To The Word – Day 227

₁Ka ge bjale re lokafaditšwe ka tumelo, re boelantšwe le Modimo ke Jesu Kriste, Morena wa rena. ₂Ke yena a re filego mahlogonolo a Modimo ka tumelo ya rena ao bjale re phelago ka ona. Ke ka lebaka leo re ikgantšhago ka letago la gagwe le re le holofetšego. ₃E sego fao fela; re ikgantšha le ka mathata a rena, ka ge re tseba gore mathata a tliša kgotlelelo, ₄kgotlelelo e dira gore re kgahle Modimo, gomme go kgahla Modimo go re tlišetša kholofelo. ₅Kholofelo yeo ga e re swabiše, gobane lerato la Modimo le tšhetšwe ka dipelong tša rena ke Moya wo Mokgethwa wo re o filwego.

₆Gobane Kriste o re hwetše ka nako ye e swanelago, mola re sa kgone go iphološa, a hwela bohle. ₇Gape go hwela moloki ke taba ye e nyakago e sa direge; kganthe yo botho yena mohlomong motho a ka beta pelo a mo hwela. ₈Modimo yena o re bontšhitše lerato le a re ratago ka lona, e lego la mola Kriste a re hwela re sa le badiradibe. ₉Ka ge bjale re lokafaditšwe ka lehu la Kriste, re tloga re sa belaele gore re tla hlakodišwa kgalefong ya Modimo ka yena Kriste. ₁₀Ge mola re le manaba a Modimo re boelantšwe le yena ka lehu la Morwagwe, ge bjale re šetše re boelantšwe le yena, re tloga re sa belaele gore o tla re phološa ka gobane a phela. ₁₁Gomme ga se moo fela; re bile re thabela tše Modimo a di dirilego ka Jesu Kriste, Morena wa rena, yo bjale a re boelantšego le yena Modimo.

₁₂Bjalo ka ge sebe se tlile lefaseng ka motho o tee, mme lehu la tla ka sona sebe, lehu le napile le aparetše batho bohle, ka ge bohle ba dirile dibe. ₁₃Pele ga ge melao ya Moshe e etla sebe se be se šetše se le gona lefaseng, eupša ge go se na molao motho ga a balelwe dibe tša gagwe. ₁₄Le ge go le bjalo, batho bohle ba ba phetšego go tloga mehleng ya Adamo go fihla mehleng ya Moshe ba ile ba lebanwa ke go hwa, ešita le bao ba bego ba se ba ka ba dira sebe sa go swana le sa Adamo mola a tshela taelo ya Modimo.

Gape Adamo e be e le seswantšho sa yo a bego a tlilo tla. ₁₅Eupša mpho ya Modimo e ka se swane le sebe sa Adamo. Ka lebaka la sebe sa motho o tee yola go hwile batho ba bantši. Eupša kgaugelo ya Modimo ke ye kgolo le go feta, kganthe le yona mpho ya gagwe ye a e filego batho ba bantši ka kgaugelo ya motho o tee yoo, Jesu Kriste, ke ye kgolo kudu le go feta. ₁₆Le gona mpho ya Modimo le sebe sa motho o tee yola ga di swane. Gobane motho o tee yola o rile go dira sebe Modimo a mmona molato, gomme go bonwa molato moo ga gagwe gwa obela le batho bohle go bonwa molato. Eupša e rile ge sebe se dirwa ke batho ba bantši Modimo a ba gaugela ka mo go sa ba swanelego, a bega gore ga ba na molato. ₁₇Ka lebaka la sebe sa motho o tee yola batho ba ile ba lebanwa ke go hwa. Se se phethilwego ke motho o tee yo, Jesu Kriste, sona ke se segolo kudu go feta se se sentšwego ke motho o tee yola. Ke go re ba ba gaugelwago kudu ke Modimo, ba ba fiwago ke yena mpho ya go lokafatšwa, ba tla tia moyeng ka yena Jesu Kriste.

₁₈Ka lebaka leo, bjalo ka ge bosenyi bja motho o tee yola bo dirile gore batho bohle ba bewe molato, ka mokgwa wo mobjalo tiro ya go lokafatša ya motho o tee yo le yona e lokafaditše batho bohle, mme ya dira gore ba phelele sa ruri. ₁₉Bjalo ka ge ba bantši e ile ya ba badiradibe ka lebaka la go se kwe ga motho o tee yola, ka mokgwa wo mobjalo ba bantši ba tla lokafatšwa ka lebaka la go hwa ga motho o tee yo.

₂₀Molao o tlile ka morago gore o atiše diphošo, eupša mo go atilego sebe, kgaugelo ya Modimo yona e atile kudu le go feta, ₂₁gore bjalo ka ge sebe se ile sa dira gore batho ba lebanwe ke go hwa, bjale kgaugelo ya Modimo e dire gore batho ba lebanwe ke go lokafatšwa, ba tle ba phelele sa ruri ka Jesu Kriste, Morena wa rena.

₁Bjale ke ge re ka reng? Na re ka dio dula re phela sebeng gore kgaugelo ya Modimo e tle e ate? ₂Le gatee! Na bjale ge re se sa phelela sebe re ka no dula re le mo go sona? ₃Kgane ga le tsebe gore bjalo ka ge kolobetšo ya rena e re dirile ba tee le Kriste, ebile e re dirile ba tee le lona lehu la gagwe? ₄Mola re kolobetšwa e bile setšha re ehwa mme re bolokwa le yena, gore bjalo ka ge a ile a tsošwa bahung ka maatla a a makatšago a Tatagwe, le rena re tle re phele bophelo bjo bofsa.

₅Gobane ka ge re bile ba tee le yena ka go hwa lehu la go swana le la gagwe, re tla ba ba tee le yena le ka go tsoga tsogo ya go swana le ya gagwe. ₆Gape re a tseba gore bomotho bjola bja rena bja kgale bo bapotšwe le Kriste sefapanong sa gagwe, gore tlhago ya rena ya go dira sebe e fedišwe, gore re se sa laolwa ke sebe. ₇Gobane motho ge a hwile ga a sa laolwa ke sebe. ₈Ge eba re hwile le Kriste, re dumela gore le go phela re tla phela naye. ₉Gobane re a tseba gore Kriste o tsošitšwe bahung gomme a ka se sa hwa – lehu ga le sa mo laola. ₁₀Go hwa o hwile gatee ya ba moka mola a hwela dibe, gomme bjale o a phela, o phelela Modimo. ₁₁Ka yona tsela yeo le lena, mabapi le sebe le itsheme ba ba hwilego, eupša ba ba phelelago Modimo ka Kriste Jesu.

₁₂Le se sa lakwa ke sebe, lena ba mebele ye e bolago, mo le ka laolwago ke ditumo tša yona. ₁₃Le gona le se ke la gafela ditho tša lena sebe, ya ba tša go dira bokgopo. Le upše le ikgafele Modimo le le ba le tsošitšwego bahung la phela, gomme ditho tša lena le di gafele go dira boloki. ₁₄Le se ke la laolwa ke sebe; gobane ga le bušwe ke molao, eupša le bušwa ke kgaugelo ya Modimo.

₁₅Bjale? Na re swanetše go dira dibe ka ge re sa bušwe ke molao, eupša re re re bušwa ke kgaugelo ya Modimo? Le gatee! ₁₆Kgane ga le tsebe gore ge le ineela go direla motho le go mo theeletša, le ba bahlanka ba gagwe – e ka ba go ba bahlanka ba sebe, gona go išago lehung, goba go ba bahlanka ba go kwa Modimo, gona go išago go lokeng? ₁₇Fela a re lebogeng Modimo, ge lena le bego le le bahlanka ba sebe bjale le latela ka dipelo tša lena ka moka thuto ye le e rutilwego. ₁₈Le lokolotšwe sebeng la ba bahlanka ba boloki. ₁₉Ke bolela ka mokgwa wo o tlwaelegilego ka lebaka la go hlaelela ga kwešišo ya lena, ke re: Bjalo ka ge pele le be le ineetše la ba bahlanka ba bootswa le ba bokgopo mme la phela bjalo, ka tsela yeo bjale ineeleng le be bahlanka ba boloki mme le phele bophelo bjo bokgethwa.

₂₀Mola le sa le bahlanka ba sebe le be le sa bone le tlemegile go dira tše di nyakwago ke Modimo. ₂₁Go le thušitšeng go dira dilo tšeo bjale di le lešago dihlong? Etse pheletšo ya tšona ke lehu. ₂₂Gomme ge bjale le lokolotšwe sebeng, le le bahlanka ba Modimo le boelwa ke bophelo bjo bokgethwa, gomme pheletšo ya gona ke go phelela sa ruri. ₂₃Gobane moputso wa sebe ke lehu, eupša mpho ya kgaugelo ya Modimo yona ke go phelela sa ruri ka Kriste Jesu, Morena wa rena.

₁Banabešo, ke botšiša lena le tsebago molao, ke re na ga le tsebe gore molao o buša motho fela ge a sa phela? ₂Mohlala šo: Mosadi yo a nyetšwego o tlemagantšwe le monna wa gagwe ke molao ge monna wa gagwe a sa phela; eupša ge monna a ka hwa mosadi o tlemologa molaong wo o mo tlemagantšego le yena. ₃Ka gona, ge a ka ipha monna yo mongwe monna wa gagwe a sa phela, o tla bitšwa seotswa; eupša ge monna wa gagwe a hwile, gona o tlemologa molaong woo, gomme ge a ka nyalwa ke monna yo mongwe ga a otswe. ₄Le go lena, banabešo, go bjalo. Ge go iwa ka melao ya Moshe, le lena ke setšha le hwile, ka gobane le ditho tša mmele wa Kriste; gomme bjale le ba yo a tsošitšwego bahung gore re tle re enywe dienywa tše di kgahlago Modimo. ₅Gobane mola re sa laolwa ke ditumo tša nama, go duma sebe mo go lego mo go rena go be go hlohleletšwa ke melao ya Moshe, gomme go re iša lehung. ₆Eupša bjale re tlemolotšwe melaong ya Moshe, ka gobane ka thokong ya melao ye e bego e re tlemile yeo re hwile. Ga re sa hlankela Modimo ka mokgwa wola wa kgale wo re bego re o laetšwe ke melao ye e ngwadilwego, eupša re mo hlankela ka mokgwa wo mofsa wo re o laelwago ke Moya.

₇Bjale re ka reng? Na re ka re melao ya Moshe ka boyona ke sebe? Le gatee! Fela nna sebe nkabe ke sa se tsebe, ge e ka be e se ka lebaka la yona melao yeo. Ge molao wa Moshe o ka be o sa re: “O se ke wa duma sa motho,” nkabe ke sa tsebe gore tumo ke eng. ₈Eupša ka molao woo sebe se kgonne go hlohleletša ditumo tše di fapafapanego mo go nna. Ge molao o se gona, sebe se hwile. ₉Nna nkile ka phela go se na molao; eupša ya re ge molao o etla, sebe sa tsoga, ₁₀gomme nna ka hwa. Ya ba gore molao wo o beetšwego go mphediša, o a mpolaya. ₁₁Sebe sa ntsena ka molao wo, sa nthadia, sa mpolaya ka wona.

₁₂Bjale ge, melao ya Moshe ka boyona ke ye mekgethwa, le ditaelo tša yona ke tše kgethwa, di lokile, di botse. ₁₃Na e ka ba seo se ra gore nna ke bolailwe ke se sebotse? Le gatee! Ke bolailwe ke sebe; ka go šomiša selo se sebotse sebe se mpolaile gore bobe bja sona bo tle bo utologe. Ka lebaka leo, ka yona melao ye sebe se bontšhwa e le se sebe le go feta.

₁₄Melao ya Moshe re tseba ge e le ya moya, fela nna ke motho wa nama, ke rekišitšwe ka ba lekgoba la sebe. ₁₅Se ke se dirago ga ke se tsebe, gobane ga ke dire se ke se ratago, eupša ke dira se ke se hloilego. ₁₆Ka ge se ke se dirago e le se ke sa se ratego, seo se šupa gore ke dumela gore melao ya Moshe e lokile. ₁₇Ka gona ga se nna ke dirago se, eupša ke sebe se se dulago mo go nna. ₁₈Gobane ke a tseba gore mo go nna ga go dule se se lokilego – ke ra nameng ya ka. Ka gore le ge ke nyaka go dira tše di lokilego, ga ke kgone. ₁₉Ga ke dire tše di lokilego tše ke nyakago go di dira, eupša tše dimpe tše ke sa nyakego go di dira, ke a di dira. ₂₀Gomme ge ke dira tše ke sa di nyakego ga e sa le nna ke di dirago, eupša ke sebe se se agilego mo go nna.

₂₁Ke mo ke lemogago gore se se diregago mo go nna ke go re ge ke nyaka go dira se se lokilego, e ba fela se sebe se ke se kgonago. ₂₂Nnaena ka pelong ya ka ke thabela melao ya Modimo. ₂₃Eupša mo nameng ya ka ke hwetša molao o šele wo o lwantšhago molao wa pelo ya ka. O ntira sebofša sa molao wa sebe wo o šomago mo nameng ya ka. ₂₄Joo, nna motho wa madimabe! Ke tla hlakodišwa ke mang nameng ye ya go nkiša lehung? ₂₅Modimo ke yena a ntlhakodišago, gomme ke mo leboga ka Jesu Kriste, Morena wa rena!

Bjale ge, taba ya ka e ka mokgwa wo: melao ya Modimo ke e phetha ka pelo fela, eupša ka nama ya ka gona ke phetha molao wa sebe.

₁Ge go le bjalo, bao ba phelago ba le ba tee le Kriste Jesu ba ka se lahlwe. ₂Gobane molao wa Moya, Moya wo o re dirago gore re phele re le ba tee le Kriste Jesu, o ntokolotše molaong wa sebe le lehu. ₃Gobane se se bego se palela melao ya Moshe ka lebaka la ge e fokodišwa ke tlhago ya motho, Modimo yena o se kgonne. O ahloletše sebe se se lego tlhagong ya motho go lahlwa ka go roma Morwagwe lefaseng a na le tlhago ya go swana le ya motho ye e sekametšego sebeng, gore a fediše sona sebe. ₄Seo Modimo o se diretše gore rena re phelago go ya ka Moya, e sego go ya ka nama, re tle re phethe tše melao e di nyakago. ₅Gobane bao ba phelago go ya ka nama, ba lakwa ke tša nama. Bao ba phelago go ya ka Moya, ba lakwa ke Moya. ₆Gape go lakwa ke tša nama go iša motho lehung, kganthe go lakwa ke Moya gona go iša motho bophelong le boiketlong. ₇Ka gona, ge motho a lakwa ke tša nama e ba lenaba la Modimo, ka gobane ga a phethe melao ya Modimo, ebile a ka se kgone go e phetha. ₈Bao ba phethago tša nama ba ka se kgone go kgahla Modimo.

₉Eupša lena ga le phele go ya ka tša nama, le phela go ya ka mo le lakwago ke Moya, ge eba Moya wa Modimo o dula ka gare ga lena. Motho yo a se nago Moya wa Kriste ga se wa Kriste. ₁₀Eupša ge Kriste a le ka gare ga lena, le ge mmele wona o tla hwa ka lebaka la sebe, Moya wona o a le phediša, ka ge le lokafaditšwe ke Modimo. ₁₁Gomme ge Moya wa Modimo yo a tsošitšego Jesu bahung o phela ka gare ga lena, gona Modimo yo a tsošitšego Kriste bahung, le mebele ya lena ye e hwago o tla e phediša ka Moya wa gagwe wo o phelago ka gare ga lena.

₁₂Ka gona, banabešo, re na le se se re tlemago, fela ga se go phela ka mo re lakwago ke tša nama. ₁₃Gobane ge le phela ka go lakwa ke tša nama, le tla hwa; eupša ge le thušwa ke Moya go lahla mediro ya lena ye mebe, gona le tla phela. ₁₄Bao ba hlahlwago ke Moya wa Modimo ke bona bana ba gagwe. ₁₅Gape Moya wo Modimo a le filego wona ga o le dire makgoba ebile ga o le dire gore le boife bjalo ka pele; eupša o le dira bana ba Modimo, o le dira gore le bitše Modimo le re: “Aba! Tate!” ₁₆Moya wa Modimo o ikopanya le meoya ya rena mme ya hlatsela gore re bana ba Modimo. ₁₇Gomme bjale ge re le bana ba gagwe, gona re bajalefa, bajalefa ba Modimo, ba go ja lefa le Kriste, gobane ka ge re tla be re hlokofaditšwe bjalo ka yena, le letago re tla le fiwa bjalo ka yena.

₁₈Nna ke bona gore tše re tlaišwago ka tšona mehleng yeno di ka se bapetšwe le letago le Modimo a tlago re utollela lona. ₁₉Tlholo ka moka e fišegela go tlo utollelwa ba e lego bana ba Modimo. ₂₀Gobane Modimo o beakantše gore tlholo yohle e se be ye e dulelago sa ruri. Ga se tlholo ye e ratilego gore go be bjalo, eupša ke Modimo yo a beakantšego ka mokgwa woo. Fela yena o e holofeditše ₂₁gore tšatši le lengwe e tla lokollwa dinaleng tša lehu, ya abelwa tokologo ya letago la bana ba Modimo. ₂₂Etse re a tseba gore le gonabjale tlholo ka moka e sa tsetla go etša mosadi ge a swerwe ke lešoko la pelego. ₂₃Eupša ga se yona fela e tsetlago; le rena beng re lego dithakangwaga tša Moya re llela teng, re ntše re letetše Modimo gore a tle a re dire bana ba gagwe, a re lokolle. ₂₄Gobane re phološitšwe ka ge re be re holofetše; fela ge se re bego re se holofetše re se bona, ga e sa le kholofelo, gobane ga go motho yo a ka holofelago se a se bonago. ₂₅Eupša ka ge se re se holofelago e le se re sa se bonego re se letela re sa fele pelo.

₂₆Godimo ga moo re thušwa le ke Moya, ka ge re fokola gakaaka. Gape rena ga re tsebe gore ge re rapela re kgopele eng, le gona bjang, eupša Moya ke wona o re bolelelago le Modimo ka mefegelo ye e sa laodišegego. ₂₇Gomme Modimo yo a lekolago dipelo tša batho o tseba se Moya o se nyakago; gobane Moya o kgopelela badumedi tše Modimo a di nyakago.

₂₈Gape re tseba ge go ba ba ratago Modimo dilo ka moka di šomela go ba hola, bona bao a ba biditšego go ya ka mo a bego a ikemišeditše ka gona. ₂₉Etse bao a ilego a ba kgetha o ile a ba rerela gore ba tle ba swane le Morwagwe, gore yo Morwagwe a tle a be le banababo ba bantši, mme yena e be mogolo wa bona. ₃₀Bao Modimo a ba reretšego go swana le Morwagwe, o ba biditše; bao a ba biditšego o ba lokafaditše, gomme bao a ba lokafaditšego o ba dirile gore ba be le letago.

₃₁Ge ditaba di le ka mokgwa wo na re ka reng? Kgane ge Modimo a na le rena ke mang yo a ka emeletšanago le rena? ₃₂Modimo ga se a babalela Morwagwe, eupša o ile a re gafela yena go re phološa bohle. Bjale a ka napa a se re fe tše dingwe tšohle? ₃₃Na bao ba kgethilwego ke Modimo, o gona yo a ka ba beago molato? Etse Modimo yena ga a ba bone molato! ₃₄Bjale ke mang yo a ka ba bonago molato? Gape Kriste Jesu o hwile a ba a tsošwa, a yo dula madulong a bogoši kgauswi le Modimo, gomme o re rapelela go yena. ₃₅Bjale ke mang yo a ka kgonago go re aroganya le Kriste yo a re ratago yo? Kgane tlalelo e ka kgona, goba mathata, goba tlaišo, goba tlala, goba mohlako, goba kotsi, goba lehu? ₃₆Ga ke re go ngwadilwe ka Mangwalong a Makgethwa gwa thwe:

₃₇Aowa, dilong tšeo ka moka re šetše re fentše ka botlalo ka yo a re ratilego. ₃₈Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ₃₉ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena.

₁Morena o re:

₈Morena o re:

₈Morena o re: