To The Word – Day 181

₁Morena a re go nna: ₂“Eya lapeng la mmopi wa dipitša, gomme moo ke tla go botša se o swanetšego go se botša setšhaba sa Israele.” ₃Ka fao ka ya gona gomme ka hwetša mmopi a le modirong wa gagwe wa go bopa. ₄Ge a be a ka re a bopa pitša ya se bopege gabotse, o be a tšea letsopa leo a bope ye nngwe ye e mo kgahlago.

₅Ke moo Morena a rilego go nna: ₆“Lena setšhaba sa Israele, kgane nna ga ke kgone go le dira seo mmopi a se dirilego letsopa lela? Bjalo ka ge mmopi a dira letsopa se a se ratago, le nna ke le dira se ke se ratago. ₇Ge ka nakwana nka re ke yo hlahlamolla goba ke yo uša goba ke yo fediša setšhaba se sengwe goba mmušo, ₈fela setšhaba seo sa tlogela bokgopo bja sona, gona nka se ba dire bošula bjo ke bego ke ikemišeditše bjona. ₉Eupša ge nka re ke re ke yo hloma goba ke yo aga setšhaba goba mmušo, ₁₀fela setšhaba seo sa se ntheeletše, mme sa dira tše ke bonago e le tše mpe, gona nka se se direle tše dibotse tše ke bego ke ikemišeditše go se direla tšona. ₁₁Bjale ge, o botše batho ba Juda le badudi ba Jerusalema gore ke ba logela maano, ke ba obela masetlapelo. O ba botše gore ba lese go phela bophelo bjo bobe – ba lahle mekgwa le ditiro tša bona. ₁₂Bona ba tla go fetola ba re: ‘Aowaa, go ka se re hole selo. Rena re tla dira se re se ratago; ka moka ga rena re tla ba le manganga, ra ba ba babe ka moo re ratago ka gona.’ ”

₁₃Ka gona Morena o re:

₁₈Ke moo setšhaba se rilego: “A re lakaneng Jeremia! Go tla no fela go na le baprista ba go re ruta, le banna ba bohlale ba go re eletša, le baprofeta ba go bega molaetša wa Modimo. A re mo tanyeng ka tše a di boletšego, gomme re lese go mo theeletša.”

₁₉Ka gona nna ka rapela ka re: “Morena, nke o ele se ke se bolelago hloko, o kwe tše manaba a ka a di bolelago. ₂₀Na e ka ba go loka go lefiwa ka bobe? Gape bona ba nkepetše molete gore ke wele ka go wona. Gopola ka moo ke ilego ka tla go wena ka ba rerelela gore o se sa ba galefela. ₂₁Eupša bjale, Morena, bolaya bana ba bona ka tlala; ba bolawe ge ntwa e tsogile. A basadi ba bona ba hwelwe ke bana, le gona e be bahlologadi. A banna ba hwe ka bolwetši bja leuba, masogana a bolawe ntweng. ₂₂A setšhaba se tle se goe se lle ge bahlakodi ba hula malapa a sona se sa itebetše. Ba nkepetše molete gore ke wele ka go wona, ba theile le melaba gore e ntanye. ₂₃Eupša wena Morena o tseba maano ohle a bona a go mpolaya. O se ke wa ba swarela molato wa bona, goba wa ba lebalela sebe sa bona. A ba ušwe fase pele ga gago, gomme o ba otle o galefile.”

_1-2Morena a re go nna: “Eya go reka pitša. O tšwele ka ntle ga motse o ye moeding wa Hinomo wo o lego kgauswi le Lesoro la Mangetana o felesetšwa ke ba bangwe ba bagolo ba setšhaba le baprista ba bangwe ba bagolo. Moo o fihle o bege molaetša wo ke tlago go fa wona. ₃O re: Lena magoši a Juda le lena badudi ba Jerusalema, ekwang se Morena Ramaatlaohle, Modimo wa Israele, a se bolelago. O tlilo tlišetša lefelo le masetlapelo a magolo moo e lego gore mang le mang yo a kwago tša ona o tla gakgamala. ₄Taba yeo o tla e dira ka gobane batho ba mo tlogetše mme ba dirile felo mo lefelo la go khunamela medimo e šele. Ba tšhumetše medimo ye mengwe dihlabelo gona – medimo ye bona le borakgolokhukhu ba bona le magoši a Juda ba bego ba sa e tsebe. Ba tladitše lefelo le madi a bahlokamolato, ₅gomme ba bopetše Baale dintotoma gore ba tle ba tšhumele bana ba bona gona e be dihlabelo. Ba dirile se a sego a ba laela sona, goba a se bolela, goba a se nagana. ₆Ka gona, go tla tla nako yeo lefelo le le ka se sa bitšwago Tofete goba moedi wa Hinomo, le tla bitšwa Moedi wa Polao. ₇Gona fa ke mo a tlago fetoša maano a batho ba Juda le ba Jerusalema difefe. O tla lesa manaba a bona, e lego batho ba ba nyakago go ba bolaya, ba ba gagara ntweng. Ditopo tša bona o tla di gafela manong le dibata gore di di je. ₈Motse wo o tla o thuba wa tšhoša batho, mme mofeti yo mongwe le yo mongwe o tla gakgamala, a kgotsa ka molodi tshenyo yeo ye kgolo. ₉Manaba a tla dikanetša motse a leka go bolaya batho ba wona. Go dikanetšwa moo go tla šiiša mo e lego gore o tla dira gore batho ba gona ba je bana ba bona; ba tla jana seng.

₁₀“Ke moka o pšhatle pitša yela pele ga banna bao ba go feleseditšego, ₁₁gomme o ba botše gore nna, Morena Ramaatlaohle, ke re: ‘Ke tla pšhatlaganya batho ba le motse wo bjalo ka motho ge a pšhatlaganya pitša mo e ka se sa kgonago go momaganywa gape. Batho ba tla ipolokela bahu ba bona gona moo Tofete, ka gobane go tla be go se sa na bobolokelo bjo bongwe. ₁₂Nna Morena ke re ke tla dira motse wo le badudi ba wona tša Tofete. ₁₃Dintlo tša Jerusalema le dintlo tša magoši a Juda, gabotsebotse dintlo tšohle tšeo godimo ga ditlhaka tša tšona letšatši le ngwedi le dinaledi di bego di tšhumelwa diorelo, gape tšeo godimo ga tšona medimo ye mengwe e bego e tšhollelwa seno e le kabelo – tšohle di tla be di tšhilafetše go etša Tofete.’ ”

₁₄Jeremia a napa a tloga Tofete moo Morena a bego a mo romile gore a ye go bega molaetša wa gagwe. A fihla a ema ka kgorong ya Tempele a botša batho bohle ₁₅gore Morena Ramaatlaohle, Modimo wa Israele, o rile: “Motse wo le metsana yohle ya kgauswi le wona ke tla e tlišetša masetlapelo ohle a ke a boletšego, ka gobane batho ba gona ba ngangabetše, ba ganne go kwa tše ke bego ke ba botša tšona.”

₁Moprista Pashure, morwa wa Imere, e be e le mohlankedimogolo wa ka Tempeleng. Ge a ekwa Jeremia a bega ditaba tše, ₂a laela gore a bethwe, a be a tlengwe maoto dikoteng lesorong la Benjamene la ka godimo Tempeleng. ₃Mosong wa letšatši le le latelago, ge Pashure a seno lokolla Jeremia, Jeremia a re go yena: “Morena ga a sa go bitša ka la Pashure, o go bitša ka la ‘Poifokagohle’, ₄ka gobane yena o rile: ‘Ke tla go dira moipoifi wa go boifša le ke bagwera ba gago ka moka, gomme ba tla bolawa ke manaba ka tšhoša o lebeletše. Ke yo gafela batho ka moka ba Juda diatleng tša kgoši ya Babilonia, yena a ba thopela Babilone, goba a ba bolaya. ₅Le gona ke tla lesa manaba a bona a thopa lehumo lohle la motse wo, gomme a thopa le dithoto tšohle tša wona, le dilo tšohle tše bohlokwa, ešita le mahumo ohle a magoši a Juda, a thotha tšohle a di iša Babilonia. ₆Ge e le wena, Pashure, le bohle ba lapa la gago le tla thopša la išwa Babilonia. O tla hwela gona, wa bolokwa gona, wena le bagwera ba gago ka moka bao o ba boditšego maaka o re o boditšwe ke nna.’ ”

₁Kgoši Tsedekia wa Juda o ile a roma Pashure, morwa wa Malkia, le moprista Sofonia, morwa wa Maasea, go Jeremia a mo kgopela a re: ₂“Nke o re botšišetše go Morena gore na go tlilo diregang, ka gobane Nebukadnesare, kgoši ya Babilonia, o lwa le rena. Mohlomongwe Morena a ka re direla mohlolo wa gagwe wo mongwenyana bjalo ka ge a fela a re direla, wa go dira gore Nebukadnesare a re tlogele.”

₃Jeremia a ba fetola ka go re: “Le botše Tsedekia ₄gore Morena Modimo wa Israele o re: ‘Ke tlilo fenya madira a gago ao a lwago le kgoši ya Babilonia le madira a gagwe ao a le dikaneditšego ka ntle ga morako. Ke tla kgobela dibetša tša madira a gago gare ga motse. ₅Nna ka sebele ke tla lwa le lena ka maatla a ka ka moka ke galefile ebile ke befetšwe o šoro. ₆Ke tla bolaya badudi ba motse wo; batho le diphoofolo di tla bolawa ke leuba le lešoro la bolwetši. ₇Ya ba gona ke gafelago wena, Kgoši Tsedekia wa Juda, le bahlanka ba gago, le mašaledi a motse wo a a phologilego leubeng le ntweng le tlaleng diatleng tša Kgoši Nebukadnesare wa Babilonia le go tša manaba a lena a a nyakago go le bolaya. Nebukadnesare o tla le bolaya. A ka se le šokele, goba a le babalela, goba a le hlomogela pelo. Ke realo, nna, Morena.’ ”

₈Ka morago ga moo Morena a ntaela gore ke tsebiše setšhaba ke re: “Theeletšang! Nna Morena ke re ikgetheleng tsela ye e išago bophelong, goba ye e išago lehung. ₉Yo a šalago mo motseng o tla bolawa ka tšhoša, goba ka tlala, goba ka leuba la bolwetši. Eupša yo a ka tšwelago ntle a ineela go Bababilonia bao bjale ba le dikaneditšego o tla iphološa, a ka se bolawe. ₁₀Ke ikemišeditše go se babalele motse wo, eupša go o fediša. O tla gafelwa go kgoši ya Babilonia, gomme yena o tla o tšhuma thokgethokge. Ke realo, nna, Morena.”

_11-12Morena a mpotša gore ke re go ba lapa la mošate wa naga ya Juda: “Lena ditlogolo tša Dafida, ekwang se nna, Morena, ke se bolelago. Le šetše gore go dirwe toka ka mehla. Le lamolele mohlalefetšwa go mohlalefetši wa gagwe, gore tše mpe tše le di dirago di se laumiše kgalefo ya ka bjalo ka mollo wa go hloka motimi. ₁₃Ke lwa nago, wena Jerusalema, kokamamoedi, selalatlapeng. Wena o re ga go yo a kago go hlasela goba a šwahla dibo tša gago. ₁₄Fela nna ke tlilo go otla ka mo go swanelago ditiro tša gago. Ke tla tšhuma sethokgwa sa gago ka mollo mme wona wa fiša sengwe le sengwe se se o dikologilego. Ke realo, nna, Morena.”

₁Morena a mpotša gore ke ye mošate, ga kgoši ya Juda, ₂ke fihle ke re: “Ekwa gore Morena o reng, wena kgoši ya Juda o bušago o le setlogolo sa Dafida, wena le bahlanka ba gago le setšhaba sa gago se se tsenago ka dikgoro tša mošate. ₃O re: ‘Le direng tše di lokilego le tše di swanelago; le lamolele mohlalefetšwa go mohlalefetši wa gagwe; le se gatelele goba la hlakiša mofaladi, goba tšhiwana, goba mohlologadi, le gona le se bolaye ba ba se nago molato mo mošate. ₄Ge ruri le ka dira ka mo ke le laetšego ka gona, gona ditlogolo tša Dafida di tla tšwela pele le go buša. Gomme bona le bahlanka ba bona le setšhaba sa bona ba tla fela ba tsena ka dikgoro tša mošate wo ba nametše dikoloi tša ntwa, ba nametše le dipere. ₅Eupša ge le ka se phethe ditaelo tša ka, gona ke ikana gore mošate wo o tla fetoga mašope.’ Ke realo, nna, Morena.

₆“Go nna, motse wa mošate, ga kgoši ya Juda, ke wo mobotse bjalo ka naga ya Gileade le ntlhora ya dithaba tša Lebanone; eupša ke tla o fetoša leganata, ka o fetoša motse wa go hloka badudi. ₇Ke tla roma banna ba go yo o pšhatla. Mongwe le mongwe o tla ya a swere selepe a phapha dikota tša wona tše dibotse tša mosedere, a di lahlela mollong.

₈“Ka morago batho ba bantši ba ditšhaba ba tla feta kgauswi le motse wo, mme ba botšišana gore go tlile bjang gore nna, Morena, ke dire taba ya mohuta wo motseng wo wo mogolo. ₉Gomme ba tla fetolana ka gore ke ka lebaka la ge ba furaletše kgwerano ya ka le lena, nna, Morena Modimo wa lena, la khunamela medimo ye mengwe la e hlankela.”

₁₁Mabapi le Shalume, morwa wa Josia, kgoši ya Juda, yena Shalume yo a bušago legatong la tatagwe, mme bjale a tlogilego mo, Morena o re: “A ka se sa boa, ₁₂gobane o tla hwela nageng yeo a thopetšwego go yona, gomme a ka se sa tsoga a bone naga ye.”

₁₈Ka lebaka leo, Morena o bolela ka morwa wa Josia, Joyakime, kgoši ya Juda, o re:

₂₄Morena a re go Joyakine, morwa wa Kgoši Joyakime wa Juda: “Ruri, ka ge ke le Morena yo a phelago, le ge o ka be o le palamonwana ya boitsebišo mo seatleng sa ka sa go ja, ke be ke tla go khwamola, ₂₅ka go gafela batho ba ba nyakago go go bolaya, batho ba o ba boifago, e lego Nebukadnesare, kgoši ya Babilonia, le madira a gagwe. ₂₆Ke tla le lelekela nageng e šele, wena le mmago, nageng ye le sego la tswalelwa go yona, gomme le tla hwela gona. ₂₇Le tla duma go boela nageng ye, eupša le ka se boele.”

₂₈Na Kgoši Joyakine o swana le lengeta la pitša ye e phumegilego mme ya lahlwa, le le sa nyakwego ke motho? Na ke ka lebaka leo yena le bana ba gagwe ba rakwago mme ba lahlelwa nageng ye ba sa e tsebego? ₂₉Hee, wena naga!