JOBO 5

₁“Goelela, o kwe ge o ka arabja.

Morongwa ke ofe yo o ka mo llelago?

₂Go phela ka metsoto ke botlaela,

go lakalela ke go hloka tlhaologanyo.

₃Nkile ka bona lešilo le iketlile,

eupša ka se diege go lakaletša lapa la lona madimabe.

₄Bana ba lona ga ba na tšhireletšo;

kgorong ya tsheko ba a tšeatšewa,

ba hloka moemeledi.

₅Monatlala o ja tše di bunnwego ke lešilo –

ešita le mabudutša a go tšwa ka mašohlošohlong –

monyoriwa yena a hufegela lehumo la lona.

₆Manyami ga a mele mobung,

le mathata ga a hloge fase.

₇Ke motho yo a tswalelwago mathata,

go no swana le dihlase ge di thanya mollong.

₈“Ge nkabe e le nna wena,

nkabe ke bolela le Modimo,

ka mmegela taba ya ka,

₉yena Modiradikgolo tše di sa kwešišegego,

le mehlolo ye e sa balegego,

₁₀yena Monešapula lefaseng,

yena Monošetšamašemo.

₁₁Ruri, Modimo ke Mophagamišabanyatšegi,

ke Mohlakodišaballi.

₁₂O senya bomenyetša bja baradia,

gore ba se atlege go tše ba di dirago.

₁₃O tanya dihwirihwiri ka maano a tšona,

gore tše ba di dirago di se tšwelele.

₁₄Le mosegare bona ba mo leswiswing,

le ge tadi e amuša ba phophola boka bošego.

₁₅Bahloki Modimo o ba phefiša mahlapa a bona,

a ba hlakodiša le tlhaselong ya diganka.

₁₆Ya ba lona lehutšo la bahlaki,

le go hlokišwa molomo ga bakgopo.

₁₇“Yo lehlogonolo ke wa go kgalwa ke Modimo;

ka gona o se gane go solwa ke Ramaatlaohle.

₁₈Modimo o re go gobatša,

a be a fodiše;

a re go hlokofatša, a be a thobe.

₁₉O go hlakodiša kotsing gantšintši,

a go phološe bošuleng.

₂₀Ge tlala e wele,

wena a ka se go lese e go bolaya,

le ntweng o tla go phefiša lehu.

₂₁Modimo o tla go šireletša go ba ba go sebago,

gomme ge masetlapelo a go wela,

o tla go hlakodiša.

₂₂Dikgaphamadi le tlala

wena o tla di sega,

wa se tšhabe le diphoofolo tša naga.

₂₃Mašemo a gago a ka se be le maswika,

le diphoofolo tša naga di ka se go hlasele.

₂₄O tla bona lapa la gago le iphelela ka boiketlo;

wa hwetša le diruiwa tša gago di le ka moka mafulong a tšona.

₂₅O tla bona ditlogolwana tša gago di ata,

di ntšifala bjalo ka bjang nageng.

₂₆O tla ikela lebitleng o tšofetše,

o etša mabele a a išwago seboeng a budule.

₂₇Tšeo ke tše re di nyakišišitšego,

mme go no ba bjalo;

le wena di ele hloko,

o di bee ka pelong.”