To The Word – Day 166

₂“Na motho wa nama a ka hola Modimo ka eng?

Ešita le yo bohlalehlale,

ke eng se a ka mo holago ka sona?

₃Kgane ge o dira tše di lokilego o hola Ramaatlaohle?

Ge o phela ntle le bosodi gona go tla mo thušang?

₄Kgane Modimo a ka go sola ka ge o mmoifa, a go iša tshekong?

₅Aowa, ke ka lebaka la bokgopo bjo o bo dirilego;

ke ka gobane o dirile dibe tše dintši.

₆O šaeditše ka ge o rile ge o adima magageno dilo,

wa nyaka peeletšo ya tšona;

wa ba tšeela diaparo,

wa ba tlogela ba itlhobotše.

₇Ga se wa fa ba ba lapilego meetse a go nwa;

o timile le ba ba swerwego ke tlala dijo.

₈Ka go fadiša maatla o iphile naga,

wa bea mogwerago go yona.

₉O bušeditše bahlologadi gae ba kadietša diatla,

wa ba wa hula le ditšhiwana.

₁₀Ke ka lebaka leo o wetšwego ke madimabe,

wa aparelwa ke poifo ka bjako,

₁₁wa ba mo leswiswing, wa se bone selo;

wa tšewa ke lefula.

₁₂“Ga ke re Modimo o dula godimo magodimong?

Bona gore dinaledi di godimodimo bjang.

₁₃Eupša wena o re: ‘Modimo o tsebang?

A ka ahlola batho bjang a širilwe ke leswiswi le lesoleso?

₁₄O širilwe ke marumaso ge a le gare a sepela mollwaneng mokgahlo ga leratadima le lefase.’

₁₅“Na o nyaka go ganelela bophelong bjola bja kgale bja go phelwa ke bakgopo?

₁₆Gape bona ba ile ba gogolwa ke lefula nako ya bona e sešo ya fihla.

₁₇Ke bona ba go re go Modimo: ‘Re tlogele.

O ka re dirang, wena Ramaatlaohle?’

₁₈Etšwe e le yena a tladitšego magae a bona mahumo.

Fela dikgopolo tša bona nna ga ke kwane natšo.

₁₉Baloki ge ba bona bakgopo ba otlwa ba a kgahlega,

le ba ba se nago molato ba a ba sega.

₂₀Ba re: ‘Manaba a rena a fedišeditšwe sa ruri,

gomme tše a bego a na le tšona di llwe ke mollo.’

₂₁“Bjale ge, boelana le Modimo,

o kwane naye,

ke mo o tlago buša wa iketla.

₂₂Amogela thuto yeo a go fago yona;

o lote mantšu a gagwe ka pelong ya gago.

₂₃Ge o ka boela go Ramaatlaohle,

o tla go bušetša sekeng.

Ge o ka fediša bobe bjo bo dirwago ka ga gago,

₂₄ge o ka lahla gauta ye o nago le yona,

wa lahla le ye e tšwago Ofire,

wa e lahlela lekgwareng ka nokaneng,

₂₅Ramaatlaohle e tla ba yena gauta le silibera ya gago ye bohlokwa.

₂₆Ke mo a tlago go thabiša, yena Ramaatlaohle,

wa lebana le Modimo o sa itshetshengwe.

₂₇Ge o mo rapela o tla go kwa,

wena o tla kgona go phetha dikeno tša gago.

₂₈Ge o ikemišeditše go dira selo,

o tla se kgona;

tsela ya gago e tla bonegelwa ke seetša.

₂₉Ge Modimo a kokobetša bakgopo,

wena o tla re ke ka lebaka la boikgantšho bja bona;

baikokobetši bona o a ba phološa.

₃₀Modimo o tla hlakodiša yo a se nago molato,

gomme wena o tla go hlakodiša ge o dira tše di lokilego.”

₂“Sello sa ka ke sa go tsogela Modimo maatla,

ke golola ke sa kgone go kgaotša.

₃Nke nkabe ke tseba mo nka mo hwetšago gona,

gore ke ye moo a dulago gona.

₄Ke be ke tla mo hlalošetša taba ya ka,

ka mo alela maiphetolelo a ka ka botlalo.

₅Ke be ke tla tseba gore o mphetola bjang,

ka leka go kwešiša se a mpotšago sona.

₆Kgane o be a tla mpatla ka maatla ge re tšere kgang?

Aowa, o be a tla ntheeletša.

₇Nna, ka ge ke le moloki,

ke be ke tla mo phophotha;

o be a ka se mpone molato.

₈“Ge ke mo nyaka ka bohlabela,

ga ke mo hwetše;

ge ke mo nyaka ka bodikela,

le gona ga ke mmone.

₉Ge a le mošomong ka leboa,

ga ke mmone;

ge a retologela ka borwa,

ga ke lemoge.

₁₀Eupša magato ohle a ka o a a tseba;

ge a ka nteka o tla nkhwetša

ke hlwekile bjalo ka gauta.

₁₁Tsela ya gagwe ke e latetše gabotse,

gomme ka se phamoge mo go yona.

₁₂Ga se nke ka tshela melao ya gagwe;

tše a di boletšego ke di lotile ka pelong.

₁₃“Ge a ikemišeditše go dira selo,

ke mang yo a ka mo hlanamišago?

O dira se a se ratago.

₁₄Tše a mpeakanyeditšego tšona o tla di phetha;

merero ye mebjalo ke ye mentši.

₁₅Ke ka lebaka leo ke tšhogilego ge ke le pele ga gagwe;

ge ke nagana ka yena ke kwa ke boifa.

₁₆Modimo o nnotše moko;

Ramaatlaohle o ntšhošitše.

₁₇Ke paletše leswiswi,

eupša bjale ga ke sa bona ka lebaka la lona leswiswi.”

₁“Ke eng Ramaatlaohle a sa bee dinako

tša go ahlola bakgopo?

Bahlankedi ba gagwe ba reng ba letela matšatši a kotlo ya bakgopo,

eupša ba sa a bone?

₂“Bakgopo ba fela ba katološa mellwane;

ba utswa diruiwa tša bangwe,

ba di fudiša le tša bona.

₃Ba ipha dipokolo tša ditšhiwana,

ba swara le dipoo tša bahlologadi,

go fihlela bahlologadi bao ba lefa

melato ya bona.

₄Ba kgorometša bahloki mo tseleng

gore ba ba šutelele;

le gona bahlaki ba mo nageng ba phela ka go iphihlela bona.

₅“Badiidi ba tlemega go yo nyaka dijo lešokeng bjalo ka dipitsi;

leganata le ba fa dijo tša bana ba bona.

₆Ba tlemega go šomela batho ba bangwe ka go ba bunela mašemo;

ba utswa diterebe mašemong a motho yo kgopo.

₇Bošego ba lala ba se ne tša go apara,

ba hloka tša go itšhireletša phefo.

₈Ba thapišwa ke dipula dithabeng;

ba ipata le magaga ba nyaka botšhabelo.

₉“Masea ao a se nago botatagoona bakgopo ba a dira makgoba,

ba thopela bahloki bana gore ba lefe melato ya bona ka bona.

₁₀Bahloki ba sepela ba hlobotše,

ba se ne diaparo;

ba rwele mabele ba swerwe ke tlala.

₁₁Ba hlotla makhura a mohlware mokgahlo ga mehlare,

ba pitla diterebe ka maoto ba sa inyorolle ka matutu a tšona.

₁₂Metseng go golola ba ba hwago,

ba ba gobetšego ba lla ba nyaka thušo,

eupša Modimo ga a ele thapelo tša bona hloko.

₁₃“Go na le batho ba go gana seedi;

ba go se se kwešiše,

ba go gana go hlahlwa ke sona.

₁₄Mmolai o tsoga ka masa,

a yo bolaya modiidi le mohloki;

bošego o a utswa.

₁₅Sehlotlolo se letela gore šwahlane e sware;

se ipotša se ikhurumetša sefahlego ka lešela se re:

‘Nka se tsebje ke motho.’

₁₆Mahodu a šwahlela ka dintlong bošego,

eupša mosegare ba a khuta ba tšhaba seetša.

₁₇Ka moka ga ona ba tšhaba seetša sa mosegare,

ge e le leswiswi lona ga ba le boife.

₁₈ “Bakgopo ba gogolwa ke mafula,

le mašemo a bona a rogakilwe ke Modimo;

batho ga ba sa šoma ka merareng ya bona.

₁₉Badiradibe ba metšwa ke bodulabahu,

bjalo ka lehlwa ge le metšwa ke komelelo le phišo.

₂₀Bakgopo ba lebalwa le ke bommagobona;

diboko di ipshina ka bona,

ga ba sa gopolwa ke motho.

Ke ka mo bokgopo bo fedišwago bjalo ka mohlare wo o welego.

₂₁Lebaka ke gore ba be ba swere basadi ba meopa gampe,

ba se na botho go bahlologadi.

₂₂Modimo o fediša diganka ka maatla a gagwe;

ge a thoma go otla bakgopo bona ga ba kgolwe gore ba tla phela.

₂₃O ba lesa ba ipea pelwanatšhwaana ya tšhireletšego,

kganthe o dula a ba beile leihlo.

₂₄Bakgopo ba tuma lebakanyana,

ya ba ga ba sa le gona;

ba a kokobetšwa,

ba pona bjalo ka bjang,

ba etša seako sa lebele se se ripilwego.

₂₅Ge eba go se bjalo,

ke mang yo a ka rego ke na le maaka,

goba a re tše ke di bolelago ga se selo?”

₂“Modimo ke kgoši,

bogoši le tlhompho ke tša gagwe;

o hlola khutšo kua godimo legodimong.

₃Ke mang yo a kago bala makoko a barongwa?

Ke mang yo seetša sa Modimo se sa mo hlabelego?

₄Na motho wa nama e ka ba moloki pele ga Modimo?

Kgane motswalwakemosadi a ka hlweka?

₅Mahlong a Modimo le ngwedi ga o tage,

le dinaledi ga di hloke bosodi.

₆Bjale motho wa nama,

yena e lego seboko,

a ka hlweka bjang?”

₂“Etse ga se ka ge o nthušitše, nna mohlokamaatla!

Ke re wa tla wa nthuša, nna mofokotšana!

₃Ga se ka ge o nkeleditše, nna moitlhokelatsebo wa batho!

Gape o mphile maele a mantši!

₄Etse mantšu a a gago a lebantšhitšwe go mang?

Ke mang wa go go tutuetša go bolela ka mokgwa wo?

₅ “Meoya ya bahu

e thothomela ka letšhogo ka fase ga lefase;

meetse le diphedi tša ka gare di a boifa.

₆Bodulabahu bo bulegetše Modimo;

felo moo ga tahlego ga go mo širegele.

₇Ke yena a phurolotšego leratadima la ka leboa sebakabakeng,

a lekeletša lefase lefaufaung.

₈Ke Modimo yo a phuthelago meetse ka maru,

mme maru ona a se palešwe ke boima.

₉O šireletša ngwedi wo o tletšego ka go o apeša leru la gagwe.

₁₀O hlomile bogomapono bja nthetelego godimo ga phamphamadiba,

ya ba mollwane mokgahlo ga seetša le leswiswi.

₁₁Ge a kgalema dikokwane tše di thekgilego leratadima,

di thothomela ka letšhogo.

₁₂Ka maatla a gagwe o bilošitše lewatle;

ka bokgoni bja gagwe o pšhatlagantše mmamogašwa Rahaba.

₁₃Ka phefo ya gagwe o apotše leratadima,

gomme ka letsogo la gagwe o hlabile mmamogašwa o tšhaba.

₁₄Tšeo ke ditšhupo tša maatla a gagwe,

gomme tše rena re di kwago ka yena ke sehebehebe fela.

Kgane ke mang yo a tsebago maatla a magolo a Modimo?”

₂“Ke ikana ka Modimo yo a phelago,

yo a ntlhokišago toka,

yena Ramaatlaohle yo a ntsotišago,

₃ke re ge ke sa buša moya,

ge yena Modimo a sa mphediša,

₄ganong ga ka go ka se tšwe bobe,

le leleme la ka le ka se bolele maaka.

₅Nka se tsoge ke rile lena le a rereša;

ke tla ba ka hwa ke re ga ke ne molato.

₆“Ke tla dula ke ntše ke re ke lokile,

nka se lese go realo;

gape ga ke itshetshengwe.

₇“Nke nkabe lenaba la ka le otlwa bjalo ka bakgopo;

nke nkabe sera sa ka se otlwa bjalo ka batho ba babe.

₈Na lehutšo la mohlokamodimo ke eng,

ge Modimo a mo amoga bophelo,

a mo lesa a ehwa?

₉Na ge a tlelwa ke mathata Modimo a ka kwa sello sa gagwe?

₁₀Nkabe e sa le a thabela Ramaatlaohle,

a rapela yena Modimo a sa kgaotše.

₁₁“Nke ke le rute bogolo bja maatla a Modimo,

ke se le fihlele tšeo yena Ramaatlaohle a ikemišeditšego tšona.

₁₂Fela a ke lese, ka ge le iponetše ka bolena.

Bjale le reng le bolela ditšiebadimo tše?

₁₃ “Se ke se Modimo a se abelago bakgopo;

ke lona lefa le diganka le le fiwago ke Ramaatlaohle.

₁₄Le ge ba na le bana ba bantši,

bana bao ba tlilo bolawa ntweng;

le ditlogolo tša bona di tla hloka dijo.

₁₅Ba ba šetšego ba tla bolawa ke leuba,

gomme bahlologadi ba bona ba ka se ba ilele.

₁₆Bakgopo le ge ba ka ba le silibera ye ntšintši le mekgobokgobo ya diaparo,

₁₇di tla aparwa ke molokitsoko,

silibera e tla tšewa ke yo a se nago molato.

₁₈Dintlo tše di agwago ke bakgopo di swana le bobi bja segoko;

di bjalo ka mošašana wa moleti wa mašemo.

₁₉Bakgopo ba robala e le bahumi,

e be la mafelelo;

ge ba tsoga lehumo la bona le tla be le nyameletše.

₂₀“Tše di šiišago di ba wela boka lefula,

gomme bošego ba tšewa ke ledimo.

₂₁Phefo ya bohlabela e ba ubula ka gae,

ya ba fefeula, mme ya ba ge ba ile.

₂₂E ba tšubotla e sa ba šokele,

bona ba leka go tšhaba parapara.

₂₃Yona e ba opela diatla ge e ba hlothola magaeng a bona.”