1Banabešo, nna ke duma ka pelo ya ka ka moka, ebile ke kgopelela setšhaba sa gešo go Modimo gore ba phološwe. 2Gobane nna ke hlatse ya gore ba fišegela Modimo, fela phišegelo ya bona ke ya motho yo a hlokago kwešišo. 3Ga se ba ka ba tseba tsela yeo Modimo a lokafatšago batho ka yona, eupša ba lekile go itshepelela ka ya bona tsela; ka gona ba se ipee tseleng ya Modimo ya go lokafatša batho. 4Gape Kriste o fedišitše melao ya Moshe, gomme bohle ba ba dumelago go yena ba a lokafatšwa.
Mang le mang a ka phološwa
5Moshe ge a ngwala mabapi le go lokafatšwa ka go phetha melao yela Modimo a mo filego yona, o re: “Yo a phethago ditaelo tša melao ya Modimo o tla phela.” 6Se Mangwalo a Makgethwa a se bolelago mabapi le go lokafatšwa ka tumelo sona se re: “O se ke wa ipotšiša wa re: Ke mang yo a tlago rotogela legodimong?” Seo se ra go re a yo theoša Kriste. 7“Le gona o se ke wa re: Ke mang yo a tlago theogela bodulabahu?” Seo se ra go re a yo rotoša Kriste bahung. 8Se Mangwalo a Makgethwa a se bolelago se re: “Molaetša wa Modimo o kgauswi le wena, o mo molomong wa gago le ka pelong ya gago.” Ke wona molaetša wa tumelo wo re o begago. 9Ge o bega gore Jesu ke Morena mme o dumela gore Modimo o mo tsošitše bahung, o tla phološwa. 10Gobane motho o lokafatšwa ka go dumela, mola ka go bega tumelo yeo a phološwa. 11Mangwalo a Makgethwa a re: “Yo a dumelago go yena a ka se swabe.” 12Seo se ra gore ga go kgethollwe Mojuda goba moditšhaba, gobane Morena wa bohle ke o tee mme ba ba mo rapelago o ba atla kudu; 13bjalo ka ge Mangwalo a Makgethwa a bolela a re: “Mang le mang yo a kgopelago Morena thušo o tla phološwa.”
14Eupša ba ka mo kgopela thušo bjang ba se ba dumela go yena? Gomme ba ka dumela go yena bjang ba se ba kwa molaetša wa gagwe? Molaetša wa gagwe wona ba ka o kwa bjang ba sa o begelwe? 15Gomme molaetša o ka begwa bjang go se gwa rongwa batseta? Bjalo ka ge Mangwalo a Makgethwa a bolela a re: “Go botse bjang go bona batseta ba etla, ba re tlela le taba ye botse!”
16Fela ga se batho bohle ba ba amogetšego Taba ye Botse yeo. Jesaya le yena o rile: “Morena, ke mang yo a dumetšego molaetša wa rena?” 17Etse tumelo e tšwa go kweng, mme molaetša o tla ka go begwa ga Kriste.
18Bjale nna ke a botšiša ke re: Na Baisraele ga se ba kwa molaetša woo? Ruri, go o kwa gona ba o kwele, gobane le Mangwalo a Makgethwa a re:
“Mokgoši wa bona o phatlaletše lefaseng lohle,
molaetša wa bona o fihlile magomong a lefase.”
19Ke botšiša gape ke re: Ga ke re setšhaba sa Israele se o kwešišitše? Etse Moshe ka noši e bile yena wa mathomo wa go fetola legatong la Modimo a re:
“Ke tla le hufegiša batho ba e sego setšhaba;
ke tla le galefiša ka morafe wa mašilo.”
20Jesaya yena a ba a ba le sebete, a bolela se a se laetšwego ke Modimo a re:
“Ke hweditšwe ke bao ba bego ba sa nnyake,
ka iponagatša go bao ba bego ba sa mpotšiše.”
21Mabapi le Baisraele Modimo o re:
“Ke hlwele ke phurolotše matsogo go amogela morafe wa lenyatšo le manganga.”
