To The Word – Day 169

₂“Ke wena mang o ka solago maikemišetšo a ka,

o sa kwešiše selo ka ona?

₃Bjale ge, ke tla go botšiša dipotšišo,

gomme wena o ngatetše senna,

o nthute.

₄Na o be o le kae ge ke hloma metheo ya lefase?

Ge eba o a tseba gore le hlolegile bjang,

mpotše.

₅Ke mang yo a rerilego gore e tla ba le le kaakang?

A ke re wena o a tseba!

Ke mang yo a gogilego thapo ya meelo ya lona?

₆A mahlomelo a lona a epetšwe go eng?

Wa go bea leswika la motheo wa lona yena ke mang?

₇Mohlang woo dinaledi tša masa di be di duduetša mmogo,

le dibopiwa tšohle tša legodimong di goa ka lethabo.

₈Ke mang wa go tswalela lewatle ka mabati mola le thibologa popelong ya lefase?

₉Ke nna ke apešitšego lewatle maru,

ka le phuthela ka leswiswi.

₁₀Ke beetše lewatle mellwane,

ka le phekela mabati.

₁₁Ka le botša ka re:

‘Ema fa, se fetele pele!

Maphoto a gago a maatla a gome fa.’

₁₂Jobo, kgane mola wa tswalwago

o kile wa botša letšatši gore le hlabe,

goba wa bontšha masa gore a thome kae?

₁₃O kile wa laela gore a tšee lefase a le thinthe bakgopo?

₁₄Mosegare o fetoša sebopego sa lefase boka letsopa le le kibilwego ka sekibo,

dithaba tša bonala bjalo ka memeno ya kobo.

₁₅Letšatši ge le hlaba le raka bošego,

gomme bakgopo ba šitwa go tšwela pele le bokgopo.

₁₆“Na o kile wa ya methopong ya bodiba bja lewatle,

goba wa sepela godimo ga lebato la lona?

₁₇Na o kile wa bontšhwa dikgoro tša bodulabahu,

goba wa bona difero tša gona tša leswiswi?

₁₈Kgane o a lemoga gore lefase ke le legolo bjang?

Bolela ge eba o a tseba.

₁₉“A o tseba tsela ya go ya moo seedi se dulago gona,

le gore a leswiswi lona le dula kae?

₂₀Na o ka di beela mellwane,

goba wa di gomišetša mo di tšwago?

₂₁Aowi, o ka kgona –

a ke re o tswetšwe ge lefase le hlolwa,

gomme o wa kgalekgale?

₂₂Na o kile wa fihla mo ke bolokelago lehlwa,

goba mo sefako se beilwego gona?

₂₃Ke di boloketše mehla ya mathata,

le nako ya tlhabano le ntwa.

₂₄Kgane o tseba tsela ya go ya mo go hlabago letšatši,

mo phefo ya bohlabela e tšwago gona ya aparela lefase?

₂₅“Ke mang yo a buletšego pula ya matlorotloro lešoba,

a phuletšego le maru a ditladi tsela,

₂₆gore pula e ne le mo go se nago motho,

goba lešokeng mo go se nago le batho?

₂₇Ke mang wa go nošetša naga ye e nyorilwego ye e se nago selo,

gore bjang bo hloge?

₂₈Kgane pula e na le tatagoyona,

goba phoka e tswetšwe ke mang?

₂₉Ke mang mmago kgapetla ya meetse?

Šobane yona e belegwe ke mang?

₃₀Tšona di fetotšago meetse leswika,

di kgahlišago le lewatle ka godimo.

₃₁“Kgane wena o ka kgokaganya Selemela goba wa bofologanya Kgogamašego?

₃₂Na o ka sepetša dinaledi ka go latelana ga tšona,

goba wa šupetša Bere le Berana tsela?

₃₃Kgane o tseba melao ye e beetšwego leratadima,

goba o ka dira gore e buše le lefase?

₃₄“Na o ka goelela maru,

gore a go thapiše ka pula?

₃₅“Kgane o ka laela legadima gore le rathe?

Na ge o le bitša le ka tla la re:

‘Ratha ka nna’?

₃₆Ke mang yo a filego tlhahlamedupi bohlale,

goba a neilego mokoko tsebo?

₃₇Ke mang sehlalefi sa go kgona go bala maru?

Ke mang a sekamišago metšega yeo ya leratadima,

₃₈gore pula e bopaganye lerole makwate a go momagana?

₃₉“Kgane ke wena o tsomelago tau phoofolo,

goba o khorišago tawana ye e swerwego ke tlala,

₄₀ge di khukhuna ka magolong a tšona,

goba di laletše ka sethokgweng?

₄₁Ke mang yo a fago legokobu dijo ge le eya kua le kua le nyaka diyamaleng,

mafotwana a lona a ntelela?”

₁“Na o tseba gore pudi ya naga e tswala neng?

Kgama yona o kile wa e bona e šokwa?

₂Na o tseba gore di duša dikgwedi tše kae?

O tseba le letšatši la tšona la go tswala?

₃Di a kwatama tša tswala,

ya ba gona go ithola morwalo.

₄Bana ba tšona ba a tia,

ba golela šokeng;

ba di tlogela,

ba se sa boela go tšona.

₅“Etse yo a lesitšego pitsi e gerema le naga ke mang?

Ke mang yo a kgokolotšego pokolo ya naga yeo?

₆Gape ke nna ke dirilego lešoka legae la yona,

melala ya letswai ya ba bodulo bja yona.

₇Ga e tshwenywe ke mašata a ka motseng,

le dikgalemo tša mootledi ga di e ame.

₈Dithaba ke mafulo a yona,

moo e tsomago botalanyana ya ja.

₉“Kgane nare e ka go šomela?

Na ka šakeng la gago e ka lala?

₁₀Afa o ka e kgoka ka kgole wa e lemiša,

goba ya go hlagolela mašemo?

₁₁Na o ka ikanya yona ka ge e na le maatla a mantši,

goba ya go direla mediro ye boima?

₁₂Kgane o ka e bota gore e tla go bunela,

ya go kgobokeletša mabele seboeng?

₁₃“Mpšhe e phuphusela ka lethabo,

go etša bomogolodi le bopekwa.

₁₄Mae e a tlogela mobung gore a alamelwe ke mobu.

₁₅Ga e nagane gore a ka pšhatlwa ka leoto,

goba a gatwa ke phoofolo ya naga.

₁₆E tlaiša matswiana a yona mo nkego ga se a yona,

ga e ne taba le gore e itshwenyeditše lefeela.

₁₇Ke nna, Modimo,

ke e hlokišitšego bohlale,

ka e hlokiša le tlhaologanyo.

₁₈Eupša ge e kitima e phaphamaditše diphego,

e sega pere le monamedi wa yona.

₁₉“Kgane pere e filwe ke wena maatla,

goba ke wena o e kgabišitšego molala ka moetse?

₂₀Kgane ke wena o e tabogišago sa tšie?

Gape e a ikgogomoša,

mme e tšhoša batho ka go letša dinko.

₂₁E kiba fase ka dingatha ka moeding e thabile;

e itlhaganetše go yo gahlana le dibetša.

₂₂Poifo ga e e tsebe,

go šia nkhokho,

ga e tšhabe tšhoša.

₂₃Mesebe e tšhekgereganya ka kgotlopong mokokotlong wa yona,

go phadima tšhoša le marumo a monamedi.

₂₄E re go thothomela ka phišegelo ya ja fase ka lebelo;

ge phalafala e lla ga e sa swarega.

₂₅Nako le nako ge phalafala e galagala,

pere e a lla;

e dupelela ntwa e sa le kgole;

e kwa le ditaelo tša balaodi le mekgoši ya ntwa.

₂₆“Na ke ka bohlale bja gago

ge pekwa e kgona go fofela godimo,

le go akalatša diphego ya fofela borwa?

₂₇Na lenong le laelwa ke wena go akalala la fofela godimo,

la aga sehlaga malekelekeng a dithaba?

₂₈Etse le ikagela sehlaga maswikeng,

ntlhora ya thaba ke sona sebo sa lona.

₂₉Le le gona moo le tsoma sa go ja;

mahlo a lona a se bona se le kgole.

₃₀Mafotwana a lona le ona a ja sa madi;

moo go lego setopo ke moo go bago manong.”

₂“Na wena, morumolani, o nyaka go ngangišana le Ramaatlaohle?

Ge o sola Modimo, fetola!”

₄“Morena, ke nna yo monyenyane kudu –

ke ge nka iphetolela ka reng?

Ke a ikhomolela ke re tuu.

₅Ke šetše ke boletše le go feta ka mo ke bego ke swanetše.”

₇“Bjale ge, ke tla go botšiša dipotšišo,

gomme wena o ngatetše senna,

o nthute.

₈Na o sa leka go bontšha gore ga se ka loka,

ke na le phošo,

mme yo a lokilego ke wena?

₉A o lekana le nna ka maatla,

goba o ka dira modumo ka lentšu le le swanago le la ka?

₁₀Gona dula le seriti le setumo seo sa gago;

o tšhepe ka bogoši le letago la gago.

₁₁Lebelela baikgogomoši bohle,

o ba tukele bogale,

gomme o ba kokobetše.

₁₂Ee, ba lebelele, gomme o ba iše fase;

gatakela bakgopo mo ba lego gona.

₁₃Ka moka o ba epele mobung;

o ba tswalelele bodulabahu.

₁₄Ke mo le nna ke tlago go reta,

ka dumela gore o fentše ka bowena.

₁₅“Bona Behemote;

e hlodilwe ke nna go etša wena.

E fula bjang bjalo ka kgomo.

₁₆Lethekeng ke mo go letšego maatla a yona;

digobeng tša mpa ga se maatla,

ga se maatla!

₁₇Mosela ke ntepepe boka mosedere,

ditšhika tša dirope di logagane.

₁₈Marapo a yona nke mapara a mphiri,

manotlo nke mapara a tshipi.

₁₉“Ke yona ya semaka diphoofolong tša ka tšohle;

e fenywa fela ke Mmopi wa yona.

₂₀Dijo e di hwetša dithabeng

moo go ralokago phoofolo tšohle tša naga.

₂₁E patlama ka fase ga mesibihla,

ya khuta le ka gare ga mahlakanoka mehlakeng.

₂₂E iphihla meriting ya mesibihla;

e bobama mepopolireng ya noka.

₂₃Ga e tšhabe noka ge e šutša;

ga e tšhoge le ge Jordane e e hlatšetša ka molomong.

₂₄Ke mang yo a ka lebanago nayo a e swara,

goba a e phulela segalanko?

₂₅“Na Lebiathane o ka e goga ka kobi ya dihlapi,

goba wa e kgoka leleme ka thapo?

₂₆A o ka e tsenya segalanko,

goba wa e phuleletša mohlagare ka kobi?

₂₇Na e ka go kgopela leboelela gore o e šokele,

goba ya ithapeletša go wena?

₂₈Kgane o ka lakana le yona,

wa e dira lekgoba la gago go ya go ile?

₂₉Na o ka e raloša bjalo ka nonyana,

wa e kgokela banenyana ba gago?

₃₀Na barekiši ba ka e bapatša goba ba e arolela babapatši?

₃₁Kgane o ka e hlaba mmele wohle ka matsolo,

goba wa e phuleletša hlogo ka tšhoša?

₃₂Nke o e kgome,

o ka se sa boeletša;

ntwa ya gona o ka se tsoge o e lebetše.”

₁“Yo a ka rego o a e hlasela o tla palelwa;

go no e bona fela go mo nola moko.

₂Ge e rumotšwe e a gakala;

bjale nnaena ke mang yo a ka lwago le nna?

₃Ke mang moehlasedi, mošayakgobalo?

Lefaseng ka moka ga a gona.

₄“A ke go botše ka ga ditho tša yona le ka ga maatla a yona a magolo,

le ka ga mmele wa yona wo o tiilego.

₅Ke mang yo a ka e hlobolago dikgapetla,

goba a phuleletša letlalo la yona le lekoto?

₆Ke mang yo a ka e ahlamišago mehlagare ye e metšego meno a go tšhoša?

₇Mokokotlo wa yona ke molokoloko wa dikotse tša go swaragana, tša go tia boka leswika.

₈Di swaragane tsiritsiri mo moya o ka se tšwego mokgahlo ga tšona.

₉Di kgohlagane,

gomme ga di amologane.

₁₀Ge Lebiathane e ethimola go benya seetša;

mahlo a yona a hwibitše boka mahwibi.

₁₁Ka molomong wa yona go tšwa dikgabo,

go thanya le dihlase tša mollo.

₁₂Ka dinkong tša yona go thunya muši boka mollong wa dihlaka wo go apeilwego pitša ka wona.

₁₃Mohemo wa yona o tšhuma hlaga,

ka molomong wa yona go tšwa kgabo.

₁₄E na le molala wo maatla;

e tšhoša ba ba gahlanago nayo.

₁₅Digoba tša yona di momagane,

di thatafetše, ke dipotongwane.

₁₆Pelo ya yona e tiile bjalo ka leswika,

ke ye thata go swana le lwala.

₁₇Ge e tsoga go boifa le dinatla,

di katakata di tšhogile.

₁₈Ge o e hlaba ka tšhoša ga o e dire selo,

le ge e le lerumo,

goba mosebe, goba letsolo.

₁₉Go yona tshipi e kobega bjalo ka lehlokwa,

mphiri e o sema kotana ye e bodilego.

₂₀Mosebe ga o kgone go e tšhabiša;

maswika a seragamabje go yona ke ditete.

₂₁Go yona dithoka e dio ba mahlaka;

ge e fošwa ka matsolo e a itshegela.

₂₂Magapi a mpa ya yona a etša dinkgetlwana tša mangeta;

e rapalala lerageng bjalo ka selei.

₂₃E fehla phamphamadiba ya e etša pitša ge e bela;

e biloša lewatle la ba bjalo ka setlolo se se apeilwego.

₂₄Mo e fetilego gona e šadiša mohlala wa go phadima,

ya fetoša phamphamadiba lephilo le lešweu.

₂₅Lefaseng ga go selo sa go swana nayo;

ke sebopiwa se se hlokago poifo.

₂₆E nyatša phoofolo tšohle le tša go ikgogomoša;

ke yona kgoši ya diphoofolo tšohle tša go ikgantšha tša nageng.”

₂“Ke a tseba gore o kgona dilo tšohle;

ga go selo se o ka rego o nyaka go se dira sa go palela.

₃O mpotšišitše wa re: ‘Ke wena mang

o ka solago maikemišetšo a ka

o sa kwešiše selo ka ona?’

Ke be ke sa tsebe,

ke bolela tše ke sa di kwešišego,

dimakatšo tše ke sa di hlaologanyego.

₄O mpoditše gore ke theeletše ge o bolela,

le gore o tla mpotšiša dipotšišo,

mme nna ka go ruta.

₅Ke be ke kwele ka wena ka go anegelwa,

eupša bjale ke iponetše wena

ka a ka mahlo.

₆Ka gona ke inyatša ka tše ke di boletšego,

gomme ke ipona molato ke le leroleng le moloreng.”