KUTOLLO 14

₁Ge ke lebelela ka bona Kwana e eme godimo ga thaba ya Sione. E be e na le batho ba dikete tše lekgolo le tše masome a mane le tše nne ba ba ngwadilwego leina la yona le la Tatago yona diphatleng tša bona. ₂Ka kwa modumo o etšwa legodimong o swana le wa meetse a mantši, o etša wa tladi. O kwagala nke ke sefela se se letšwago ke baletši ka dikgapa. ₃Batho bao ba be ba opela sefela se sefsa pele ga setulo sa bogoši, le pele ga diphedi tšela tše nne, le pele ga bagolo bale ba masome a mabedi le ba bane. Sefela seo se be se kgonwa fela ke bona bao ba dikete tše lekgolo le tše masome a mane le tše nne ba ba bego ba rekolotšwe gare ga batho ba lefase. ₄Ke ba ba se ba kago ba itšhilafatša ka go robala le basadi; ba hlwekile. Ba latela Kwana gohle mo e yago gona. Ba rekolotšwe gare ga batho ba lefase, gomme ya ba bona ba mathomo ba go neelwa Modimo le Kwana. ₅Ga se ba ka ba bolela maaka; ga ba na bosodi.

₆Ka bona morongwa yo mongwe a fofa kua godimo moyeng, a ilo phatlalatša Taba ye Botse go badudi ba lefase: go merafe yohle, le dikgoro tšohle, le maleme ohle, le ditšhaba tšohle. ₇A goelela a re: “Boifang Modimo le mo reteng! Gobane nako ya gore a ahlole batho e fihlile. Mo khunameleng, yena yo a hlodilego legodimo le lefase le lewatle le methopo ya meetse!”

₈Morongwa wa bobedi a latela yola wa pele a re: “Owaa, o wele! O wele motsesaratlatla wa Babilone! Etse o be o tšhilafatša ditšhaba tšohle ka mediro ya wona ya bohlola. E be nke ke beine ye bogale ye o di nwešago yona.”

₉Morongwa wa boraro a latela bale ba babedi ba pele, a goelela a re: “Yo a khunamelago sebata se le seswantšhobopša sa sona a ba a swaiwa phatleng goba seatleng ₁₀o tla nwa beine ye e sego ya talošwa ye e lego kotlo ya Modimo, ye a e tšhetšego ka senwelong se e lego kgalefo ya gagwe. O tla hlokofatšwa ka mollo le tshebela pele ga barongwa ba bakgethwa le yona Kwana. ₁₁Muši wa mollo wo ba hlokofatšwago ka wona o tla kuelela go ya go ile. Bao ba khunamelago sebata seo le seswantšhobopša sa sona, bao ba swailwego leina la sona, ga ba ehuge bošego goba mosegare.”

₁₂Seo se ra gore badumedi, bona ba ba phethago melao ya Modimo mme ba botegelago Jesu, ba swanetše go ba le kgotlelelo.

₁₃Ke ge ke ekwa lentšu le etšwa legodimong le re: “Ngwala o re: Ba lehlogonolo ke bao go tloga bjale ba tlago hwa e le ba Morena!”

Moya wa fetola wa re: “Ee. Ba tla ikhutša mekatano ya bona, gobane tše ba di dirilego di sepela nabo.”

₁₄Ge ke lebelela ka bona leru le lešweu leo godimo ga lona go bego go dutše selo se nkego ke motho a rwele mphapahlogo wa gauta, a swere sekele ye bogale ka seatla. ₁₅Ke moka gwa tšwa morongwa yo mongwe ka tempeleng a goelela yola a dutšego lerung a re: “Tšea sekele ya gago o bune, gobane nako ya go buna e fihlile; bjale mabele lefaseng a budule.” ₁₆Ke ge yola wa go dula godimo ga leru a tšea sekele ya gagwe, a buna mabele a lefase.

₁₇Ka bona yo mongwe morongwa a etšwa ka tempeleng ya legodimong, le yena a swere sekele ye bogale.

₁₈Yo mongwe morongwa a tšwa aletareng, yena e le yo a hlokometšego mollo. A goelela morongwa yola wa go swara sekele ye bogale a re: “Tšea sekele ya gago ye bogale o kgothe dintšhuhla tša diterebe tša lefaseng, gobane di budule!” ₁₉Morongwa yola a tšea sekele ya gagwe, a kgotha diterebe tša lefaseng, a di lahlela ka bopitlelong bja diterebe bja kgalefo ye kgolo ya Modimo. ₂₀Diterebe tšela tša pitlwa ka maoto ka bopitlelong bja diterebe ka ntle ga motse, gomme ka moo bopitlelong gwa tšwa madi, a ela monabo wo e ka bago dikilometara tše makgolo a mararo le metara o tee le seripa go iša fase.