JOBO 38

₂“Ke wena mang o ka solago maikemišetšo a ka,

o sa kwešiše selo ka ona?

₃Bjale ge, ke tla go botšiša dipotšišo,

gomme wena o ngatetše senna,

o nthute.

₄Na o be o le kae ge ke hloma metheo ya lefase?

Ge eba o a tseba gore le hlolegile bjang,

mpotše.

₅Ke mang yo a rerilego gore e tla ba le le kaakang?

A ke re wena o a tseba!

Ke mang yo a gogilego thapo ya meelo ya lona?

₆A mahlomelo a lona a epetšwe go eng?

Wa go bea leswika la motheo wa lona yena ke mang?

₇Mohlang woo dinaledi tša masa di be di duduetša mmogo,

le dibopiwa tšohle tša legodimong di goa ka lethabo.

₈Ke mang wa go tswalela lewatle ka mabati mola le thibologa popelong ya lefase?

₉Ke nna ke apešitšego lewatle maru,

ka le phuthela ka leswiswi.

₁₀Ke beetše lewatle mellwane,

ka le phekela mabati.

₁₁Ka le botša ka re:

‘Ema fa, se fetele pele!

Maphoto a gago a maatla a gome fa.’

₁₂Jobo, kgane mola wa tswalwago

o kile wa botša letšatši gore le hlabe,

goba wa bontšha masa gore a thome kae?

₁₃O kile wa laela gore a tšee lefase a le thinthe bakgopo?

₁₄Mosegare o fetoša sebopego sa lefase boka letsopa le le kibilwego ka sekibo,

dithaba tša bonala bjalo ka memeno ya kobo.

₁₅Letšatši ge le hlaba le raka bošego,

gomme bakgopo ba šitwa go tšwela pele le bokgopo.

₁₆“Na o kile wa ya methopong ya bodiba bja lewatle,

goba wa sepela godimo ga lebato la lona?

₁₇Na o kile wa bontšhwa dikgoro tša bodulabahu,

goba wa bona difero tša gona tša leswiswi?

₁₈Kgane o a lemoga gore lefase ke le legolo bjang?

Bolela ge eba o a tseba.

₁₉“A o tseba tsela ya go ya moo seedi se dulago gona,

le gore a leswiswi lona le dula kae?

₂₀Na o ka di beela mellwane,

goba wa di gomišetša mo di tšwago?

₂₁Aowi, o ka kgona –

a ke re o tswetšwe ge lefase le hlolwa,

gomme o wa kgalekgale?

₂₂Na o kile wa fihla mo ke bolokelago lehlwa,

goba mo sefako se beilwego gona?

₂₃Ke di boloketše mehla ya mathata,

le nako ya tlhabano le ntwa.

₂₄Kgane o tseba tsela ya go ya mo go hlabago letšatši,

mo phefo ya bohlabela e tšwago gona ya aparela lefase?

₂₅“Ke mang yo a buletšego pula ya matlorotloro lešoba,

a phuletšego le maru a ditladi tsela,

₂₆gore pula e ne le mo go se nago motho,

goba lešokeng mo go se nago le batho?

₂₇Ke mang wa go nošetša naga ye e nyorilwego ye e se nago selo,

gore bjang bo hloge?

₂₈Kgane pula e na le tatagoyona,

goba phoka e tswetšwe ke mang?

₂₉Ke mang mmago kgapetla ya meetse?

Šobane yona e belegwe ke mang?

₃₀Tšona di fetotšago meetse leswika,

di kgahlišago le lewatle ka godimo.

₃₁“Kgane wena o ka kgokaganya Selemela goba wa bofologanya Kgogamašego?

₃₂Na o ka sepetša dinaledi ka go latelana ga tšona,

goba wa šupetša Bere le Berana tsela?

₃₃Kgane o tseba melao ye e beetšwego leratadima,

goba o ka dira gore e buše le lefase?

₃₄“Na o ka goelela maru,

gore a go thapiše ka pula?

₃₅“Kgane o ka laela legadima gore le rathe?

Na ge o le bitša le ka tla la re:

‘Ratha ka nna’?

₃₆Ke mang yo a filego tlhahlamedupi bohlale,

goba a neilego mokoko tsebo?

₃₇Ke mang sehlalefi sa go kgona go bala maru?

Ke mang a sekamišago metšega yeo ya leratadima,

₃₈gore pula e bopaganye lerole makwate a go momagana?

₃₉“Kgane ke wena o tsomelago tau phoofolo,

goba o khorišago tawana ye e swerwego ke tlala,

₄₀ge di khukhuna ka magolong a tšona,

goba di laletše ka sethokgweng?

₄₁Ke mang yo a fago legokobu dijo ge le eya kua le kua le nyaka diyamaleng,

mafotwana a lona a ntelela?”