1 TIMOTHEOSE 2

₁Go feta tšohle, ke le kgothaletša gore le kgopelele batho bohle go Modimo, le ba rapelele, le ba phophothele, le be le ba lebogele, ₂ana ke dikgoši, ana ke batho ba maemo, gore re tle re phele re wele dipelo re iketlile, re le ba borapedi bja nnete, le maitshwaro a a swanelago. ₃Ye ke taba ye botse gomme e kgahla Modimo, Mophološi wa rena, ₄yo a nyakago gore batho ka moka ba phološwe mme ba tle ba tsebe nnete. ₅Gape Modimo ke o tee, le Mmoelanyi wa batho le Modimo le yena ke o tee, yena motho, Kriste Jesu, ₆yo a ilego a ikgafa gore e be seloba sa go lokolla batho ka moka sebeng. E bile bjona bohlatse ka nako ya gona bja gore Modimo o nyaka ge bohle ba lokollwa sebeng, ₇gomme ke ka lebaka leo ke beilwego moapostola le moruti wa baditšhaba, go bega molaetša wa tumelo le nnete. Ga ke bolele maaka, ke bolela nnete.

₈Phuthegong ye nngwe le ye nngwe ke rata ge go rapela banna ba phagamišitše matsogo a a se nago bosodi, ba sa galefe, le gona ba sa ngangišane. ₉Basadi le bona ke rata ge ba ikgabiša ka meaparo ye e ba lebanego, le ka boitlhompho le bohlweki; e sego ka go loga meriri, goba ka dikgabišo tša gauta, goba ka diperela, goba ka diaparo tša go bitša tšhelete ye ntši, ₁₀eupša ka mediro ye mebotse ye e swanelago basadi ba ba ipitšago barapedi. ₁₁Mosadi a rutwe a homotše a ikokobetša ka mekgwa yohle. ₁₂Ga ke mo dumelele gore a rute monna goba a mo laole. Sa gagwe ke go homola, ₁₃gobane yo a hlodilwego pele ke Adamo, gwa kgona go hlolwa Efa. ₁₄Le gona ga se Adamo yo a ilego a forwa, ke mosadi yo a ilego a forwa mme a tshela molao. ₁₅Eupša mosadi o tla phološwa ka go tswala bana, ge a ka kgotlelela tumelong le leratong le bokgethweng ka maitshwaro a mabotse.