To The Word – Day 212

₁Ka morago ga moo ka bona barongwa ba bane ba eme dikhutlong tše nne tša lefase, ba swere diphefo tše nne tša lona gore go se be le phefo ye e fokago lefaseng goba lewatleng goba sehlareng. ₂Ka bona morongwa yo mongwe a rotoga a etšwa bohlabatšatši, a swere seswai sa Modimo yo a phelago. A goelela barongwa bale ba bane ba ba bego ba filwe maatla a go senya lefase le lewatle ₃a re: “Le se senye lefase goba lewatle goba dihlare; a re thomeng ka go swaya bahlanka ba Modimo wa rena diphatleng.” ₄Ka kwa gore palo ya bao ba swailwego ke ba dikete tše lekgolo le tše masome a mane le tše nne. E be e le ba dikgoro ka moka tša setšhaba sa Israele. ₅Ba kgoro ya Juda gwa swaiwa ba dikete tše lesome le tše pedi, ba kgoro ya Rubene gwa swaiwa ba dikete tše lesome le tše pedi; ba kgoro ya Gade gwa swaiwa ba dikete tše lesome le tše pedi; ₆ba kgoro ya Asere gwa swaiwa ba dikete tše lesome le tše pedi; ba kgoro ya Naftali gwa swaiwa ba dikete tše lesome le tše pedi; ba kgoro ya Manase gwa swaiwa ba dikete tše lesome le tše pedi; ₇ba kgoro ya Simeone gwa swaiwa ba dikete tše lesome le tše pedi; ba kgoro ya Lefi gwa swaiwa ba dikete tše lesome le tše pedi; ba kgoro ya Isakara gwa swaiwa ba dikete tše lesome le tše pedi; ₈ba kgoro ya Sebulone gwa swaiwa ba dikete tše lesome le tše pedi; ba kgoro ya Josefa gwa swaiwa ba dikete tše lesome le tše pedi; ba kgoro ya Benjamene gwa swaiwa ba dikete tše lesome le tše pedi.

₉Ka morago ga moo ka bona lešaba le legolo le go bego go se motho yo a ka kgonago go le bala. E be e le ba merafe yohle, le dikgoro tšohle, le ditšhaba tšohle, le maleme ohle ba eme pele ga setulo sa bogoši le pele ga Kwana, ba apere dipurapura tše ditšhweu, ba swere makala a mepalema ka diatla. ₁₀Ba goelela ba re:

₁₁Barongwa ka moka ba be ba eme ba dikaneditše setulo sa bogoši, le bagolo bale, le diphedi tšela tše nne. Ke moka ba itahlela fase ka difahlego mo pele ga setulo sa bogoši ba khunamela Modimo ₁₂ba re:

₁₃Yo mongwe wa bagolo bale a mpotšiša a re: “Na ke bomang ba ba go apara dipurapura tše ditšhweu, gona ba tšwa kae?”

₁₄Ka mo fetola ka re: “Nnaena ga ke tsebe, morena, go tseba wena.”

Yena a mphetola a re: “Ke ba ba tšwago ditlaišegong tše di šiišago. Ba hlatswitše dipurapura tša bona ba di šweufatša ka madi a Kwana.

₁E rile ge Kwana e kgomarolla sekgomaretši sa bošupa gwa homola gwa re tuu legodimong nako ye e ka bago seripa sa iri. ₂Ke moka ka bona barongwa ba ba šupago ba eme pele ga Modimo go mo hlankela, ba fiwa diphala tše di šupago.

₃Morongwa yo mongwe a tla a ema kgauswi ga aletare a swere setšhumeladiorelo sa gauta. A fiwa diorelo tše dintši gore a di neele gotee le dithapelo tša badumedi bohle godimo ga aletare ya gauta ye e lego pele ga setulo sa bogoši. ₄Muši wa diorelo tšeo di bego di tšhungwa ke morongwa yola wa rotogela go Modimo gotee le dithapelo tša badumedi. ₅Ke moka morongwa yoo a tšea setšhumeladiorelo sela, a se tlatša mollo wo o tšwago aletareng, a o kgotholela fase. Gwa kwagala mekidimetšo le dituduma, magadima a bonala, le lefase la šikinyega.

₆Barongwa bale ba go šupa ba go swara diphala tše di šupago ba itokišetša go di letša.

₇Morongwa wa pele a letša ya gagwe, gomme gwa na sefako le mollo di tswakane le madi tša tloromišwa lefaseng. Gwa swa karolo ya boraro ya lefase, le karolo ya boraro ya dihlare, le bjang ka moka bjo botala.

₈Morongwa wa bobedi a letša ya gagwe, gomme selo se nkego ke thaba ye kgolo ye e tukago mollo sa lahlelwa ka lewatleng. Karolo ya boraro ya lewatle ya fetoga madi; ₉karolo ya boraro ya diphedi tšohle tša ka lewatleng ya hwa, le karolo ya boraro ya maselawatle ya fedišwa.

₁₀Morongwa wa boraro a letša ya gagwe, gomme gwa wa naledi ye kgolo go tšwa leratadimeng e tuka bjalo ka serumola, ya wela karolo ya boraro ya dinoka, ya wela le didiba tša meetse. ₁₁Leina la naledi yeo ke “Lengana”. Karolo ya boraro ya meetse ya galaka, gomme batho ba bantši ba ba nwelego meetse ao a go galaka ba hwa.

₁₂Morongwa wa bone a letša ya gagwe, gomme karolo ya boraro ya letšatši le ya ngwedi le ya dinaledi ya rathwa mme ya fifala. Gwa fifala nako ye e ka bago karolo ya boraro mosegare, le karolo ya boraro bošego.

₁₃E rile ke sa lebeletše, ka kwa ntšhu ye e fofago kua godimo sebakabakeng e goelela e re: “Joo! joo! Badulalefaseng ga ba le bona, ge barongwa bale ba bangwe ba bararo ba tlilo letša tša bona diphala!”

₁Morongwa wa bohlano a letša ya gagwe. Ka bona naledi ya sebakabakeng e wetše fase, gomme ya fiwa sekgonyo sa molete wo o išago fasefase. ₂Ya khurumola molete woo, gomme go wona gwa kuelela muši wo nkego wa mokubego wo mogolo, mme letšatši le leratadima tša thibja ke mokuelelo woo wa go tšwa moleteng. ₃Gwa tšwa tšie moo mokuelelong mme ya wa nageng, ya fiwa maatla a go swana le a phepheng. ₄Ya laelwa gore e se senye bjang goba mehlare goba dimela tše dingwe, e upše e lome fela batho ba ba se nago leswao la Modimo mo diphatleng tša bona. ₅Ya laelwa gore e se ba bolaye, fela e ba hlokofatše dikgwedi tše tlhano. Bohloko bja yona bo swana le bja phepheng ge e lomile motho. ₆Dikgweding tšeo tše tlhano batho ba tla inyakela lehu, fela ba ka se le hwetše; ba tla duma go hwa, fela lehu le tla ba tšhaba.

₇Tšie yeo e be nke ke dipere tše di hlametšwego ntwa. Hlogong ya yona e be e rwele se nkego mphapahlogo wa gauta, le sefahlego sa yona se be se swana le sa motho. ₈E be e na le moriri wa go swana le leetse la basadi, gomme meno a yona nke ke a tau. ₉E be e na le dilo tše nkego ke difahlelakgara tša tshipi, le lešata la maphego a yona e be nke ke la dikoloi tše dintši tše di gogwago ke dipere tše di kitimelago ntweng. ₁₀E be e na le mosela wa lebolela bjalo ka wa phepheng, gomme maatla a yona a go hlokofatša batho dikgwedi tšeo tše tlhano a be a le mo moseleng wa yona. ₁₁E be e na le kgoši ya go e buša, e lego morongwa wa molete, yo leina la gagwe ka Seheberu ba rego ke Abadone, gomme ka Segerike ba rego ke Apolione, ke go re “Mofediši”.

₁₂Masetlapelo a mathomo a fetile; go sa tlilo tla a mangwe a mabedi.

₁₃Morongwa wa boselela a letša ya gagwe phala. Ka kwa lentšu le etšwa dikhutlong tše nne tša aletare ya gauta ye e lego mo pele ga Modimo. ₁₄La botša morongwa wa boselela yo a swerego phala la re: “Kgokolla barongwa bale ba bane ba ba kgokilwego ka kua nokeng ye kgolo ya Yufratese!” ₁₅Barongwa bao ba bane ba ile ba kgokollwa. Gape ba be ba šetše ba lokišeditšwe yona nako ye, le lona letšatši le, le yona kgwedi ye, le wona ngwaga wo, gore ba bolaye karolo ya boraro ya batho. ₁₆Ke ile ka kwa ge go bolelwa palo ya bahlabani ba dipere; bona e be e le ba dimilione tše makgolo a mabedi. ₁₇Moo ponong ya ka ke bone dipere le banamedi ba tšona di le ka mokgwa wo: banamedi ba be ba apere difahlelakgara tša bohwibidu bja mollo, tša botala bja leratadima, tša modipa wa tshebela. Dihlogo tša tšona di be di swana le tša ditau, gomme di ntšha mollo le muši le tshebela ka melomo. ₁₈Karolo ya boraro ya batho e ile ya bolawa ka dikotlo tše tharo tše tša go ntšhwa ke dipere ka melomo: mollo le muši le tshebela. ₁₉Gobane maatla a pere tšeo a be a le ka melomong ya tšona le meseleng ya tšona. Mesela ya tšona e swana le dinoga, e na le dihlogo gomme di gobatša batho ka yona.

₂₀Batho ba go šala, bao ba ilego ba se bolawe ka dikotlo tše, ba ile ba se lahle medingwana ye ba itiretšego yona. Ba se lese go khunamela bademone, goba medingwana ya gauta le ya silibera le ya mphiri le ya maswika le ya kota, e lego dilo tše di sa kgonego go bona le go kwa le go sepela; ₂₁le gona ba se tlogele dipolao le boloi le bohlola le bohodu bja bona.

₁Ka morago ka bona yo mongwe morongwa wa senatla a theoga legodimong a apere leru, a na le molalatladi hlogong; sefahlego sa gagwe nke ke letšatši, mme maoto ona nke dikokwane tša mollo. ₂Ka seatleng o be a swere lengwalwana le le phutholotšwego. O be a gatile lewatle ka leoto la go ja, ka la mmangele a gatile lefase, ₃gomme a goelela ka lentšu le legolo le nkego ke la tau e rora. Ge a goelela bjalo, dituduma tše di šupago tša mo araba ka go kidimetša. ₄E rile ge dituduma tšeo di seno bolela, ka re ke sa re ke ngwala tše di bolelwago, ka kwa lentšu le etšwa legodimong le re: “Tše di boletšwego ke dituduma tše di šupago tšeo e be sephiri, o se di ngwale!”

₅Morongwa yola ka go mmona a gatile lewatle le lefase a emišetša seatla sa gagwe sa la go ja legodimong, ₆a ikana ka yena Mophelelasaruri yo a hlodilego legodimo le lefase le lewatle le tšohle tše di lego mo go tšona, a re: “Tiego ga e sa tlo ba gona! ₇Se se tlago ba gona ke gore mohla morongwa wa bošupa a letša phala Modimo o tla phethagatša sephiri sa gagwe, bjalo ka ge a begetše bahlanka ba gagwe, baprofeta.”

₈Lentšu lela ka go le kwa le etšwa legodimong la bolela le nna gape la re: “Eya o tšee lengwalwana lela la go bulwa le lego ka seatleng sa morongwa yola a gatilego lewatle le lefase.”

₉Ka ya go morongwa yoo ka re a mphe lengwalwana leo. Yena a re go nna: “Le tšee o le je; le tla ba bose bjalo ka todi ka ganong, fela ka mpeng le tla galaka.”

₁₀Ka tšea lengwalwana leo ka seatleng sa gagwe ka le ja, gomme la ba bose bjalo ka todi ka ganong. Fela ka re go le metša la ntomiša mala. ₁₁Ke ge ke botšwa gwa thwe: “Eya o boeletše o porofete ka ga ditšhaba le merafe le maleme le dikgoši.”

₁Ke moka ka fiwa patla ye nkego ke thupa ya go ela, gomme gwa thwe: “Etla o ele tempele ya Modimo le aletare, o be o bale le bao ba mo khunamelago ka tempeleng. ₂Fela lapa la ka ntle o le lese, o se ke wa le ela, ka gobane le neetšwe baditšhaba bao ba tlago gatakela motse wo mokgethwa dikgwedi tše masome a mane le tše pedi. ₃Ke tla laela dihlatse tša ka tše pedi tša go apara diaparo tša mogohla go porofeta matšatšing ao a sekete le makgolo a mabedi le masome a a selelago.”

₄Dihlatse tšeo tše pedi ke mehlware yela ye mebedi le dihlomamabone tšela tše pedi tše di emego mo pele ga Morena wa lefase. ₅Ge motho a leka go di hlokofatša, go tšwa mollo ka melomong ya tšona o tšhume lenaba leo la tšona. Ge motho a ka re o di kweša bohloko, o swanetše go bolawa ka wona mokgwa woo. ₆Ba na le maatla a go thiba magodimo gore nakong ya ge ba porofeta go se ne pula. Le maatla a go fetola meetse madi ba na le ona. Le a go otla lefase ka go rata ka kotlo efe le efe ba na le ona.

₇E tla re ge ba fetša go hlatsela, gwa tšwa sebata ka moleteng woo wa go iša fasefase mme sa lwa nabo. Se tla ba fenya sa ba bolaya, ₈gomme ditopo tša bona di tla rapalala mokgotheng wa motse wo mogolo moo go bapotšwego Morena wa bona, motse woo ka go swantšha ba rego ke Sodoma goba Egepeta. ₉Ditopo tša bona di tla hlalelwa ke ba ditšhaba tšohle, le ba dikgoro tšohle, le ba maleme ohle, le ba merafe yohle matšatši a mararo le seripa, gomme ba se di dumelele gore di bolokwe. ₁₀Badudi ba lefase ba tla thabela lehu la baprofeta bao ba babedi, ka ge ba tlaišitše batho gabohloko. Ba tla hlalala ba romelana dimpho. ₁₁Fela e rile ge go fetile matšatši ao a mararo le seripa moya wo o phedišago wa go tšwa go Modimo wa tsena ka ditopong tša baprofeta bao. Ba emelela, gomme bao ba ba bonago ba tšhoga kudu. ₁₂Ke mo baprofeta bao ba kwelego lentšu le goelela le etšwa legodimong le re go bona: “Rotogelang mono!” Ba rotogela legodimong ka leru, manaba a bona a ba lebeletše. ₁₃Ka yona nako yeo lefase la šikinyega kudu; karolo ya lesome ya motse ya pšhatlagana, gomme gwa hwa batho ba dikete tše di šupago. Ba ba šetšego ba tšhoga kudu ba tumiša Modimo wa legodimong.

₁₄Bjale ke gona ke go fetile masetlapelo a bobedi; kgauswinyana go tla tla masetlapelo a boraro.

₁₅Morongwa wa bošupa a letša phala ya gagwe, gomme legodimong gwa kwagala mantšu a a goelelago a re:

₁₆Bagolo bale ba masome a mabedi le metšo ye mene ba ba dutšego ditulong tša bona tša bogoši pele ga Modimo ba napa ba itahlela fase ka difahlego ba khunamela Modimo ₁₇ba re:

₁₉Ke moka tempele ya Modimo legodimong ya bulwa, gomme Polokelo ya gagwe ya Kgwerano legodimong ya bonagala. Gwa bonwa le magadima, gwa kwagala mekidimetšo le dituduma, lefase la šikinyega, le sefako se sentši sa na.

₁Gwa bonala semaka se segolo leratadimeng: mosadi a apere letšatši, a beile maoto godimo ga ngwedi, a rwele mphapahlogo wa dinaledi tše lesome le metšo ye mebedi hlogong. ₂E be e le moimana, a llišwa ke bohloko bja lešoko la pelego.

₃Gwa bonala se sengwe semaka leratadimeng. Gwa tšwelela mmamogašwa wo mohwibiduhwibidu wa dihlogo tše di šupago le dinaka tše lesome, o rwele mphapahlogo hlogong ye nngwe le ye nngwe. ₄Wa gogola karolo ya boraro ya dinaledi tša leratadima ka mosela, wa di lahlela fase lefaseng. Wa tla wa ema pele ga mosadi yola a bego a belega, gore o tle o kwametše ngwana wa gagwe ge a seno belegwa. ₅Ke moka mosadi yoo a belega morwa yo a bego a kgethetšwe go tlo buša ditšhaba tšohle ka lepara la tshipi. Eupša ngwana a ubulwa a išwa go Modimo yo a dutšego setulong sa gagwe sa bogoši. ₆Mosadi yola a tšhabela lešokeng, lefelong leo Modimo a bego a mo lokišeditše lona, moo a bego a tlilo hlokomelwa matšatši a sekete le makgolo a mabedi le masome a a selelago.

₇Ka morago gwa tsoga ntwa legodimong. Mikaele le barongwa ba gagwe ba lwa le mmamogašwa wola, mme wona le barongwa ba wona ba itwela. ₈Mmamogašwa wa fenywa, gomme wona le barongwa ba wona ba se sa dumelelwa go dula legodimong. ₉Mmamogašwa woo, yona noga yela ya kgale e bitšwago Diabolose goba Sathane yo a foraforeditšego lefase lohle, o ile wa rakwa. Wa lahlelwa lefaseng gotee le barongwa ba wona.

₁₀Ke moka ka kwa lentšu le goelela legodimong le re:

₁₃E rile ge mmamogašwa o bona gore o lahletšwe lefaseng, wa lelekiša mosadi yola wa go belega ngwana wa mošemane. ₁₄Mosadi yoo a fiwa maphego a mabedi a ntšhu ye kgolo gore a fofe a tšhabele bodulong bja gagwe lešokeng, moo a tlago hlokomelwa mengwaga ye meraro le seripa, gore a se hlaselwe ke mmamogašwa. ₁₅Mmamogašwa woo wa hlatšetša meetse ka morago ga mosadi yoo mme a ela bjalo ka noka gore a mo tšee. ₁₆Fela lefase la thuša mosadi yoo; la ahlama la metša meetse ale a go hlatšwa ke mmamogašwa. ₁₇Mmamogašwa wa galefela mosadi yoo, wa ba wa tloga wa yo lwa le ditlogolo tša gagwe tše dingwe, e lego bohle ba ba phethago melao ya Modimo gape ba botegelago go hlatsela Jesu. ₁₈Ya ba mmamogašwa woo o ema lebopong la lewatle.