To The Word – Day 160

₁Go kile gwa ba le monna yo mongwe yo leina la gagwe e bego e le Jobo, a dula nageng ya Utse. E be e le monna yo a se nago bosodi, wa go loka le wa go boifa Modimo, gomme a sa dire tše mpe. ₂O be a na le barwa ba ba šupago le barwedi ba bararo, ₃a ruile dihuswane tše dikete tše di šupago, dikamela tše dikete tše tharo, dikgomo tše sekete, le dipokolo tše makgolo a mahlano. Le gona o be a na le bahlanka ba bantšintši, gomme a humile go feta batho ba Bohlabela ka moka.

₄Barwa ba Jobo ba be ba na le setlwaedi sa go šielana ka go direlana monyanya ka malapeng a bona, gomme ba laletša le dikgaetšedi tša bona tše tharo gore di tle di je, di nwe nabo. ₅E be e re ge matšatši a monyanya wo mongwe le wo mongwe a fetile, Jobo a bitše bana ba gagwe go tlo direla yo mongwe le yo mongwe wa bona sehlabelo gore a ba hlwekiše. O be a tsoga e sa le bošego a dire dihlabelo tšeo, ka ge a be a gopola gore mohlomongwe ba ka no ba ba rogile Modimo ka phošo.

₆E rile ge letšatši le fihla la gore dibopiwa tša legodimong di tle pele ga Morena, Sathane le yena a tla le tšona. ₇Morena a mmotšiša a re: “Na o tšwa kae?”

Sathane a mo fetola a re: “Ke be ke itshepelela le lefase, ke eya kua le kua.”

₈Morena a mmotšiša a re: “Afa o bone Jobo, mohlanka wa ka? Lefaseng ka moka ga go motho yo a swanago le yena, wa go se be le bosodi, wa go loka, wa go mpoifa, le wa go se dire tše mpe.”

₉Sathane a mo fetola a re: “Na o ra gore Jobo a ka go boifela lefeela? ₁₀Ga ke re ke wena o dulago o mo šireleditše ka gohle, yena le lapa la gagwe gotee le tšohle tše a nago le tšona. O šegofaditše tšohle tše a di dirilego, gomme mehlape ya gagwe ya ata kudu. ₁₁Eupša ge o ka mo tšeela tšohle tše a nago le tšona o tla go roga mahlong!”

₁₂Ke moo Modimo a rilego go Sathane: “Go lokile ge, tšohle tše a nago le tšona di diatleng tša gago, fela yena mong o se ke wa mo dira selo.” Sathane a nama a tloga.

₁₃Ya re ka tšatši le lengwe ge bana ba Jobo ba le monyanyeng ka lapeng la mogolwabona, ₁₄gwa tla motseta go Jobo, a re: “Re be re lema ka dipholo gomme dipokolo tšona di fula kgauswi. ₁₅Gateetee ke ge Basheba ba re wela godimo gomme ba di thopa tšohle. Ba bolaya bahlanka ba gago ka moka ka ditšhoša. Ke nna fela ke tšhabilego gore ke tle ke go tsebiše.”

₁₆Ya re a sa bolela, gwa fihla yo mongwe, a re: “Legadima le rathile dihuswane la di bolaya gotee le badiša. Ke nna fela ke tšhabilego gore ke tle ke go tsebiše.”

₁₇Ya re a sa bolela, gwa tla yo mongwe, a re: “Makoko a mararo a Bakaldea a re hlasetše, a thopa dikamela, a bolaya le bahlanka ba gago bohle ka ditšhoša. Ke nna fela ke tšhabilego gore ke tle ke go tsebiše.”

₁₈Ya re a sa bolela, yo mongwe a fihla, a re: “Bana ba gago ba be ba le monyanyeng ga morwago yo mogolo ₁₉ge go etla ledimo la go tšwa lešokeng. La šikinya ntlo yohle, gomme ya ba wela godimo, ya ba bolaya ka moka. Ke nna fela ke tšhabilego gore ke tle ke go tsebiše.”

₂₀Ke moka Jobo a emelela, a gagola diaparo tša gagwe a nyamile. A ipoola hlogo, a itahlela fase ka sefahlego, a rapela ₂₁a re: “Ke tlile lefaseng ke le fela, gomme ke tla tloga lefaseng ke le fela. Morena o be a file, mme bjale o tšere. A a retwe!”

₂₂Le ge Jobo a hlagetšwe ke dilo tšeo ka moka, ga se a ka a dira sebe ka go sola Modimo.

₁E rile ge letšatši le fihla la gore dibopiwa tša legodimong di tle gape pele ga Morena, Sathane le yena a buša a tla le tšona. ₂Morena a mmotšiša a re: “Na o tšwa kae?”

Sathane a mo fetola a re: “Ke be ke itshepelela le lefase, ke eya kua le kua.”

₃Morena a mmotšiša a re: “Afa o bone Jobo, mohlanka wa ka? Lefaseng ka moka ga go motho yo a swanago le yena, wa go se be bosodi, wa go loka, wa go mpoifa, le wa go se dire tše mpe. Wena o ile wa ntlhohleletša gore ke mo tlišetše masetlapelo go se na le lebaka, le ge go le bjalo Jobo o sa kgotleletše boloking bja gagwe.”

₄Ke moo Sathane a mo fetotšego a re: “Moleko woo e be e le molekwana – motho a ka lahla tšohle tše a nago le tšona ge a šetše a rapeletša go phela. ₅Fela ge o ka mo kweša bohloko mmeleng, gona o tla go rogaka mahlong!”

₆Ke ge Morena a re go Sathane: “Go lokile ge, o diatleng tša gago, fela o se ke wa mmolaya.”

₇Ke moka Sathane a tloga moo pele ga Morena, a yo ntšha Jobo dišo tše šoro, go tloga ka monwana wa leoto go fihla ka hlogo. ₈Jobo a tloga a yo dula sethobolong, a tšea lengetana a ingwaya ka lona. ₉Mosadi wa gagwe a mmotšiša a re: “Na o sa fela o kgotleletše boloking bja gago? Rogaka Modimo o ikhwele!”

₁₀Jobo a mo fetola a re: “O bolela bjalo ka mosadi wa setlaela! Na re ka amogela dilo tše dibotse go Modimo, tše mpe tšona ra di gana?” Le ge Jobo a be a ekwa bohloko, o ile a se ke a dira sebe ka go bolela gampe ka Modimo.

₁₁Ge bagwera ba Jobo ba bararo ba ekwa masetlapelo a gagwe ka moka, ba ile ba kwana go tloga magaeng a bona go yo mo kwela bohloko le go mo homotša. Bona e be e le Elifase wa go tšwa Temane, le Bildade wa go tšwa Shuage, le Tsofare wa go tšwa Naama. ₁₂Ya re ba sa le kgole ba bona Jobo, fela ba se mo tsebe. Ge ba seno mo tseba, ba thoma go lla ba golola, ba gagola diaparo tša bona, gomme ba gašetša mobu godimo wa ba tšhela dihlogo. ₁₃Ke moka ba dula fase gona moo le yena matšatši a a šupago le mašego a ona, ba sa bolele selo, ka gore ba be ba bona gore o kwa bohloko kudu.

₁Ka morago ga moo Jobo a thoma go bolela, a rogaka letšatši le a tswetšwego ka lona ₂a re:

₁Lengwalo le le tšwago go nna, Paulose, mohlanka wa Jesu Kriste, yo ke bileditšwego go ba moapostola, ke kgethetšwego go bega Taba ye Botse ya Modimo.

₂Taba ye Botse yeo ke ye setšhaba sa Israele se e holofeditšwego ke yena Modimo ka baprofeta ba gagwe e sešo ya hlaga, go ya ka mo go ngwadilwego ka gona ka Mangwalong a Makgethwa. ₃Ke ya mabapi le Morwa wa gagwe, yo ka tlhago ya gagwe ya bomotho a tswetšwego e le wa leloko la Dafida; ₄ge e le ka tlhago ya gagwe ya bomodimo o bontšhitšwe ka maatla a magolo gore ke Morwa wa Modimo ka go tsošwa bahung, yena Jesu Kriste, Morena wa rena. ₅Ka yena Modimo o mpontšhitše go ntokela ga gagwe, a ntira moapostola, gore batho ba ditšhaba tšohle ba tle ba dumele go Modimo ka nna mme ba mo theeletše, e be gona go tumiša Jesu. ₆Seo se ama le lena le lego fao Roma, bao Modimo a le bileditšego go ba ba Jesu Kriste.

₇Go lena bohle ba motse wa Roma, ba le ratwago ke Modimo mme a le bileditšego go ba ba gagwe, ke re:

Nke Modimo, Tatagorena, le Morena Jesu Kriste ba le gaugele, ba le fe khutšo.

₈Ke thoma ka go le lebogela bohle go Modimo wa ka ka Jesu Kriste, gobane tumelo ya lena e kwagala gohle lefaseng. ₉Modimo yo ke mo direlago ka pelo ya ka yohle ka go bega Taba ye Botse ya Morwa wa gagwe, ke hlatse ya ka gore ge ke rapela ke dula ke le gopotše. ₁₀Nako le nako ge ke rapela ke kgopela Modimo gore ge e le thato ya gagwe a dire gore ke be ke kgone go tlo le etela. ₁₁Gobane ke le hlolosetše kudu, gore ke tle ke le fe mpho ye nngwenyana ya moya ya go le tiiša. ₁₂Ke ra gore nna le lena re tle re maatlafatšane – nna ke maatlafatšwe ke tumelo ya lena, le lena le maatlafatšwe ke ya ka.

₁₃Ke nyaka ge le tseba, banabešo, gore e šetše e le gantši ke re ke tla le etela, fela nako le nako go be le se sengwenyana sa go ntšhitiša. Gape le moo go lena ke nyaka go ba le basokologi, bjalo ka ge ke na le bona ditšhabeng tše dingwe. ₁₄Gobane ke tlemegile go begela ba ba hlabologilego le ba ba sego ba hlabologa Taba ye Botse; ba ba rutegilego le ba ba sa tsebego selo. ₁₅Ke ka lebaka leo ke fišegelago go tlo begela le lena le dulago Roma Taba ye Botse.

₁₆Ga ke na dihlong ka Ebangedi; ke maatla a Modimo a go phološa bohle ba ba dumelago, ba mathomo ke Bajuda, gwa latela ba e sego Bajuda. ₁₇Gobane Ebangedi e utolla toka ya Modimo ka mo a lokafatšago batho ka gona: ke ka tumelo fela. Bjalo ka ge go ngwadilwe ka Mangwalong a Makgethwa: “Yo a lokafaditšwego ke Modimo ka tumelo o tla phela.”

₁₈Kgalefo ya Modimo e bonala e etšwa legodimong e lebile bobe bjohle le bokgopo ka moka bja batho bao mekgwa ya bona ye mebe e šitišago therešo go tsebja. ₁₉Modimo o ba otla ka gobane tše di kgonago go tsebja mabapi le yena, mo go bona di pepeneneng, gobane Modimo ka boyena o ba utolletše tšona. ₂₀Go tloga mola Modimo a hlolago lefase, tše di sa bonwego tša gagwe, e lego maatla a gagwe a a sa felego le bomodimo bja gagwe, di bonagala gabotse; di bonagala dilong tše a di dirilego. Ka gona batho bao ga ba na tše ba ka mo latolago ka tšona. ₂₁Gobane ba tseba Modimo, eupša ga ba mo hlomphe ka mo go mo lebanego, le gona ga ba mo leboge. Menagano ya bona e fetogile lefeela, gomme ka ge ba šilofetše, ga ba kwešiše selo. ₂₂Ba re ba hlalefile, etšwe e le ditlaela; ₂₃bakeng sa go khunamela Modimo yo a sa hwego, ba khunamela diswantšhobopša tša batho ba nama le tša dinonyana le tša diphoofolo le tša digagabi.

₂₄Ka gona Modimo o ba gafetše dikganyogong tša bona tša go šišimiša, gomme ba dirana dilo tša go leša dihlong ka mebele ya bona. ₂₅Ba fetola nnete ya Modimo maaka; ba khunamela sebopiwa ba se hlankela, bakeng sa go khunamela le go hlankela yena Mmopi yo a swanetšego go tumišwa go ya go ile! Amene.

₂₆Ke ka lebaka leo Modimo a ba gafetšego ditumong tša go leša dihlong. Gobane le basadi ba gona ba fetotše mokgwa wa tlhago wa thobalo, mme ba a robalana. ₂₇Ka wona mokgwa woo banna ba gona le bona ba tlogetše mokgwa wa tlhago wa go robala le basadi, ba duma go robalana. Ba dira taba ya go leša dihlong ya gore monna a robale monna, gomme ba ikobela kotlo ye e lebanego bokgopo bjoo bja bona.

₂₈Ka ge ba sa nyake go tseba Modimo, yena o dirile gore ba dule ba nagana tše mpe, gomme bjale ba dira tše ba sego ba swanela go di dira. ₂₉Ba tletše bobe bja mehuta yohle, bokgopo, bojato le bonokwane; ba tletše tseba, polao, bonganga, boradia le bomenetša; ba na le lesebo, ₃₀gomme ba senya ba bangwe maina; ba hloile Modimo, ba na le mereba, ba a ikgogomoša ebile ba a ikgantšha; ba dula ba nagana mathaithai; ga ba theeletše batswadi ba bona; ₃₁ke mašilo; ba tšeiša dikeno tša bona phefo; ga ba ne lerato le lešoko. ₃₂Le ge ba tseba gore molao wa Modimo o re badiri ba tše bjalo ba lebanwe ke lehu, bona ba tšwela pele e sego fela le go di dira, eupša le go thabela bao ba di dirago.

₁Bjale ge, wena motho, o lego semangmang, mosolabangwe, o ka se re ga o na molato, gobane ge o solela bangwe tše ba di dirago etšwe le wena o di dira, o a ikahlola. ₂Re a tseba gore Modimo ge a ahlola badiri ba tše bjalo go lebane. ₃Eupša wena motho, o dirago tšona tšeo o di solago go ba bangwe, na o gopola gore o tla phonyokga kahlolo ya Modimo? ₄Na ga se gore o nyatša Modimo ka ge a lokile kudu, a sa go felele pelo, a le pelotelele? Ga ke re o a tseba gore Modimo, ka botho bja gagwe, o rata go go hlahla gore o sokologe? ₅Eupša wena o ne kgang ebile o gana go itshola, ka gona o ikobela kotlo ye kgolo ya Letšatši la Kahlolo, mohla Modimo a tlilo utolla kahlolo ya gagwe mme a ahlola ka toka. ₆Gobane Modimo o tlilo nea mongwe le mongwe se se lebanego mediro ya gagwe: ₇bao ba kgotleletšego go dira tše di lokilego, ba nyakago gore Modimo a ba tumiše, a ba rete, le gona a dire gore ba se ke ba hwa, bona o tla ba phediša go ya go ile. ₈Bao e lego dijato le gona ba ganago se e lego nnete, ba kwanago le bokgopo; bao bona Modimo o tla ba galefela, o tla ba tukela bogale. ₉Mang le mang yo a dirago tše dimpe o tla welwa ke tlaišego le tlalelo, pele tša wela Mojuda, gwa latela yo e sego Mojuda. ₁₀Fela mang le mang yo a dirago tše di lokilego, pele Mojuda, gwa latela yo e sego Mojuda, Modimo o tla mo tumiša, a mo reta, a dira gore a be le khutšo, ₁₁gobane Modimo ga a bebe batho.

₁₂Ba ba dirilego sebe ba sa tsebe melao ya Moshe, ba tla lahlega ba sa ahlolwe ka melao yeo. Ba ba dirilego sebe ba tseba melao ya Moshe, ba tla ahlolwa ka melao yeo. ₁₃Gape batho ga ba lokafatšwe ke Modimo ka go kwa melao ya Moshe, eupša ba lokafatšwa ka go phetha melao yeo. ₁₄Baditšhaba ga ba ne melao ya Moshe, eupša ge ba dira se se laelwago ke melao yeo ka go itsebela sona ka bobona, gona bona beng ke molao ka bobona, le ge melao ya Moshe mo go bona e se gona. ₁₅Maitshwaro a bona a bontšha gore se melao yeo e se laelago se ngwadilwe ka dipelong tša bona. Ebile matswalo a bona a bontšha gore seo ke nnete, ka ge ditlhaologanyo tša bona ka nako ye nngwe di ba tšwa, ka nako ye nngwe di ema le bona. ₁₆Bjale ge, go ya ka Taba ye Botse ye ke e begago ye, dilo tše di tla bonagala ka Letšatši la Kahlolo, mohla Modimo a tlago ahlola batho ka Jesu Kriste go ya ka dikhupamarama tša bona.

₁₇Bjale wena? Etse o re ke wena Mojuda; o ikanya melao ya Moshe ebile o ikgantšha ka Modimo; ₁₈o tseba se Modimo a nyakago o se dira, o ithutile melao ya Moshe go kgetha se se lokilego; ₁₉o itirile mohlahli wa difofu le seetša sa ba ba lego leswiswing; ₂₀o re ke wena moeletši wa ditlaela le morutiši wa ba ba sa tsebego selo, ka ge o nagana gore melao ya Moshe e go ruta tšohle mabapi le tsebo le therešo. ₂₁Ka ge o le morutabangwe, o reng, wena mong, o sa ithute? O reng o laya batho gore ba se ke ba utswa, etšwe wena mong o utswa? ₂₂O reng o iletša bangwe go otswa, mola wena o otswa? O šišingwelang medimo ya diswantšho, eupša o thopa tša ka ditempeleng tša medimo yeo? ₂₃Wena o kgantšhago melao ya Modimo, o reng o hlompholla Modimo ka go tshela melao yeo? ₂₄Gobane Mangwalo a Makgethwa a re: “Baditšhaba ba nyefola Modimo ka lebaka la lena Bajuda.”

₂₅Go bolla ga lena go tla le hola ge le phetha melao ya Moshe, fela ge le sa e phethe, go bolla ga lena go no swana le go se bolle. ₂₆Ka gona, ge lešoboro la moditšhaba le ka phetha tšohle tše di laelwago ke melao ya Moshe, go Modimo le swana le yo a bolotšego. ₂₇Ka lebaka leo, baditšhaba, le ge e le mašoboro eupša ba phetha melao ya Moshe, ba tla ahlola lena le e tshelago etšwe le na le yona e ngwadilwe ebile le bolotše. ₂₈Gape ga se gore Mojudajuda ke yo a bolotšego, le gona ga se gore lebollobollo ke leswao leo le bonalago mmeleng. ₂₉Aowa, Mojudajuda ke yo e lego Mojuda ka pelong, le lebollobollo ke le e lego la pelo, gomme ke modiro wa Moya wa Modimo, e sego wa melao ya Moshe ye e ngwadilwego. Motho yo mobjalo o retwa ke Modimo, e sego batho.

₁Ge go le bjalo, ke eng se Bajuda ba phalago baditšhaba ka sona? Mohola wa lebollo wona ke eng? ₂Ke wo mogolo ka mekgwa ye mentši. Mokgwa wa mathomo ke wa ge Modimo a dirile Bajuda baboloki ba molaetša wa gagwe. ₃Bjale, ge eba ba bangwe ba bona ba ile ba lesa go botega, na go se botege moo ga bona go ra gore Modimo le yena o ile a lesa go botega? ₄Le gatee! Go pepeneneng gore wa go rereša ke Modimo, le ge batho bohle e le ba maaka. Gobane Mangwalo a Makgethwa a re:

₅Bjale ge go se loke ga rena go bonagatša go loka ga Modimo, gona re tla reng? Na re ka re Modimo ga se a loka ge a re otla? Seo ke se motho wa nama a ka se botšišago. ₆Le gatee! Ge Modimo a ka be a se a loka, na o be a tla ahlola lefase bjang?

₇Bjale ge eba go bolela maaka ga ka go tumiša Modimo ka go tšweletša nnete ya gagwe gabotse, ke sa ahlolelwang gore ke modiradibe? ₈Ge go le bjalo, ke reng ke sa re: “A re direng tše mpe gore go tle go tšwelele tše di lokilego”? Gape batho ba bangwe ba nkgobošitše ka go mphara ka go re ke realo. Ba tla otlwa, bjalo ka ge go ba swanetše.

₉Bjale ge, na rena Bajuda re phala baditšhaba? Le gatee! Gobane ke šetše ke boletše gore Bajuda le baditšhaba ba bušwa ke sebe bohle, ₁₀bjalo ka ge Mangwalo a Makgethwa a re:

₁₉Bjale re a tseba gore tšohle tše melao ya Moshe o di bolelago di botšwa ba ba bušwago ke yona melao yeo, gore go se be le yo a bago le lebaka la go ikemelela, le gore batho bohle lefaseng ba tle ba lebanwe ke go ahlolwa ke Modimo. ₂₀Gobane ga go motho yo a lokafatšwago ka go phetha melao ya Moshe; se melao yeo e se dirago ke go lemoša motho gore o dirile sebe.

₂₁Gomme bjale tsela ya Modimo ya go lokafatša batho e utolotšwe. Ga e sepelelane le molao, le ge e hlatsetšwe ke melao ya Moshe le baprofeta. ₂₂Modimo o lokafatša batho ka tumelo ya bona go Jesu Kriste. Seo Modimo o se direla bohle ba ba dumelago go Kriste, ka gobane ga go kgethollo. ₂₃Bohle ba dirile dibe gomme ba hloka letago la Modimo. ₂₄Eupša Modimo, ka kgaugelo ya gagwe ye e sego ya swanela batho, o ba lokafatša ka Kriste Jesu yo a ba lokollago. _25-26Modimo o ba neetše yena, gore ka go bolawa ga gagwe e tle e be mmoelanyi wa batho le Modimo ka go dumela ga bona go Kriste. Seo Modimo o be a se direla go bontšha go loka ga gagwe. Mehleng ya kgale o be a le pelotelele mme a hlokomologile dibe tša batho; eupša mehleng yeno o a ba kgala, gore a bontšhe go loka ga gagwe. Ke wona mokgwa wo ka wona Modimo a bontšhago go loka ga gagwe, mme a lokafatšago yo a dumelago go Jesu.

₂₇Bjale, ke eng se re ka ikgantšhago ka sona? Ga se gona! Lebaka ke eng? Kgane lebaka ke gore re phetha melao ya Moshe? Aowaa, lebaka ke gore re a dumela. ₂₈Ga ke na le ka pelaelo gore motho o lokafatšwa ka tumelo, e sego ke go phetha tše di laelwago ke melao ya Moshe. ₂₉Kgane Modimo ke Modimo wa Bajuda fela? Na baditšhaba bona ga se Modimo wa bona? Ee, le bona ke wa bona. ₃₀Modimo ke o tee, gomme o tla lokafatša Bajuda ka tumelo ya bona; baditšhaba le bona o tla ba lokafatša ka ya bona tumelo. ₃₁Na e ka ba seo ke go re melao ya Moshe re e fediša ka yona tumelo? Aowaa, le gatee! Ebile ke gona ge re e tiiša.