To The Word – Day 203

₁Dariose, Momedia, o ile a tšea bogoši go Belshatsare a na le mengwaga ye masome a a selelago le metšo ye mebedi. ₂A ikemišetša go bea babušiši ba lekgolo le masome a mabedi mmušong wa gagwe ka moka. ₃A ba beela mantona a mararo a go ba hlokomela gore yena a se lobe. Daniele e be e le yo mongwe wa mantona ao. ₄Yena a ipontšha gore o phala mantona ale a mangwe le babušiši, ka gobane o be a na le bokgoni bjo bogolo. Ka lebaka leo kgoši a gopola go mmea molaodi wa mmušo wa gagwe ka moka. ₅Ke moka mantona ale a mangwe le babušiši ba leka go phara Daniele molato ka mo a bego a sepetša ditaba tša mmušo ka gona, eupša ba palelwa ke go hwetša le phošonyana, ka gobane Daniele o be a tshephega gomme a sa dire bošaedi goba se sengwenyana se sempe. ₆Ke moka ba re: “Re ka se hwetše se re ka pharago Daniele molato ka sona, ge e se ka tša bodumedi bja gagwe.”

₇Ka gona ba kgeregela go kgoši mme ba re: “Kgoši Dariose, nke o re phelele go ya go ile! ₈Rena ka moka – mantona a mmušo, baokamedi ba dilete, babušiši, bakgomana le bomaseterata – re kwane gore kgoši a bee molao gomme e tloge e eba wa kgapeletšo. O laele gore lebakeng la matšatši a masome a mararo go se be le motho yo a kgopelago se sengwenyana go modimo ofe goba ofe, goba go motho yo mongwe, ge e se go wena, kgoši. Yo a ka tshelago molao wo a lahlelwe ka moleteng wa ditau. ₉Kgoši a a bee molao woo, a o ngwale gore o se fetošwe, e be molao woo o ka se phumolwego wa Bamedia le Bapersia.”

₁₀Ka gona Kgoši Dariose a ngwala molao woo. ₁₁Ge Daniele a ekwa gore molao woo o ngwadilwe, a ya ntlong ya gagwe. Ka phapošing ya ka godimo ya ntlo yeo go be go na le mafasetere a a lebeletšego Jerusalema. Gona moo o be a fela a rapela gararo ka letšatši. Le mohlang woo a dira bjalo ka mehleng, a bula mafasetere, a khunama pele ga ona gomme a rapela Modimo, a mo tumiša.

₁₂Ke moka banna bale ba kgeregela ntlong ya gagwe mme ba mo hwetša a rapela Modimo a mo kgopela kgaugelo. ₁₃Ba napa ba ya go kgoši ba mo gopotša ka molao wola ba re: “Ga ke re o ngwadile molao wa go re mang le mang yo a ka kgopelago selo go modimo ofe goba ofe, goba go motho yo mongwenyana lebakeng la matšatši a masome a mararo ge e se go wena, kgoši, o tla lahlelwa ka moleteng wa ditau?”

Kgoši a ba fetola a re: “Ee, ke molao wo o tiilego wo o ka se phumolwego wa Bamedia le Bapersia.”

₁₄Bona ba re go yena: “Daniele, e lego yo mongwe wa mathopša ale a go tšwa Juda, ga se a ela wena kgoši le molao wa gago hloko. O rapela gararo ka letšatši.”

₁₅Ge kgoši a ekwa seo a nyama kudu gomme a leka go loga maano a go phološa Daniele. A hlwa a leka letšatši la ba la sobela. ₁₆Ya ba gona banna bale ba kgeregelago go kgoši gomme ba re go yena: “Kgoši, o tseba gabotse gore go ya ka molao wa Bamedia le Bapersia ga go kiletšo goba molao wo o ka rego o beilwe ke kgoši wa fetošwa.”

₁₇Ka gona kgoši a laela gore Daniele a swarwe gomme a lahlelwe ka moleteng wa ditau. A re go Daniele: “Nke Modimo wa gago yo o mo hlankelago ka mehla a ka go phološa.” ₁₈Molete woo wa tswalelwa ka leswika, gomme kgoši a o swaya ka palamonwana ya gagwe le ka ya bakgomana gore go se be le motho yo a ka phološago Daniele. ₁₉Ke moka kgoši a gomela mošate, a lala a se a robala, a se a ja, a ba a laela gore a se lale a tlošitšwe bodutu.

₂₀Ge go esa kgoši a tsoga a itlhaganela a ya moleteng. ₂₁Ge a batamela a goelela a nyamile a re: “Wena Daniele, mohlanka wa Modimo yo a phelago! Na Modimo yo o mo hlankelago ka mehla o kgonne go go phološa ditaung?”

₂₂Daniele a mo fetola a re: “Kgoši a re phelele go ya go ile! ₂₃Modimo wa ka o romile morongwa wa gagwe go tlo swara ditau tše melomo gore di se ke tša ntira selo. Seo o se dirile ka ge a tsebile gore ga ke ne molato, le ka gobane le wena kgoši ga se ka go phošetša.”

₂₄Kgoši o ile a thaba kudu gomme a laele gore Daniele a ntšhwe ka moo moleteng. Ka gona ba mo ntšha gomme ba bona gore ga se a gobala le gatee, ka ge a be a tshephile Modimo. ₂₅Ke moka kgoši a laela gore banna bale ba bego ba pharile Daniele ka molato ba swarwe, gomme bona le basadi le bana ba bona ba lahlelwa ka moleteng woo wa ditau. Ya re ba sešo ba fihla fase, ditau tša be di šetše di ba kamile mme di ba robile mašapo ka moka.

₂₆Ka morago Kgoši Dariose a ngwalela ditšhaba tšohle le merafe yohle le ba maleme ohle lefaseng ka moka a re: “Khutšo a e be le lena! ₂₇Ke laela gore mmušong wa ka ka moka mang le mang a tšhabe Modimo wa Daniele mme a mo hlomphe, ka gobane ke yena Modimo yo a phelago,

₂₉Daniele o ile a atlega nakong ya pušo ya Dariose le ya Korese wa Persia.

₁Ka ngwaga wa mathomo wa ge Belshatsare e le kgoši ya Babilone, e ile ya re e le bošego ka lora, ka bona pono. Ka ngwala toro yeo, gomme se ke se bonego ₂bošegong bjoo sese:

Diphefo di be di etšwa ka mathoko ka mane mme di hudua lewatle le legolo. ₃Gwa tšwelela dibata tše nne tša go se swane ka lewatleng. ₄Sa mathomo se be se swana le tau, fela se na le diphego bjalo ka ntšhu. Ge ke sa se lebeletše diphego tša sona tša kgaoga. Sebata seo sa kukegela godimo gomme sa emišwa ka maoto bjalo ka motho, sa napa sa fiwa mogopolo bjalo ka motho.

₅Sebata sa bobedi se be se swana le bere, se eme ka maoto a morago. Se be se swere dithapa tše tharo ka meno, gomme lentšu le re go sona: “Tšwela pele o je nama ka moo o ratago ka gona!”

₆Ya re ke sa lebeletše gwa tšwelela sebata se sengwe. Sona se be se swana le nkwe, eupša se na le diphego tše nne mokokotlong tše di swanago le tša nonyana, ebile se na le dihlogo tše nne. Sa fiwa maatla a go buša.

₇Ge ke sa lebeletše gwa tšwelela sebata sa bone. Se be se boifiša, le gona se šiiša mme se na le maatla kudu. Ka meno a sona a magolo a tshipi se be se rwaetša se se se swarago sa se metša, mme mašaledi sa a gataka ka maoto. Se be se sa swane le dibata tšela tše dingwe, sona se be se na le manaka a lesome. ₈Ge ke lebelediša manaka ao ka bona lenaka le lenyenyane le mela gare ga ale a mangwe. La kgola manaka a mararo ale a bego a šetše a le gona. Lenaka leo le be le na le mahlo a motho le molomo wa go ikgantšha.

₉E rile ke sa lebeletše gwa bewa ditulo tša bogoši. Mophelelasururi a dula go se sengwe sa ditulo tšeo tša bogoši. Diaparo tša gagwe e be e le tše ditšhweutšhweu, gomme moriri wa gagwe o swana le boya bja nku bjo bo hlwekilego. Setulo sa gagwe sa bogoši se lauma dikgabo mme se nameditšwe maotwaneng a a tukago mollo, ₁₀gomme mollo o ela o etšwa go sona. Batho ba diketekete ba be ba mo hlankela, gomme pele ga gagwe go eme batho ba dimilione. Tsheko ya thongwa, mme dipuku tša phuthollwa.

₁₁Ge ke sa lebeletše, sebata sela sa bone sa bolawa ka lebaka la dipolelo tša go ikgantšha tša lenakana lela, gomme sa lahlelwa dikgabong tša mollo sa fišwa. ₁₂Dibata tšela tše dingwe tša amogwa maatla a go buša, eupša tša beelwa sebaka le matšatši a bophelo bja tšona.

₁₃Moo ponong yeo ya bošego ke ile ka bona se nkego ke motho. O be a etla a pipeditšwe ke maru, gomme a ya go yola Mophelelasaruri a tsebišwa yena. ₁₄A fiwa maatla a go buša, le tlhomphego, le bogoši gore ditšhaba tšohle le merafe yohle le ba maleme ohle ba tle ba mo hlankele. Pušo ya gagwe e tla ba ya go ya go ile, ya se fele, mme mmušo wa gagwe o ka se fedišwe.

₁₅Dipono tšeo ka go di bona di ile tša ntshwenya kudu, tša ntšhoša. ₁₆Ka ya go yo mongwe wa ba ba bego ba eme fao ka mo kgopela gore a ntlhathollele tšona. Ka gona a mpotša tše di di šupago. ₁₇A re: “Dibata tšeo tše nne tše dikgolo ke mebušo ye mene ye e tlago hlaga lefaseng. ₁₈Ge e le batho ba bakgethwa ba Modimo Yogodimodimo bona ba tla fiwa bogoši, gomme ya ba bja bona go ya go ile.”

₁₉Ke ile ka nyaka go tsebišiša ka sebata sela sa bone sa go se swane le tše dingwe, sela sa go boifiša kudu sa go robaganya se se se swarago ka dinala tša sona tša mphiri, sa se rwaetša ka meno a sona a tshipi gomme mašaledi sa a gataka ka maoto. ₂₀Le gona ke ile ka nyaka go tseba le ka manaka ale a lesome hlogong ya sona, le lenaka lela la go mela mme la kgola a mararo a manaka ale – lela la go ba le mahlo le molomo wa go ikgantšha. Lona le be le feta ale a mangwe.

₂₁Ge ke ntše ke lebeletše, lenaka leo le ile la lwa le batho ba bakgethwa ba Modimo gomme la ba fenya. ₂₂Ke moka Mophelelasururi a tla a ahlola batho ba bakgethwa ba Modimo Yogodimodimo a re ga ba na le molato. Nako ya gore batho bao ba fiwe maatla a go buša e be e fihlile.

₂₃Ke ile ka hlathollelwa ka tsela ye: “Sebata sela sa bone ke mmušo wa bone wo o tlago ba lefaseng, o ka se swane le mebušo yela ye mengwe yohle. O tla gataka lefase ka moka wa le pšhatlaganya, wa le rwaetša. ₂₄Manaka ao a lesome ke magoši a lesome ao a tlago buša mmušo woo. Gwa latela kgoši ye nngwe ye e sa swanego le tšela tša pele, gomme go dikgoši tšela tše lesome e tla fenya tše tharo. ₂₅E tla bolela gampe ka Modimo Yogodimodimo gomme ya gatelela batho ba bakgethwa ba Modimo. E tla leka go fetola menyanya le melao ya bona ya sedumedi, gomme batho bao ba Modimo ba tla bušwa ke yona mengwaga ye meraro le seripa. ₂₆Ka morago gwa tliwa tshekong ya legodimong, ba mo amoga maatla a go buša mme ba a fedišetša sa ruri. ₂₇Batho ba bakgethwa ba Modimo Yogodimodimo ba tla fiwa bogoši le pušo le maatla a mebušo yohle lefaseng. Mmušo wa bona e tla ba wa go ya go ile, gomme babuši bohle lefaseng ba tla ba hlankela ba ba theeletša.”

₂₈Ao ke mafelelo a taba ye. Ke ile ka tšhoga kudu ka ba ka galoga sefahlego, gomme tšohle tšeo ka se di botše motho.

₁Ka ngwaga wa boraro wa ge Belshatsare e le kgoši, nna, Daniele, ke ile ka bona pono ya bobedi. ₂Moo ponong yeo ka ipona ke le motseng wa Susa wo o ageleditšwego ka morako, seleteng sa Elamo. Moo ponong ka ikhwetša ke le nokeng ya Ulai. ₃Ge ke phagamiša mahlo gona moo nokeng ka bona kgapa ya manaka a mabedi a matelele, lenaka le lengwe le feta le lengwe ka botelele, le gona le metše morago ga lela le lengwe. ₄Ka bona kgapa yeo e ometša ka manaka a yona ka bodikela, ka leboa le ka borwa. Go be go se phoofolo ye e ka lwago nayo, goba ya hlakodišwa dinaleng tša yona. E be e dira ka mo e ratago ka gona, gomme e maatlafala e eya.

₅Ge ke sa nagana ka seo ke se bonego, gwa tšwelela phooko ka bodikela e pharihla le lefase e sa gate fase, e na le lenaka la mantletlere phatleng. ₆Ya leba go kgapa yela ya manaka a mabedi ke bego ke e bone e eme kgauswi le noka, ya e kgorogela ka šiši. ₇Ka e bona e hlasela kgapa yela, ya e thula e e galefetše, ya e roba manaka ka mabedi. Kgapa yeo e be e se ne maatla a go itwela. Phooko yeo ya e wiša ya e gataka, gomme gwa se be le yo a e lamolelago.

₈Phooko yeo e ile ya maatlafala e eya, eupša ya re ge e šetše e na le maatla a mantši, ya robega lenaka lela la mantletlere. Sebakeng sa lona gwa mela manaka a mangwe a mane a mantletlere, a lemetše dikhutlong tše nne tša lefase. ₉Mo lenakeng le lengwe la ao a mane gwa mela lenakana le le ilego la gola kudu la lemela borwa le bohlabela le nageng ye e kgahlišago. ₁₀La gola la ba la fihla madireng a legodimo, e lego dinaledi, gomme la wišetša tše dingwe fase, la di gataka. ₁₁La ba la nyatša molaodi wa madira a legodimo, la thibela le dihlabelo tša tšatši le lengwe le le lengwe tše a bego a di direlwa, la hlompholla le Tempele. ₁₂Lenaka leo la fenya madira. Batho ba be ba dira dibe bakeng sa go dira dihlabelo tša tšatši le lengwe le le lengwe. Lenaka leo le be le nyatša sedumedi sa mmakgonthe, gomme le atlega go tše le di dirago.

₁₃Ka kwa morongwa a bolela, mme yo mongwe morongwa a botšiša mmoledi yoo a re: “Na taba tša pono ye di yo feletša kae? Go tla tšea nako ye kaakang batho ba ntše ba dira sebe se se šiišago legatong la dihlabelo tša tšatši le lengwe le le lengwe? Go tla tšea lebaka le lekaakang Tempele le madira a legodimo di gatakwa?”

₁₄Morongwa yola yo mongwe a mo fetola a re: “Go tla tšea mantšiboa a dikete tše pedi le makgolo a mararo le masa a ona, ya ba gona Tempele e bušetšwago sekeng.”

₁₅Nna, Daniele, ka re ke sa leka go kwešiša pono yeo ke e bonego, gateetee ka bona se nkego ke motho se eme pele ga ka. ₁₆Ka kwa lentšu la yo a goelelago ka nokeng ya Ulai le re: “Gabriele, mo hlalošetše tša pono yeo.” ₁₇Gabriele a tla mo ke emego gona, gomme nna ka tšhoga, ka ba ka wela fase ka rapalala.

Yena a re go nna: “Wena motho wa nama, kwešiša gore pono yeo ke ya mabapi le tša bofelo bja lefase.” ₁₈Ya re a sa bolela, ka idibala, ka wela fase ka sefahlego. Eupša yena a ntshwara, a nkemiša, ₁₉a re: “Ke tla go botša tše di tlago direga ka moso mohla Modimo a otla batho, gobane pono yeo e amana le tša nako ye e beilwego ya tša bofelo bja lefase.

₂₀“Kgapa yela o e bonego ya manaka a mabedi e šupa kgoši ya Media le ya Persia. ₂₁Phooko yela e šupa kgoši ya Bagerike, gomme lenaka lela le legolo phatleng ya yona ke kgoši ya mathomo ya gona. ₂₂Manaka ale a mane a go hloga ge go seno robega lenaka la mathomo a šupa mebušo ye mene ye e tlago aroga setšhabeng seo, le gona e ka se kego ya tia go swana le mmušo wa mathomo.

₂₃“Ge mebušo yeo e ewa mme bokgopo bo iphile maatla, go tla ba le kgoši ye sehlogo, mokadikadi. ₂₄O tla tia a eya, fela e sego ka boyena. O tla hlola tshenyo ye e šiišago, gomme a atlega go tše a di dirago. O tla fediša banna ba maatla le setšhaba se sekgethwa. ₂₅Ka ge e le mogarigari, o tla atlega boradieng bja gagwe. O tla ikgantšha gomme a fetša batho ba bantši ba sa itebetše. O tla ba a tsogela le Kgoši ya dikgoši maatla, eupša o tla hwa, fela a sa bolawe ke motho. ₂₆Tša pono ye ya mantšiboa le masa a o a bontšhitšwego di tla phethagala. Eupša gonabjale o se di botše motho, ka gobane ke tša mabakeng a a sa lego kgole.”

₂₇Nna, Daniele, ke ile ka fokola mme ka fetša matšatši ke lwala. Ka morago ka tsoga ka boela mošomong wo kgoši a bego a mphile wona, eupša ke be ke tlabilwe ke pono yeo, ke sa kgone go e kwešiša.

_1-2Dariose wa Momedia, yo e bego e le morwa wa Zerksese, o be a buša naga ya Babilonia. Ka ngwaga wa mathomo wa ge e le kgoši, nna, Daniele, ke ile ka lemoga ka Mangwalong a Makgethwa gore Jerusalema e tlilo ba marope mengwaga ye masome a a šupago, go ya ka mo Morena a bego a boditše moprofeta Jeremia ka gona. ₃Ka rapela Morena ke tiišitše, ke phophotha, ke ikona dijo, ke apere tša go ilela, ke dutše meloreng. ₄Ka rapela Morena Modimo wa ka, ka ipolela dibe ka re:

“Joo, Morena, Modimo yo mogolo yo a tšhabegago! O botegetše kgwerano ya gago, gomme bao ba go ratago, ba phethago ditaelo tša gago, o ba bontšha leratorato.

₅“Re dirile dibe, re fošitše, re dirile tše kgopo, re ganne go bušwa ke wena, ra aroga melaong le ditaelong tša gago. ₆Ga se ra theeletša bahlanka ba gago, baprofeta, bao o ba romilego go bolela le magoši a rena, babuši ba rena, borakgolokhukhu ba rena, le setšhaba ka moka sa naga ya gaborena. ₇Wena, Morena, o lokile, eupša rena re a inyatša, rena badudi ba Juda le ba Jerusalema le Baisraele bohle, ba kgole le ba kgauswi, le ba dinaga tšohle tše o re šwalalanyeditšego go tšona ka lebaka la go se go botegele ga rena. ₈Morena, rena le magoši a rena le babuši ba rena le borakgolokhukhu ba rena re be re inyatša ka ge re be re go fošeditše. ₉Wena, Morena Modimo wa rena, o a re gaugela, o a re lebalela, le ge re ile ra gana o re buša. ₁₀Ga se ra go theeletša, Morena Modimo wa rena, mola o re botša gore re phele ka melao yela o re filego yona ka bahlanka ba gago, baprofeta. ₁₁Baisraele bohle ba tshetše melao ya gago, ba go furalela, ba gana go go theeletša. Re go fošeditše, ka gona wa re gaša ka dithogako tše di ngwadilwego ka melaong ya Moshe, mohlanka wa gago, tše o ikannego go re otla ka tšona. ₁₂O re dirile tše o bego o boletše gore o tla re dira tšona, wa ba wa di dira babuši ba rena ka go re tlišetša masetlapelo a magolo. Lefaseng lohle ga se wa ka wa dira tše o di dirilego motse wa Jerusalema. ₁₃Masetlapelo a ka moka a re wetše go ya ka tše di ngwadilwego ka melaong ya Moshe. Eupša Morena Modimo wa rena, ga se ra go kgahla ka go furalela makgopo a rena, re tseba gore o phetha tše o di boletšego. ₁₄Wena, Morena, ga se wa dikadika go re tlišetša masetlapelo, ka ge wena, Morena Modimo wa rena, o le yo a lokilego go tšohle tše o di dirago; le ge go le bjalo, rena ga se ra go theeletša.

₁₅“Gomme wena, Morena Modimo wa rena, o itiretše leina ka go ntšha setšhaba sa gago Egepeta ka maatla a gago a magolo, gomme le lehono o sa tumile. Re dirile dibe, re fošitše. ₁₆O Modimo yo a lokilego, gomme mabakeng a a fetilego o ile wa re hlakodiša; ka gona, hle, o se sa galefela Jerusalema, wa e befelelwa. Ke motse wa gago, ke thaba ya gago ye kgethwa. Batho ka moka ba dinaga tša kgauswi ba nyatša Jerusalema le setšhaba sa gago ka lebaka la dibe tša rena le makgopo a borakgolokhukhu ba rena. ₁₇Bjale ge, wena Modimo wa rena, ekwa thapelo ya ka le kgopelo ya ka, nna, mohlanka wa gago. Tsošološa Tempele ya gago ye e pšhatlagantšwego, gore batho ba tsebe gore Mong wa bohle ke wena. ₁₈Re hlwaele tsebe, Modimo wa ka, re theeletše; re lebelele, o bone mathata a rena, le motse wo e lego wa gago. Re go rapela ka ge o le yo lešokošoko, e sego ka gobane re dirile tše di lokilego. ₁₉Re theeletše, Mong wa rena! Re swarele, Mong wa rena! Re kwe, Mong wa rena, mme o re hlakodiše! O se dikadike, gore batho ba tle ba tsebe ge o le Modimo, ka gobane motse wo ke wa gago le setšhaba se.”

₂₀Ke ile ka no fela ke bolela le Modimo ke rapela, ke ipolela dibe tša ka le tša setšhaba sa gešo sa Israele, ke kgopela Morena Modimo wa ka gore a tsošološe Tempele ya gagwe ye kgethwa. ₂₁Ke rile ke sa rapela, Gabriele, yo ke bego ke ile ka mmona mo ponong ya pele, a tla a itlhaganetše a fofela go nna. E be e le ka nako ya sehlabelo sa mantšiboa. ₂₂A fihla a re go nna: “Daniele, ke tletše go go thuša gore o kwešiše profeto yela. ₂₃Mola o thoma go rapela, Modimo o ile a go araba. O a go rata, ka fao nna ke tletše go go botša karabo ya gagwe. Bjale ge, o theeletše gabotse ge ke go hlathollela pono ya gago.

₂₄“Mengwaga ye masome a a šupago e balwa gašupa ke nako ye Modimo a e beetšego go fediša bokgopo bja setšhaba sa geno, le bja badudi ba motse wa geno wo mokgethwa, le dibe tša bona, batho ba boelana le Modimo, gwa hlongwa toka ya go ya go ile, gwa phethagala pono yeo le profeto, gomme Tempele ye kgethwa ya šegofatšwa ka lefsa. ₂₅Taba ye o swanetšego go e ela hloko le go e kwešiša še: Go tloga mohla go ntšhwa taelo ya go tsošološa le go aga Jerusalema ka lefsa go fihlela ge go etla mmuši yo a tloditšwego go tla feta mengwaga ye e šupago e balwa gašupa. Motse wa Jerusalema o tla agwa ka lefsa le mekgotha, wa ageletšwa ka leope, gomme wa dula mengwaga ye masome a a selelago le metšo ye mebedi a balwa gašupa, fela yeo e tla ba nako ya mathata. ₂₆Mafelelong a nako yeo mmuši yo a tloditšwego yoo o tla bolawa a se na molato. Motse le Tempele di tla fedišwa ke madira a kgoši ye e tlilogo tla. Bofelo bja lefase bo tla fihla bjalo ka lefula, gwa ba le ntwa le tobo ye e laetšwego ke Modimo. ₂₇Kgoši yeo e tla kwana le dihlopha tše dintši mengwaga ye e šupago, gomme ge seripa sa nako yeo se fetile, o tla fediša dihlabelo le dikabelo. Ntlhoreng ya Tempele go tla bewa Bohlola bjo bo tlontlollago Tempele, gomme bja dula moo go fihlela ge kgoši ya go hlasela naga e bolawa, bjalo ka ge Modimo a laetše.”

₁Ka ngwaga wa boraro wa ge Korese e le kgoši ya Persia, Daniele, yo a bitšwago le ka la Belteshatsare, o ile a utollelwa molaetša. Molaetša woo e be e le wa nnete, eupša e le wo mothata kudu go o kwešiša. O ile a o hlathollelwa ponong.

₂Mehleng yeo nna, Daniele, ke be ke feditše dibeke tše tharo ke hloname. ₃Ke be ke feditše dibeke tše tharo ke sa je tše bose, ke itima nama, ke sa nwe beine, ke sa tlole.

₄Ka letšatši la masome a mabedi le metšo ye mene la kgwedi ya pele ya ngwaga ke be ke eme leribeng la noka ye kgolo ya Tigrise. ₅Ge ke phagamiša mahlo ka bona monna yo a aperego diaparo tša lešela le lepanta la gauta ye e sego ya tswakwa. ₆Mmele wa gagwe o be o phadima bjalo ka legakabje. Sefahlego sa gagwe se etša legadima, mahlo a gagwe a tuka mollo. Matsogo le maoto a gagwe a be a phadima bjalo ka mphiri wo o phadimišitšwego, lentšu la gagwe le kwagala bjalo ka legoa la lešaba.

₇E bile nna, Daniele, ke nnoši wa go bona pono yeo. Banna ba ba bego ba na le nna ga se ba e bona, fela ba ile ba tšhoga, ba tšhaba ba yo khuta. ₈Nna ka šala moo ke nnoši, ke bogetše pono yeo ya go makatša. Ka felelwa ke maatla, ka galoga mmala boka mohu, ka nolega moko. ₉Ge ke ekwa lentšu leo la gagwe ka wela fase ka sefahlego ke idibetše. ₁₀Ke moka ka kwa seatla sa motho se ntshwara, se nthuša go khunama ka dikhuru, ka ikokotlela ka matsogo; ke ge ke sa thothomela.

₁₁Morongwa yoo a re go nna: “Daniele, morategi wa Modimo, o theeletše gabotse se ke go botšago sona. Emelela, lehono ke romilwe go wena.” Ge a seno realo ka emelela ke sa thothomela.

₁₂Ke moka a re: “Daniele, o se ke wa boifa. Modimo o kwele dithapelo tša gago go tloga tšatšing lela la mathomo o leka go kwešiša molaetša wola o ilego wa o utollelwa, mme wa ikemišetša go ikokobetša pele ga Modimo mabapi le thapelo ya gago. ₁₃Morongwamohlokomedi wa mmušo wa Persia o be a emeletšane le nna matšatši a masome a mabedi le motšo o tee. Ka morago Mikaele, yo mongwe wa barongwa ba bagolo, a tla a ntamolela. Ka mo tlogela moo a elwa le magoši a Persia. ₁₄Ke tletše go go tsebiša tše di tlago hlagela setšhaba sa geno ka moso, gobane pono ye e šupa tša ka moso.”

₁₅Ge a realo nna ka lebelela fase ke se na molomo. ₁₆Yo mongwe morongwa wa go swana le motho a nkgwatha molomo ka seatla. Nna ka re go yo a emego pele ga ka: “Mong wa ka, pono ye e nkweša bohloko, ke nolega moko. ₁₇Nna, mohlanka wa gago, nka bolela bjang le wena, Mong wa ka? Ke feletšwe ke maatla, ke palelwa le ke go hema.”

₁₈Mokamotho yoo a ntshwara gape, gomme ka maatlafala. ₁₉A re: “Se boife, morategi wa Modimo, ewa pelo! Tia maatla, o be le sebete!”

Ge a sa realo ka ikwa ke tieletše gape, gomme ka re: “Mong wa ka, hle, mpotše se o nyakago go se bolela, gobane o mmaatlafaditše.”

_20-21Yena a re: “Na o a tseba gore ke ka lebaka la eng ke tlile go wena? Ke ka lebaka la go tlo go botša tše di ngwadilwego ka Pukung ya Therešo. Bjale ke swanetše go boela morago go yo lwa le morongwamohlokomedi wa Persia. Ka morago ga moo morongwamohlokomedi wa naga ya Gerike o tla tšwelela. Ga go yo a tlago nthuša ge ke elwa nabo, ge e se Mikaele, morongwamohlokomedi wa setšhaba sa geno.