To The Word – Day 161

₂“Kgane o ka selekega ge nka boledišana le wena?

Fela ga ke sa kgona go homola.

₃O be o ruta batho ba bantši,

o tiiša ba ba nolegilego moko.

₄Ba ba lego mathateng o be o ba kgothatša;

ba ba lapilego o ba lapološa.

₅Bjale ge mathata a wela wena,

o felelwa ke tshepo, o a gakanega.

₆Ga ke re go boifa Modimo wa gago ke sona se o se botilego,

le go hloka bosodi ga gago ke sona se o se tshepilego?

₇Nke o gopodišiše mo:

Na o gona mohlokabosodi goba moloki yo a kilego a fedišwa?

₈Nna se ke se tsebago ke gore bomolemabobe

ba go bjala le mathata ba buna tšona tšeo.

₉Bona bao Modimo o ba bolaya a befetšwe,

a ba fediša a ba galefetše.

₁₀Bakgopo bao ba a bopa,

ba rora boka ditau;

eupša Modimo o homotša tawana tšeo, o di kgola meno.

₁₁Ba hwa bjalo ka tau tše di hlokago sa go ja, bana ba bona ba gašagana.

₁₂“Nkile ka sebelwa taba ka tsebeng.

₁₃Ya ntlhoba boroko bjalo ka segateledi,

mola batho ba robetše bja matlogadibešong.

₁₄Ka thothomela ka letšhogo,

mmele wohle wa ka wa roromela.

₁₅Phefšana ye tshesane ya mphorola sefahlego;

ka kgaoga letswalo,

moriri wa ba wa tširoga.

₁₆Ka bona selotsoko se eme pele ga ka,

fela ke sa se hlathe.

Ge go rile tuu, ka kwa lentšu le re:

₁₇‘Kgane motho wa nama e ka ba moloki pele ga Modimo,

goba a hloka bosodi pele ga Mmopi wa gagwe?

₁₈Gape le batseta ba gagwe ba legodimong

yena ga a ba tshepe;

ee, le mo go barongwa o hwetša ba bosodi.

₁₉Bjale a ka napa a tshepa

ba ba dulago ka dintlong tša mobu,

dibopiwa tša letsopa,

bona ba ba pitleletšegago bjalo ka tšhwele?

₂₀Motho le mo hlabela a phela,

la dikela a hwile.

O timelela sa ruri go se yo a lemogago.

₂₁O loba tšohle tše a nago le tšona,

a hwe a se na bohlale.’ ”

₁“Goelela, o kwe ge o ka arabja.

Morongwa ke ofe yo o ka mo llelago?

₂Go phela ka metsoto ke botlaela,

go lakalela ke go hloka tlhaologanyo.

₃Nkile ka bona lešilo le iketlile,

eupša ka se diege go lakaletša lapa la lona madimabe.

₄Bana ba lona ga ba na tšhireletšo;

kgorong ya tsheko ba a tšeatšewa,

ba hloka moemeledi.

₅Monatlala o ja tše di bunnwego ke lešilo –

ešita le mabudutša a go tšwa ka mašohlošohlong –

monyoriwa yena a hufegela lehumo la lona.

₆Manyami ga a mele mobung,

le mathata ga a hloge fase.

₇Ke motho yo a tswalelwago mathata,

go no swana le dihlase ge di thanya mollong.

₈“Ge nkabe e le nna wena,

nkabe ke bolela le Modimo,

ka mmegela taba ya ka,

₉yena Modiradikgolo tše di sa kwešišegego,

le mehlolo ye e sa balegego,

₁₀yena Monešapula lefaseng,

yena Monošetšamašemo.

₁₁Ruri, Modimo ke Mophagamišabanyatšegi,

ke Mohlakodišaballi.

₁₂O senya bomenyetša bja baradia,

gore ba se atlege go tše ba di dirago.

₁₃O tanya dihwirihwiri ka maano a tšona,

gore tše ba di dirago di se tšwelele.

₁₄Le mosegare bona ba mo leswiswing,

le ge tadi e amuša ba phophola boka bošego.

₁₅Bahloki Modimo o ba phefiša mahlapa a bona,

a ba hlakodiša le tlhaselong ya diganka.

₁₆Ya ba lona lehutšo la bahlaki,

le go hlokišwa molomo ga bakgopo.

₁₇“Yo lehlogonolo ke wa go kgalwa ke Modimo;

ka gona o se gane go solwa ke Ramaatlaohle.

₁₈Modimo o re go gobatša,

a be a fodiše;

a re go hlokofatša, a be a thobe.

₁₉O go hlakodiša kotsing gantšintši,

a go phološe bošuleng.

₂₀Ge tlala e wele,

wena a ka se go lese e go bolaya,

le ntweng o tla go phefiša lehu.

₂₁Modimo o tla go šireletša go ba ba go sebago,

gomme ge masetlapelo a go wela,

o tla go hlakodiša.

₂₂Dikgaphamadi le tlala

wena o tla di sega,

wa se tšhabe le diphoofolo tša naga.

₂₃Mašemo a gago a ka se be le maswika,

le diphoofolo tša naga di ka se go hlasele.

₂₄O tla bona lapa la gago le iphelela ka boiketlo;

wa hwetša le diruiwa tša gago di le ka moka mafulong a tšona.

₂₅O tla bona ditlogolwana tša gago di ata,

di ntšifala bjalo ka bjang nageng.

₂₆O tla ikela lebitleng o tšofetše,

o etša mabele a a išwago seboeng a budule.

₂₇Tšeo ke tše re di nyakišišitšego,

mme go no ba bjalo;

le wena di ele hloko,

o di bee ka pelong.”

₂“Ge nkabe masetlapelo a ka le mathata a elwa,

₃a be a tla feta lešabašaba la lewatle ka boima;

ke ka lebaka leo ke tšhogilego ke boletše.

₄Ramaatlaohle o ntlhabile ka mesebe,

mpholo wa yona wa ntsenelela mmeleng.

Modimo o ntebantšhitše ka tše di ntšhošago.

₅“Kgane pitsi e ka lla e na le mafulo,

kgomo yona e ka bokolela e le mafulong?

₆Sejo sa bohla sona a se ka jega se se se tšhelwe letswai?

Mothubi wa lee wona kgane o na le leno?

₇Dijo tše dibjalo ga ke nyake le go di kgoma, di a ntšhišimiša.

₈“Modimo o reng a sa mphe se ke se kgopelago?

Ke eng a sa mphe se ke se nyakago,

₉e lego gore a kgahlwe ke go mpheleletša,

a nkiše seatla, a mpolaye?

₁₀Se se bego se ka nkwiša pelo,

gomme ka kganakgana ke thabile

le ge bohloko bjona bo be bo ka se okobale,

ke gore ditaelo tša Yomokgethwa tšona ga se nke ke di gane.

₁₁Na maatla a ka a kaakang,

ge go thwe ke kgotlelele?

Go se fele pelo ga ka go tla nthušang

ke se na le se ke se holofelago?

₁₂Kgane ke bopilwe ka leswika,

goba mmele wa ka ke wa tshipi?

₁₃Ga ke sa na le maatla a go itlhakodiša;

ga go motho yo a ka nthušago.

₁₄“Ge motho a itlhobogile

o lokelwa ke go bewa pelo ke bagwera,

ešita le ge a se sa hlompha Modimo.

₁₅Eupša lena, banabešo, le nthadiile,

la etša dinokana tše di pšhago.

₁₆Tšona di dubišwa ke lehlwa

mola ka godimo le tologa.

₁₇Ge go fiša di a gwama;

ge thwagadima e iphile maatla,

di a pšha.

₁₈Basepelakadikamela ba phamoga tsela

ba nyaka dinokana tšeo;

ba gerema le lešoka ba ba ba hwa.

₁₉Basepelakadikamela ba kua Sheba

ba a di nyaka;

baeti ba Tema ba holofetše tšona.

₂₀Ba nyamišwa ke go hloka se ba bego ba se holofetše;

ge ba fihla go tšona ba a swaba.

₂₁Lena ke le swantšha le dinokana tšeo;

le mpona molahlego gomme le a ntšhaba.

₂₂Kgane nkile ka re go lena:

‘Mpheng sa go re le go re,’

goba ka re: ‘Nkalaletšeng motho ka maruo a lena,’

₂₃goba ka re: ‘Ntamoleleng lenaba,’

goba ka re: ‘Ntlhakodišeng diatleng tša diganka’?

₂₄“Nthuteng, ke tla homola,

le ntemošeng mo ke fošitšego gona.

₂₅Mantšu a nnete a a kgodiša,

eupša lena, go ntshola ga lena go tla thušang?

₂₆Na le nyaka go mphošolla go tše ke di bolelago,

goba le tšeiša mantšu a moitlhobogi phefo?

₂₇Lena tšhiwana le ka e bapatša,

la rekiša le mogwera wa lena ka theko ye kgolo.

₂₈Hle, nke le ntebeleleng,

gobane taba di mahlong,

mme nka se le aketše.

₂₉Bjale go lekane, le se tšwele pele;

le se nkgopiše,

gobane nna ga ke ne molato.

₃₀Kgane go na le se sempe se ke se boletšego?

A le re ga ke kgone go lemoga madimabe

ge a nkwela?”

₁“Ga ke re sa motho mo lefaseng ke go šekela?

Kgane bophelo bja gagwe ga bo etše bja mothwalwa?

₂Bo swana le bja lekgoba le le dumago moriti;

bo bjalo ka bja mothwalwa yo a letetšego mogolo,

₃gomme sa ka ke go phelela lefeela dikgwedi ka go latelana ga tšona;

ke beetšwe mašego a tlaišego.

₄Ge ke robetše ke fela ke re:

‘Go tla sa neng?’

Eupša bošego e ba bjo botelele,

ke lala ke hlobaela gwa ba gwa sa.

₅Mmele wa ka o nyeuma diboko,

letlalo la ka le apere magogo a dišo;

dišo tša ka di a palega di dutle boladu.

₆Matšatši a ka a kitima ka lebelo la mmutla, a feta ke itlhobogile.

₇“Hle, Modimo, gopola gore bophelo bja ka ke lefeela;

dilo di ka se sa ntokela.

₈Bjale o a mpona, fela o ka se sa mpona;

o tla re ge o lebelela,

ya ba ga ke sa le gona.

₉Bjalo ka ge leru le re go apoga le ele ruri,

yo a theogetšego bodulabahu le yena o ela ruri.

₁₀Ga a ke a sa boela ka lapeng la gagwe;

o lebalwa ke ba ba bego ba mo tseba.

₁₁Ke ka lebaka le ke sa kgonego go homola,

ke nyakago go bolela ka lebaka la ge ke tlaišegile kudu,

ke balabala ka ge ke tsota.

₁₂“Na o ntišeditšeng?

Kgane ke nna lewatle goba mmamogašwa?

₁₃Ge ke re ke patlama malaong ke a ehuga

gore ke hlatlolwe bohloko bja ka,

₁₄wena o ntšhošetša ka ditoro,

o ntlaletša ka dipono,

₁₅ke be ke bone go kgangwa go le kaone go phala go phela ke tlaišega.

₁₆Go phela go ntenne;

nka se phelele ruri.

Ntlogele, bophelo bja ka ke lefeela.

₁₇“Motho ke eng,

ge o bile o mo tšeela godimo gakaaka,

ge o bile o mo ela hloko?

₁₈O mo lekola mosong wo mongwe le wo mongwe,

wa mo leka motsotso wo mongwe le wo mongwe.

₁₉O reng o sa ntlhokomologe gosenene gore ke dio metša mare?

₂₀Ge eba ke dira sebe,

ke go senyetšang, wena Moletabatho?

O reng o ntebantše?

Ke ka lebaka la eng ke le morwalo wa go go imela?

₂₁Ke eng o sa ntshwarele ge ke tshela molao wa gago,

wa ntloša molato?

Etse kgauswinyana ke tla be ke ikhwetše,

wa nnyaka, ya ba ga ke sa le gona.”

₇“Go lehlogonolo bao ba swaretšwego melato ya bona,

bao ba lebaletšwego dibe tša bona.

₈Go lehlogonolo motho yo Morena a sa mmalelego dibe tša gagwe.”