Ditaba tše dibotse tša tokologo
1Moya wa Morena,
Mong wa bohle,
o na le nna.
Yena o mpeile gore ke yo begela
baikokobetši ditaba tše dibotse,
ke bee ba ba nyamilego pelo,
ke begele dibofša khunologo,
le ba ba lego kgolegong tokologo.
2O nthomile go bega
gore nako e fihlile
ya gore Morena a phološe setšhaba sa gagwe
mme a se lefeletše manabeng a sona.
O nthomile go homotša bohle ba ba iletšego,
3le go išetša ba ba llago kwa Sione lethabo.
Ba ka se sa itšhela dihlogo ka mobu,
goba ba apara diaparo tša go ilela,
eupša ba tla apara tša botšhepi,
mme ba tlola ka dinkgabose.
Ba tla opela ditumišo bakeng sa go nyama.
Ba tla swana le mehlare ye Morena a e bjetšego ka boyena.
Ba tla dira tše di lokilego,
mme ba reta Modimo ka lebaka la tše a di dirilego.
4Ba tla tsošološa meago yela e phušotšwego mehleng ya pele.
5Lena setšhaba sa ka, bašele ba tla le dišetša mehlape,
ba le lemela mašemo,
ba le hlokomelela le dirapa tša merara.
6Le tla tsebja le le baprista ba Morena,
bahlanka ba Modimo wa rena.
Le tla ipshina ka mahumo a ditšhaba,
gomme la ikgantšha ka ona.
7Bakeng sa go lewa ke dihlong le tla hlomphega kudu,
mme bakeng sa go goboga la duduetša,
ka ge Morena a le šegofaditše.
Le tla dula nageng ya lena,
gomme moo thoto tša lena tša oketšega gabedi;
lethabo la lena e tla ba la go ya go ile.
8Morena o re:
“Ke rata toka mme ke hloile bohlakodi le bokgopo.
Ke tla botegela go putsa setšhaba sa ka,
gomme ka dira kgwerano ya go sa felego le sona.
9Ditlogolo tša bona di tla tuma gare ga ditšhaba;
mang le mang yo a di bonago o tla dumela gore ke tšona setšhaba se ke se šegofaditšego.”
10Re thabetše kudu tše Morena a di dirilego.
Re swana le monyadi ge a apara diaparo tša botšhepi,
goba monyadiwa ge a apara dipheta tša gagwe.
Modimo o re apešitše phologo le tlhakodišo.
11Ruri, bjalo ka ge lešoka le hlogiša dimela,
bjalo ka ge peu e mela mme e gola, le serapa se mediša peu,
Morena, Mong wa bohle,
o tla re phološa gomme ditšhaba tšohle di tla mo tumiša.
