To The Word – Day 213

₁Ka bona sebata sa manaka a lesome le dihlogo tše di šupago se etšwa ka lewatleng. Mo lenakeng le lengwe le le lengwe se be se na le mphapahlago, gomme hlogong ye nngwe le ye nngwe se na le leina la Modimo, e le gona go mo nyefola. ₂Se be se swana le lepogo, marofa a sona nke ke a bere, molomo wona o swana le wa tau. Mmamogašwa wa abela sebata seo maatla a wona a bogoši le pušo ya wona ye kgolo. ₃Sebata seo se be se bonala nke se gobaditšwe wa go hwa mo hlogong ye nngwe ya sona, eupša ntho ya gona e be e fodile. Batho bohle mo lefaseng ba be ba tlabilwe ke sebata se mme ba se šetše morago. ₄Ba be ba khunamela mmamogašwa woo ka ge o be o abetše sebata seo maatla. Sebata seo le sona ba se khunamela ba re: “Ke mang yo a swanago le sebata se? Yo a kago lwa naso yena ke mang?”

₅Sebata seo se ile sa dumelelwa go bolela ka matepe le bonyefodi, sa dumelelwa le go buša dikgwedi tše masome a mane le tše pedi. ₆Sa thoma go nyefola Modimo le leina la gagwe le bodulo bja gagwe, le ba ba dulago legodimong. ₇Sa ba sa dumelelwa go lwa le badumedi le go ba fenya, sa fiwa maatla a go buša dikgoro tšohle, le ditšhaba tšohle, le maleme ohle, le merafe yohle. ₈Bohle ba ba phelago mo lefaseng ba tla se khunamela, ge e se bao maina a bona a ngwadilwego pele lefase le hlolwa ka pukung ya ba ba phelago ya Kwana yela ya go ka ya bolawa.

₉Yo a nago le tsebe a a theeletše.

Tše ke ditaba tše di nyakago gore badumedi ba be le kgotlelelo le tumelo.

₁₁Ka bona se sengwe sebata se rotoga se etšwa lefaseng, se na le manaka a mabedi a go swana le a kgapana, gomme se bolela bjalo ka mmamogašwa. ₁₂Sa šomiša maatla ohle a sebata sela sa pele ka taelo ya sona. Sa gapeletša batho ba lefase le tšohle tše di lego lefaseng go khunamela sebata sela sa mathomo sa go ba le ntho ye e fodilego. ₁₃Sebata se sa bobedi se be se dira mehlolo ye megolo; sa theoša mollo wa go tšwa legodimong, sa o neša lefaseng batho ba lebeletše. ₁₄Sa hlalefetša badudi ba lefaseng ka mehlolo ye se bego se dumeletšwe go e dira ka taelo ya sebata sela sa mathomo. Sa ba botša gore ba bope seswantšho sa sebata sela sa go gobatšwa ka tšhoša fela sa no phela. ₁₅Sa dumelelwa go phediša seswantšho seo sa go bopša sa sebata sela sa mathomo, mme seswantšho seo sa kgona go bolela le go bolaya ba ba ganago go se khunamela. ₁₆Sa gapeletša batho ka moka, ba bagolo le ba banyane, bahumi le badiidi, balokologi le makgoba, gore ba swaiwe ka seatleng sa go ja goba phatleng, ₁₇le gore go se be le yo a kago reka goba a rekiša selo a se a swaiwa leina goba nomoro ye e emetšego leina la sona.

₁₈Gore o tle o kwešiše taba ye go nyakega bohlale. Yo a hlalefilego a ka kgona go hlatholla nomoro ya sebata seo, gobane nomoro e emela leina la motho. Nomoro ya sona ke makgolo a a selelago le masome a a selelago le metšo ye e selelago.

₁Ge ke lebelela ka bona Kwana e eme godimo ga thaba ya Sione. E be e na le batho ba dikete tše lekgolo le tše masome a mane le tše nne ba ba ngwadilwego leina la yona le la Tatago yona diphatleng tša bona. ₂Ka kwa modumo o etšwa legodimong o swana le wa meetse a mantši, o etša wa tladi. O kwagala nke ke sefela se se letšwago ke baletši ka dikgapa. ₃Batho bao ba be ba opela sefela se sefsa pele ga setulo sa bogoši, le pele ga diphedi tšela tše nne, le pele ga bagolo bale ba masome a mabedi le ba bane. Sefela seo se be se kgonwa fela ke bona bao ba dikete tše lekgolo le tše masome a mane le tše nne ba ba bego ba rekolotšwe gare ga batho ba lefase. ₄Ke ba ba se ba kago ba itšhilafatša ka go robala le basadi; ba hlwekile. Ba latela Kwana gohle mo e yago gona. Ba rekolotšwe gare ga batho ba lefase, gomme ya ba bona ba mathomo ba go neelwa Modimo le Kwana. ₅Ga se ba ka ba bolela maaka; ga ba na bosodi.

₆Ka bona morongwa yo mongwe a fofa kua godimo moyeng, a ilo phatlalatša Taba ye Botse go badudi ba lefase: go merafe yohle, le dikgoro tšohle, le maleme ohle, le ditšhaba tšohle. ₇A goelela a re: “Boifang Modimo le mo reteng! Gobane nako ya gore a ahlole batho e fihlile. Mo khunameleng, yena yo a hlodilego legodimo le lefase le lewatle le methopo ya meetse!”

₈Morongwa wa bobedi a latela yola wa pele a re: “Owaa, o wele! O wele motsesaratlatla wa Babilone! Etse o be o tšhilafatša ditšhaba tšohle ka mediro ya wona ya bohlola. E be nke ke beine ye bogale ye o di nwešago yona.”

₉Morongwa wa boraro a latela bale ba babedi ba pele, a goelela a re: “Yo a khunamelago sebata se le seswantšhobopša sa sona a ba a swaiwa phatleng goba seatleng ₁₀o tla nwa beine ye e sego ya talošwa ye e lego kotlo ya Modimo, ye a e tšhetšego ka senwelong se e lego kgalefo ya gagwe. O tla hlokofatšwa ka mollo le tshebela pele ga barongwa ba bakgethwa le yona Kwana. ₁₁Muši wa mollo wo ba hlokofatšwago ka wona o tla kuelela go ya go ile. Bao ba khunamelago sebata seo le seswantšhobopša sa sona, bao ba swailwego leina la sona, ga ba ehuge bošego goba mosegare.”

₁₂Seo se ra gore badumedi, bona ba ba phethago melao ya Modimo mme ba botegelago Jesu, ba swanetše go ba le kgotlelelo.

₁₃Ke ge ke ekwa lentšu le etšwa legodimong le re: “Ngwala o re: Ba lehlogonolo ke bao go tloga bjale ba tlago hwa e le ba Morena!”

Moya wa fetola wa re: “Ee. Ba tla ikhutša mekatano ya bona, gobane tše ba di dirilego di sepela nabo.”

₁₄Ge ke lebelela ka bona leru le lešweu leo godimo ga lona go bego go dutše selo se nkego ke motho a rwele mphapahlogo wa gauta, a swere sekele ye bogale ka seatla. ₁₅Ke moka gwa tšwa morongwa yo mongwe ka tempeleng a goelela yola a dutšego lerung a re: “Tšea sekele ya gago o bune, gobane nako ya go buna e fihlile; bjale mabele lefaseng a budule.” ₁₆Ke ge yola wa go dula godimo ga leru a tšea sekele ya gagwe, a buna mabele a lefase.

₁₇Ka bona yo mongwe morongwa a etšwa ka tempeleng ya legodimong, le yena a swere sekele ye bogale.

₁₈Yo mongwe morongwa a tšwa aletareng, yena e le yo a hlokometšego mollo. A goelela morongwa yola wa go swara sekele ye bogale a re: “Tšea sekele ya gago ye bogale o kgothe dintšhuhla tša diterebe tša lefaseng, gobane di budule!” ₁₉Morongwa yola a tšea sekele ya gagwe, a kgotha diterebe tša lefaseng, a di lahlela ka bopitlelong bja diterebe bja kgalefo ye kgolo ya Modimo. ₂₀Diterebe tšela tša pitlwa ka maoto ka bopitlelong bja diterebe ka ntle ga motse, gomme ka moo bopitlelong gwa tšwa madi, a ela monabo wo e ka bago dikilometara tše makgolo a mararo le metara o tee le seripa go iša fase.

₁Ka buša ka bona semaka se sengwe leratadimeng, se segolo sa go tlaba. E be e le barongwa ba ba šupago ba swere dikotlo tše di šupago, e lego tšona tša mafelelo, ka gobane ke tšona mafelelo a bogale bja Modimo.

₂Ka ba ka bona selo se se swanago le lewatle le nkego ke galase, le le hlakahlakanego le mollo. Ka bona le bale ba bego ba ile ba fenya sebata sela le seswantšhobopša sa sona le yola leina la gagwe le emetšwego ke nomoro. Bona ba be ba eme kgauswi le lewatle leo la go swana le galase ba swere dikgapa tše ba bego ba di filwe ke Modimo, ₃ba opela kopelo ya Moshe, mohlanka wa Modimo, le ya Kwana ba re:

₅Ka morago ga moo ka bona tempele legodimong e bulegile e na le Tente ya Kgwerano ka gare. ₆Ka moo tempeleng gwa tšwa barongwa ba ba šupago ba swere dikotlo tše di šupago, ba apere diaparo tše di hlwekilego tša mabaibai, ba ipofile dikgara ka mapanta a gauta. ₇Se sengwe sa diphedi tšela tše nne sa fa barongwa bale ba šupago meruswana ye e šupago ya gauta e tletše bogale bja Modimo yo a phelago go ya go ile. ₈Tempele ya tlala muši wa go tšwa letagong la Modimo le maatleng a gagwe, gomme gwa se be le yo a kgonago go tsena ka tempeleng go ba go fihlela dikotlo tšela tša go tlišwa ke barongwa bale ba go šupa di fela.

₁Ka kwa lentšu le goelela le etšwa ka tempeleng le botša barongwa bale ba go šupa le re: “Sepelang le yo tšholla meruswana yeo ya go šupa ya kgalefo ya Modimo lefaseng!”

₂Morongwa wa mathomo a ya a tšholla moruswana wa gagwe lefaseng. Bao ba bego ba swailwe leswao la sebata sela, bona bao ba bego ba khunamela seswantšhobopša sa sona, ba tšwa dišo tša go šiiša tše bohloko.

₃Morongwa wa bobedi a tšholla moruswana wa gagwe godimo ga lewatle. Meetse a gona a ba bjalo ka madi a motho yo a hwilego, gomme sephedi se sengwe le se sengwe ka moo lewatleng sa hwa.

₄Morongwa wa boraro a tšholla moruswana wa gagwe godimo ga dinoka le methopo ya meetse, gomme tša fetoga madi. ₅Ka kwa morongwa yo a hlokometšego meetse a re:

₈Morongwa wa bone a tšholla moruswana wa gagwe godimo ga letšatši, gomme lona la dumelelwa go tšhuma batho ka mollo wa lona. ₉Ba tšhungwa ke phišo ye kgolo ya lona, gomme ba nyefola Modimo yo a laolago dikotlo tše. Fela ba se sokologe gore ba rete Modimo.

₁₀Morongwa wa bohlano a tšholla moruswana wa gagwe godimo ga setulo sa bogoši sa sebata sela. Mmušo wa sona wa welwa ke leswiswi, batho ba itoma maleme ka lebaka la bohloko bjo ba bo kwago, ₁₁ba ba ba nyefola Modimo wa legodimong ba mo solela bohloko bjoo bja bona le dišo. Fela bona ba se itsholele ditiro tša bona.

₁₂Morongwa wa boselela a tšholla moruswana wa gagwe godimo ga noka ye kgolo ya Yufratese. Noka yeo ya pšha, mme ya ba ge dikgoši tša go tšwa bohlabela di namile di bulegetšwe ke tsela. ₁₃Ke ge ke bona meoya ye mebe ye meraro ya go swana le digwagwa. E be e etšwa ka molomong wa mmamogašwa, le ka go wa sebata sela, le ka go wa moprofeta wa maaka. ₁₄Ke yona meoya ya bademone ye e dirago mehlolo, ye e yago go dikgoši tšohle tša lefase, e di rape go ya ntweng ka Letšatšilegolo la Modimo Ramaatlaohle.

₁₅“Tsebang, ke tla bjalo ka lehodu. Go lehlogonolo yo a dulago a phafogile, a apere diaparo tša gagwe gore a se tlo sepela a le fela mme a bonelwa ke batho.”

₁₆Meoya yela ya kgoboketša dikgoši tšela felo mo ka Seheberu go bitšwago Harmagedone.

₁₇Morongwa wa bošupa a tšholla wa gagwe moruswana lefaufaung. Gwa kwagala lentšu le legolo le etšwa setulong sa bogoši ka tempeleng le re: “Go phethegile!” ₁₈Gwa ba le magadima le mekidimetšo le dituduma, le tšhikinyego ye e šiišago ya lefase. E sa le go tloga mola batho ba phelago mo lefaseng ga se gwa ka gwa ba le tšhikinyego ye kaaka ya lefase. ₁₉Motsemogolo wa kgaoga wa tšwa dikarolo tše tharo, metse ya ditšhaba yona ya pšhatlagana. Modimo a gopola Babilone, motsemogolo, gomme a o noša senwelo sa gagwe seo se swerego beine ye e lego kgalefo ya gagwe. ₂₀Dihlakahlaka tšohle tša timelela, dithaba ka moka tša lewa ke bjelele. ₂₁Sefako se sekoto sa go imela dikilokramo tše masome a mahlano ka se tee sa rothotha batho se ewa godimo, mme bona ba nyefola Modimo ka lebaka la kotlo yeo ya sefako, gobane e be e le ya masetlapelo.

₁Yo mongwe wa barongwa bale ba go šupa ba go swara meruswana ye e šupago a tla go nna, a fihla a re: “Etla ke go bontšhe gore segwebakathobalo se segolo se se dutšego kgauswi le meetse a mantši se tlilo otlwa bjang. ₂Magoši a lefase a be a dira tša bohlola le yena, le badudi ba lefase ba be ba tagwa ke beine ya bohlola bja gagwe.”

₃Ka re ke sa tsenwe ke Moya morongwa yoo a nkuka a nkiša lešokeng. Fao ka bona mosadi a nametše sebata se sekhunong se se ngwadilwego maina a Modimo mo gohle e le gona go mo nyefola. Sebata seo se be se na le dihlogo tše di šupago le manaka a lesome. ₄Mosadi wa gona o be a apere diaparo tša bohwibidu bja moretele le tša bohwibidu bja go topela, a kgabile ka dikgabišo tša gauta le magakabje le diperela. Ka seatleng o be a swere senwelo sa gauta se se tletšego tša go šišimiša le ditšhila tša bohlola bja gagwe. ₅Mo phatleng o be a ngwadilwe leina le le sa hlalošegego. Leina leo ke “Babilone, motsemogolo, mmagodigwebakathobalo le bohlola bja lefase.” ₆Ka bona mosadi yoo a tagilwe ke madi a badumedi le a bao ba bolaetšwego go dumela go Jesu.

Ge ke mmona ka tlabega kudu. ₇Morongwa a mpotšiša a re: “O tlabilwe ke eng? Ke tla go hlalošetša se mosadi yo le sebata se a se nametšego sa dihlogo tše di šupago le manaka a lesome se se šupago. ₈Sebata seo o se bonego se kile sa ba gona, fela bjale ga se sa le gona; eupša se tlilo tšwa ka moleteng woo wa go iša fasefase sa ya go fedišwa. Badudi ba lefase bao maina a bona a se a kago a ngwalwa ka pukung ya ba ba phelago go tloga mola lefase la hlolwago, ba tla tlabega ge ba bona sebata se. Se kile sa ba gona, fela bjale ga se sa le gona, eupša se sa tlilo tšwelela gape.

₉“Taba ye e nyaka dikgopolo tše bohlale. Dihlogo tšeo tša go šupa ke dithaba tše di šupago tše mosadi yoo a dulago godimo ga tšona. Ebile ke magoši a a šupago, ₁₀ao, a mahlano a ona a šetšego a wele. O tee o sa buša, gomme yo mongwe ga sešo a tla. Mohla a etla o tla buša sebakanyana fela. ₁₁Sebata se se kilego sa ba gona, seo bjale se se sa lego gona, ke kgoši ya seswai ye e balwago le tše dingwe tše di šupago, gomme e ya go fedišwa.

₁₂“Manaka ale a lesome o a bonego a emetše dikgoši tše lesome tše di sešogo tša thoma go buša, eupša di tlago fiwa maatla a go buša le sebata seo nako ya iri e tee fela. ₁₃Dikgoši tše tše lesome di na le maikemišetšo a go swana, gomme di fa sebata se maatla a tšona a go buša. ₁₄Di tla lwa le Kwana, fela Kwana e tla di fenya le balatedi ba ba biditšwego ba ba kgethilwego gape ba ba botegago, ka gobane ke yona Morena wa marena, le Kgoši ya dikgoši.”

₁₅Morongwa yoo o ile a ba a re go nna: “Meetse ale o a bonego, ale segwebakathobalo se bego se dutše kgauswi le ona, ke ditšhaba, le makoko a batho, le merafe le maleme. ₁₆Manaka ale a lesome o a bonego gotee le sebata di tla hloya segwebakathobalo; di tla mo amoga tšohle tše a nago le tšona tša mo tlogela a hlobotše; di tla mo ja dinama tša mo fediša ka mollo. ₁₇Tšeo di tla di dira ka ge Modimo a di dirile gore di ikemišetše go phetha thato ya gagwe. Ka gona di tla kwana go fa sebata seo maatla a tšona a bogoši go fihlela tše di boletšwego ke Modimo di phethagala.

₁₈“Mosadi yoo o mmonego o emetše motsemogolo wo o bušago magoši a lefase.”

₁Ka morago ga moo ka bona morongwa yo mongwe a theoga legodimong. O be a na le maatla a magolo, gomme letago la gagwe le bonega lefaseng ka moka. ₂A goelela kudu a re:

₄Ka kwa lentšu le lengwe la go tšwa legodimong le re:

₉Dikgoši tša lefase tše di bego di dira nayo bohlola le bofebe di tla e llela di golola ge di bona mokuelelo wa muši wa go tšwa mollong wo o e tšhumago. ₁₀Di tla emela kgole ka ge di boifa go otlwa le yona, gomme di tla re:

₁₁Babapatši ba lefase le bona ba o llela ba golola, ka gobane ga go sa na motho yo a ba rekelago; ₁₂dithoto tša bona ga di sa rekwa, e lego gauta le silibera le magakabje le diperela; le mašela a masethesethe, le a bohwibidu bja moretele, le a silika, le a bohwibidu bja go topela; le dikota tše bohlokwa tša mehutahuta, le dilwana tša mehutahuta tša go dirwa ka nakatlou, le tša kota ya theko ye kgolo, le tša mphiri, le tša tshipi, le tša mmabola; ₁₃le sinamone, le dinoko, le diorelo, le mira, le ditlolo, le beine, le makhura a mohlware, le bupi bja mathume, le mabele, le dikgomo, le dinku, le dipere, le dikoloi, le makgoba, ešita le batho. ₁₄Babapatši bao ba re go wona:

₁₅Babapatši ba dilo tšeo ba go ikhumiša ka go bapatša motseng woo ba tla emela kgole ka ge ba boifa go otlwa le wona. Ba tla lla ba golola ba re:

Balaolamaselawatle le banamedi bohle le basepetšamaselawatle le bohle ba ba iphedišago ka go šoma ka lewatleng ba emela kgole, ₁₈ba goelela ge ba bona mokuelelo wa muši wo o tšwago mollong wo o tšhumago motse woo ba re: “Ke ofe motse wo o kilego wa swana le motsemogolo wo?” ₁₉Ba itšhela ka marole dihlogong, ba lla ba golola ba re:

₂₁Morongwa yo mongwe wa senatla a kuka leswika la go lekana le lwala le legolo, a le lahlela ka lewatle a re: