To The Word – Day 167

₁“Go na le moo go epšago silibera;

go na le mafelo moo go hlwekišwago gauta.

₂Tshipi e epša mobung,

mphiri wona o hwetšwa ka go tološa borale.

₃Batho ba bonega leswiswi.

Ba putuka matlapa ka maswiswing a masomaso, ka fase ga lefase.

₄Ba epa mekoti ya meepo kgole le mo go dulago batho,

ba lebalwa le ke bafeti ba tsela.

Ke moo ba šomago gona kgole le batho,

ba šikinyega ba lekeletše ka dithapo.

₅Godimo ga lefase go mela tša go lewa,

eupša ka fase ga lona go a biloga,

go swana le ka gare ga mollo.

₆Maswika a lefase a swere magakabje a botala bja leratadima,

a swere le dithorwana tša gauta.

₇Tsela ya go ya meepong ga e tsebje le ke ntšhu,

le pekwa ga se ya ka ya e bona.

₈Ga go sebata se se kilego sa gata moo,

goba tau ye e kilego ya sepela gona.

₉“Batho ba epa maswika a bothatathata,

ba phekgola le dithaba ka medu.

₁₀Ge ba le gare ba phula tsela maswikeng,

ba hwetša magakabje a mehutahuta.

₁₁Mo go rothago meetse ba a go thiba,

gomme se se utegilego ba se tliša nyanyeng.

₁₂Eupša bohlale bo hwetšwa kae?

Tlhaologanyo yona e humanega kae?

₁₃“Ga go tsebje ke motho wa nama;

ga bo hwetšwe lefaseng mo go dulago batho.

₁₄Lewatle le re:

‘Bohlale ga bo na le nna;’

le phamphamadiba e re:

‘Ka gare ga ka bohlale ga bo gona.’

₁₅Ga bo rekwe ka gauta ye e sego ya tswakwa, goba ka silibera.

₁₆Le gauta ye e tšwago Ofire e ka se lekantšhwe le bjona,

ešita le magakabje a bohlokwahlokwa.

₁₇Bo phala gauta le galase ka mohola,

ebile bo ka se rekwe le ka moruswi wa gauta ye e hlwekišitšwego.

₁₈Bohlale bo phala pheta ya thaga,

le legakadima le perela.

₁₉Bo phala legakabje la Etopia ka mohola;

le gauta ye e sego ya tswakwa e ka se lekantšhwe nabjo.

₂₀“Bjale bohlale bo tšwa kae, ge?

Tlhaologanyo yona e humanega kae?

₂₁Ga go sephedi se se kago bona bohlale,

ešita le yona nonyana e ka se bo bone.

₂₂Felo ga tahlego le lehu di re:

‘Rena re di kwa fela ka mabarebare.’

₂₃“Ke Modimo a nnoši yo a tsebago tsela ya go ya go bohlale,

yo a tsebago mo bo hwetšwago gona,

₂₄ka gore yena o bona mellwane ya lefase,

o bona tšohle tša ka fase ga leratadima.

₂₅Mola Modimo a efa phefo maatla,

a beela le lewatle magomo;

₂₆mola a beela pula melao ya go na,

a phulela legadima tsela,

₂₇ke gona a hlodilego bohlale,

a bo lebelela, a bo sekaseka.

₂₈“A botša batho a re:

‘Go boifa Morena ke bjona bohlale;

go tlogela bobe ke yona tlhaologanyo.’ ”

₂“Nke nkabe nka swana le pele,

mola ke hlokomelwa ke Modimo.

₃Ke mola lebone la gagwe le mponegela,

ke sepela ka seedi sa gagwe leswiswing.

₄Ke matšatšing ale dilo di sa ntshepelela gabotse,

mola Modimo a ntotetše legae.

₅Ke mola Ramaatlaohle a sa na le nna,

ke sa farafarilwe ke bana ba ka.

₆Ke mola lebese le ntlalela mo nkego meetse a go hlapa maoto,

le mehlware ya ka e sa mela makgwareng,

mme e etšwa makhura a mantši.

₇Mola ke sa fela ke eya kgorong pitšong ya bagolo ba motse,

ke dula fase madulong a ka lepatlelong,

₈masogana ge a mpona a be a ntšhutelela,

le bakgalabje ba emelela ka go ntlhompha.

₉Bahlomphegi ba be ba homola,

ba sa bolele;

₁₀baetapele le bona ba ikhomolela,

ba re tuu.

₁₁“Bohle ba ba kwago tša ka ba be ba re ke lehlogonolo;

ba ba mponago ba nthetela tiro tša ka.

₁₂Gobane ke be ke thuša mohlaki ge a llela thušo,

le tšhiwana ge e hloka mothuši.

₁₃Ke be ke lakaletšwa ditšhegofatšo ke motho ge a ehwa,

mohlologadi yena ke mo thabiša.

₁₄Ka mehla ke be ke phethagatša toka le tshwanelo.

₁₅E be e le nna mahlo a difofu,

le maoto a digole.

₁₆Ke be ke le tatagobadiidi,

ke emelela bašele ba ba lego tlalelong.

₁₇Badiratšempe ke be ke ba kgola meno,

ke hlakodiše batho ba ba lego ka maganong a bona.

₁₈“Ka gona ke be ke ipotša gore matšatši a ka a atile boka lešabašaba,

le gore ke tla hwela ka ga ka ke iketlile;

₁₉ke re ke tla swana le mohlare woo medu ya wona e dulago e nabetše meetseng,

le makala a wona a thapišwago ke phoka;

₂₀ke re ke tla dula ke retwa,

ke bile ke sa felelwe ke maatla.

₂₁Ge ke bolela, batho ba be ba ntheeletša ka hloko,

ba ekwa maele a ka ba homotše;

₂₂gomme ge ke fetša,

ba sa be le sa go tlaleletša.

Mantšu a ka a be a nwelela go bona boka marothi a pula.

₂₃Ba be ba a letela mo nkego ke pula,

ba ahlama nke ba nyoretšwe pula ya tsheola.

₂₄Ke be ke ba segiša ge ba nolega moko,

gomme sefahlego sa ka se se edilego se ba bea pelo.

₂₅Ke be ke ba laola,

ke ba tšeela sephetho,

ke ba eta pele boka kgoši ge e eta bahlabani pele,

ke bile ke ba bea pelo ge ba nyamile.”

₁“Eupša bjale ke segwa ke bao e lego bana go nna,

bao botatabo ke bego ke ba nyatša,

ke sa rate le go ba dudiša le dimpša tša go diša dihuswane tša ka.

₂E be e le dikoka tše di ka se kego tša ntirela selo.

₃Ba be ba gwameditšwe ke tšhego le tlala;

bošego ge ba le mašokeng,

kgole le mo go dulago batho,

ba phuphura medu ye e omeletšego.

₄Ba be ba ekga merogwana ya lešoka,

medu ya mehlopi e le dijo tša bona.

₅Ba be ba rakwa bathong ka go kgadimolwa mo nkego ke mahodu.

₆Ba be ba swanela go phela ka magageng

le ka mešimeng le ka maweng.

₇Ba be ba lla bjalo ka dipitsi,

ba ipopa dikgororwana ka gare ga dithokgwana.

₈E be e le makokwana a mašilo,

digoboga tše di lelekilwego nageng ya gabotšona.

₉“Gomme bjale ba nkopela koša,

ba mphara dika.

₁₀Ba a ntšhišingwa, ba nkema phaphi;

ga ba dikadike go ntshwela sefahlego ka mare.

₁₁Ka ge Modimo a mpheditše maatla,

a nkokobeditše,

bona ba namile ba ntlhasela ba sa itshware.

₁₂Lekoko le le ntlhasela le etšwa ka lehlakoreng la la go ja;

ba a nkgorometša,

ba itokišetša go mpheleletša.

₁₃Ba nthibela tsela,

ba leka go mphetšiša,

ebile ga go motho yo a ba thibelago.

₁₄Ba tsena mo nkego go phutšwe lešoba morakong,

ba šwahlela ge morako o kgerega.

₁₅Ke wetšwe ke tše di šiišago,

seriti sa ka se ntlogile mo nkego se tšerwe ke phefo,

le go atlega mola ga ka go apogile boka leru.

₁₆“Bjale šemo ke hwa bosele;

ke imetšwe ke ditlaišego tša ka.

₁₇Bošego ke lala ke opša ke marapo,

bohloko bjo ke bo kwago ga bo okobale.

₁₈Modimo o nkgoga ka sekgapha,

o šošobantšha le diaparo tša ka.

₁₉O ntahletše ka lerageng,

ke fetogile lerole le molora.

₂₀“Ke a go llela, Modimo, eupša ga o nkarabe;

le ge ke emelela ke rapela ga o nkele hloko.

₂₁O ntshwere gasehlogo;

o ntlhomere ka maatla ohle a gago.

₂₂O lesa phefo gore e ntšee;

o nkutlautla gare ga ledimo le le tšubotlago.

₂₃Ke a tseba gore o nkiša lehung moo go yago batho bohle.

₂₄Gape motho ge a tlaletšwe ga a hlaselwe,

ge a llela thušo a le mathateng.

₂₅Kgane ke be ke sa lle le ba ba lego mathateng,

goba ke sa kwele bahloki bohloko?

₂₆Ke be ke holofetše go ba mahlatse,

eupša ke wetšwe ke madimabe;

ke be ke letetše seetša,

fela ka tlelwa ke leswiswi.

₂₇Ke ferekane, ga ke na khutšo;

ke welwa ke ditlaišego letšatši ka letšatši.

₂₈Ke phela ke nyamile, ke se na lethabo;

ge ke ema kgorong ke ge ke kgopela thušo.

₂₉Ke lla sello sa bošiwana,

sa bophukubje le bompšhe.

₃₀Ke ifetše letlalo, ebile le a hlobega;

mmele wa ka o a fiša ka lebaka la letadi.

₃₁Se bjale se ntšhaletšego ke go letša sefela sa mahloko ka sekgapa,

le kopelo ya manyami ka kwadi.”

₁“Ke ikanne gore nka se tsoge ke dumile kgarebe ge ke e lebeletše.

₂“Ke eng se Modimo Yogodimo a se abelago motho?

Ke eng se Ramaatlaohle wa magodimong a mmeetšego sona?

₃Na dikotsi ga di wele bakgopo,

madimabe ona ga a wele badiratšempe?

₄Kgane Modimo ga a tsebe tše ke di dirago,

goba ga a mpale magato?

₅“Kgane nkile ka radia motho,

goba ka potlakela go hlalefetša bangwe?

₆Nke Modimo a nkele ka seelo se se sa jabetšego,

gomme o tla bona gore ga ke na molato.

₇Ge eba ke phamogile tseleng ye e lokilego,

goba ke lakilwe ke tše ke di bonego,

ge eba diatla tša ka di tšhilafaditšwe ke sebe,

₈gona tše ke di bjalago a di lewe ke bangwe,

le tše di mmelelago di tumolwe.

₉“Ge eba nkile ka duma mosadi wa mongwe,

gomme ka mo lalela mojako,

₁₀gona mosadi wa ka a a yo šilela monna yo mongwe,

gomme banna ba bangwe ba robale naye.

₁₁Gobane ge nkabe nkile ka dira bohlola bjoo,

nkabe ke obile molato wo o swanelago kotlo.

₁₂Bo ka swana le mollo wo o tšhumago go fihla bodulabahu,

wo o ka laumišago tšohle tše ke nago le tšona.

₁₃“Mola mohlanka wa ka yo mongwe wa monna goba wa mosadi a ntsošetša tshele,

ke be ke theeletša,

ke mo direla ka mo go lebanego.

₁₄Ge nkabe ke be ke sa dire bjalo,

ke be nka lebelela Modimo bjang?

Ke be nka fetola bjang ge Modimo a ntshekiša?

₁₅A ke re yena Modimo yo a mpopilego ka popelong ya mma,

o bopile le bona bahlanka ba ka?

₁₆“Ga se nke ke gane go thuša badiidi;

bahlologadi ga se nke ke ba hlokiše lehutšo.

₁₇Ga se nke ke je nthathana ya ka ke nnoši ke sa e ngwathelane le tšhiwana.

₁₈Go tloga bofseng bja ka ke godišitše ditšhiwana boka tatagotšona;

go tloga bjaneng bja ka ke hlokometše bahlologadi.

₁₉“Ge ke be ke bona mošaparegi a ebela a se ne diaparo,

goba mohloki wa go se be le nkgeretlana ya kobo,

₂₀ke be ke mo fa diaparo tše borutho tša boya,

boya bja dinku tša mohlape wa ka,

mme yena a nteboge ka pelo ka moka.

₂₁“Ge eba nkile ka šupa tšhiwana ka monwana,

ke fadiša ba go ema le nna kgorong,

₂₂gona letsogo la ka a le robje sefakeng,

segetla sa ka se kgaolwe legetleng.

₂₃Ka ge ke be ke boifa kotlo ya Modimo le bogoši bja gagwe,

ke be nka se dire taba ye bjalo.

₂₄“Ga se nke ke bote gauta,

ka ikanya gauta ye e hlwekišitšwego

₂₅goba ka ikgantšha ka leruo la ka le lentši,

goba ka thoto ye ke ikgobokeleditšego yona.

₂₆Go bona letšatši, sephadimaletago,

goba wona ngwedi wa letopanta, seputlalerata,

₂₇ga se gwa ka gwa nkutswa pelo gore ke be ke budulele dilo tšeo katlo.

₂₈Ge nkabe nkile ka dira bjalo,

nkabe ke obile molato wo o swanelago kotlo,

gobane ke be ke tla be ke latotše Modimo yo godimo.

₂₉“Ga se nke ke thabele madimabe a lenaba la ka,

goba ka hlalala ge a wetšwe ke masetlapelo.

₃₀Ga se nke ke dire sebe ka go mo lakaletša lehu.

₃₁Bahlanka ba ka ba a tseba gore ka ga ka motho o be a eja a tlatša mpa.

₃₂Basepedi ba be ba amogelega ka ga ka;

bafeti ke be ke sa ba latše ntle.

₃₃“Nna ga se nke ke bipe dibe tša ka ka etša batho ba bangwe,

ka fihla bokgopo bja ka,

₃₄e le ge ke tšhaba gore batho ba tla reng,

ke tšhaba le go kodutlwa ke ba gešo.

Ga se nke ke homole,

goba ka se tšwe ka gae.

₃₅“Nke nkabe taba ya ka e ka theeletšwa!

Tše ke di boletšego tše ke a di emela.

A Ramaatlaohle a mphetole.

“Nke nkabe momphari a na le bohlatse bja lengwalo.

₃₆Ke be ke tla le phara magetleng;

ke be ke tla le rwala hlogong boka mphapahlogo.

₃₇Ke be ke tla botša Modimo tšohle tše ke di dirilego,

ka mmatamela ke sa šie.

₃₈“Ge eba tšhemo ye ke e lemago e mpea melato,

ge eba bolemi bja yona bo a lla,

₃₉ge eba ke lle dibjalo tša yona ke se ka di lefela,

gomme ka bolaiša beng ba yona tlala,

₄₀gona, bakeng sa korong a ke melelwe ke ditshehlo,

bakeng sa mabele ke melelwe ke sekoro.”

“Nna ke yo monyenyane,

lena le ba bagolo,

ka gona ke be ke inyatša ke bile ke šia go le botša tše ke di naganago.

₇Ke ikgadile ka re a go bolele lena ba bagolo,

lena diputswa le tšweletše bohlale bja lena.

₈Gape se se kgontšhago motho go kwešiša,

ke moya wo Ramaatlaohle a mo tsentšego wona.

₉Bohlale ga se bja batšofadi fela;

ga se bakgalabje fela ba go kwešiša go loka.

₁₀Ke ka lebaka leo ke rego ntheeletšeng,

le nna ke le botše se ke se naganago.

₁₁“Ke be ke le theeleditše ke sa le felele pelo, ke le hlwaetše tsebe mola le ngangišana,

le akanya se le nyakago go se bolela.

₁₂Ke be ke le theeleditše gabotse,

fela go hlokegile wa go phala Jobo ka dipolelo;

le paletšwe ke go mo ganetša.

₁₃Ka fao le se re lena bohlale le bo hweditše,

la re Jobo o tla kgonwa ke Modimo,

a ka se kgonwe ke motho.

₁₄Nnaena Jobo ga sešo a bolela a ntebantšhitše,

gomme nna nka se mo fetole bjalo ka lena.

₁₅“Šeba ba gakanegile,

ga ba kgone go mo fetola;

ga ba na mantšu.

₁₆Bjale na nka napa ka dio itulela ge bona ba homotše,

ge ba ikemetše ba se ne polelo?

₁₇Le nna a ke lahlele la bošiwana,

ke bolele se ke se naganago.

₁₈Tše nka le botšago tšona ke tše dintši;

ke ikwa ke hlohleletšega go bolela.

₁₉Ka teng ga ka nke go bela beine ye e sa tšogo hlotlwa,

ye e palešago makuka a mafsa.

₂₀A ke bolele ke kgebiše pelo;

a ke ahlame ke fetole.

₂₁Nka se emelele motho,

nka se gegee motho.

₂₂Go gegea ga ke go kgone,

gomme le ge nkabe nka gegea,

Mmopi wa ka a ka akgofa a ntloša tšatšing.”

₁“Bjale ge, Jobo, o ntheeletše gabotse,

tšohle tše ke di bolelago o di hlwaele tsebe.

₂Bona mo, bjale ke tla ahlama,

ka bolela ditšwaganong tša ka.

₃Ke bolela ke tiišitše,

gomme ke bolela therešo.

₄Ke hlodilwe ke moya wa Modimo,

moya wa Ramaatlaohle o a mphediša.

₅“Ge o kgona o nkganetše,

o itokiše, o mphetole,

o be komana, madulaabapile.

₆Nna le wena re a swana mahlong a Modimo;

ka babedi re bopilwe ka letsopa.

₇Ka gona o se ke wa ntšhaba,

nka se go tlišetše mathata.

₈“Gape o boletše ke go kwa,

ke kwele tše o di bolelago.

₉O rile: ‘Nna ga ke na bosodi,

ga se ka tshela molao,

ga ke ne molato,

ga se ka dira tše kgopo.

₁₀Eupša Modimo o mpala magato,

gomme o ntshema lenaba la gagwe.

₁₁O mpatagantše maoto ka dikota,

o ntišitše mesepelong ya ka yohle.’

₁₂“Fela nna ke a go botša, Jobo, o a foša,

gobane Modimo o feta motho ka bogolo.

₁₃O reng o sola Modimo,

o re ga a fetole motho ge a mmotšiša?

₁₄Modimo o bolela ka mekgwa ye mentši,

le ge batho ba sa lemoge.

₁₅O bolela ka ditoro le ka dipono bošego,

mola batho ba ile ka boroko malaong a bona.

₁₆O ba kweša se a se bolelago,

a ba tšhošetše ka go ba kgala,

₁₇gore a ba tlogediše sebe,

le gore ba se ikgogomoše.

₁₈Ke ka mo a ba phefišago lebitla,

a ba hlakodišago lehung la lerumo.

₁₉Le gona o kgala batho ka ditlaišo tša bolwetši,

ka bohloko bjo bo sa okobalego mmeleng,

₂₀molwetši a be a šišingwe dijo,

ešita le tše dibosebose.

₂₁A fetoge lekhoro,

mme marapo a thome go tšwelela.

₂₂A be kgauswi le go ikela bohunamatolo,

lefaseng la ba ba ithobaletšego.

₂₃“Mohlomongwe morongwa yo mongwe wa ba sekete,

ba ba gopotšago batho ditshwanelo,

a ka tlo mo hlakodiša,

ya ba mophophothethedi wa gagwe.

₂₄O tla mo šokela a re:

‘Mo hlakodiše a se ye bohunamatolo,

ke mo hweleditše seloba.’

₂₅Mmele wa gagwe o tla mpshafala wa tia gape;

yena o tla boela sekeng sa bofseng bja gagwe.

₂₆Ge a rapela, o tla kgahla Modimo;

o tla tla pele ga Modimo a thabile;

Modimo o tla mmušetša sekeng sa gagwe.

₂₇Motho yoo o tla ipolela phatlalatša a re:

‘Ke dirile dibe.

Ga se ka dira tše di lokilego,

eupša Modimo ga se a nkotla ka mo go ntebanego.

₂₈O mphološitše gore ke se ye bohunamatolo,

gomme le gonabjale šemo ke sa phela.’

₂₉“Tšeo ka moka ke tše Modimo a di dirago motho leboelela,

₃₀e le gona go mo hlakodiša lehung,

gore a tle a ipshine ka bophelo.

₃₁“Bjale, Jobo, ekwa se ke go botšago sona;

o homole, o ntese ke bolele.

₃₂Fela ge o na le taba, o e ntšhe;

o bolele, gobane nka thaba ge o ka mpontšha gore ga o na molato.

₃₃Eupša ge o se na polelo, o ntheeletše;

o homole, mme ke tla go ruta se e lego bohlale.”