JOBO 3

₃“A letšatši le ke tswetšwego ka lona le timelele,

le bjona bošego bjo ke imilwego ka bjona!

₄Letšatši leo a e be leswiswi,

Modimo wa magodimong a se sa le šetša,

le seedi se se ke sa le hlabela.

₅A le tšewe ke leswiswi le lesoleso;

le khupetšwe ke maru a maso,

le aparelwe le ke phifalo ya letšatši.

₆Bošego bjoo a bo tlošwe ke leswiswi,

gomme bo se sa balwa le matšatši a ngwaga;

bo se ke bja hwetšwa dikgweding tša ngwaga.

₇Ee, ka bjona a go se tswalwe ngwana,

go se ke gwa kwagala mekgolokwane.

₈Tšatši leo a le rogakwe ke barogakamatšatši

ba ba kgonago go hlohleletša Lebiathane.

₉Bošego bjoo a bo fifalelwe ke naledi tša masa,

bo letele letšatši ge le hlaba

eupša le se hlabe;

a bo se ke bja hlabelwa ke mahwibi,

₁₀ka ge bo ntesitše ke tswalwa,

mme bo ntsentše mathateng.

₁₁“Ke reng ke se ka ikhwela ge ke tswalwa,

ka hema la mafelelo ge ke belegwa?

₁₂Mma o be a mpharelang difarong?

O be a nnyantšhetšang letswele?

₁₃Ge nkabe ke ikhwetše ka nako yeo,

nkabe ke robetše ke iketlile,

ke ithobaletše ka khutšo

₁₄le magoši le bakgomana

ba ba ilego ba tsošološa marope.

₁₅Nkabe ke ithobaletše le babuši

ba ba bego ba na le gauta,

ba tladitše dintlo tša bona silibera.

₁₆Ke be ke reng ke sa be bjalo ka sefolotšana

se se bolokwago ka lephakuphaku,

ka ba bjalo ka lesea le le sa kago la bona seedi?

₁₇Gape ka lebitleng bakgopo ga ba sa dira tše mpe,

le ba ba feletšwego ke maatla ba khutša gona.

₁₈Ešita le dibofša moo di a iketla,

ga go na le yo a di gapeletšago go šoma.

₁₉Ke mo go dulago batho ka moka,

ba bagolo le ba banyenyane;

le makgoba ke moo a lokologago gona.

₂₀“Batho ba phedišetšwang mahlomoleng?

Seetša se reng se fiwa ba ba nyamilego?

₂₁Ba duma lehu, fela ga le ba tlele;

ba le nyaka go feta lehumo le le fihlilwego.

₂₂Ba ka thaba ba hlalala

ge ba ka be ba ka bolokwa.

₂₃Ke go reng seetša se fiwa motho yo a se sa dumago go phela,

motho yo Modimo a mo thibetšego tsela tšohle?

₂₄Bakeng sa go ja ke a lla,

metsetlo ya ka ga e fele,

e bjalo ka meetse a a elago.

₂₅Tše ke di boifago ke tšona tše di ntlhagelago;

tše ke di tšhabago di a ntlela.

₂₆Ga ke na boiketlo,

ga ke na khutšo,

le poifo ga e ntlogele.”