To The Word – Day 170

₁Nna, Paulose, le Timotheose, makgoba a Kriste Jesu, re dumediša badumedi bohle motseng wa Filipi ba e lego ba tee le Kriste Jesu, go akaretšwa le baetapele ba phuthego le bathuši, re re: ₂Nke Modimo, Tatagorena, le Morena Jesu Kriste ba le gaugele, ba le fe khutšo.

₃Ke le lebogela go Modimo wa ka nako le nako ge ke le gopola; ₄gomme ka mehla ge ke le rapelela bohle ke rapela ke thabile, ₅ke le lebogela ka mo le nthušitšego ka gona mo modirong wa go bega Ebangedi, go tloga tšatšing lela la mathomo go fihlela gonabjale. ₆Se ke nago le nnete ya sona ke gore Modimo yo a thomilego modiro wo mobotse wo mo go lena o tla o tšwetša pele go fihlela a o phetha ka letšatši le Kriste Jesu a tla bego a etla ka lona. ₇Go ntshwanetše ge ke le gopola bohle ka mokgwa wo, ka gobane le ka mo pelong ya ka. Gobane le hlakanetše kgaugelo ya Modimo le nna ke le mo kgolegong, ke emela Ebangedi ke bile ke e hloma. ₈Modimo ke hlatse ya ka gore ke le hlolosetše bohle ka lerato la Kriste Jesu.

₉Ke rapela gore lerato la lena le gole le eya le na le tsebo le kwešišo ye e feletšego, ₁₀gore le kgone go kgetha se sebotse. Ke mo le tlago ba ba ba hlwekilego ba go hloka bosodi ka letšatši le Kriste a tla bego a etla ka lona. ₁₁La ba ba ba tletšego toka ye e tlago ka Jesu Kriste gore ka yona le tumiše le be le rete Modimo.

₁₂Banabešo, ke rata ge le tseba gore tše di ntlhagetšego di thušitše kudu go tšweletša Ebangedi, ₁₃baleti ba mošate le bohle moo ba be ba tseba gore nna ke ka mo kgolegong ka lebaka la Kriste. ₁₄Gomme go golegwa ga ka go dirile gore badumedi ba bantši ba tshephe Morena, ba be le sebete go feta pele go bega molaetša wa Modimo ka mafolofolo.

₁₅Ba bangwe ba bega molaetša wa Kriste ka tseba le kgang, mola ba bangwe bona ba o bega ka maikemišetšo a mabotse. ₁₆Bona seo ba se dirišwa ke lerato, ka ge ba tseba gore wa ka modiro ke go emela Ebangedi. ₁₇Ge e le bao ba tseba le kgang bona ba bega molaetša wa Kriste ka bojato, e sego ka maikemišetšo a mabotse, e le ge ba gopola gore ba ka nkokeletša mathata ge ke le ka mo kgolegong.

₁₈Fela ba tla ntirang? Segolo ke ge molaetša wa Kriste o begwa ka mekgwa yohle – ana ke ka maaka, ana ke ka therešo – seo se a nthabiša, gomme ke tla no dula ke thabile, ₁₉ka gobane ke a tseba gore ka dithapelo tša lena le ka go thušwa ke Moya wa Jesu Kriste ke tla ba ka lokollwa. ₂₀Se ke se dumago kudu gape ke se holofelago ke gore ke se ke ka dira selo se se kago nteša dihlong, eupša gonabjale le ka mehla ke be le mafolofolo a gore Kriste a tumišwe ka tšohle tše ke di dirago – ana ke a phela, ana ke a hwa. ₂₁Gape mo go nna go phela ke go direla Kriste, go hwa ke go boelwa. ₂₂Fela ge eba nka tšwela pele le go phela nka dira mošomo wo bohlokwa. Gore na nka kgetha eng, ga ke tsebe. ₂₃Ke tšeatšewa ke dilo tše pedi tše. Ke duma go tloga mo lefaseng ke yo dula le Kriste. Etse seo ke sona se sekaone kudu; ₂₄fela go tšwela pele le go phela ga ka mo lefaseng go tloga go nyakega ka lebaka la lena. ₂₅Ka ge ke na le nnete ya taba ye, ke a tseba gore ke tla no dula ke phela. Ke tla dula le lena bohle gore ke le thuše go tšwela pele tumelong mme le thabe go yona, ₂₆gore mohla ke na le lena gape le kgone go ikgodiša kudu ka go ba ba Kriste Jesu ka lebaka la se a le diretšego sona.

₂₇Tabakgolo ke gore le phele go ya ka mo go nyakago Ebangedi ya Kriste, gore le ge nka kgona go tlo le bona le ge nka se kgone, ke kwe gore le eme le tiile le le ba pelo e tee, gomme le tšea kgopu le hlabanela tumelo ya Ebangedi. ₂₈Le gannyane le se boife baganetši ba lena; gomme seo e tla ba sešupo sa gore ba tla lahlwa gwa phološwa lena. Sešupo se se tšwa go Modimo. ₂₉Gobane lena le filwe sebaka sa go direla Kriste, e sego fela ka go dumela go yena, eupša le ka go tlaišwa ka lebaka la gagwe. ₃₀Nna le lena re lwa ntwa e tee. Ke yona yela le bonego ke e elwa, gape ye le kwago ke sa e lwa le gonabjale.

₁Ge eba le hweditše kgothatšo mo go Kriste goba khomotšo ye e tšwago leratong, goba le ikwa le le selo se tee le Moya wo Mokgethwa, goba le ratana le bile le kwelana bohloko, ₂gona ke le kgopela gore le nthabiše gagolo ka go ba le menagano ya go swana, le lerato la go swana, le maikemišetšo a go swana, le pelo ya go swana. ₃Motho a se dire selo ka bojato goba ka go nyaka boikgantšho bja lefeela, eupša ka boikokobetšo a ipone a phalwa ke ba bangwe. ₄A se šetše fela tša go ikhola, eupša a šetše tša go hola ba bangwe. ₅Moya wo le swanetšego go ba le wona ke wo Kriste a bego a na le wona:

₁₂Barategi, ka ge le be le ntheeletša ka mehla mola ke sa na le lena, gonabjale ge ke le kgole le lena, le swanetše go ntheeletša le go feta. Dulang le katanela phološo ya lena ka tlhompho le poifo, ₁₃gobane go rata go phetha thato ya Modimo ga lena, le go kgona go e phetha le go dirišwa ke yena.

₁₄Le dire tšohle le sa ngongorege, le se na manganga, ₁₅gore le hloke bosodi mme le be ba ba hlwekilego, le be bana ba Modimo ba ba se nago molato, ba ba phelago gare ga bakgopo le baarogi, ba ba tagago mo gare ga bona bjalo ka dinaledi leratadimeng, ₁₆le ba fe molaetša wa bophelo. Ge le ka dira bjalo ke tla ba le lebaka la go ikgantšha ka lena ka letšatši le Kriste a tla bego a etla ka lona, gobane go tla bontšhega gore maitekelo le maitapišo ohle a ka ga se a wela fase.

₁₇Ke ra le ge nkabe nka dirwa sehlabelo ka lebaka la tumelo ya lena ye ka boyona e lego sehlabelo se se neelwago Modimo, ke be nka thaba ka ipshina le lena ka moka. ₁₈Ka lona lebaka leo le lena thabang le ipshine le nna.

₁₉Ge Morena Jesu a ratile ke holofela gore kgauswinyana ke tla roma Timotheose moo go lena gore le nna ke tle ke we pelo ge ke ekwa tša lena. ₂₀Gape ka ntle le yena ga ke na yo mongwe yo a kago le hlokomela gabotse bjalo ka yena, yo maikutlo a gagwe a swanago le a ka. ₂₁Ba bangwe batho ba inyakela tša bona, ga ba nyake tša Kriste Jesu. ₂₂Ge e le yena, go botega ga gagwe le a go tseba, ka mo a šomilego le nna go bega Ebangedi ka gona bjalo ka ngwana ge a dira le tatagwe. ₂₃Ke yena yo ke holofelago gore ke tla mo roma ka pelapela ge ke seno bona gore ditaba di ntshepelela bjang. ₂₄Ge Morena a ratile ke tshepha gore le nna mong nka se tšee nako ke se ka tla go lena.

₂₅Ke bone e le tshwanelo gore ke le romele ngwanaborena, Ephafroditose, yo e lego modirikanna le mokatanikanna, yo ebilego e le motseta wa lena wa go tlo nthuša ka tše ke di hlokago. ₂₆O le hlolosetše bohle, gomme o hlobaetšwa ke ge le kwele gore o be a fokola. ₂₇Ke nnete o be a lwala, a ba a ba makgatheng. Fela Modimo o mo gaugetše, e sego yena fela, eupša le nna, gore manyami a se ke a ntlela a šalane morago. ₂₈Ke ka lebaka leo ke fišegago kudu go mo roma, gore ge le mmona gape le thabe mme nna ke se sa hlobaela. ₂₉Ka fao le mo amogele ka diatla tše pedi ka ge e le modumedikalena. Ba babjalo ka yena le ba hlomphe, ₃₀gobane o ile a ipea kotsing ya lehu gomme o nyakile go hwa ka lebaka la modiro wo a bego a o direla Kriste, e le ge a nthuša ka tše lena le bego le sa kgone go nthuša ka tšona.

₁Bjale ge, banabešo, thabang le le ba Morena. Gape go boeletša tše ke šetšego ke le ngwaletše tšona ga go ntene, kganthe lena go a le tiiša. ₂Le phafogele dimpša tšeo, ke ra badiratšekgopo bao, bona baripšasetho bao. ₃Gape ba lebollo la mmannete ke rena, gobane rena re khunamela Modimo ka Moya wa gagwe, gomme re ikgantšha ka Kriste Jesu. Ga re bote tša nama. ₄Go bota tša mohuta woo ga se gore go a mpalela. Ge eba go na le yo a gopolago gore a ka bota tša nama, nna ke a mo phala. ₅Nna ke boloditšwe ke sa na le matšatši a seswai. Ke nna Moisraele ka matswalo, wa kgoro ya Benjamene; ke Moheberu wa Baheberu, ge go iwa ka go phetha melao ya Moshe, ke be ke le Mofarisei; ₆ke be ke fišegela go direla Modimo mo ke bego ke bile ke hlomara kereke. Ge eba go loka ke go phetha melao ya Moshe, gona nna ke be ke sa solege. ₇Fela tšeo ka moka tše ke bego nka re ke poelo, ka lebaka la Kriste ke bona e le tobo. ₈Ga se tšeo fela; eupša le dilo ka moka ke bona e le tobo ge ke di bapetša le se se nago le mohola kudu, e lego go tseba Kriste Jesu, Morena wa ka. Ka lebaka la gagwe ke lobile dilo tšohle gomme ke bona tšohle e le tšhila fela, e le ge ke gabile gore Kriste e be wa ka, ₉ke be selo se tee le yena ke se na boloki bjo e lego bja ka, bjo bo hwetšwago ka go phetha melao ya Moshe, fela ke na le boloki bjo bo hwetšwago ka go dumela go Kriste, boloki bja go tšwa go Modimo bja tla ka tumelo. ₁₀Se ke se nyakago ke go tseba Kriste le go kwa maatla a tsogo ya gagwe bahung, le go ba selo se tee naye mahlokong a gagwe, ka ba wa go swana naye lehung la gagwe, ₁₁ke holofetše gore le nna ke tla tsošwa bahung ka phela.

₁₂Ga se gore ke re ke šetše ke atlegile goba gona go ba yo a phethegilego. Se ke se dirago ke go leka go thopa sefoka, ka gobane le nna Kriste o šetše a nthopile. ₁₃Banabešo, ga se gore ke ipona nke ke šetše ke se thopile. Aowa; se ke se dirago ke gore tša ka morago ga ka ke a di lebala, ka obelela tša ka pele ga ka. ₁₄Ke šianela go ba thwadi gore ke yo thopa sefoka, e lego go biletšwa ke Modimo bophelong bja legodimong ka Kriste Jesu.

₁₅Rena ka moka ba re budulego go tša semoya a re naganeng ka mokgwa woo. Fela ge eba le nagana ka mokgwa wo mongwe, Modimo o tla le utollela se e lego sona. ₁₆Fela se segolo a re gateleng pele ka moo re dutšego re sepela ka gona.

₁₇Banabešo, nkekišeng bjalo ka badumedi ba bangwe. Le phele ka mo re le bontšhitšego go phela ka gona. Le tšee malebeši go bao ba phelago ba latela mohlala wa rena. ₁₈Gobane ba bantši ba phela e le manaba a sefapano sa Kriste. Taba ye ke šetše ke ile ka le botša yona gantši, mme bjale ke boeletša ke le botša yona ke lla. ₁₉Pheletšo ya bona ke tahlego, modingwana wa bona ke mpa; ba kgantšha tše di bego di swanetše go ba leša dihlong, ba nagana fela ka tša lefaseng. ₂₀Ge e le rena, ga gaborena ke legodimong, gomme re letetše Mophološi wa rena, Morena Jesu Kriste, gore o tla tla a etšwa gona. ₂₁O tla fetoša mebele ya rena ye e sego ya selo a e fa sebopego sa go swana le sa wa gagwe wo o tagago; ke se a tlago se dira ka maatla ao a kgonago go laola tšohle ka ona.

₁Ka gona, banabešo ba ke le ratago gape ke le hlolosetšego, lena le nthabišago mme ke ikgantšhago ka lena, le eme le tiile le le ba Morena, lena barategi.

₂Wena Efodia le wena Sintige, ke a le kgothatša, le kwane Moreneng. ₃Le wena modirikanna yo a botegago, ke go kgopela gore o thuše basadi bao; ba be ba katanela go nthuša go bega Ebangedi gotee le Klemense le badirikanna ba bangwe bao maina a bona a lego ka pukung ya ba ba phelago.

₄Thabang ka mehla le le ba Morena. Ke a boeletša, ke re thabang!

₅Ebang ba botho go yo mongwe le yo mongwe. Morena o kgauswi le go tla. ₆Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. ₇Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.

₈Banabešo, ke fetša ka gore le dule le nagana fela ka tšohle tše e lego tša nnete, tšohle tše di tumišegago, tšohle tše e lego tša go loka, tšohle tše di hlwekilego, tšohle tše di kgahlišago, tšohle tše di dirago gore motho a retwe – a ke re tšohle tše di dirago gore motho e be mothomotho mme a tumišwe ke batho – tšeo ke tšona tše le swanetšego go dula le di nagana. ₉Le dire tše le ithutilego tšona go nna le tše le di amogetšego go nna, e ka ba tše le kwelego ke di bolela goba ke di dira. Gomme Modimo yo a re fago khutšo o tla ba le lena.

₁₀Ka ge ke le wa Morena, ke thabile kudu ge ke lemoga gore ka morago ga nako ye telele ka mokgwa wo le sa nkgopola. E se gore ke re le kile la ntebala – se le bego le se hloka ke sebaka. ₁₁Ge ke realo ga se gore ke ipega mohlako, gobane ke ithutile go kgotsofala ka se ke nago le sona. ₁₂Mohlako ke a o tseba, bohumi le bjona ke a bo tseba. Ke itlwaeditše tšohle, e ka ba go khora goba go bolawa ke tlala, go tlalelwa ke dilo goba go di hloka. ₁₃Tšohle ke di kgona ka maatla ao Kriste a mphago ona.

₁₄Fela le dirile gabotse ge le nkimolotše mathata a ka. ₁₅Gomme lena Bafilipi, le a tseba gore mola ke tloga moo Matsedonia mathomong a modiro wa ka wa go bega Ebangedi ga se gwa ka gwa ba le phuthego ye nngwe ya go nthuša ditšheleteng tša go tsena le tša go tšwa, ntle le lena. ₁₆Mola ke le motseng wa Thesalonika le gona le nthometše tše ke bego ke di hloka, la ba la boeletša. ₁₇Ge ke realo ga se gore ke dio nyaka go amogela dimpho; gagolo se ke se nyakago ke gore go holega ga lena go oketšege. ₁₈Bjale ge, tšohle tše le nthometšego tšona ke di amogetše, gomme ebile ke hwetša di ntlaletše. Ke di tlišeditšwe ke Ephafroditose, gomme bjale ke na le tšohle tše ke bego ke di hloka. Tšona ke bona e le sehlabelo se se amogelegago go Modimo mme se mo kgahlago e le seorelo sa go nkga bose. ₁₉Gomme Modimo wa ka o tla le fa tšohle tše le di hlokago, go ya ka lehumo le legolo le a nago le lona ka Kriste Jesu. ₂₀A go tumišwe yena Modimo Tatagorena go ya go ile! Amene.

₂₁Le dumediše badumedi bohle ba Kriste Jesu. Badumedi ba ke nago le bona mo ba re le dumele. ₂₂Badumedi bohle ba a le dumediša, gagolo ba lapa la Kesare.

₂₃Morena wa rena, Jesu Kriste, a le gaugele bohle.