Batho ba Juda ke ba madimabe
1Ke moka Morena a re go nna: “Le ge nkabe e le Moshe le Samuele ba ba emego fa ba nthapela, ke be nka se šokele setšhaba se. Ba tloše mo pele ga ka; a ba sepele! 2Ge ba go botšiša gore ba ye kae, o ba botše gore nna ke re:
“Ba ba lebanwego ke leuba la bolwetši, leubeng!
Ba ba lebanwego ke go bolawa ka tšhoša, tšhošeng!
Ba ba lebanwego ke go hwa ka tlala, tlaleng!
Ba ba lebanwego ke go thopša, bothopšeng!
3“Nna, Morena, ke tla laela dilo tše nne gore di ba otle: tšhoša, gore e ba bolaye; dimpša, gore di gogagoge ditopo tša bona; manong le dibata, gore di je ditopo tša bona lai. 4Ke tla dira gore batho ba mebušo yohle ya lefase ba ba tšhoge ka lebaka la tše Manase, morwa wa Hiskia, a kilego a di dira kua Jerusalema mola e le kgoši ya Juda.”
5Morena o re:
“Le tla šokelwa ke mang,
lena batho ba Jerusalema?
Ke mang yo a tlago le llela?
Ke mang yo a tlago phamogela go lena a le botšiša maphelo?
6Lena le nkganne, le mphuraletše.
Ke ka lebaka leo ke otlolotšego letsogo la ka ka le fediša;
ke be ke lapišitšwe ke go le šokela.
7Ke le feferile ka leselo mo metseng ya lena ka le bolaela bana,
ka le gagara,
lena setšhaba sa ka,
ka ge le sa tlogele mekgwa ya lena.
8Bahlologadi ba gabolena ba oketšegile,
ba feta dithorwana tša lešabašaba la lewatle.
Ke bolaile masogana a gabolena mosegare wa sekgalela,
gomme ka kweša bommabo bohloko.
Ke tla dira gore ba welwe ke tlalelo le letšhogo ka bjako.
9Mmagobana yo a hwetšwego ke bana ba ba šupago o akgegile,
o a fegelwa.
Mosegare o mo fetogetše leswiswi;
o šuletšwe, o a inyatša.
Ke tla dira gore manaba a lena a bolaye mašaletšana a lena.
Ke realo, nna, Morena.”
Jeremia o balabalela Morena
10Nna ke madimabe bjang, mma, ge o ile wa mpelega ka ba motho wa lešutu le tshele nageng ka moka! Ga se nke ke adime goba ke adingwe tšhelete, le ge go le bjalo mang le mang o a nthoga. 11Morena, ge eba ruri ga se ka go hlankela gabotse, ge eba ga se nke ke phophothele manaba a ka mola a le mathateng le tlalelong, gona dithogako tša bona a di tšwelele. 12Na o gona motho yo a ka robago tshipi, kudu tshipi ya go tšwa leboa, goba a roba mphiri?
13Morena a re: “Ke tla lesa manaba a thopa mahumo le matlotlo a lena, gore ke le otlele dibe tše le di dirilego nageng ka moka ya lena. 14Ke tla dira gore le hlankele manaba a lena lefaseng le le sa le tsebego, ka gobane kgalefo ya ka e tuka bjalo ka mollo, gomme e tla tuka go ya go ile.”
15Ke moo ke ilego ka re: “Go tseba wena, Morena. O nkgopole mme o nthuše. O ntefeletše go ba ba ntlhomerego. O se mphelele pelo wa mpolaya. O se lebale gore ke rogakwa ka lebaka la gago. 16Mola o bolela le nna ke be ke go hlwaela tsebe. Ke nna wa gago, wena Morena, Modimo Ramaatlaohle, gomme ke ka lebaka leo mantšu a gago a nthabišago, ka hlalala. 17Ga se nke ka hlwela go dula le bakodutli ka ipshina nabo. Ke hlohleleditšwe ke wena ka itulela ke nnoši, ya ba taba ya go ntlatša pelo. 18Bjale ke ka lebaka la eng ke dula ke tlaišegile? Ntho ya ka e reng e sa alafege ya fola? Kgane o nyaka go ntshwabiša wa etša nokana ye e pšhago selemo?”
19Morena a mphetola a re: “Ge o ka boa ke tla go amogela, gomme o tla ba mohlanka wa ka gape. Ge o ka bega molaetša wo o kwagalago, e sego wo o se nago mohola, gona o tla ba molomo wa ka. Setšhaba se tla boela go wena, ya se be wena o boelago go sona. 20Ke tla go dira gore o be bjalo ka morako wo o tiilego wa mphiri go bona. Ba tla lwa le wena, eupša ba ka se go fenye, ka gobane ke na le wena gore ke go phološe, ke go hlakodiše. Ke realo, nna, Morena. 21Ke tla go hlakodiša diatleng tša batho ba babe, ka go phološa dinaleng tša ba sehlogo.”
