To The Word – Day 174

₁Nna, Paulose, moapostola wa Kriste Jesu ka taelo ya Modimo, Mophološi wa rena, le ya Kriste Jesu yo re mmotilego, ₂ke dumediša wena, Timotheose, morwa wa ka wa mmakgonthe tumelong, ke re: Nke Modimo, Tatagorena, le Kriste Jesu, Morena wa rena, ba go gaugele, ba go šokele, mme ba go fe khutšo.

₃Bjalo ka ge ke ile ka go kgothatša mola ke fetela Matsedonia, ke sa go kgopela gore o dule moo motseng wa Efeso, o laye batho ba ba rutago dithuto tša maaka gore ba tlogele go di ruta. ₄O ba botše gore ba tlogele dinonwane le mananeo ao a se nago pheletšo a borakgolokhukhu ba bona, a go dio hlola ditshele fela; a sa tšweletše morero wa Modimo wo o tsebjago ka tumelo. ₅Nepo ya taelo ye ke gore le ratane ka lerato le le tšwago ka pelong ye e hlwekilego ya motho, le letswalo le le se nago boitshetshengo, le tumelo ye e se nago boikaketši. ₆Batho ba bangwe ba phamogile tabeng tše ba phamogetše dipolelong tša bošilo. ₇Ba nyaka go ba baruti ba melao ya Moshe, etšwe ba sa kwešiše tše ba di bolelago le tše ba tiišago gore ke nnete.

₈Rena re a tseba gore melao ya Moshe e lokile ge motho a e šomiša ka mo go lebanego. ₉Gape re se ke ra lebala gore molao ga o beelwe ba go loka, o beelwa disenyi le ba go itaola, o beelwa bahlokamodimo le badiradibe, o beelwa ba go se hlomphe Modimo le dilo tše dikgethwa, ba ba bolayago botatagobona le bommagobona, o beelwa babolai, ₁₀o beelwa difebe, le banna ba go robala bannakabona, le bathopi, le bafeane, le ba ba hlatselago ka maaka, le ba ba dirago tše dingwe tše di fapanago le thuto ya nnete. ₁₁Thuto yeo e hwetšwa ka mo Ebangeding ye ke e filwego gore ke e bege, yona Taba ye Botse ye e bolelago tša letago la Modimo wa mahlogonolo.

₁₂Ke leboga Kriste Jesu, Morena wa rena, ge a mphile maatla a go dira modiro wa ka. Ke mo leboga ge a bone ke botega mme a nkgethela go mo hlankela, ₁₃etšwe pele ke be ke mmolela gampe, ke mo hlomara, ke mo roga. Fela Modimo o ile a nkgaugela ka gobane ke be ke sešo ka ba modumedi, gomme ke sa tsebe se ke se dirago. ₁₄Gomme Morena wa rena a nkgaugela kudu a ba a mpha le tumelo le lerato ka bontši, tšona dimpho tše e bago tša rena ge re eba ba Kriste Jesu. ₁₅Ke taba ya nnete ye e swanetšego go amogelwa ka botlalo gore Kriste Jesu o tlile lefaseng go phološa badiradibe. Nna ke ba feta bohle ka bobe, ₁₆fela Modimo o nkgaugetše e le gore Kriste Jesu a tle a mpontšhe go se mphelele pelo ga gagwe mo go feletšego, nna modiradibe wa go ba feta ka moka, e tle e re bohle ba ba tlago dumela go yena ba swantšhetšwe ka nna mme ba išwe bophelong bjo bo sa felego. ₁₇Kgoši ya go ya go ile, yo a sa hwego gape a sa bonalego, yena Modimo a le noši, a hlompšhe a be a tumišwe go ya go ile! Amene.

₁₈Taelo yeo ke go fa yona, Timotheose, ngwanaka, e le ya go ya ka mantšu a profeto ao a kilego a bolelwa mabapi le wena. Mantšu ao a go hlohleletše go lwa bjalo ka mohlabani, o lwele Ebangedi, ₁₉o kgomarele tumelo ya gago le letswalo le le se nago molato. Batho ba bangwe ba be ba sa theeletše letswalo la bona, gomme tša tumelo di ba palela. ₂₀Ba bangwe ba bona ke boHimeneose le Aleksandere, bao ke ba gafetšego Sathane, gore ba tlwaologe go nyefola Modimo.

₁Go feta tšohle, ke le kgothaletša gore le kgopelele batho bohle go Modimo, le ba rapelele, le ba phophothele, le be le ba lebogele, ₂ana ke dikgoši, ana ke batho ba maemo, gore re tle re phele re wele dipelo re iketlile, re le ba borapedi bja nnete, le maitshwaro a a swanelago. ₃Ye ke taba ye botse gomme e kgahla Modimo, Mophološi wa rena, ₄yo a nyakago gore batho ka moka ba phološwe mme ba tle ba tsebe nnete. ₅Gape Modimo ke o tee, le Mmoelanyi wa batho le Modimo le yena ke o tee, yena motho, Kriste Jesu, ₆yo a ilego a ikgafa gore e be seloba sa go lokolla batho ka moka sebeng. E bile bjona bohlatse ka nako ya gona bja gore Modimo o nyaka ge bohle ba lokollwa sebeng, ₇gomme ke ka lebaka leo ke beilwego moapostola le moruti wa baditšhaba, go bega molaetša wa tumelo le nnete. Ga ke bolele maaka, ke bolela nnete.

₈Phuthegong ye nngwe le ye nngwe ke rata ge go rapela banna ba phagamišitše matsogo a a se nago bosodi, ba sa galefe, le gona ba sa ngangišane. ₉Basadi le bona ke rata ge ba ikgabiša ka meaparo ye e ba lebanego, le ka boitlhompho le bohlweki; e sego ka go loga meriri, goba ka dikgabišo tša gauta, goba ka diperela, goba ka diaparo tša go bitša tšhelete ye ntši, ₁₀eupša ka mediro ye mebotse ye e swanelago basadi ba ba ipitšago barapedi. ₁₁Mosadi a rutwe a homotše a ikokobetša ka mekgwa yohle. ₁₂Ga ke mo dumelele gore a rute monna goba a mo laole. Sa gagwe ke go homola, ₁₃gobane yo a hlodilwego pele ke Adamo, gwa kgona go hlolwa Efa. ₁₄Le gona ga se Adamo yo a ilego a forwa, ke mosadi yo a ilego a forwa mme a tshela molao. ₁₅Eupša mosadi o tla phološwa ka go tswala bana, ge a ka kgotlelela tumelong le leratong le bokgethweng ka maitshwaro a mabotse.

₁Taba ye ke nnete, gore ge motho a duma go ba moetapelemogolo, o duma selo se sebotse. ₂Moetapele e swanetše go ba motho wa go hloka bosodi, monna wa mosadi o tee, wa go nagana gabotse, wa maitshwaro a mabotse, wa go hlomphega, wa go amogela basepedi ka ga gagwe, wa go kgona go ruta; ₃e se be setagwa goba seganka, e be yo boleta wa go se rumolane, wa go se rate tšhelete; ₄e be yo a bušago lapa la gagwe gabotse, yo a laolago bana ba gagwe ka seriti. ₅Gobane ge motho a palelwa ke lapa la gagwe, phuthego ya Modimo yona a ka e kgona bjang? ₆E se be motho yo a sa tšogo sokologa, gore a se ikgogomoše, a tla a lahlwa go etša Diabolose. ₇E swanetše go ba motho yo a hlompšhago le ke batho ba e sego badumedi, gore a se ke a tla a goboga mme a tanywa ke sefu sa Diabolose.

₈Batikone le bona ba swanetše go ba le boitshwaro bjo bobotse, le gona ba tshepege; ba se ke ba nwa kudu goba ya ba dihwirihwiri tšheleteng; ₉a ba kgomarele nnete ye e utolotšwego ya tumelo ka letswalo le le sa itshetshengwego; ₁₀ba hlahlobje pele, gomme ge ba se na bosodi e be gona ba thomago go dira modiro wa botikone. ₁₁Batikone ba basadi le bona e be ba maitshwaro a mabotse, ba go hloka lesebo, ba go nagana gabotse, ba go tshepagala mo go tšohle. ₁₂Motikone e swanetše go ba monna wa mosadi o tee, wa go laola bana ba gagwe le lapa la gagwe gabotse. ₁₃Batikone ba ba phethago modiro wa bona gabotse ba ikhweletša maemo a mabotse, gomme ba kgona go bolela ka tša tumelo ya bona go Kriste Jesu ba sa boife.

₁₄Ke go ngwalela lengwalo leo ke holofetše go tla go wena kgauswinyana. ₁₅Fela le ge nka diega, wena o šetše o tseba ka lengwalo le ka mo motho a swanetšego go itshwara ka gona ge a na le ba lapa la Modimo, e lego yona phuthego ya Modimo yo a phelago, ye e lego yona kokwane le motheo wa therešo. ₁₆Ntle le pelaelo, phihlo ye re e utolletšwego ya tumelo ya rena ke ye kgolo:

₁Moya wo Mokgethwa o bolela thwii gore mehleng ya mafelelo batho ba bangwe ba tla kgeloga; ba tla theeletša meoya ya maaka ba latela le dithuto tša bademone. ₂Dithuto tše dibjalo di phatlalatšwa ke bafeane ba baradia ba ba hwilego matswalo mo nkego ba swailwe ka tshipi ya go fiša. ₃Batho ba mohuta woo ba iletša batho go nyala le go ja dijo tše dingwenyana, mokagona Modimo a di diretše gore di lewe ka tebogo ke bao e lego badumedi mme ba tsebago therešo. ₄Tšohle tše di hlodilwego ke Modimo di lokile; gomme mo go tšona ga go se se swanetšego go lahlwa, eupša tšohle di swanetše go amogelwa ka tebogo, ₅gobane di kgethwafatšwa ka lentšu la Modimo le ka thapelo.

₆Ge o ka laya badumedikawena bjalo o tla be o le mohlanka yo a direlago Kriste Jesu gabotse, o le yo a iphepago ka mantšu a tumelo le a thuto ye e lokilego ye o e botegetšego. ₇O kgaogane le dinonwane tša batho ba lefase. Wena o itlwaetše bophelo bja bodumedi. ₈Go ithobolla mmele go na le mohola mmeleng, eupša bodumedi bjona bo na le mohola dilong ka moka, ka gore bo re holofetša bophelo bja gonabjale le bja ka moso. ₉Yeo ke nnete ye e swanetšego go amogelwa ka botlalo. ₁₀Ke ka lebaka leo re katanago re kalokana, ka gobane re botile Modimo yo a phelago, yena e lego Mophološi wa batho bohle, gagolo bao ba dumelago.

₁₁O ba laye o be o ba rute ka dilo tše. ₁₂Go se be le yo a go nyatšago ka lebaka la ge o le yo mofsa, eupša o be mohlala go badumedi ka dipolelo tša gago, le ka boitshwaro, le ka lerato, le ka tumelo, le ka bohlweki. ₁₃O ikgafele go balela phuthego Mangwalo a Makgethwa, le go ba kgothatša, le go ba ruta, go fihlela ke etla. ₁₄O se hlokomologe mpho ye Modimo a go filego yona mola baprofeta ba bolela mabapi le wena, mola bagolo ba phuthego ba go bea diatla. ₁₅O itlwaetše dilo tše gomme o ikgafele tšona, gore tšwelopele ya gago e bonwe ke bohle. ₁₆O itote, o lote le thuto ya gago. O fele o phetha dilo tše, ka gobane ge o dira bjalo o tla be o iphološa, o phološa le ba ba go kwago.

₁O se ke wa kgadimola mokgalabje, o upše o bolele le yena bjalo ka ge nke ke tatago. Masogana o a sware bjalo ka banabeno, ₂bakgekolo o ba sware bjalo ka bommago, le mathari o a sware bjalo ka dikgaetšedi tša gago, ka bohlweki ka mehla.

₃Bahlologadi ba e lego bahlologadihlologadi o ba hlokomele. ₄Fela ge mohlologadi a na le bana goba ditlogolo, ba swanetše gore ba itlwaetše go phetha ditshwanelo tša bona tša bodumedi go ba malapa a bobona, mme ka tsela yeo ba leboge batswadi ba bona le borakgolwabona le bomakgolwabona, gobane seo ke sona se se kgahlago Modimo. ₅Mohlologadihlologadi yo a se nago mohlokomedi o ikanya Modimo, gomme o dula a mo kgopela a mo rapela bošego le mosegare. ₆Eupša mohlologadi yo a iphilego maithabišo o hwile a phela. ₇O ba laye bjalo gore go se be le yo a ba bonago bosodi. ₈Fela ge motho a sa hlokomele ba gabo, gagolo ba lapa la gagwe, o lahlile tumelo, gomme o phalwa le ke yo e sego modumedi.

₉Lenaneong la bahlologadi go ngwalwe fela yo a sa hlaelego mengwaga ye masome a a selelago. Godimo ga moo, e be yo a ilego a nyalwa gatee, ₁₀le gona a tumile ka mediro ye mebotse, ya go hlokomela bana, le go amogela baeng, le go hlapiša badumedikayena maoto, wa go thuša ba ba lego tlalelong – wa go ikgafela mediro ye mebotse ka mehla.

₁₁Bahlologadi ba bafsa bona o se ke wa ba ngwala lenaneong leo la bahlologadi, ka gobane go tsogelwa ga bona go ka no ba aroša go Kriste, ba duma go nyalwa gape, ₁₂ya ba ge ba ikobela molato wa go tshela dikano tšela ba ikannego ka tšona pejana. ₁₃Le gona ba ka itlwaetša bobodu ka go thetha le malapa; go feta moo ba ka itlwaetša lesebo le bofeane, le go bolela tše di sego tša ba swanela. ₁₄Ka gona, nna ke duma ge bahlologadi ba bafsa ba ka nyalwa gape ba ba le bana, ba hlokomela malapa a bona, gore ba tle ba se fe manaba a rena sebaka sa go re bolela gampe. ₁₅Bahlologadi ba bangwe ba šetše ba kgelogile ba latela Sathane. ₁₆Ge go na le Mokriste wa mosadi yo ka gabo go nago le bahlologadi, a ba hlokomele, a se ke a tshwenya phuthego ka seo, gore phuthego e hlokomele bahlologadihlologadi.

₁₇Bagolo ba phuthego ba ba bušago phuthego gabotse ba lokela go lefša moputso wa bona gabedi, gagolo bao ba katanago le go begela batho Ebangedi le go ba ruta yona. ₁₈Gobane Mangwalo a Makgethwa a re: “O se ke wa bofa pholo molomo ge o fola mabele ka yona.” Gapegape a re: “Mošomi mogolo wa gagwe o mo lebane.” ₁₉O se ke wa theeletša yo a pharago mogolo wa phuthego molato, ge e se ge a na le dihlatse tše pedi goba tše tharo. ₂₀Badiradibe o ba kgale pepeneneng, gore ba bangwe ba tle ba šie.

₂₁Ke go laya Modimo le Kriste Jesu le barongwa ba bakgethwa ba na le nna, gore o phethe ditaelo tšeo ntle le go kgetholla batho, ntle le go dira dilo sepitša. ₂₂O se kitimele go bea motho diatla, gore o se kgathe tema dibeng tša ba bangwe; wena o dule o hlwekile.

₂₃O se sa nwa meetse fela, o upše o nwe le beinenyana ka lebaka la mala a gago le bokoka bja gago bjo bo felago bo go boela.

₂₄Dibe tša batho ba bangwe di bonala pepeneneng, gomme di ba eta pele tša ba letela kahlolong, kganthe tša ba bangwe tšona di ba šala morago. ₂₅Ka yona tsela yeo mediro ye mebotse ya ba bangwe e bonala pepeneneng, gomme le ye e sego pepeneneng ga e kgone go fihlega.

₁Bohle ba e lego makgoba ba swanetše ba bone beng ba bona e le ba ba lebanwego ke tlhompho ye e feletšego, gore go se be le motho yo a nyefolago Modimo goba thuto ya rena. ₂Makgoba ao beng ba ona e lego badumedi a se ke a ba nyatša, gobane ke badumedikabona. A a upše a ba šomele gabotse le go feta, ka gobane ba ba holegago ka modiro wa ona ke badumedi bao ba ratwago.

O rute batho ka go realo, o ba begele ditaba tšeo. ₃Ge eba go na le yo mongwe wa go ruta batho dišele, wa go se dumele thuto ya nnete e lego ya Morena wa rena, Jesu Kriste, le tša thuto ya bodumedi bja rena, ₄yo mobjalo ke moikgogomoši yo a sa tsebego selo. Sa gagwe ke go tšea kgang le go ngangišana ka tlhalošo ya mantšu, gona go tswalago mahufa le ditshele le lesebo le dikgopolelo tše mpe, ₅le kgang ya go se fele – dilo tše di tšwago bathong ba ba senyegilego menagano ba ba sa tsebego nnete. Ba hloma nke bodumedi ke mokgwa wa go ikhumiša.

₆Bodumedi bjona bo humiša motho kudu ge eba a kgotsofala ka se a nago le sona. ₇Gape ga se ra tla le selo mo lefaseng, gomme le go tloga re ka se kgone go tloga le selo mo go lona. ₈Ge re na le dijo le diaparo re kgotsofale ka tšona. ₉Ba ba nyakago go huma bona ba wela molekong, gomme ba tanywa ke ditumo tše dintši tša botlaela tša go bolaiša batho le go ba phonkgetša tahlegong le tshenyegong. ₁₀Gape go rata tšhelete ke wona modu wa makgopo ka moka. Ba bangwe, ka lebaka la go e duma kudu, ba kgelogile tumelong mme ba itlišetša masetlapelo a mantši.

₁₁Ge e le wena, motho wa Modimo, dilo tšeo o di tšhabe. O katanele go loka le borapedi le tumelo le lerato le kgotlelelo le boleta. ₁₂O gakale ge o šiana mošianong wo mogolo wa tumelo, o tle o ithopele bophelo bjo bo sa felego, gobane o bileditšwe bophelong bjo mola o ipega tumelo ka sebete mo pele ga dihlatse tše dintši. ₁₃Ke go laya Modimo, Mophedišatšohle, le Kriste Jesu yo a ilego a ipega tumelo ka sebete mo pele ga Pontiose Pilato ba le gona, ₁₄gore o botegele go phetha ditaelo o se na bosodi, go fihlela Morena wa rena, Jesu Kriste, a tšwelela. ₁₅Go tšwelela ga gagwe go tla tlišwa ka nako ya gona, gwa tlišwa ke Modimo, yena Mmušanoši yo lehlogonolo, Kgoši ya dikgoši, Morena wa marena. ₁₆Ke yena fela yo a sa hwego, yo a dulago seetšeng se go sego yo a kago se batamela. Ga go yo a kilego a mmona ebile ga go yo a kago mmona. A a hlompšhe a buše go ya go ile! Amene.

₁₇O laele ba ba humilego ka tša lefase le gore ba se ikgogomoše goba ba bota ona mahumo a a felago, ba upše ba bote Modimo yo a re fago tšohle ka bontši gore re ipshine ka tšona. ₁₈O ba laye gore ba dire tše di lokilego, ba ikhumiše ka mediro ye mebotse, ba se timane, eupša ba ikemišetše go abelana le ba bangwe. ₁₉Ka tsela yeo ba tla ipolokela lehumo le e tlago ba motheo wo o tiilego wa ka moso. Ke mo ba tlago kgona go fihlela bophelo bjo e lego bja mmakgonthe.

₂₀Timotheose, o boloke tše o di neilwego. O kgaogane le dipolelo tša lefeela tša batho ba lefase le dikganetšano tše go thwego ke “Tsebo”, etšwe e se yona. ₂₁Gobane ba bangwe ba ipotša gore ba na le yona, mme ba kgelogile tumelong.

A Modimo a le gaugele.