To The Word – Day 202

₁Ngwageng wa boraro wa ge Joyakime e le kgoši ya Juda, Kgoši Nebukadnesare wa Babilone o ile a tla motseng wa Jerusalema gomme a o dikanetša. ₂Morena a gafela Kgoši Joyakime diatleng tša gagwe gotee le dibjana tše dingwe tša Tempele. Nebukadnesare a tšea mathopša a boela le ona tempeleng ya modimo wa gagwe nageng ya Babilonia. A bea dibjana tšela tempeleng ka diphapošing tša go bolokela tša tempele.

₃Kgoši a laela Ashpenase, mohlankedi wa gagwe yo mogolo, gore a kgethe masogana lapeng la bogoši le malapeng a bakgomana mathopšeng a Baisraele. ₄Masogana ao a be a swanetše go ba a a se nago bosodi mmeleng, a a bopegilego, a bohlale, a tsebo ye e nabilego, a hlogo tše boleta, gore a tle a lokele ka mošate. Ashpenase o be a swanetše go ba ruta go ngwala le go bolela Sebabilonia. ₅Kgoši a laela le gore tšatši le lengwe le le lengwe ba solelwe dijo tše di swanago le tša gagwe, ba fiwe le beine ye a e fiwago. Ka morago ga mengwaga ye meraro ya go rutwa moo ba be ba swanetše go tlišwa pele ga kgoši. ₆Mo go bao ba kgethilwego go be go na le Daniele, Hanania, Mishaele le Asaria, ka moka e le ba kgoro ya Juda. ₇Mohlankedi yo mogolo a ba thea maina a mafsa: Daniele a re ke Belteshatsare, Hanania a re ke Shadraka, Mishaele a re ke Meshaka, mme Asaria a re ke Abednego.

₈Daniele a ikemišetša gore a ka se itšhilafatše ka go ja dijo tše di bego di lewa ke kgoši, le go nwa beine ye a bego a e nwa; ka gona a kgopela Ashpenase gore a mo dumelele gore a se ke a itšhilafatša, ₉gomme Modimo a dira gore Ashpenase a kwešiše sello sa Daniele. ₁₀Eupša Ashpenase a re go Daniele: “Ke tšhaba mong wa ka, e lego kgoši. Ke yena a laetšego gore le je eng le nwe eng, gomme ge lena le ka bonala le sa phele gabotse bjalo ka masogana ale a mangwe, a ka no mpolaya.”

₁₁Ka gona Daniele a ya go mookamedi yo Ashpenase a bego a mmeile go hlokomela yena le bagwera ba gagwe ka bararo, a re: ₁₂“Nke o re leke matšatši a lesome. Dijo tša rena e be merogo le meetse fela. ₁₃Ka morago o re bapetše le masogana ale a jago dijo tše di lewago ke kgoši, gomme o re dire se o bonago se re swanetše.”

₁₄Mookamedi a dumelelana le bona mme a ba leka matšatši a lesome. ₁₅Ya re ge matšatši ao a fetile, ba bonala ba kgahliša mme ba phedile gabotse go phala bohle bale ba bego ba eja dijo tše di bego di lewa ke kgoši. ₁₆Ke moka mookamedi a tšwela pele le go ba fa merogo bakeng sa dijo tšela ba bego ba swanetše go di fiwa.

₁₇Modimo a fa masogana ao a mane tsebo le kwešišo ya tša mangwalo le bohlale. Daniele yena o be a kgona le go hlatholla pono le toro efe le efe.

₁₈Ya re mafelelong a mengwaga yela ye meraro ya go bewa ke kgoši Ashpenase a iša masogana ale ka moka go Nebukadnesare. ₁₉Kgoši a bolela le bona, gomme Daniele, Hanania, Mishaele le Asaria ba mo kgahla go feta ba bangwe ka moka. Ka gona bona ba hlankela kgoši. ₂₀Dipotšišong ka moka tše kgoši a bego a ba botšiša tšona mabapi le bohlale le tlhaologanyo, o ile a bona gore ba phala didupe le dingaka galesome mmušong wa gagwe ka moka. ₂₁Daniele o ile a dula mošate go fihlela Kgoši Korese wa Persia a thopa Babilonia.

₁Ka ngwaga wa bobedi wa ge Nebukadnesare e le kgoši, o ile a lora. Toro yeo ya mo tshwenya kudu ya ba ya mo hlokiša boroko. ₂Ka gona a laela gore go bitšwe didupe, dingaka, boramaselamose le boradinaledi gore ba tle ba mo hlathollele toro ya gagwe. Ge ba fihla ba ema pele ga kgoši, ₃mme yena a re go bona: “Ke lorile toro, gome e a ntshwenya. Ke nyaka go tseba tlhathollo ya yona.”

₄Boradinaledi ba fetola kgoši ka Searamo ba re: “Nke kgoši a re phelele go ya go ile! Botša rena, bahlanka ba gago, toro ya gago, gomme re tla go hlathollela yona.”

₅Kgoši a re go bona: “Ke feditše le pelo gore lena le mpotše toro yeo le be le ntlhathollele yona. Ge le ka se kgone gona le tla ripaganywa, mme le mengwako ya lena ya fetošwa marope. ₆Eupša ge le ka kgona go mpotša toro yeo le tlhalošo ya yona, ke tla le putsa ka dimpho, ka le hlompha kudu. Bjale ge, mpotšeng toro yeo le tlhathollo ya yona.”

₇Bona ba fetola kgoši gape ba re: “Ge kgoši a ka no botša rena, bahlanka ba gagwe, toro yeo, re tla e hlatholla.”

₈Ge ba realo, kgoši a re: “Ke tsebile! Le re le leka go ikokeletša nako ka ge le bona gore ke ikemišeditše ₉go le otla ka kotlo e tee ge le ka se mpotše toro ya ka. Le lakane gore le fele le mpotša maaka le bohwirihwiri go fihlela mabaka a ka fetoga. Mpotšeng gore ke lorile eng, ke gona ke tlago tseba gore le tlhathollo ya toro yeo le ka kgona go mpotša yona.”

₁₀Boradinaledi ba mo fetola ba re: “Mong wa rena, ga go na motho mo lefaseng yo a ka botšago kgoši taba yeo. Le gona ga go kgoši, le ge e le ye kgolo goba ye maatla, ye e kilego ya nyaka taba ye bjalo go didupe le go dingaka le go boradinaledi. ₁₁Se kgoši a se nyakago se bothata mo e lego gore ga go motho yo a ka se botšago kgoši, ge e se medimo, gomme yona ga e dule le batho.” ₁₂Ge ba realo, kgoši a gakala, a galefa kudu gomme a laela gore dihlalefi tša Babilone tšohle di bolawe. ₁₃Ka fao gwa laelwa gore ka moka ga bona ba bolawe, gotee le Daniele le bagwera ba gagwe.

₁₄Daniele a ya go Arioko, molaodi wa baleti ba kgoši, yo a bego a šetše a ile go bolaya dihlalefi tšela. A bolela le yena gabotsana a iketletše yena, ₁₅a mmotšiša gore ke ka lebaka lang kgoši a laetše gore go dirwe sehlogo se sekaaka. Ka gona Arioko a botša Daniele taba tšeo.

₁₆Ke moka Daniele a ya go kgoši a mo kgopela gore a mo fe sebaka sa gore a tle a mo hlathollele toro yeo. ₁₇Daniele a ya mo a dulago gona, a fihla a botša bagwera bale ba gagwe, e lego Hanania, Mishaele le Asaria, tše di hlagilego. ₁₈A ba botša gore ba rapele Modimo wa legodimo gore a ba gaugele ka go ba hlathollela sephiri seo, gore ba tle ba se bolawe gotee le dihlalefi tšela tše dingwe tša Babilone. ₁₉Ya re bjona bošego bjoo Daniele a utollelwa sephiri seo ponong, gomme yena a tumiša Morena a re:

₂₄Ka gona Daniele a ya go Arioko, yo kgoši a bego a mo laetše go bolaya dihlalefi tša Babilone. A re go yena: “O se ke wa ba bolaya. Nkiše go kgoši gomme ke tla mo hlathollela toro ya gagwe.”

₂₅Ka bjako Arioko a iša Daniele go Kgoši Nebukadnesare, mme a re go yena: “Ke hweditše yo mongwe wa mathopša a Bajuda yo a ka hlathollelago kgoši toro ya gagwe.”

₂₆Kgoši a re go Daniele yo a bego a bitšwa le ka la Belteshatsare: “Na o ka kgona go mpotša toro ye ke e lorilego le tlhathollo ya yona?”

₂₇Daniele a mo fetola a re: “Mong wa ka, dihlalefi le dingaka le didupe le boradinaledi ba ka se kgone go botša kgoši taba yeo. ₂₈Fela go na le Modimo legodimong yo a utollago diphiri. O tsebišitše wena, Kgoši Nebukadnesare, tše di tlago hlaga mabakeng a a tlago. Bjale ge, toro ya gago, e lego pono ye o e bonego mola o robetše, še:

₂₉“Kgoši, ge o le malaong a gago o be o akanya tše di tlago hlaga mabakeng a a tlago, gomme Modimo, Moutolodi wa diphiri, a go tsebiša tšona. ₃₀Bjale ge, nna ke utolletšwe sephiri seo, e sego ka gobane nka ba ke le yo bohlale go phala batho ka moka, eupša e le gore wena, kgoši, o tle o hlathollelwe sephiri se, mme o kwešiše tše o bego o di akanya.

₃₁“Kgoši, mo ponong ya gago o ile wa bona seswantšho se segologolo sa motho se eme pele ga gago se phadima kudu, le gona se šiiša. ₃₂Hlogo ya sona e be e le ya gauta ye e sego ya tswakwa, kgara ya sona le matsogo e le tša silibera; letheka la sona le dinoka e le tša mphiri; ₃₃maoto e le a tshipi, gomme dinao tša sona e le tša tshipi le letsopa. ₃₄E rile o sa se lebeletše, gwa kgerega leswika – le se la kgorometšwa ke motho – la kgatla maoto a tshipi le letsopa a seswantšho sela la a pšhatlaganya. ₃₅Gateetee tshipi yela le letsopa le mphiri le silibera le gauta tša pšhatlagana mme tša ba bjalo ka mooko seboeng marega. Tša tšewa ke phefo, mme gwa se šale le mašaletšana. Leswika lela lona la gola ya ba thaba la tlala lefase ka moka.

₃₆“Ke yona toro ye o e lorilego. Bjale a ke go hlathollele yona, kgoši. ₃₇Wena kgoši, o kgoši ya dikgoši. Modimo wa legodimo o go beile mmuši, a go fa maatla le bogolo le tlhomphego. ₃₈O gafetše lefase le batho ba lona, le diphoofolo tša naga, le dinonyana tša legodimo diatleng tša gago, gomme a go bea mmuši wa tšona ka moka. Hlogo yela ya gauta ke wena. ₃₉Mmušo wa gago o tla latelwa ke wo mongwe wa go fetwa ke wa gago ka maatla, gomme woo wa latelwa ke wa boraro, mmušo wo o emetšwego ke mphiri, wo o tlago buša lefase lohle. ₄₀Ka morago ga woo go tla latela mmušo wa bone wa go tla boka tshipi ye e kgatlago tšohle ya di pšhatlaganya. Gomme bjalo ka ge tshipi e pšhatlaganya se sengwe le se sengwe, le wona o tla pšhatlaganya mme wa šilaganya mebušo yohle ye e bilego gona pele ga wona. ₄₁O ile wa bona le gore dinao le menwana e be e le tša tshipi le letsopa. Seo se ra gore e tla ba mmušo woo o aroganego. O tla ba le go tia ga tshipi, ka ge go bile le tshipi ye e hlakanego le letsopa. ₄₂Menwana yeo mo gongwe e bego e le tshipi mme mo gongwe e le letsopa e šupa gore karolo ye nngwe ya mmušo e tla tia, mola ye nngwe e tla fokola. ₄₃O ile wa bona le gore tshipi e hlakane le letsopa. Seo se šupa gore batho ba mmušo woo ba tla nyalelana, fela e ka se be selo se tee go no swana le ge tshipi e ka se tswakane le letsopa. ₄₄Mehleng ya babuši ba mmušo woo Modimo wa legodimo o tla hloma mmušo wo o ka se tsogego o fedišitšwe. O ka se tsoge o thopilwe ke wo mongwe, eupša wona o tla pšhatla mebušo yeo ye mengwe ka moka wa e fediša, mme wona ya ba wa go ya go ile. ₄₅O ile wa bona ka moo leswika le ilego la kgerega legageng le se la kgorometšwa ke motho, le ka moo le ilego la pšhatlaganya seswantšho sa tshipi le mphiri le letsopa le silibera le gauta. Modimo yo mogolo o go botša tše di tlago hlaga ka moso. Toro ye ke therešo, le tlhathollo ya yona ke nnete.”

₄₆Ke moka Kgoši Nebukadnesare a itahlela fase ka sefahlego a obamela Daniele, gomme a laela gore Daniele a tšhumelwe kabelo ya bupi le ya seorelo. ₄₇Kgoši a re: “Ruri, Modimo wa gago ke Modimo wa medimo, ke Morena wa magoši, ke Moutolodi wa diphiri, ka gobane wena o kgonne go utolla sephiri se.” ₄₈A nama a bea Daniele maemong a godimo, a mo fa le dimpho tše dintši tše dikgolo, a mmea mmušiši wa selete sa Babilone, a ba a mo dira hlogo ya dihlalefi tšohle tša Babilone. ₄₉Daniele a kgopela kgoši gore a bee Shadraka le Meshaka le Abednego balaodi ba tša selete sa Babilone, gomme kgoši a dumela; Daniele yena a dula mošate.

₁Kgoši Nebukadnesare o kile a laela gore go bopše seswantšho sa gauta, botelele bja sona e be dimetara tše 26,7, bophara e be tše 2,8, le gore se hlongwe molaleng wa Dura, seleteng sa Babilone. ₂Ke moka kgoši a laela gore bahlankedi ba gagwe ka moka ba kgobokane – babuši, babušiši, bathušababušiši, baeletši, boramatlotlo, baahlodi, bomaseterata, gotee le bahlankedi ba bangwe ba maemo ba dilete. Ba be ba swanetše go tla go kgakola seswantšhobopša seo Kgoši Nebukadnesare a bego a se hlomile. ₃E rile ge bahlankedi bao ka moka ba kgobokane go tlo kgakola seswantšhobopša mme ba eme pele ga sona, ₄segoeledi sa goelela sa re: “Lena ditšhaba le merafe le maleme ohle! ₅Ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se sa gauta se se hlomilwego ke Kgoši Nebukadnesare. ₆Yo a ka se itahlelego fase ka sefahlego a se khunamela, o tla lahlelwa moubelong mo go laumago mollo.” ₇Ka gona, e rile ge ditšhaba tšohle le merafe le ba maleme ka moka ba ekwa diletšo tšeo di lla, ba itahlela fase ka difahlego ba khunamela seswantšhobopša sa gauta se Kgoši Nebukadnesare a bego a se hlomile.

₈Ke moo Bababilonia ba bangwe ba hweditšego lebaka la go bega Bajuda. ₉Ba re go Kgoši Nebukadnesare: “Nke kgoši a re phelele go ya go ile! ₁₀Kgoši, mong wa rena, o laetše gore ge diletšo di lla mang le mang a itahlele fase ka sefahlego a khunamele seswantšhobopša sa gauta, ₁₁le gore yo a ka se dirego bjalo o swanetše go lahlelwa moubelong wo o laumago mollo. ₁₂Go na le Bajuda ba bangwe ba o ba beilego balaodi ba tša selete sa Babilone, e lego Shadraka le Meshaka le Abednego, ba ba tšeišago taelo ya gago phefo. Ga ba direle modimo wa gago goba ba khunamela seswantšhobopša sela o se hlomilego.”

₁₃Ge kgoši a ekwa seo a gakala, a tuka bogale, gomme a laela gore banna bao ba bararo ba tlišwe pele ga gagwe. Ge ba fihla, ₁₄a re go bona: “Wena Shadraka le Meshaka le Abednego, na ke nnete gore lena le gana go direla modimo wa ka le go khunamela seswantšhobopša sa gauta se ke se hlomilego? ₁₅Bjale ge, ge eba ga le gane, le re ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se ke se dirilego. Eupša ge le ka se dire ka mokgwa woo, le tla lahlelwa ka pelapela moubelong wo o laumago mollo. Kgane le gopola gore go na le modimo yo a ka le phološago diatleng tša ka?”

₁₆Shadraka le Meshaka le Abednego ba mo fetola ba re: “Mong wa rena, tabeng ye ga re nyake go iphetolela. ₁₇Ge Modimo yo re mo hlankelago a kgona go re hlakodiša moubelong wa mollo wo o laumago le diatleng tša gago, kgoši, gona yena o tla re hlakodiša. ₁₈Fela le ge a ka se re hlakodiše, wena kgoši, tseba gore modimo wa gago wona re ka se o direle, le seswantšhobopša sa gauta se o se hlomilego re ka se se khunamele.”

₁₉Ke mo Nebukadnesare a tletšego pelo gomme a galoga sefahlego ka go galefela Shadraka le Meshaka le Abednego. Ka gona a laela gore moubelo o tukišwe gašupa go feta mehleng. ₂₀A laela banna ba e lego dinatla mo bahlabaning ba gagwe gore ba tleme banna bao ba bararo mme ba ba lahlele moubelong wo o laumago mollo. ₂₁Ka gona banna bao ba tlengwa ba sa apere dipurapura tša bona le marokgo le mengatse le diaparo tše dingwe, gomme ba lahlelwa moubelong wo o laumago mollo. ₂₂Bjale ka gore kgoši o be a ba laile tsebegokwa gore moubelo o tukišwe kudu, kgabo ya wona e ile ya bolaya dinatla tšela di bego di lahlela banna bale moubelong. ₂₃Ke moka Shadraka le Meshaka le Abednego ba wela ka gare ga moubelo wo o laumago mollo ba sa tlemilwe.

₂₄Gateetee Nebukadnesare a emelela a tlabegile. A botšiša bakgomana ba gagwe a re: “Na ga ke re re lahletše banna ba bararo ka moubelong ba tlemilwe?”

Bona ba mo fetola ba re: “Ee, go bjalo, kgoši.”

₂₅Kgoši a re: “Eupša ke bona banna ba bane ba sepelasepela ka gare ga mollo! Ga se ba tlengwa, le gona ga o ba dire selo – gomme yola wa bone nke ke sebopiwa sa legodimong.”

₂₆Ke moka Nebukadnesare a ya mojako wa moubelo woo mme a ba bitša a re: “Shadraka! Meshaka! Abednego! Lena bahlanka ba Modimo Yogodimodimo, etšwang le tle mo!” Gommme ba tšwa. ₂₇Babuši, babušiši, bathušababušiši le baeletši ba kgoši ba kgobokana gomme ba bona banna bao ba bararo, mme ba lemoga gore mollo ga se wa ba dira selo. Meriri ya bona e be e se ya tlaboga, diaparo tša bona di se tša swa, le gona ba sa nkge mollo.

₂₈Kgoši a re: “A go retwe Modimo wa Shadraka le Meshaka le Abednego! O romile morongwa wa gagwe a hlakodiša bahlanka ba ba gagwe ba ba mmotilego. Ba nyaditše ditaelo tša ka gomme ba gafa bophelo bja bona, ba se direle modimo o šele ba o khunamela, ge e se wa bona.

₂₉“Gomme bjale ke laela gore ge motho wa setšhaba sefe goba morafe ofe goba leleme lefe a ka nyefola Modimo wa Shadraka le Meshaka le Abednego, o swanetše go ripaganywa, le ngwako wa gagwe o fetošwe lešope. Ga go na le modimo wo mongwe wo o ka phološago ka mokgwa wo.”

₃₀Gomme kgoši a bea Shadraka le Meshaka le Abednego maemong a godimo go feta a pele seleteng sa Babilone.

₁Kgoši Nebukadnesare a romela molaetša go ba ditšhaba tšohle, le ba merafe yohle, le ba maleme ohle ba ba agilego lefaseng lohle a re:

“Nke le ka okeletšwa katlego! ₂Ke thabela go le begela dimakatšo le mehlolo ye Modimo Yogodimodimo a ntiretšego yona.

₄“Nna, Nebukadnesare, ke be ke dutše ka ga ka ke iketlile, ke atlegile ka mošate. ₅Eupša ka re ke robetše ka lora toro ya go tšhoša, ka bona dipono tše di šiišago. ₆Ka laela gore bahlale bohle ba Babilone ba tlišwe go nna gore ba tle ba ntlhathollele toro yeo. ₇Gwa tla boramaselamose le bonkadingala le boradinaledi le didupe, gomme ka ba botša toro ya ka, eupša bona ba palelwa ke go ntlhathollela yona. ₈Mafelelong gwa tsena Daniele. Yena o tsebja le ka la Belteshatsare, ka ge a theeletšwe modimo wa ka. Moya wa medimo ye mekgethwa o mo go yena, ka gona ka mmotša toro ya ka ka re: ₉Wena Belteshatsare, mookamedi wa boramaselamose, ke a tseba gore moya wa medimo ye mekgethwa o mo go wena, le gore ga go sephiri se se go palelago. Toro ya ka še. Ntlhathollele yona.

₁₀“Ke rile ke robetše ka bona pono ya sehlare se seteleletelele gare ga lefase. ₁₁Se ile sa gola sa tia, sa ba sa fihla leratadimeng, sa bonwa ke mang le mang mo lefaseng. ₁₂Matlakala a sona e be e le a mabotse, se entšwe e le ruri, gomme se fepa bohle. Diphoofolo tša naga di be di dula moriting wa sona, dinonyana di agela makaleng a sona, le diphedi ka moka di eja dienywa tša sona.

₁₃“Moo ponong ya ka ya borokong ke ile ka bona morongwa a ntšhitše mahlo dinameng a theoga legodimong. ₁₄A goeletša a re: ‘Remang sehlare seo mme le se ripe makala; se hlohloreng matlakala, le gašanye dienywa tša sona. Rakang diphoofolo moriting wa sona le dinonyana makaleng a sona. ₁₅Fela kutu ya sona le medu le e tlogele mobung e kgokilwe ka tshipi le mphiri ka mabjanyeng a lešoka.

“ ‘A monna yo a welwe ke phoka, a phele le diphoofolo gare ga dimela tša lešoka. ₁₆Monagano wa gagwe o tla tšea mengwaga ye e šupago o fetogile wa phoofolo. ₁₇Ke yona kahlolo ye e ntšhitšwego ke bale ba go ntšha mahlo dinameng, ke sephetho se se begilwego ke barongwa, gore bohle ba tsebe gore Yogodimodimo o na le maatla a go laola mebušo ya batho, le gore a ka no e fa yo a mo ratago, ešita le yo a nyatšegago kudu gare ga batho.’

₁₈“Ke yona toro ye nna, Kgoši Nebukadnesare, ke e lorilego. Bjale wena, Belteshatsare, ntlhathollele yona ka ge bahlale bohle ba mmušo wa ka ba paletšwe. Wena o ka kgona, ka gobane moya wa medimo ye mekgethwa o mo go wena.”

₁₉Daniele, yo a bitšwago le ka la Belteshatsare, ge a ekwa kgoši a realo a tšhoga mo e lego gore o ile a tšea sebaka a sa kgone go bolela selo. Kgoši a re go yena: “Belteshatsare, o se tšhošwe ke toro ye le tlhathollo ya yona.”

Belteshatsare a mo fetola a re: “Mong wa ka, nke nkabe toro ye e lebantše bahloi ba gago, le tlhathollo ya yona e lebantše manaba a gago! ₂₀Sehlare se o se bonego se gola, se tia, sa ba sa fihla leratadimeng sa bonwa ke bohle mo lefaseng, ₂₁sa matlakala a mabotse, sa go enywa kudu, sa fepa bohle, seo diphoofolo tša naga di dulago moriting wa sona, le dinonyana di agelago makaleng a sona, ₂₂ke wena, kgoši. O godile wa tia, wa ba wa fihla leratadimeng, gomme maatla a gago a akaretša lefase ka moka. ₂₃Wena, kgoši, o bone morongwa yo a ntšhitšego mahlo dinameng a theoga legodimong a re: ‘Remang sehlare seo le se fediše, fela le tlogele kutu ya sona le medu mobung e kgokilwe ka tshipi le mphiri ka mabjanyeng a lešoka. A monna yo a welwe ke phoka, gomme a phele le diphoofolo tša naga mengwaga ye e šupago.’

₂₄“Bjale ge, kgoši, tlhathollo ya toro yeo še, gomme ke kahlolo ye Yogodimodimo a ahlotšego wena kgoši, mong wa ka, ka yona. ₂₅O tla rakwa bathong, wa yo phela le diphoofolo tša naga mengwaga ye e šupago, wa fula bjang bjalo ka kgomo, wa welwa ke phoka. O tla phela bjalo go fihlela o dumela gore mebušo yohle ya batho e laolwa ke Yogodimodimo, le gore yena o e fa yo a mo ratago. ₂₆Barongwa ba laetše gore go šadišwe kutu le medu ka mobung. Seo se šupa gore o tla boela wa ba kgoši mohla o dumelago gore lefase lohle le bušwa ke Modimo wa legodimo. ₂₇Ka gona, kgoši, nke o amogele keletšo ya ka. Tlogela go dira dibe, o dire tše di lokilego, o lahle tše kgopo, o thuše badiidi. Ke gona o tlago fela o atlega.”

₂₈Tšeo ka moka di ile tša hlagela Kgoši Nebukadnesare. ₂₉Ge go fetile dikgwedi tše lesome le tše pedi, ge a ntše a itshepelela godimo ga tlhaka ya ntlo ya mošate kua Babilone, ₃₀a re: “Na ye ga se yona Babilone, motse serantlatla wo ke o agilego ka maatla a ka a magolo, ya ba motsemošate, gore ke kgantšhe letago la ka le bogoši?”

₃₁Ya re a sa realo, gwa kwagala lentšu le le tšwago legodimong le re: “Wena Kgoši Nebukadnesare, theeletša se ke go botšago sona! Bjale o amogilwe bogoši. ₃₂O tla rakwa bathong, wa yo phela le diphoofolo tša lešoka, gomme wa fula bjang bjalo ka kgomo mengwaga ye e šupago. O tla phela bjalo go fihlela o dumela gore mebušo ya batho e laolwa ke Yogodimodimo, le gore o e fa yo a mo ratago.”

₃₃Ka yona nako yeo gwa phethagala tše di bego di boletšwe. Nebukadnesare a rakwa bathong, gomme a fula bjang bjalo ka kgomo; a welwa ke phoka, moriri wa gagwe ya ba setšhitšhi, wa lekana le mafofa a ntšhu, le dinala tša gagwe ya nke ke tša lenong.

₃₄Kgoši a re: “E rile ge go fetile mengwaga ye e šupago yeo, nna, Nebukadnesare, ka lebelela godimo leratadimeng, gomme tlhaologanyo ya ka ya boela sekeng. Ka reta Yogodimodimo, ka hlompha yena Mophelelaruri, mme ka mo tumiša.

₃₆“E rile ge tlhaologanyo ya ka e boetše sekeng tlhomphego ya ka ya mpoela, le bogoši, le seriti sa ka sa go buša. Mantona a ka le bakgomana ba nketela, ka bušetšwa sekeng, gomme bogolo bja ka bja feta le bja pele. ₃₇Gomme bjale nna, Nebukadnesare, ke reta Kgoši ya legodimo, ke a mo godiša, ebile ke a mo tumiša, gobane tšohle tše a di dirago di lokile ebile di a swanela, gomme yena o kgona go kokobetša ba ba ikgogomošago.”

₁Kgoši Belshatsare o kile a direla bakgomana ba gagwe ba sekete monyanya wo mogolo, gomme a nwa beine le bona. ₂Ya re ge ba thoma go tagwa Belshatsare a laela gore go tlišwe dibjana tša gauta le tša silibera tšela Nebukadnesare, tatagwe, a kilego a di thotha ka Tempeleng kua Jerusalema. Kgoši a laela gore di tlišwe gore yena le bakgomana le basadi ba gagwe le metlabo ba tle ba nwe ka tšona. ₃Ka gona dibjana tšeo tša gauta tša tlišwa, gomme ba nwa ka tšona ₄ba reta medimo ya gauta le ya silibera le ya mphiri le ya tshipi le ya kota le ya leswika.

₅Gateetee gwa tšwelela seatla, gomme sa thoma go ngwala mo lebotong le le ritetšwego la ntlo ya mošate moo go bego go lebane le mabone. Kgoši a bona seatla seo se ngwala. ₆A galoga sefahlego ka letšhogo, a repha dinoka, le dikhuru tša gagwe tša tiana. ₇A goelela a re go bitšwe dingaka, boradinaledi le didupe. Ge ba fihla kgoši a re go bona: “Yo a ka kgonago go bala tše di ngwadilwego mo mme a ntlhathollela tšona, o tla apešwa seaparo sa bogoši sa bohubedu bja go retela le pheta ya gauta, gomme ya ba wa boraro ka maemo mmušong wa ka.” ₈Dihlalefi tša kgoši tša tla, eupša tša se kgone go bala tše di ngwadilwego moo goba go di hlathollela kgoši. ₉Kgoši Belshatsare a tšhoga kudukudu, a galoga sefahlego go iša pele, gomme bakgomana bale ba gagwe ba gakanega.

₁₀Mmakgoši o ile a kwa lešata la kgoši le bakgomana ba gagwe, gomme a tsena ka ntlong ya monyanya a re: “A kgoši a re phelele go ya go ile! O se ke wa tšhoga ka tsela ye wa ba wa galoga le sefahlego. ₁₁Go na le monna ya mongwe mo mmušong wa gago yo a nago le moya wa medimo ye mekgethwa. Mehleng ya ge go buša tatago go ile gwa lemogwa gore monna yoo o na le tlhaologanyo, temogo le bohlale bja go etša bja medimo. Ka gona Kgoši Nebukadnesare, tatago, a mo dira hlogo ya didupe, dingaka, boradinaledi le mekome. ₁₂Ke makgone yo mogologolo gomme o na le kwešišo le tlhaologanyo ya go hlatholla ditoro, go nyepolla dinyepo, le go rarolla tše di sa kwešišegego. Ka gona laela gore monna yo ba rego ke Daniele, yo tatago a mo theilego leina la Belteshatsare, a yo bitšwa gomme yena o tla go botša gore tše di ngwadilwego mo di ra eng.”

₁₃Ke moka Daniele a tlišwa go kgoši, gomme kgoši a mmotšiša a re: “Na o yena Daniele, lethopša lela la Mojuda le tate, kgoši, a le tlišitšego mo le mathopša a mangwe a Bajuda? ₁₄Ke kwele gore moya wa medimo ye mekgethwa o mo go wena, le gore o na le tlhaologanyo le temogo le bohlale bjo bogologolo. ₁₅Dingaka, e lego tšona dihlalefi, di be di tlišitšwe mo go nna go tlo mpalela le go ntlhathollela tše di ngwadilwego mo, eupša ba paletšwe ke go di hlatholla. ₁₆Ke kwele gore wena o kgona go hlatholla le go rarolla tše di sa kwešišegego. Ge o ka bala tše di ngwadilwego mo gomme wa ntlhathollela tšona, o tla apešwa seaparo sa bogoši sa bohubedu bja go retela le pheta ya gauta, gomme wa ba wa boraro ka maemo mmušong wa ka.”

₁₇Daniele a mo fetola a re: “Itulele le dimpho tšeo tša gago goba o fe yo mongwe dineo tšeo. Eupša tše di ngwadilwego ke tla no go balela ka ba ka go hlathollela tšona, kgoši.

₁₈“Modimo Yogodimodimo o be a file Nebukadnesare, tatago, bogoši le bogolo le seriti le borena. ₁₉Modimo o be a mo file maatla mo e lego gore ditšhaba tšohle le merafe yohle le ba maleme ohle ba be ba mo tšhaba mme ba thothomela. Yo a nyakago go mmolaya o be a mmolaya; yo a nyakago gore a fele a phela, o be a phela. Ge a nyaka go hlompha motho o be a mo hlompha; ge a nyaka go kokobetša motho le gona o be a mo kokobetša. ₂₀Eupša ya re ge a thoma go ikgogomoša le go ngangabala le go ikgantšha, a tlošwa setulong sa gagwe sa bogoši mme a amogwa seriti. ₂₁A rakwa bathong gomme a ba bjalo ka phoofolo, a phela le dipitsi, a fula bjang bjalo ka kgomo, a thapišwa ke phoka bošego. Mafelelong a dumela gore Modimo Yogodimodimo ke yena a laolago mebušo yohle ya batho gomme o e beela babuši ba a ba ratago.

₂₂“Eupša wena Belshatsare, morwagwe, ga se wa ikokobetša etšwe tšeo ka moka o di tsebile. ₂₃O ikgantšheditše Morena wa legodimo, wa laela gore ba go tlišetše dibjana tšela tša ka Tempeleng ya gagwe. Wena le bakgomana le basadi ba gago le metlabo la nwa beine ka tšona gomme la reta medimo ya silibera, le ya gauta, le ya mphiri, le ya tshipi, le ya kota, le ya leswika – medimo ye e sa bonego gape e sa kwego, le gona e sa tsebego selo. Eupša Modimo yo a swerego bophelo bja gago gape a laolago tšohle tše o di dirago, ga se wa mo hlompha. ₂₄Ke ka lebaka leo Modimo a romilego seatla sela gore se tle se ngwale tše di ngwadilwego mo.

₂₅“Mo go ngwadilwe: ‘Badilwe, badilwe, boima, dikarolo.’ ₂₆Tlhathollo še: badilwe ke go re Modimo o badile matšatši a mmušo wa gago gomme a o fediša; ₂₇etšwe boima ke go re o etšwe boimakelong gomme wa hwetšwa o le bofefo kudu; ₂₈arotšwe ke go re mmušo wa gago o arotšwe ka bogare wa fiwa Bamedia le Bapersia.”

₂₉Ke moka Belshatsare a laela bahlanka ba gagwe gore ba apeše Daniele seaparo sa bogoši sa bohubedu bja go retela, le pheta ya gauta. A bega gore ke wa boraro ka maemo mmušong wa gagwe. ₃₀Bjona bošego bjoo Belshatsare, kgoši ya Babilonia, a bolawa.