: “Le setšhaba sa melala ye methata. Ge nka sepela le lena, le ge e le lebakanyana fela, ke tla le feleletša sa ruri. Bjale ge, apolang dikgabišo tša lena, gomme nna ke tla bona gore ke dirang ka lena.” ₆Ka gona, ge Baisraele ba tlogile thabeng ya Sinai, ba ile ba se hlwe ba apara dikgabišo.

₇Ka mehla ge setšhaba sa Israele se hloma mešaša, Moshe o be a tšea Tente ye kgethwa a e hlome kua ntle kgojana le mešaša. E be e bitšwa Tente ya bodulo bja Morena, gomme yo mongwe le yo mongwe yo a bego a nyaka go kopana le Morena o be a tšwela kua go yona. ₈Ka mehla ge Moshe a tšwela kua go yona, setšhaba se be se ema mejakong ya mešaša ya sona se lebelela Moshe go fihlela a sobelela ka go yona. ₉Ge Moshe a tsene, thololo ya leru e be e theoga e dule mojakong wa Tente, gomme Morena a bolele le Moshe a le lerung. ₁₀E be e re ge setšhaba se bona thololo ya leru mojakong wa Tente, se obame. ₁₁Morena o be a bolela le Moshe ba lebane ka difahlego, bjalo ka ge motho a bolela le mogweragwe. Ka morago ga fao Moshe o be a boela mešašeng. Fela lesogana le e bego e le mothuši wa gagwe, Joshua, morwa wa Nunu, le be le šala Tenteng.

₁₂Moshe a re go Morena: “O ntaetše gore ke ntšhe setšhaba se, fela ga se wa mpotša gore o nthoma le mang. O boletše gore o ntseba gabotse, le gore ke a go kgahla. ₁₃Bjale ge ke go kgahla, hle, ntsebiše maikemišetšo a gago, gore ke go tsebe gomme ke fele ke go kgahla. O gopole le gore batho ba ke setšhaba sa gago.”

₁₄Morena a re: “Ke tla sepela nago, ka go fa khutšo.”

₁₅Moshe a mo fetola a re: “Ge o sa sepele le rena, gona o se ke wa re tloša fa. ₁₆Motho o tla tseba bjang gore nna le setšhaba sa gago re a go kgahla, ge wena o sa sepele le rena? Go ba le rena ga gago go tla re hlaola ditšhabeng tše dingwe ka moka lefaseng.”

₁₇Morena a re go Moshe: “Ke tla dira ka moo o kgopetšego ka gona, ka gobane ke go tseba gabotse, gomme o a nkgahla.”

₁₈Ke mo Moshe a kgopetšego Morena a re: “Hle, ntaetše seetša se se fahlago sa letago la gago.”

₁₉Morena a mo fetola a re: “Ke tla feta pele ga gago ka botse bjohle bja letago la ka, gomme ka go begela leina la ka la Morena. Ke tla gaugela yo ke ratago go mo gaugela, ka šokela yo ke ratago go mo šokela. ₂₀Nka se go dumelele gore o bone sefahlego sa ka, gobane ga go motho yo a ka rego go bona sefahlego sa ka a fela a sa phela, ₂₁fela mo thoko ga ka go na le felo mo o ka emago gona godimo ga leswika. ₂₂Ge seetša se se fahlago sa letago la ka se putla, ke tla go bea ka leweng mo leswikeng, ka go pipa ka seatla go fihlela ke putlile. ₂₃Ka morago ga moo ke tla tloša seatla sa ka gomme wa mpona ke go fularetše, wa se bone sefahlego sa ka.”

₁Morena a re go Moshe: “Ipetlele matlapa a mabedi a a swanago le ale a pele, mme nna ke tla ngwala mantšu a a bego a le mola matlapeng a pele a o a pšhatlilego. ₂Itokišetše la bosasa mosong, o namele thaba ya Sinai gomme o gahlane le nna kua godimo ga yona. ₃Go se be le o tee yo a namelago le wena; go se be le o tee yo a bonwago mo gongwe thabeng; le gona go se be le sehuswane goba kgomo ye e fulago patogeng ya thaba.” ₄Ka gona Moshe a betla matlapa a mangwe a mabedi gomme a tsoga e sa le ka moswane, a namela thaba ya Sinai a a swere, ka moo Morena a bego a mo laetše ka gona.

₅Morena a theoga ka leru, a ema moo go yena, a bolela leina la gagwe, la Morena. ₆Morena a putla pele ga gagwe a bega a re: “Nna, Morena, ke Modimo wa lešoko le kwelobohloko, yo a sa befelwego ka bjako, le gona yo a nago le lerato le legolo le potego. ₇Ke botegela kholofetšo ya ka melokong ye diketekete, mme ka lebalela batho makgopo le dibe tša bona; eupša nka se lese go otla bana le ditlogolo go iša molokong wa boraro le wa bone ka lebaka la dibe tša batswadi ba bona.”

₈Ka bjako Moshe a obama, a itahlela fase, ₉a rapela a re: “Mong wa ka, ge ke tloga ke go kgahla, Morena, hle, sepela le rena. Setšhaba se se na le melala ye methata, fela re lebalele bokgopo bja rena le sebe sa rena, mme o re amogele re be setšhaba sa gago.”

₁₀Morena a re go Moshe: “Bjale ke dira kgwerano le setšhaba sa geno. Ke tla dira mehlolo setšhaba se ntebeletše ye e sego ya ka ya dirwa setšhabeng se sengwe lefaseng lohle. Ditšhaba ka moka di tla bona tše kgolo tše nna, Morena, ke tlago di dira, gobane tše ke tlago di dira ka lena di a šiiša. ₁₁Le phethe melao ye ke le fago yona lehono. Ke tla leleka Baamore, Bakanana, Bahete, Baperise, Bahibe le Bajebuse ge le goroga. ₁₂Le se ke la dira kgwerano le badudi ba naga ye le yago go yona, gobane seo e ka ba molaba go lena. ₁₃Lena le kgerešeng dialetare tša bona, le thubaganye dikokwane tša bona tša borapedi tša maswika, le remeng dikota tša bona tša borapedi.

₁₄“Le se ke la khunamela medimo ye mengwe, gobane nna, Morena, ke Modimo yo a sa kgotlelelego tirelo ya medimo ye mengwe. ₁₅Le se ke la dira kgwerano le badudi ba naga yeo, gobane ba ka re ge ba kgeloga go nna ka go khunamela medimo ya bona e šele, ba e direla le dihlabelo, ba le laletša gore le e khunamele le bona, la ja le dihlabelo tšeo tša bona. ₁₆Le barwa ba lena ba ka nyala basadi ba šele bao, gomme bona ba ba kgeloša go nna ka go dira gore ba khunamele medimo yeo ya bona.

₁₇“Le se ke la itirela medimo ya tshipi mme la e rapela.

₁₈“Le bineng Monyanya wa Dinkgwa tše di se nago komelo. Le je dinkgwa tše di se nago komelo matšatši a a šupago mo kgweding ya Abibi, ka mo ke le laetšego ka gona, ka gobane ke ka yona kgwedi yeo mo le tšwilego Egepeta.

₁₉“Leitšibolo le letona la motho goba la seruiwa ke la ka, ₂₀eupša leitšibolo le letona la pokolo le le rekolle ka kwanyana. Ge le sa le rekolle, gona le le robe molala. Le rekolleng mošemane yo mongwe le yo mongwe wa leitšibolo.

“Go se be le o tee yo a tlago pele ga ka a se a swara kabelo.

₂₁“Mediro ya lena le e dire ka matšatši a a selelago, fela ka letšatši la bošupa le se šome, le ge e ka ba mabakeng a ge go lengwa goba go bunwa.

₂₂“Le bineng Monyanya wa Puno ge le thoma go buna mabele a lena a pele, gomme le bine le Monyanya wa Kgobelo ge le kgobela dienywa tša lena lehlabula.

₂₃“Gararo mo ngwageng banna ba gabolena ka moka ba tle go khunamela nna, Morena, Modimo wa Israele. ₂₄Ge ke lelekile ditšhaba ge le goroga gomme ke katološitše naga ya lena, ga go yo a kago leka go thopa naga ya lena nakong ya ge go binwa menyanya ye meraro ye.

₂₅“Ge le ntirela sehlabelo le se ke la se tliša le senkgwa se se nago komelo. Le se ke la latša seruiwa se se hlabilwego Monyanyeng wa Paseka go fihlela ka la ka moswane.

₂₆“Ngwakong wa Morena Modimo wa lena le tliše dibjalo tše kaonekaone tše le di bunago pele.

“Le se ke la apea kwanyana goba putšanyana ka maswi a mmayo.”

₂₇Morena a re go Moshe: “Ngwala mantšu a, ka gobane ke dira kgwerano le wena le Baisraele go ya ka ona.”

₂₈Moshe o dutše moo le Morena matšatši a masome a mane le mašego a ona a sa je selo a sa nwe selo. Gomme a ngwala mantšu a kgwerano e lego Melao ye Lesome matlapeng ao.

₂₉Ge Moshe a theoga thabeng ya Sinai a swere Melao ye Lesome, sefahlego sa gagwe se be se phadima ka ge a be a boletše le Morena, fela yena o be a sa tsebe. ₃₀Arone le Baisraele ka moka ba lebelela Moshe, ba bona sefahlego sa gagwe se phadima, mme ba boifa go mmatamela. ₃₁Eupša Moshe a ba bitša, gomme Arone le baetapele ka moka ba setšhaba ba ya go yena, gomme Moshe a bolela le bona. ₃₂Ka morago ga fao, Baisraele ka moka ba mmokanela, gomme Moshe a ba botša tšohle tše Morena a mmoditšego tšona thabeng ya Sinai a re ba di phethe. ₃₃Ge Moshe a feditše go bolela nabo, a ikhurumetša sefahlego ka lešira. ₃₄Ka mehla ge Moshe a tsena ka Tenteng ya bodulo bja Morena go bolela le yena, o be a tloša lešira. Ge a etšwa, o be a laodišetša setšhaba sa Israele tšohle tše a bego a laetšwe go ba botša tšona, ₃₅gomme bona ba be ba bona sefahlego sa gagwe se phadima. Ka fao o be a ikhurumetša ka lešira go fihlela a eya gape go bolela le Morena.

₁Moshe a rapa pitšo ya setšhaba ka moka sa Israele, a re go sona: “Tše Morena a le laetšego gore le di dire šedi: ₂Mediro ya lena le ka e dira matšatšing a a selelago, eupša letšatši la bošupa e be le lekgethwa, letšatši le legolo la go khutša le le abetšwego nna, Morena. Mang le mang yo a dirago modiro ka letšatši leo a bolawe. ₃Ešita le mollo ka malapeng a lena le se ke la o gotša ka tšatši la Sabatha.”

₄Moshe a re go setšhaba ka moka sa Israele: “Sese se Morena a le laetšego sona: ₅Le ntšhetše Morena dimpho. Yo mongwe le yo mongwe yo a ratago go ntšha mpho, a ntšhe ya gauta goba ya silibera goba ya mphiri. ₆Le ntšhe le mašela a boletiana, le wulu ya botala bja legodimo, le ya bohubedu bja moretele, le ya bohubedu bja madi, le lešela le le dirilwego ka boya bja dipudi, ₇le matlalo a dikgapa a a tloditšwego ka letsoku, le mekgopana ye boletiana, le dikota tša mogohlo, ₈le makhura a go tukiša mabone, le dinoko tša makhura a tlotšo le tša seorelo sa go nkga bose, ₉le dikarneliene le magakabje a mangwe a go rokelelwa seaparong se sekgethwa sa Moprista yo Mogolo le phaphathianeng ya sehubeng sa gagwe.”

₁₀“Bomakgone bohle magareng a lena ba tle ba dire tšohle tše Morena a di laetšego. ₁₁Ba dire Tente le sepipetši sa yona sa ka gare le sa ka ntle, le dikgwaetšo tša yona, le mahlomo a yona a go thekga, le dipalelo tša yona, le dikota tša yona, le mabogato a yona, ₁₂le Polokelo ya Kgwerano, le mapara a yona, le sekhurumelo sa yona, le seširo sa go e šira, ₁₃le tafola, le mapara a yona, le ditlabakelo ka moka tša yona, le dinkgwa tše di abetšwego Modimo, ₁₄le sehlomamabone sa lebone le ditlabakelo tša sona, le mabone le makhura a ona, ₁₅le aletare ya seorelo le mapara a yona, le makhura a tlotšo, le seorelo sa go nkga bose, le seširo sa mojako wa Tente, ₁₆le aletare ya dihlabelo, le papetla ya yona ya mphiri e kgomareditšwe, le mapara a yona, le ditlabakelo ka moka tša yona, le sebjana sa go hlapela le bogato bja sona, ₁₇le diširo tša kgoro le dikota tša yona, le mabogato a tšona, le seširo sa mojako wa kgoro, ₁₈le dibapola le dithapo tša Tente le kgoro, ₁₉le diaparo tša botšhepi tše baprista ba swanetšego go di apara ge ba dira mošomo wa baprista ka Felo mo Gokgethwa, diaparo tše dikgethwa tša Arone, moprista, le tša barwa ba gagwe.”

₂₀Setšhaba ka moka sa Israele sa tloga go Moshe, ₂₁gomme yo mongwe le yo mongwe yo a ikwago a tlišetša Morena mpho ya go aga Tente ya bodulo bja Morena. Ba tliša dilo ka moka tše di tsomegago go tlo dirišwa tirelong le go tlo roka diaparo tše dikgethwa. ₂₂Mang le mang yo a ratago, banna le basadi, ba tliša dithobošo le mangina le dipalamonwana le dipheta, le magakabje a mehutahuta a gauta, mme ba di abela Morena. ₂₃Mang le mang yo a bego a na le mašela a boletiana, goba wulu ya botala bja legodimo, le ya bohubedu bja moretele, le ya bohubedu bja madi, goba lešela le le dirilwego ka boya bja dipudi, goba matlalo a dikgapa a a tloditšwego ka letsoku, goba mekgopana ye boletiana, a di tliša. ₂₄Bohle ba ba bego ba kgona go ntšha dimpho tša silibera goba tša mphiri, ba tlišetša Morena dimpho tša bona, le bohle ba ba bego ba na le dikota tša mogohlo tše di bego di ka dirišwa, le bona ba di tliša. ₂₅Bomakgone bohle ba basadi ba tliša ditlhale tša lešela le boletiana le ditlhale tša wulu ya botala bja legodimo, le ya bohubedu bja moretele, le ya bohubedu bja madi tše ba bego ba di ohlile. ₂₆Ba ohla le tlhale ya boya bja dipudi. ₂₇Baetapele ba tliša dikarneliene le magakabje a mangwe a go rokelelwa seaparong se sekgethwa le phaphathianeng ya sehubeng, ₂₈le dinoko le makhura, e le tša mabone le tša makhura a tlotšo le tša seorelo sa go nkga bose. ₂₉Baisraele ka moka bao ba bego ba ikwa ba ile ba ithaopa ba tliša dikabelo tša bona go Morena, gore go tle go dirwe modiro woo Morena a bego a laetše Moshe go o dira.

₃₀Moshe a re go Baisraele: “Morena o kgethile Betsaliele, morwa wa Uri, wa kgorwana ya Hure, wa kgoro ya Juda. ₃₁Modimo o mo hlamile ka maatla a gagwe, mme o mo file tsebo le tlhaologanyo le bokgoni go dira modiro ofe le ofe wa bokgwari, ₃₂e lego go beakanya mediro ya bokgwari, le go e šoma ka gauta le silibera le mphiri, ₃₃le go seta magakabje a go rokelelwa, le go betla dikota, le go dira mošomo ofe le ofe wa bokgwari. ₃₄Morena o file yena le Oholiabe, morwa wa Ahisamake, wa kgoro ya Dane, mpho ya go kgona go ruta ba bangwe bokgoni bja bona. ₃₅Morena o ba file bokgoni medirong ka moka ye e dirwago ke batloki le babeakanyi le balogi ba mašela a boletiana, le ba wulu ya botala bja legodimo, le ya bohubedu bja moretele, le ya bohubedu bja madi, le ba mašela a mangwe. Ba kgona go dira mešomo ya mehutahuta, mme ke babeakanyi ba dikgwari.

₁“Betsaliele le Oholiabe le bomakgone ba bangwe ka moka bao Morena a ba filego tsebo le tlhaologanyo, bao ba tsebago go dira se sengwe le se sengwe seo se tsomegago go aga Tente ye kgethwa, ba dire tšohle ka moo Morena a laetšego ka gona.”

₂Moshe a bitša Betsaliele le Oholiabe le bomakgone ba bangwe ka moka bao Morena a ba filego bokgoni ba bile ba rata go thuša, gomme a ba botša gore ba thome go šoma. ₃Ba ile ba amogela go Moshe dimpho tšohle tše Baisraele ba bego ba di tlišitše go aga Tente ye kgethwa. Setšhaba sa Israele sa fela se tliša dimpho tša sona ka go ithaopa mosong wo mongwe le wo mongwe. ₄Bjale banna bao ba go ba bomakgone, bao ba bego ba dira mediro ye e fapanego, ba tla go Moshe ₅ba re go yena: “Setšhaba se tliša dimpho tše ntši go feta tekanyo ya modiro wo Morena a laetšego gore o dirwe.”

₆Ka gona Moshe a romela molaetša go bohle mešašeng gore ba se hlwe ba ntšhetša Tente ye kgethwa dimpho; ka fao batho ba se hlwe ba ntšha dimpho. ₇Tšeo di bego di šetše di tlišitšwe di be di šetše di feta tekanyo go phetha modiro ka moka.

₈Ba e bego e le bomakgonekgone gare ga bao ba bego ba dira mediro ba dira Tente ya bodulo bja Morena. Ba e dira ka diripa tše lesome tša lešela le boletiana tše di logeletšwego wulu ya botala bja legodimo, le ya bohubedu bja moretele, le ya bohubedu bja madi, gomme di logeletšwe mekgabišo ya diswantšho tša bakerubi. ₉Diripa ka moka di be di lekana, e le tša botelele bja dimetara tše 12,9, le bophara bja dimetara tše 1,8. ₁₀Ba rokaganya tše tlhano tša tšona gotee ya ba thokaganyo e tee, mme le tše dingwe tše tlhano ba di rokaganya ka wona mokgwa woo. ₁₁Ba dira digole tša lešela la botala bja legodimo morumong wa seripa sa ka ntle thokaganyong tše pedi. ₁₂Ba rokelela digole tše masome a mahlano seripeng sa mathomo sa thokaganyo ya mathomo, le tše masome a mahlano tša go lebana natšo seripeng sa mafelelo sa thokaganyo ya bobedi. ₁₃Ba dira dikgwaetšo tša gauta tše masome a mahlano tša go kgokaganya dithokaganyo tšeo tše pedi ya ba selo se tee.

₁₄Ka morago ga fao ba dira sepipetši sa Tente ka diripa tše lesome le se tee tša lešela le le dirilwego ka boya bja dipudi. ₁₅Ba lekanya diripa tšeo ka moka ya ba tša botelele bja dimetara tše 13,8, le bophara bja dimetara tše 1,8. ₁₆Ba rokaganya tše tlhano tša tšona ya ba thokaganyo e tee, mme le tše dingwe tše di selelago tša tšona ba di rokaganya thokaganyo ye nngwe. ₁₇Ba kgokelela digole tše masome a mahlano morumong wa seripa sa mafelelo sa thokaganyo e tee, le digole tše masome a mahlano morumong wa seripa sa mafelelo sa thokaganyo ye nngwe. ₁₈Ba dira dikgwaetšo tša mphiri tše masome a mahlano tša go kgokaganya dithokaganyo tšeo tše pedi gore e be sepipetši se tee. ₁₉Ba dira dipipetši tše dingwe tše pedi, se sengwe ka matlalo a dikgapa a a tloditšwego ka letsoku, le se sengwe ka mekgopana ye boletiana, gore di pipetše bokantle.

₂₀Ba dira mahlomo a dikota tša mogohlo go thekga Tente. ₂₁Lehlomo le lengwe le le lengwe ya ba la botelele bja dimetara tše 4,6, le bophara bja disentimetara tše 69, ₂₂la ba le maphakga a mabedi lefateng go swaranya mahlomo gotee. Mahlomo ka moka a go thekga a ba le maphakga a. ₂₃Ba dira mahlomo a go thekga a masome a mabedi lehlakoreng la ka borwa, ₂₄le mabogato a silibera a masome a mane ka fase ga ona, mabogato a mabedi a le ka fase ga lehlomo le lengwe le le lengwe go swarelela maphakga ka mabedi a lehlomo. ₂₅Ba dira mahlomo a go thekga a masome a mabedi ka lehlakoreng la ka leboa la Tente, ₂₆le mabogato a silibera a masome a mane, a mabedi a le ka fase ga lehlomo le lengwe le le lengwe. ₂₇Ka lehlakoreng la ka morago, ka bodikela, ba dira mahlomo a a selelago a go thekga, ₂₈le mahlomo a mabedi a go thekga a dikhutlo tša ka morago. ₂₉Mahlomo a a go thekga a dikhutlo a tlemaganywa go tloga fase go rotoga go fihlela mokgokong wa ka godimo. Mahlomo a mabedi a go thekga a a dirago dikhutlo tšeo tše pedi a dirwa bjalo. ₃₀Ka gona gwa ba le mahlomo a seswai a go thekga, le mabogato a silibera a lesome le a a selelago, a mabedi a le ka fase ga lehlomo le lengwe le le lengwe.

₃₁Ba betla dipalelo tše lesome le tše tlhano ka dikota tša mogohlo, tše tlhano ya ba tša mahlomo a go thekga a ka thoko ye nngwe ya Tente, ₃₂tše tlhano ya ba tša mahlomo a go thekga a ka thoko ye nngwe, mme tše tlhano ya ba tša mahlomo a go thekga a ka thoko ya ka bodikela, ka morago. ₃₃Palelo ya gare, ye e lego seripagareng sa bogodimo bja mahlomo a go thekga, ya tloga mathomong a Tente ya fihla mafelelong a yona. ₃₄Ba manega mahlomo a go thekga ka gauta, mme ba a kgokelela mekgoko ya gauta ya go khwamela dipalelo tšeo le tšona di bego di manegilwe ka gauta.

₃₅Ba dira seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, mme ba e logelela mekgabišo ya diswantšho tša bakerubi. ₃₆Ba betla dikota tša mogohlo tše nne tša go thekga seširo; ba di manega ka gauta, ba ba ba di kgokelela dikgwaetšo tša gauta. Ba dira mabogato a silibera a mane go swarelela dikota tšeo. ₃₇Mojako wa Tente ba o direla seširo sa lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, ya ba mologelelo wa mebala wa mekgabišo ya bokgwari. ₃₈Seširo se ba se direla dikota tše tlhano tše di kgokeletšwego dikgwaetšo; ba manega bogodimo le mapheko a tšona ka gauta, mme ba di direla mabogato a mahlano a mphiri.

₁Betsaliele o betlile Polokelo ya Kgwerano ka dikota tša mogohlo, ya ba ya botelele bja disentimetara tše 115, le bophara bja disentimetara tše 69, le bogodimo bja disentimetara tše 69. ₂A e manega ka ntle le ka gare ka gauta ye e sego ya tswakwa, mme a e direla morumo wa gauta go e dikologa. ₃A e direla mekgoko ye mene ya gauta, mme a e kgokelela maotwaneng a yona ka mane, mekgoko ye mebedi lehlakoreng le lengwe le le lengwe. ₄A betla mapara a go rwala ka dikota tša mogohlo, mme le ona a a manega ka gauta, ₅a a tsenya mekgokong ya ka mahlakoreng a Polokelo. ₆A dira sekhurumelo ka gauta ye e sego ya tswakwa, ya ba sa botelele bja disentimetara tše 115, le bophara bja disentimetara tše 69. ₇A bopa diswantšho tša bakerubi ba babedi ka gauta ye e rutšwego. ₈A bea se tee ka mafelelong a mangwe a sekhurumelo, se sengwe a se bea ka mafelelong a mangwe a sona; a dira gore di kgomagane le sekhurumelo. ₉Bakerubi bao ba lebana ka difahlego go putla sekhurumelo, mme diphego tša bona tša phurulogela godimo go pipetša sekhurumelo.

₁₀A dira tafola ka dikota tša mogohlo, ya ba ya botelele bja disentimetara tše 92, le bophara bja disentimetara tše 46, le bogodimo bja disentimetara tše 69. ₁₁A e manega ka gauta ye e sego ya tswakwa, mme a e direla morumo wa gauta go e dikologa. ₁₂A e direla lepanta la bophaphathi bja disentimetara tše 7,4 go e dikologa, mme a bea morumo wa gauta go dikologa lepanta leo. ₁₃A e direla mekgoko ye mene ya gauta ya go e rwala, mme a e kgokelela dikhutlong ka dine maotwaneng. ₁₄Mekgoko ya go swara mapara a go rwala tafola a e kgokelela kgauswi le lepanta. ₁₅A betla mapara ao ka dikota tša mogohlo, mme a a manega ka gauta. ₁₆A direla tafola dibjana ka gauta ye e sego ya tswakwa, e lego meruswi, megopo, diphafana le digo tša go tšhela dikabelo tša dino.

₁₇A dira sehlomamabone ka gauta ye e sego ya tswakwa. A dira bogato bja sona le thito ya sona ka gauta ye e rutšwego; matšoba a go se kgabiša, gotee le matšoba a a sego a khukhuša le matlakala a ona ya ba selo se tee le bogato le thito.

₁₈Makabe a a selelago a tšwa ka mathoko a thito, a mararo ka thoko e tee. ₁₉Lekabe le lengwe le le lengwe la ona ao a selelago la ba le matšoba a mararo a go le kgabiša a sebopego sa letšoba la moalmone, le matšoba a a sego a khukhuša, le matlakala a ona. ₂₀Thito ya sehlomamabone yona ya ba le matšoba a mane a go e kgabiša a sebopego sa letšoba la moalmone, le matšoba a a sego a khukhuša, le matlakala a ona. ₂₁Gwa ba le letšoba le le sego la khukhuša ka fase ga makabe a mangwe le a mangwe a mabedi. ₂₂Matšoba a a sego a khukhuša le makabe le sehlomamabone ya ba selo se tee sa gauta ye e rutšwego ye e sego ya tswakwa. ₂₃A dira mabone a a šupago a sehlomamabone, a dira le ditlao tša sona le dibjana tša sona tša magala ka gauta ye e sego ya tswakwa. ₂₄O dirišitše gauta ye e sego ya tswakwa ya boima bja dikilokramo tše masome a mararo go dira sehlomamabone le ditlabakelo tša sona ka moka.

₂₅A dira aletare ya go tšhumela seorelo ka dikota tša mogohlo. A e lekalekanya ka mathoko, ya ba ya botelele bja disentimetara tše 46, le bophara bja disentimetara tše 46, mme bogodimo ya ba disentimetara tše 92. Dinakana tša dikhutlo tša yona ya ba selo se tee le yona. ₂₆A manega bogodimo bja yona le mahlakore a yona ka mane le dinakana tša yona ka moka ka gauta ye e sego ya tswakwa, mme a e direla morumo wa gauta go e dikologa. ₂₇A e direla mekgoko ye mebedi ya go e rwala, a e kgokelela ka tlase ga morumo mahlakoreng ka mabedi gore go tsene mapara a go e rwala. ₂₈A betla mapara ao ka dikota tša mogohlo, mme le ona a a manega ka gauta.

₂₉A dira le makhura a makgethwa a tlotšo, le seorelo se se sego sa tswakwa sa go nkga bose, se se hlakantšwego go swana le senkgabose.

₁A dira aletare ya dihlabelo ka dikota tša mogohlo. Ya lekalekana ka thoko tšohle: ya ba ya botelele bja dimetara tše 2,3, bophara bja dimetara tše 2,3, bogodimo ya ba bja dimetara tše 1,4. ₂A dira dinakana dikhutlong ka dine mme ya ba selo se tee le aletare. Ka moka ga yona a e manega ka mphiri. ₃A dira ditlabakelo ka moka tša aletare – dibjana tša go olelela melora, digarafo, meruswi, diforoko tša mašimelo, le dibjana tša magala. Ditlabakelo tša yona tšohle a di dira ka mphiri. ₄A dira papetla ya mphiri mme a e bea ka fase ga morumo wa aletare gore e be gare ga bogodimo bja aletare. ₅A dira mekgoko ye mene ya go e kuka, mme a e khwamela dikhutlong ka dine tša papetla yeo. ₆A e betlela mapara a go e rwala ka dikota tša mogohlo, a a manega ka mphiri, ₇gomme a a tsenya ka mahlakoreng a mabedi a aletare. Aletare o e dirile ka diphaphathi gomme ya ba lehoa.

₈O ile a dira sebjana sa mphiri sa go hlapela gotee le bogato bja sona bja mphiri ka diipone tša basadi bao ba bego ba šoma mojakong wa Tente ya bodulo bja Morena.

₉A aga kgoro ya Tente ya bodulo bja Morena ka legora la diširo tša lešela le boletiana. Ka lehlakoreng la ka borwa diširo ya ba tša botelele bja dimetara tše 46, ₁₀mme tša lekeletšwa ka dikgwaetšo le mapheko a silibera dikoteng tša mphiri tše masome a mabedi tše di lego mabogatong a masome a mabedi a mphiri. ₁₁Kgoro ya ba ka wona mokgwa woo le ka lehlakoreng la ka leboa. ₁₂Ka lehlakoreng la ka bodikela gwa ba le diširo tša botelele bja dimetara tše 23, tša lekelela dikoteng tše lesome tše di tsemilwego mabogatong a lesome, le dikgwaetšo le mapheko a a dirilwego ka silibera. ₁₃Le ka bohlabela, ka moo go bego go le mojako, kgoro ya ba ya bophara bja dimetara tše 23. _14-15Ka thoko ye nngwe le ye nngwe ya mojako gwa ba le diširo tša dimetara tše 6,9 tše di lekelelago dikoteng tše tharo tše di tsemilwego mabogatong a mararo. ₁₆Diširo ka moka go dikologa kgoro tša dirwa ka lešela le boletiana. ₁₇Mabogato a dikota ona a dirwa ka mphiri, ge e le dikgwaetšo le mapheko le manego ya bogodimo bja dikota tšona tša dirwa ka silibera. Dikota ka moka tša kgoro go dikologa tša kopanywa ka mapheko a silibera. ₁₈Seširo sa mojako wa kgoro sa dirwa ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi la mologelelo wa mebala ya mekgabišo ya bokgwari. Ya ba sa botelele bja dimetara tše 9,2 le bogodimo bja dimetara tše 2,3, go no swana le diširo tša kgoro. ₁₉Seširo sa thekgwa ka dikota tše nne tše di tsemilwego mabogatong a mane a mphiri. Dikgwaetšo le manego ya bogodimo bja tšona le mapheko a tšona tša dirwa ka silibera. ₂₀Dibapola ka moka tša Tente le tša kgoro go dikologa tša dirwa ka mphiri.

₂₁Le ke lenaneo la bontši bja ditshipi tše di dirišitšwego Tenteng ya bodulo bja Morena, moo go bego go beilwe matlapa a mabedi ao go ona go bego go ngwadilwe Melao ye Lesome. Moshe o ntšhitše taelo ya gore go dirwe lenaneo le, mme lona la dirwa ke Balefi ba ba bego ba šoma ba laetšwe ke Ithamara, morwa wa Arone, moprista.

₂₂Betsaliele, morwa wa Uri, wa kgorwana ya Hure, wa kgoro ya Juda, o dirile tšohle tše Morena a di laetšego. ₂₃Mothuši wa gagwe, Oholiabe, morwa wa Ahisamake, wa kgoro ya Dane, e bile motloki le mmeakanyi le mologi wa lešela le boletiana, le wa wulu ya botala bja legodimo, le ya bohubedu bja moretele, le ya bohubedu bja madi.

₂₄Gauta ka moka ye e bego e abetšwe Morena ya Tente ye kgethwa e be e le ya boima bja dikilokramo tše 878 ye e etšwego go ya ka boima bja papetlana ya gauta ya ka Felo mo Gokgethwa. ₂₅Silibera ye e ntšhitšwego ke batho ba ba badilwego e be e le ya boima bja dikilokramo tše 3 020 ye e etšwego go ya ka boima bja papetlana ya silibera ya ka Felo mo Gokgethwa. ₂₆Tšhelete ye e be e lekana le ye e ntšhitšwego ke batho ka moka bao ba bego ba badilwe, yo mongwe le yo mongwe a ntšhitše tšhelete ya boima bja dikramo tše 6, ge e elwa go ya ka boima bja papetlana ya silibera ya ka Felo mo Gokgethwa. Banna bao ba bego ba badilwe, ba mengwaga ye masome a mabedi goba go feta moo, e be e le ba 603 550. ₂₇Ka silibera ya boima bja dikilokramo tše 3 000 go ile gwa bopša mabogato a lekgolo a Tente ye kgethwa le a seširo, dikilokramo tše 30 bogatong bjo bongwe le bjo bongwe. ₂₈Ka dikilokramo tše 20 tšeo di šalago tša silibera o ile a dira mapheko, le dikgwaetšo tša dikota, le manego ya bogodimo bja dikota tšeo. ₂₉Mphiri wo o bego o abetšwe Morena e ile ya ba wa dikilokramo tše 2 127. ₃₀Ka wona o ile a dira mabogato a mojako wa Tente ya bodulo bja Morena, le aletare ya mphiri le papetla ya yona ya mphiri, le ditlabakelo ka moka tša aletare, ₃₁le mabogato a kgoro go dikologa, le a mojako wa kgoro, le dibapola ka moka tša Tente ya bodulo bja Morena le tša kgoro go dikologa.