To The Word – Day 180

₁Morena o mpoditše gore ke yo ithekela borokgwana bja ka gare mme ke bo apare; eupša a ntaya gore ke se ke ka bo hlatswa. ₂Ka gona ka bo reka, bjalo ka ge Morena a ntaetše, ka bo apara. ₃Morena a bolela le nna gape a re: ₄“Eya nokeng ya Yufratese gomme o ute borokgwana bjoo bja ka gare ka mongeng wa letlapa.” ₅Ke moka ka yo bo uta kgauswi le Yufratese, bjalo ka ge a ntaetše.

₆Ge go fetile lebaka le letelele Morena a mpotša gore ke boele Yufratese, ke yo tšea borokgwana bja ka gare bjola a ntaetšego gore ke bo ute gona. ₇Ka gona ka boela morago, gomme ka fihla ka fata moo ke bego ke bo utile gona ka bo ntšha. Fela bo be bo senyegile bo se sa na mohola.

₈Ya ba Morena o bolela le nna gape o re: ₉“Ke gona ka mo ke tlago fediša boikgantšho bja Juda le boikgogomošo bjo bogolo bja Jerusalema. ₁₀Setšhaba se se sebe se gana go ntheeletša. Ba ne kgang. Ba itirela se ba se ratago; ba ya medimong ye mengwe go e loba le go e khunamela. Ka lebaka leo, ba tlilo swana le borokgwana bjoo bja ka gare bja go se be le mohola. ₁₁Bjalo ka ge borokgwana bja ka gare bo kgomarela motho lethekeng, ke be ke holofetše gore batho bohle ba Israele le ba Juda ba tla nkgomarela. Ke be ke direla gore e tle e be setšhaba sa ka, gomme ba ntsebagatše ditšhabeng tše dingwe, ba nthete, ba be ba ntumiše; fela bona ga se ba theeletša. Ke realo, nna, Morena.”

₁₂“Botša setšhaba sa Israele gore Morena Modimo wa bona o re dipitša tšohle di bopetšwe go tšhelwa beine. Bona ba tla go fetola ba re ba a tseba gore dipitša tšohle di bopetšwe go tšhelwa beine. ₁₃Ke moo o swanetšego go ba botša gore nna, Morena, ke re bohle ba ba agilego nageng ye, magoši, bona e lego ditlogolo tša Dafida, le baprista, le baprofeta, le badudi bohle ba Jerusalema ke tla ba tagiša beine. ₁₄Ka morago ke tla ba pšhatla ka go ba thulantšha, ka thulantšha barwa le botatagobona. Ke tla ba fediša ke se na lešoko, le kwelobohloko, le kgaugelo.”

₁Mabapi le komelelo Morena o rile go Jeremia:

₁₀Morena o boletše ka setšhaba se a re: “Se ba se ratago ke go kgeloga, gomme ga ba itshware. Ka gona ga ba nkgahle. Bjale nka se lebale makgopo a bona, ke tla ba otlela dibe tše ba di dirilego.”

₁₁Morena a re go nna: “O se ke wa ba phophothela. ₁₂Le ge ba ka ikona dijo, nka se ba theeletše ge ba llela thušo; gomme le ge ba ka ntirela dihlabelo tša go tšhungwa ka moka le dikabelo tša bupi, ba ka se nkgahle, ke tla ba bolaya ka tšhoša, le ka tlala, le ka leuba la bolwetši.”

₁₃Nna ka re: “Morena, Mong wa rena, baprofeta ba botša setšhaba gore go ka se we ntwa goba tlala, ka gore wena o tla dira gore batho ba iketle go ya go ile nageng ye.”

₁₄Morena yena a fetola a re: “Baprofeta bao ba bolela maaka ka leina la ka; ga se ba rongwa ke nna, le gona nna ga se ka ba laela selo goba ka bolela le bona. Dipono tše ba bolelago le lena ka tšona ga se tšona; go porofeta ga bona ke dilo tše ba di naganago tše di se nago mohola. ₁₅Ka gona, nna, Morena, ke re: Baprofeta bao ba bolelago ka leina la ka etšwe ba se ba rongwa ke nna mme ba re ntwa le tlala di ka se wele naga ye, ke bona ba ba tlago bolawa ka ntwa le ka tlala. ₁₆Le bona batho bao ba boditšwego ditaba tše ke baprofeta ba ba tla bolawa ka ntwa le ka tlala. Ditopo tša bona di tla lahlelwa mekgotheng ya Jerusalema, gomme ga go yo a tlago ba boloka, bona le basadi ba bona le barwa ba bona le barwedi ba bona. Ke tla ba otlela bokgopo bja bona.” ₁₇Morena o ntaetše gore ke botše setšhaba ke re:

₁Ke moka Morena a re go nna: “Le ge nkabe e le Moshe le Samuele ba ba emego fa ba nthapela, ke be nka se šokele setšhaba se. Ba tloše mo pele ga ka; a ba sepele! ₂Ge ba go botšiša gore ba ye kae, o ba botše gore nna ke re:

₃“Nna, Morena, ke tla laela dilo tše nne gore di ba otle: tšhoša, gore e ba bolaye; dimpša, gore di gogagoge ditopo tša bona; manong le dibata, gore di je ditopo tša bona lai. ₄Ke tla dira gore batho ba mebušo yohle ya lefase ba ba tšhoge ka lebaka la tše Manase, morwa wa Hiskia, a kilego a di dira kua Jerusalema mola e le kgoši ya Juda.”

₅Morena o re:

₁₀Nna ke madimabe bjang, mma, ge o ile wa mpelega ka ba motho wa lešutu le tshele nageng ka moka! Ga se nke ke adime goba ke adingwe tšhelete, le ge go le bjalo mang le mang o a nthoga. ₁₁Morena, ge eba ruri ga se ka go hlankela gabotse, ge eba ga se nke ke phophothele manaba a ka mola a le mathateng le tlalelong, gona dithogako tša bona a di tšwelele. ₁₂Na o gona motho yo a ka robago tshipi, kudu tshipi ya go tšwa leboa, goba a roba mphiri?

₁₃Morena a re: “Ke tla lesa manaba a thopa mahumo le matlotlo a lena, gore ke le otlele dibe tše le di dirilego nageng ka moka ya lena. ₁₄Ke tla dira gore le hlankele manaba a lena lefaseng le le sa le tsebego, ka gobane kgalefo ya ka e tuka bjalo ka mollo, gomme e tla tuka go ya go ile.”

₁₅Ke moo ke ilego ka re: “Go tseba wena, Morena. O nkgopole mme o nthuše. O ntefeletše go ba ba ntlhomerego. O se mphelele pelo wa mpolaya. O se lebale gore ke rogakwa ka lebaka la gago. ₁₆Mola o bolela le nna ke be ke go hlwaela tsebe. Ke nna wa gago, wena Morena, Modimo Ramaatlaohle, gomme ke ka lebaka leo mantšu a gago a nthabišago, ka hlalala. ₁₇Ga se nke ka hlwela go dula le bakodutli ka ipshina nabo. Ke hlohleleditšwe ke wena ka itulela ke nnoši, ya ba taba ya go ntlatša pelo. ₁₈Bjale ke ka lebaka la eng ke dula ke tlaišegile? Ntho ya ka e reng e sa alafege ya fola? Kgane o nyaka go ntshwabiša wa etša nokana ye e pšhago selemo?”

₁₉Morena a mphetola a re: “Ge o ka boa ke tla go amogela, gomme o tla ba mohlanka wa ka gape. Ge o ka bega molaetša wo o kwagalago, e sego wo o se nago mohola, gona o tla ba molomo wa ka. Setšhaba se tla boela go wena, ya se be wena o boelago go sona. ₂₀Ke tla go dira gore o be bjalo ka morako wo o tiilego wa mphiri go bona. Ba tla lwa le wena, eupša ba ka se go fenye, ka gobane ke na le wena gore ke go phološe, ke go hlakodiše. Ke realo, nna, Morena. ₂₁Ke tla go hlakodiša diatleng tša batho ba babe, ka go phološa dinaleng tša ba sehlogo.”

₁Morena a bolela le nna a re: ₂“O se ke wa tšea mosadi goba wa ba le bana nageng ye. ₃E re ke go botše se se tlago hlagela bana ba ba tswalelwago fa, se tlago hlagela le bommabo le botatabo. ₄Ba tla hwa ba bolawa ke malwetši a mašoro, gomme ba ka se llelwe goba ba bolokwa ke motho – e tla ba nke ke dišu nageng. Ba tla bolawa ka tšhoša, goba ba hwa lehu la tlala, gomme ditopo tša bona di tla lewa ke manong le dibata.”

₅Morena a tšwela pele a re: “O se ke wa tsena ka lapeng leo go lona go hlobošwago, goba wa ya go hloboga mohu, goba wa ya matshedišong. Nka se sa atla setšhaba se ka boiketlo, goba ka se rata, goba ka se šokela. ₆Ba bagolo le ba banyenyane ba tla hwela mo nageng ye, eupša ba se bolokwe, ba se ilelwe. Ga go yo a tlago ikgaya goba a ipoola hlogo e le go ba ilela. ₇Ga go yo a tlago solela molli dijo e le go mo homotša ka ge a hlokafaletšwe; ga go yo a tlago mo fa sa go nwa e le go mo homotša, ešita le ge a hlokafaletšwe ke tatagwe goba mmagwe.

₈“O se ke wa tsena ka lapeng leo go lona go ketekwago. O se ke wa dula fase wa ja goba wa nwa le bona, ₉gobane nna, Morena Ramaatlaohle, Modimo wa Israele, ke re ke tla fediša mekgolokwane ya lethabo le tlhalalo, le ya mekete ya lenyalo. Taba tše di tla direga lena ba le dulago mo le sa phela, mme le tla di bona.

₁₀“Ge o ba botša tšeo ka moka ba tla go botšiša gore ke ka lebaka la eng ke rile ke tla ba tlišetša masetlapelo a makaaka. Ba tla botšiša gore ba sentšeng, sebe se ba fošeditšego Morena Modimo wa bona ka sona ke sefe. ₁₁Ke mo wena o swanetšego go ba botša gore Morena o rile: ‘Ke ge borakgolokhukhu ba lena ba ile ba mphuralela ba ya go hlankela medimo ye mengwe, ba e khunamela. Ba ile ba ntlhanamela ba se phethe melao ya ka. ₁₂Eupša lena le dirile tše mpe go feta le borakgolokhukhu ba lena. Bohle le ngangabaletše go dira tše mpe tše le di ratago, le gana go ntheeletša. ₁₃Ka lebaka leo, ke tla le leleka nageng ye ka le iša nageng ye lena le borakgolokhukhu ba lena le sa e tsebego. Ke gona moo le tlago khunamela medimo ye mengwe bošego le mosegare, gobane nka se le gaugele.’ ”

₁₄Morena o re: “Nako e etla mohla batho ba ka se sa ikanago ka nna ba re: ‘Ka Morena yo a phelago, yo a ilego a ntšha setšhaba sa Israele nageng ya Egepeta.’ ₁₅Ba tla ikana ka nna ba re: ‘Ka Modimo yo a phelago, yo a ilego a ntšha setšhaba sa Israele nageng ya ka leboa le dinageng tšohle tše dingwe tše ke bego ke ba leleketše go tšona.’ Ke tla ba bušetša nageng ya bona, nageng ye ke ilego ka e fa borakgolokhukhu ba bona.”

₁₆Morena o re: “Ke ya go bitša baswari ba dihlapi ba bantši gore ba tle ba sware setšhaba se. Ka morago ke tla ya go bitša batsomi ba bantši gore ba tle ba ba tsome dithabeng tšohle le mebotong yohle le gona ka magageng, ₁₇gobane se sengwe le se sengwe se ba se dirago ke a se bona. Ga go se se nkhutetšego; dibe tša bona ke di bona ka a ka mahlo. ₁₈Ke tla ba otlela bokgopo bja bona le dibe tša bona gabedi, ka ge ba tšhilafaditše naga ya ka ka medimo ya diswantšho ya go šišimiša ya go etša ditopo, le gona ba beile medingwana ya makgapha mo gohle nageng ye ke e filego setšhaba sa ka.”

₁₉Morena, wena maatla a ka le sebo sa ka, wena botšhabelo bja ka ge ke le tlalelong, ditšhaba di tla tla go wena di etšwa mafelelong a lefase, tša re: “Borakgolokhukhu ba rena ba be ba na le medimo ya bofora fela, medimo ya diswantšho ya lefeela ye e se nago mohola. ₂₀Kgane motho a ka itirela medimo? Gape e ka se be medimodimo.”

₂₁Morena o re: “Bjale ge, ke tla bontšha ditšhaba maatla a ka le bonatla la mafelelo; ke mo ba tla tsebago gore leina la ka ke Morena.”

₁“Sebe sa batho ba naga ya Juda se ngwadilwe ka tshipi; se tlokilwe ka ntlha ya taamane dipelong tša bona le manakaneng a dialetare tša bona. ₂Le bana ba bona ba sa gopola dialetare tša bona le dikota tša borapedi tše di lego kgauswi le mehlare ye metala mebotong ya go phagama ₃le dithabeng kua nageng. Ke tlilo dira gore le thopelwe mahumo le matlotlo ohle ka lebaka la dibe tše le di dirilego nageng ka moka ya lena. ₄Le tla swanela go tlogela naga ye ke le filego yona, molato e le wa lena, gomme ke tla dira gore le hlankele manaba a lena nageng ye le sa e tsebego, gobane le kgohleditše pefelo ya ka ya tuka bjalo ka mollo, gomme e tla tukela sa ruri.”

₅Morena o re:

₁₅Batho ba re go nna: “A kae matšhošetši ale a Morena? A a a tliše!”

₁₆Eupša ga se nke ke go hlohleletše gore o ba tlišetše masetlapelo. Ga se ka ba lakaletša nako ye ya go itlhoboga. Morena, seo se tsebja ke wena; o tseba se ke se boletšego. ₁₇O se ke wa ntšhoša; ge masetlapelo a etla ke wena botšhabelo bja ka. ₁₈O swabiše bantlhomari, e sego nna. A go tšhoge bona, e sego nna. O ba tlišetše masetlapelo, o ba otle o be o ba boeletše.

₁₉Morena a re go nna: “Eya o eme Lesorong la Setšhaba, leo magoši a Juda a tsenago gape a tšwago ka lona; go tloga moo o ye masorong a mangwe a Jerusalema. ₂₀O botše magoši le batho bohle ba Juda le badudi bohle ba Jerusalema ba ba tsenago ka masoro a gore ba theeletše se ke se bolelago. ₂₁O ba botše gore ge eba ba rata go phela ba se ke ba rwala morwalo ka letšatši la Sabatha, goba ba tsena nawo ka masoro a Jerusalema, ₂₂goba ba tšwa ka dintlong tša bona ba rwele selo ka letšatši la Sabatha. Ba se ke ba šoma ka letšatši la Sabatha; ba le hlomphe e le letšatši le lekgethwa, bjalo ka ge ke ile ka laela borakgolokhukhu ba bona. ₂₃Borakgolokhukhu ba bona ba ile ba se ntheeletše, ba se ntshekegele tsebe. Bona ba ile ba ngangabala, ba se ntlhomphe, ba gana go kgalwa ke nna.

₂₄“Ge setšhaba se se ka tloga se ntlhompha, ba se tsene ka masoro a motse ba rwele morwalo ka letšatši la Sabatha, ba hlompha Sabatha e le letšatši le lekgethwa, gomme ba se dire mošomo ofe le ofe, ₂₅ke gona magoši le bakgomana ba ba bušago e le ditlogolo tša Dafida ba tlago tsena ka masoro a motse wo. Ba tla namela dikoloi tša ntwa gotee le batho ba Juda le badudi ba Jerusalema, ba namela le dipere, gomme motseng wo wa Jerusalema go tla dula go na le batho. ₂₆Batho ba tla tla ba etšwa metseng ya Juda le tikologong ya Jerusalema; ba tla tšwa nageng ya Benjamene, le nagengtlase, le seleteng sa dithaba, le seleteng sa ka borwa se se omilego. Ba tla tliša dihlabelo tša go tšhungwa ka moka le dihlabelo tše dingwe, le dikabelo tša bupi le diorelo, le tšona dikabelo tša tebogo kua Tempeleng ya ka. ₂₇Eupša ge ba ka se ntheeletše, ba se hlomphe Sabatha e le letšatši le lekgethwa, ba tsena ka masoro a Jerusalema ba rwele morwalo ka letšatši leo, ke tla gotša mollo wa hloka motimi masorong a Jerusalema, wa fiša dintlo tša mošate mo motseng.”