Pesalome 75

₁Re a go leboga, Modimo,

re a go leboga!

Re a go rapela, ebile re anega mehlolo ya gago.

₂Modimo o re:

“Ke tla bea nako ya go tlo ahlola ka toka.

₃Ge lefase le šikinyega le badudi bohle ba lona,

ke nna ke swarelelago dikokwane tša lona ka di tiiša. Sela

₄Baikgantšhi ke ba boditše

ka re: Le se ikgantšhe;

bakgopo ka re go bona:

Le se fadišetše batho maatla.

₅Le se kgantšhetše batho maatla le tepelela;

le se bolele ka matepe.”

₆Go se bone motho molato ga se ga motšwabohlabela goba motšwabodikela,

ebile ga se ga motšwašokeng.

₇Ke ga Modimo,

yo e lego yena moahlodi;

yo a bonago bangwe molato,

bangwe a se ba bone molato.

₈Morena o swere senwelo ka seatla,

se tletše motswako wo bogale wa beine.

O e tšhelela bakgopo bohle ba lefase mme ba e nwa,

ba e kgarihlela.

₉Ge e le nna nka se lese go bolela ka Modimo wa Jakobo;

ke tla mo opelela ditumišo.

₁₀Bakgopo o tla ba amoga maatla;

baloki bona ba tla a okeletšwa.