DIEMA 30

₂“Nna ke lešilo la mašilo,

ga ke na tlhaologanyo ya setho.

₃Ga se ka ithuta bohlale,

le yena Mokgethwa ga ke mo tsebe.

₄Ke mang yo a kilego a rotogela legodimong a ba a theoga?

Ke mang yo a kilego a khuparela phefo ka diatla?

Ke mang yo a kilego a phuthela mawatle ka lešela?

Ke mang yo a beilego mellwane ya lefase?

Ke mang? Morwa wa gagwe yena ke mang?

Mpotšeng ge le tseba.

₅“Modimo o tshephagala go tšohle tše a di bolelago.

Ke kotse ya ba ba tšhabelago go yena.

₆O se oketše tše a di boletšego,

ka gore a ka go sola,

a bona o le wa maaka.”

₇Ke go kgopela dilo tše pedi;

o se ntime tšona pele ke ehwa:

₈Boradia le maaka o di tloše di be kgole le nna;

o se ke wa ntiitša goba wa nkhumiša.

O mphe dijo tše di ntekanego,

₉gobane ge nka ba le dijo tše dintši,

nka tla ka go latola ka re ga ke go hloke.

Le gona,

ge nka diila nka utswa,

mme ka go hlompholla,

wena, Modimo wa ka.

₁₀O se sebe lekgoba go mong wa lona,

ka gore le ka go roga, wa lefa ka setopo.

₁₁Go na le mohuta wa batho ba ba rogakago botatagobona,

le gona ba bolelago bommagobona gampe.

₁₂Go na le mohuta wa batho ba ba iponago ba hlwekile,

etšwe ba se ba hlatswiwe tšhila ya dibe tša bona.

₁₃Go na le mohuta wa batho ba ba iponago kudu,

ba ba lebelelago batho ka go ba nyatša.

₁₄Go na le mohuta wa batho ba meno a nkego ditšhoša,

a nkego dithipa a go garola badiidi lefaseng,

le go fediša bahloki bathong.

₁₅Kgofa e na le barwedi ba babedi ba ba kgopelago ba re: “Mphe! Mphe!”

Go na le dilo tše tharo tše di sa kego di kgotsofala,

gabotsebotse ke tše nne tše di sa kego di re: “Go lekane!” –

₁₆ke bodulabahu,

le mosadi wa moopa,

le naga ye e sa kwelelego meetse,

le mollo wa hlaga wo o sa kego o re: “Go lekane!”

₁₇Yo a kwerago tatagwe,

goba a ganago go phetha taelo ya mmagwe,

o tla gonywa mahlo ke magokobu,

a lewa ke manong.

₁₈Go na le dilo tše tharo tše di ntlabago kudu,

gabotsebotse ke tše nne tše ke sa di kwešišego:

₁₉ke ka mo nong e fofago sebakabakeng,

le noga e sepelago letlapeng,

le leselawatle le sepelago lewatleng,

le monna le mosadi ba thomago go ratana.

₂₀Tša mosadi wa seotswa šedi:

O re go otswa a hlape, mme a re:

“Nna ga se ka dira phošo!”

₂₁Go na le dilo tše tharo tše di dirago gore lefase le roromele,

gabotsebotse ke tše nne tše lefase le sa di kgotlelelego:

₂₂ke lekgoba le e bago kgoši,

le setlaela se se sosomatšwago ke mokhora,

₂₃le mosadi wa mohloiwa yo a nyalwago,

le lekgoba la mosetsana le le amogago mong wa lona monna.

₂₄Go na le diphedi tše nne mo lefaseng tše e lego tše nnyane,

eupša e lego tše bohlalehlale:

₂₅Makeke: ke mohuta wo o sego wa tia,

eupša a ipolokela dijo selemo;

₂₆dipela:

le tšona ke mohuta wo o sego wa tia,

eupša di ikagela legae ka gare ga maswika;

₂₇tšie: ga e ne kgoši,

eupša ka moka e fofa ka serupa;

₂₈mokgaditswane:

le ka seatla o ka o swara,

eupša o hwetšwa le ka mengwakong ya mošate.

₂₉Go na le diphedi tše tharo tša go šataka ka bothakga;

gabotsebotse ke tše nne tša go gwataka ka bokgwari:

₃₀ke tau,

phoofolo ye e tiilego go feta tšohle,

ye e se nago se e se tšhabago;

₃₁ke mokoko wo o gwantago;

ke phoko,

le kgoši ge e etile batho ba yona pele.

₃₂Ge eba o kile wa ba setlaela,

wa ikgodiša mme wa loga maanomabe, tlogela!

₃₃Go thitha maswi ke go ntšha sereledi;

go itia motho nko ke go mo ntšha mokola;

go hlohleletša kgalefo ke go hlola phapano.