To The Word – Day 156

₁Ka kgwedi ya bošupa setšhaba sa Israele se be se dutše metseng ya sona. Ya re ka letšatši la mathomo la kgwedi yeo bohle ba kgobokana Jerusalema ka lepatlelong la Lesorong la Meetse. Ba kgopela Esra, moprista le serutegi sa melao ye Morena a e filego setšhaba sa Israele ka Moshe, gore a tliše puku ya melao. ₂Ka gona Esra a e tliša moo setšhaba se bego se kgobokane gona – banna le basadi le bana ba ba bego ba godile mo ba ka kwešišago. ₃Gona moo lepatlelong la lesorong a balela batho melao go tloga ka mahwibi go fihlela mosegare wo mogolo, mme bona ba hlwaile ditsebe ba theeditše.

₄Esra o be a eme sethaleng se se bego se agetšwe mohla woo. Ka lehlakoreng la gagwe la go ja go be go eme banna ba ba latelago: Matitia, Shema, Anaya, Uria, Hilkia le Maasea; gomme ka go la nngele go eme ba ba latelago: Pedaya, Mishaele, Malkia, Hashumo, Hashbadana, Sakaria le Meshulamo.

₅Ge Esra a eme moo sethaleng a okametše batho, bona ba be ba mo tseparetše ka mahlo. Ya re ge a phutholla puku ba emelela.

₆Esra a tumiša Morena, Modimo yo mogolo, gomme batho ka moka ba emišetša matsogo godimo ba re: “Amene! Amene!” Ba khunama ba obamiša difahlego pele ga Morena.

₇Ka morago ba emelela, gomme Balefi ba ba latelago ba ba hlathollela melao: Jeshua, Bani, Sherebia, Jamine, Akube, Shabetai, Hodia, Maasea, Kelita, Asaria, Josabade, Hanane le Pelaya. ₈Ba bala puku ya melao ya Modimo ba hlabošitše mantšu ba e fetolela Searamong, ba ba ba e hlatholla gore batho ba e kwešiše.

₉Ge batho ba ekwa melao e balwa ba ile ba lla. Ka gona Nehemia, yo e bego e le mmušiši, le Esra, moprista le serutegi sa melao, gotee le Balefi bao ba bego ba hlatholla melao ba botša setšhaba ka moka ba re: “Lehono ke letšatši le lekgethwa la Morena Modimo wa lena; ka gona le se ke la ilela goba la lla. ₁₀Bjale eyang gae le yo keteka. Le abele bao ba se nago selo dijo le beine ya lena. Lehono ke letšatši le lekgethwa la Morena wa rena, ka gona le se ke la hlonama. Go thabela Morena go tla le šireletša.”

₁₁Balefi ba fela ba botša batho gore ba homole, ba se ke ba hlonama ka letšatši leo le lekgethwa. ₁₂Ka morago batho bohle ba ikela magae gomme ba ja, ba nwa, ba thabile, mme ba abela ba bangwe tše ba nago le tšona, ka gore ba be ba kwešišitše tše ba bego ba di boditšwe.

₁₃Ka letšatši le le latelago mantona a dikgorwana, gotee le baprista le Balefi, ba ya go Esra go yo ithuta dithuto tša melao ya Modimo. ₁₄Ba lemoga gore melao yela Morena a ba filego yona ka Moshe e laela gore setšhaba sa Israele se dule ka mešašeng ka nako ya Monyanya wa Mešaša. ₁₅Ka gona ba roma batseta motseng wa Jerusalema le metseng ye mengwe gore ba botše batho ba re: “Eyang dithabeng le tle le makala a mehlware le a memirte le a mepalema le a mehlare ya matlakala a a swaraganego, mme le age mešaša go ya ka ditaelo tše di ngwadilwego melaong ya Modimo.”

₁₆Ka gona setšhaba sa tla le makala gomme sa aga mešaša godimo ga ditlhaka tše di ikadilego tša dintlo tša bona, le ka malapeng a bona, le ka dikgorong tša Tempele, le mapatlelong a motse Lesorong la Meetse le Lesorong la Efraime. ₁₇Batho bohle bao ba bego ba boile bothopša ba aga mešaša gomme ba dula ka go yona. Ya ba la mathomo monyanya wo o binwa ka mokgwa woo go tloga mehleng yela ya Joshua, morwa wa Nunu, gomme go thabilwe kudu. ₁₈Go tloga ka letšatši la mathomo la monyanya go fihlela ka la mafelelo ba be ba bala seripa sa melao ya Modimo. Ba ile ba bina monyanya matšatši a a šupago, gomme ka la seswai ba swara tirelo ya go feleletša, ka moo go laelwago ka gona melaong.

_1-2Ka letšatši la masome a mabedi le metšo ye mene la yona kgwedi yeo setšhaba sa Israele sa kgobokana go tlo ikona dijo le go itshola ka lebaka la dibe tša sona. Ba be ba šetše ba ikgetholotše go batho ba šele. Ba apara diaparo tša go ilela, gomme ba itšhela dihlogo ka mobu ba nyamile. Ba ema ba ipolela dibe tša bona le tša borakgolokhukhu ba bona. ₃Ba balelwa melao ya Morena Modimo wa bona diiri tše e ka bago tše tharo, gomme diiri tše dingwe tše tharo ba ipolela dibe tša bona, ba ba ba khunamela Morena Modimo wa bona.

₄Go be go na le sethala sa Balefi, gomme godimo ga sona go eme Jeshua, Bani, Kadmiele, Shebania, Buni, Sherebia, Bani le Kenani. Ba hlaboša mantšu ba rapela Morena Modimo wa bona.

₅Balefi ba ba latelago ba ile ba botša batho gore ba tumiše Morena: Jeshua, Kadmiele, Bani, Hashabnea, Sherebia, Hodia, Shebania le Petagia. Ba re:

₆Balefi bao ba rapela ba re:

₁Ka lebaka la tšohle tše di hlagilego, rena, setšhaba sa Israele, re dira kwano ya go ngwalwa, gomme baetapele ba rena le Balefi ba rena le baprista ba rena ba e gatiša ka dikibo tša bona.

₂Wa mathomo wa go e gatiša e bile Mmušiši Nehemia, morwa wa Hakalia, gomme gwa latela Tsedekia. Ba ba latelago le bona ba ile ba e gatiša ka dikibo tša bona:

₂₉Rena setšhaba sa Israele, baprista, Balefi, baleti ba masoro a dikgoro tša Tempele, baopedi, bašomi ba ka Tempeleng, gotee le bohle bao, ka lebaka la go phetha melao ya Modimo ba ikgaogantšhitšego le ba ditšhaba di šele ba ba dulago nageng ya rena, rena, gotee le basadi ba rena le bana ba rena ka moka ba ba godilego mo ba ka kwešišago, ₃₀re ena le bomorwarragorena, baetapele ba rena, gore re tla phela ka melao ya Modimo ye a re filego yona ka Moshe, mohlanka wa gagwe; le gore re tla dira tšohle tše Morena, Mong wa rena, a re laelago tšona; le gore re tla phetha melao yohle ya gagwe le ka moka tše a di nyakago. Ge re ka se phethe keno ye re otlwe ka thogako.

₃₁Re ka se nyalelane le ba ditšhaba di šele ba ba dulago mo nageng ya rena.

₃₂Ge bašele bao ba ka tla ba bapatša mabele goba se sengwe go rena ka letšatši la Sabatha goba ka letšatši le lengwe le lekgethwa, re ka se ba rekele.

Ka ngwaga wo mongwe le wo mongwe wa bošupa re ka se leme mašemo, le gona re tla phumola melato ka moka.

₃₃Yo mongwe le yo mongwe wa rena o tla ntšhetša Tempele ya Modimo wa rena silibera ya dikramo tše nne ka ngwaga.

₃₄Tirelo ya Tempeleng re tla e ntšhetša dilo tše di latelago: dinkgwa tše dikgethwa, kabelo ya bupi ya ka mehla, diruiwa tša dihlabelo tša ka mehla tša go tšhungwa ka moka, dihlabelo tša Disabatha le tša Menyanya ya Lebalana le tša menyanya ye mengwe, le dihlabelo tše dikgethwa, le dihlabelo tša tshwarelo ya dibe tša go re boelanya le Modimo, gotee le se sengwe le se sengwe se se nyakegago Tempeleng.

₃₅Rena setšhaba, baprista le Balefi, ngwaga wo mongwe le wo mongwe re tla dira matengwa gore re tsebe gore ke dikgorwana dife tše di swanetšego go iša dikgong Tempeleng ka dinako tše di beilwego, gore ka tšona go gotšwe mollo wa go tšhuma dihlabelo tše di direlwago Morena Modimo wa rena, go ya ka moo melao ya Modimo e nyakago ka gona.

₃₆Ngwaga ka ngwaga re tla iša kabelo ya mabele a dithakangwaga Tempeleng, le ya dikenywa tše di butšwago pele tša mehlare ya rena yohle.

₃₇Maitšibolo a rena a bašemane le a dikgomo le a dihuswane tša rena re tla a iša go baprista Tempeleng, gomme moo ra a abela Modimo, bjalo ka ge melao ya gagwe e re botša.

₃₈Ngwaga wo mongwe le wo mongwe re tla išetša baprista ka Tempeleng maupi a a dubilwego a mathomo a mabele a mafsa, gotee le dikabelo tša rena tše dingwe tša beine le tša makhura a mohlware le tša mehuta yohle ya dikenywa tša rena.

Balefi ba re ba ntšhetšago karolo ya lesome metseng ya gaborena ya temo re tla ba išetša dikarolo tša lesome tša tše re di bunago. ₃₉Baprista, ditlogolo tša Arone, ba swanetše go ba le Balefi ge dikarolo tša lesome di ntšhwa, gomme karolo ya lesome ya tšohle tše ba di ntšhitšego Balefi ba e iše ka diphapošing tša Tempele tša go bolokela, gore di yo šomišwa ka Tempeleng. ₄₀Balefi le Baisraele ka moka ba iše dikabelo tša mabele, tša beine, le tša makhura a mohlware ka diphapošing tša go bolokela, moo go bewago dibjana tša Tempele, le moo baprista ba ba lego modirong le baleti ba masoro a dikgoro tša Tempele le baopedi ba ka Tempeleng ba dulago gona.

Re ka se itebatše ntlo ya Modimo wa rena.

₁Baetapele ba ile ba dula Jerusalema, gomme batho ba bangwe ka moka ba dira matengwa go kgetha lapa le tee malapeng a mangwe le a mangwe a lesome gore le yo dula motseng wo mokgethwa wa Jerusalema, mola batho ba bangwe ka moka ba swanetše go dula metseng ye mengwe. ₂Setšhaba sa reta mang le mang yo a ilego a ithaopa a yo dula Jerusalema. ₃Metseng ye mengwe baprista, Balefi, bašomi ba ka Tempeleng, le ditlogolo tša bahlanka ba Solomone, le Baisraele ba bangwe ka moka ba be ba itulela malapeng a bona metseng ya gabobona.

Maina a baetapele ba selete sa Juda ba ba bego ba agile Jerusalema šea:

₄Ba kgoro ya Juda:

Athaya, morwa wa Usia, le setlogolo sa Sakaria. Sakaria e be e le morwa wa Amaria, Amaria morwa wa Shefatia, Shefatia morwa wa Mahalelele. Bao ka moka e be e le ditlogolo tša Peretse.

₅Maasea, morwa wa Baruke, le setlogolo sa Kolohose. Kolohose e be e le morwa wa Hasaya, Hasaya morwa wa Adaya, Adaya morwa wa Joyaribe, Joyaribe morwa wa Sakaria. Bao ka moka e be e le ditlogolo tša Shela.

₆Ditlogolo tša Peretse tše di bego di agile Jerusalema e be e le tše makgolo a mane le masome a a selelago a metšo ye seswai. E be e le banna ba bogale.

₇Ba kgoro ya Benjamene:

Salu, morwa wa Meshulamo, le setlogolo sa Joede. Joede e be e le morwa wa Pedaya, Pedaya morwa wa Kolaya, Kolaya morwa wa Maasea, Maasea morwa wa Itiele, Itiele morwa wa Jeshaya.

₈Gabai le Salai, bomorwarragoSalu.

Ba kgoro ya Benjamene ka moka ba ba bego ba dula Jerusalema e be e le ba makgolo a senyane le masome a mabedi le metšo ye seswai. ₉Joele, morwa wa Sikri, e be e le molaodi wa bona, gomme Juda, morwa wa Hasenua, e le letsogo la ramotse wa Jerusalema.

₁₀Baprista:

Jedaya, morwa wa Joyaribe, le Jakine.

₁₁Seraya, morwa wa Hilkia, le setlogolo sa Meshulamo. Meshulamo e be e le morwa wa Tsadoko, Tsadoko morwa wa Merayote, Merayote morwa wa Ahitube, Moprista yo Mogolo. ₁₂Ba makgolo a seswai le masome a mabedi le metšo ye mebedi ba kgorwana ye ba be ba šoma ka Tempeleng.

Adaya, morwa wa Jerohamo, le setlogolo sa Pelalia. Pelalia e be e le morwa wa Amtsi, Amtsi morwa wa Sakaria, Sakaria morwa wa Pashure, Pashure morwa wa Malkia. ₁₃Ba makgolo a mabedi le masome a mane a metšo ye mebedi ba kgorwana ye e be e le dihlogo tša malapa.

Amashesai, morwa wa Asarele, le setlogolo sa Aksai. Aksai e be e le morwa wa Meshilemote, Meshilemote e le morwa wa Imere. ₁₄Ba lekgolo le masome a mabedi a metšo ye seswai e be e le banna ba bogale. Molaodi wa bona e be e le Sabdiele, wa lapa le le tsebegago kudu.

₁₅Balefi:

Shemaya, morwa wa Hashube, le setlogolo sa Asrikamo. Asrikamo e be e le morwa wa Hashabia, Hashabia morwa wa Buni.

₁₆Shabetai le Josabade, baetapele ba bangwe ba Balefi; bona ba be ba hlokometše mošomo wa ka ntle ga Tempele.

₁₇Matania, morwa wa Mika, le setlogolo sa Sabdi. Sabdi e be e le morwa wa Asafo. Matania e be e le moopediši wa ka Tempeleng, gomme o be a hlabeletša ge go opelwa thapelo ya tumišo.

Bakbukia, yo e bego e le letsogo la Matania.

Abda, morwa wa Shamua, le setlogolo sa Galale. Galale e be e le morwa wa Jedutune.

₁₈Balefi ka moka ba ba bego ba dula motseng wo mokgethwa wa Jerusalema e be e le ba makgolo a mabedi le masome a seswai a metšo ye mene.

₁₉Baleti ba masoro a dikgoro tša Tempele:

Akube le Talmone le meloko ya bobona, ka moka e le ba lekgolo le masome a a šupago a metšo ye mebedi.

₂₀Baisraele, baprista, le Balefi ba bangwe ka moka ba ile ba dula malapeng a bona metseng ye mengwe ya selete sa Juda. ₂₁Bašomi ba ka Tempeleng ba ile ba dula karolong ye nngwe ya Jerusalema ye e bitšwago Ofele, gomme ba šoma ba hlokometšwe ke Tsiha le Gishpa.

₂₂Mookamedi wa Balefi bao ba bego ba dula Jerusalema e be e le Usi, morwa wa Bani, le setlogolo sa Hashabia. Hashabia e be e le morwa wa Matania, Matania morwa wa Mika. Usi e be e le wa kgorwana ya Asafo, kgorwana yela e bego e hlokometše moopelo ditirelong ka Tempeleng. ₂₃Go be go na le melawana ya mošate ye e bego e laela ka moo dikgorwana di bego di swanetše go šielana ka go opela ka Tempeleng tšatši le lengwe le le lengwe.

₂₄Petagia, morwa wa Meshesabele, wa kgorwana ya Serage ya kgoro ya Juda, e be e le moemedi wa kgoši ya Persia setšhabeng sa Israele.

₂₅Batho ba bantši ba be ba dula metsaneng ye e bego e le kgauswi le mašemo a bona. Ba kgoro ya Juda bona ba be ba dula Kiriate-Arba le Dibone le Kabtsiele le metsaneng ye e bego e le kgauswi le metse yeo. ₂₆Ba be ba dula le metseng ye e latelago: Jeshua, Molada, Bethe-Pelete, ₂₇Hatsare-Shuale, Beresheba, le metsaneng ye e bego e le kgauswi le metse yeo. ₂₈Ba be ba dula le metseng ye: Tsikelage, Mekona, le metsaneng ya motse woo, ₂₉le Ene-Rimone, Tsora, Jarmute, ₃₀Sanoage, Adulamo, le metsaneng ye e bego e le kgauswi le metse yeo. Ba be ba dula le motseng wa Lakishe le mašemong a a lego kgauswi le wona, le motseng wa Aseka le metsaneng ya wona. Ka tsela yeo batho ba Juda ba be ba agile go tloga Beresheba go yo fihla moeding wa Hinomo.

₃₁Ba kgoro ya Benjamene ba be ba dula Geba, Mikimase, Ai, Bethele, le metsaneng ya kgauswi le motse woo. ₃₂Ba be ba dula le metseng ye: Anathote, Nobo, Anania, ₃₃Hatsore, Rama, Gitaime, ₃₄Hadide, Tseboime, Nebalate, ₃₅Lodo, Ono, le Moeding wa Batsebamediro-ya-diatla. ₃₆Dihlopha tše dingwe tša Balefi tše di bego di agile seleteng sa Juda di ile tša laelwa gore di yo dula le ba kgoro ya Benjamene.

₁Maina a a latelago ke a baprista le a Balefi ba ba ilego ba boa bothopša le Serubabele, morwa wa Sealtiele, le Moprista yo Mogolo, Jeshua:

Banna ba e be e le baetapele gare ga baprista ba gabobona mehleng ya Jeshua.

Banna ba ba latelago ba be ba hlokometše go tumiša Modimo ka dikopelo: Jeshua, Binui, Kadmiele, Sherebia, Juda le Matania.

₉Bakbukia, Uni, le Balefi ba bangwe bjalo ka bona e be e le sehlopha sa go hlatlolana le bahlabeledi.

₁₀Jeshua e bile tatagoJoyakime, Joyakime ya ba tatagoEliashibe, Eliashibe ya ba tatagoJoyada, ₁₁Joyada ya ba tatagoJonathane, Jonathane ya ba tatagoJadua.

_12-21Mehleng ya ge Joyakime e le Moprista yo Mogolo baprista ba ba latelago e be e le mantona a dikgorwana tša baprista:

₂₂Dihlogo tša malapa a Balefi le a baprista di be di ngwadišitšwe mehleng ya Baprista ba Bagolo ba ba latelago: Eliashibe, Joyada, Johanane le Jadua. Go ngwadišwa moo go ile gwa fetšwa mola Dariose e le kgoši ya Persia.

₂₃Eupša dihlogo tša malapa a Balefi di ile tša ngwadišwa ka dipukung tša ditaba tša mmušo go goma ka nako ya Johanane, setlogolo sa Eliashibe.

₂₄Balefi ba be ba arotšwe dihlopha tše pedi. Sehlopha sa mathomo e be e le Hashabia, Sherebia, Jeshua, Binui le Kadmiele, ba e bego e le dihlogo tša Balefi. Sa bobedi e le Balefi ba bangwe. Dihlopha tše tše pedi di be di tumiša Modimo ebile di mo leboga ka go hlatlolana go ya ka ditaelo tša Kgoši Dafida, monna wa Modimo.

₂₅Baleti ba masoro a dikgoro tša Tempele ba ba latelago ba be ba leta diphapoši tša go bolokela, tše di bego di le masorong a dikgoro tša Tempele: Matania, Bakbukia, Obadia, Meshulamo, Talmone le Akube.

₂₆Banna ba ba phetše mehleng ya Joyakime, morwa wa Jeshua, le setlogolo sa Jotsadaka, le mehleng ya Mmušiši Nehemia le ya Esra, moprista le serutegi sa melao ya Modimo.

₂₇E rile ge morako wa motse wa Jerusalema o kgakolwa, Balefi ba nyakwa gohle moo ba bego ba dula gona, ba tlišwa gore ba tle ba kgakole morako le ba bangwe ka lethabo ka dikoša tša tebogo le ka diletšo tša masenkana le diharepa le dikgapa. ₂₈Malapa a baopedi ba Balefi a ile a kgobokana a etšwa metsaneng ye a bego a ikagetše yona go dikologa Jeruselema, le metsaneng ye e bego e le tikologong ya Netofa, ₂₉le motseng wa Bethe-Gilgale le wa Geba le wa Asmabethe. ₃₀Baprista le Balefi ba ile ba itlhwekiša, ba hlwekiša le setšhaba le masoro le morako wa motse.

₃₁Ke ile ka nametša baetapele ba Juda morako, gomme ba hlokomela dihlopha tše pedi tše kgolo tša baopedi ge di dikologa motse di leboga Modimo.

Sehlopha sa mathomo se ile sa leba ka letsogong la go ja se sepela godimo ga morako go ya Lesorong la Sethobolong. ₃₂Joshaya o be a šetše baopedi morago, mme yena a latelwa ke seripa sa baetapele ba Juda. _33-35Bona ba be ba šetšwe morago ke baprista ba ba latelago ba ba letša diphala: Asaria, Esra, Meshulamo, Juda, Benjamene, Shemaya le Jeremia. Bao ba latelwa ke Sakaria, morwa wa Jonathane, le setlogolo sa Shemaya. Shemaya e be e le morwa wa Matania, Matania e le morwa wa Mikaya, Mikaya e le morwa wa Sakure, Sakure e le morwa wa Asafo. ₃₆Yena o be a šetšwe morago ke ba kgorwana ya gabo, e lego Shemaya, Asarele, Milalai, Kilalai, Maai, Netanele, Juda le Hanani. Bona ba be ba letša diletšo tšela Kgoši Dafida, monna wa Modimo, a bego a laetše gore di letšwe. Esra, serutegi, o be a etile sehlopha se pele. ₃₇Kua Lesorong la Mothopong ba hlatloga ka manamelo a go ya motseng wa Dafida, ba feta ka godimo ga mošate ka morotoga wo o yago morakong, ba ya Lesorong la Meetse ka bohlabela bja motse.

₃₈Sehlopha sela se sengwe sa baopedi bao ba bego ba leboga Modimo sa leba ka letsogong la nngele se sepela godimo ga morako, gomme nna ka se šala morago ke na le seripa sa batho. Ra sepela ra feta Tora ya Dionto, ra fihla Morakong wa Phaphathi; ₃₉go tloga moo ra yo feta Lesorong la Efraime le Lesorong le Letala le Lesorong la Dihlapi le Toreng ya Hananele le Toreng ya Lekgolo, ra yo fihla Lesorong la Dihuswane. Ra ema Lesorong la Baleti.

₄₀Ka morago dihlopha tšela tše pedi tša baopedi tše di bego di leboga Modimo tša yo ema ka Tempeleng.

Ka ntle le baetapele bao ba bego ba le sehlopheng sa ka, ₄₁re be re na le baprista ba ba latelago ba ba bego ba letša diphala: Eliakime, Maasea, Miniamine, Mikaya, Elioenai, Sakaria le Hanania; ₄₂gomme ba be ba šetšwe morago ke Maasea, Shemaya, Eleasara, Usi, Johanane, Malkia, Elamo le Esere. Baopedi bao ba bego ba opedišwa ke Jisragia ba be ba hlabošitše mantšu kudu.

₄₃Mohlang woo go ile gwa dirwa dihlabelo tše dintši, gomme batho ba thaba ka gobane Modimo o be a ba thabišitše kudu. Basadi le bana le bona ba be ba thabile, gomme megobo ya bona e kwagala kgole.

₄₄Matšatšing ao go ile gwa bewa banna ba go hlokomela diphapoši tša go bolokela dikabelo tša Tempele, gotee le dikarolo tša lesome le dithakangwaga tša mabele le tša dikenywa. Banna bao ba be ba swanetše go bea dikabelo tša go tšwa ka mašemong a metse tše di bego di fiwa baprista le Balefi go ya ka melao ya Modimo ka moo diphapošing tšeo. Batho ba naga ya Juda ba ntšha dikabelo ka mafolofolo, ka gobane ba be ba thabile ka ge baprista le Balefi ba be ba dira mediro ya bona gabotse. ₄₅Baprista le Balefi ba be ba swara ditirelo tša tlhwekišo le ditirelo tše dingwe tše di bego di laetšwe ke Modimo. Baopedi ba ka Tempeleng le baleti ba masoro a dikgoro tša Tempele le bona ba be ba dira mešomo ya bona go ya ka ditaelo tša Kgoši Dafida le tša Solomone, morwagwe. ₄₆Le kgale, mehleng ya Kgoši Dafida le Asafo, go be go na le baopediši ba dikoša tša go tumiša le go leboga Modimo. ₄₇Mehleng ya Serubabele le mehleng ya Nehemia, Baisraele ka moka ba be ba ntšha dikabelo letšatši le lengwe le le lengwe, e le tša go fepa baopedi le baleti ba masoro a dikgoro tša Tempele. Batho ba be ba ntšhetša Balefi dikabelo tše dikgethwa, gomme Balefi bona ba di abelana le baprista.

₁E rile ka lona tšatši leo ge melao ya Moshe e balelwa batho, gwa fihlwa moo go ngwadilwego gore Moamone goba Momoaba a se ke a tsoga a dumeletšwe go tsena phuthegong ya Modimo. ₂Seo e be e le ka lebaka la gore Baamone le Bamoaba ba ile ba se fe Baisraele dijo le meetse mola ba le leetong la go tšwa Egepeta. Bona ba ile ba reka Bileamo gore a rogake Baisraele, eupša Modimo wa rena a fetoša thogako yeo tšhegofatšo. ₃Ge Baisraele ba ekwa molao woo o balwa ba kgetholla batho ba šele ka moka setšhabeng.

₄Moprista Eliashibe, yo a bego a hlokometše diphapoši tša go bolokela tša Tempele, o be a kwana le Tobia go tloga kgale. ₅Ka gona a mo fa phapoši ye kgolo yela pele e bego e le ya go bolokela dikabelo tša bupi, diorelo, dibjana tša ka Tempeleng, dikabelo tše di filwego baprista, le dikarolo tša lesome tša mabele le tša beine le tša makhura a mohlware tše molao o laelago gore di fiwe Balefi le baopedi ba ka Tempeleng le baleti ba masoro a dikgoro tša Tempele. ₆Ge tšeo di direga nna ke be ke se gona Jerusalema, ka gobane ka ngwaga wa masome a mararo a metšo ye mebedi wa ge Artazerksese e le kgoši ya Babilone ke be ke boetše go kgoši. Ka morago ga lebaka ka kgopela kgoši gore ke tloge, ₇gomme ka boela Jerusalema. Moo ke ile ka hwetša taba ye mpe ye e bego e dirilwe ke Eliashibe wa go fa Tobia phapoši ka kgorong ya Tempele. ₈Ka tuka bogale kudu gomme ka lahlela thoto yohle ya Tobia ntle. ₉Ka laela gore diphapoši di hlwekišwe, le gore ditlabakelo tša Tempele le dikabelo tša bupi le diorelo di bušetšwe ka moo.

₁₀Ke ile ka kwa le gore baopedi le Balefi ba ba bego ba šoma ka Tempeleng ba tlogile Jerusalema ba ipoeletše mašemong a bona, ka gobane batho ba be ba sa ba abele dijo tše di ba lebanego. ₁₁Ka kgalema bahlankedi ka ge ba se ba šetša Tempele. Ka nama ka bušetša Balefi le baopedi bale Tempeleng, gomme ka ba fa mešomo ya bona gape. ₁₂Ke moka batho bohle ba Juda ba thoma gape go tliša dikarolo tša lesome tša mabele le tša beine le tša makhura a mohlware diphapošing tša Tempele tša go bolokela. ₁₃Ka bea banna ba ba latelago gore ba hlokomele diphapoši tša go bolokela: Shelemia, moprista, le Tsadoko, mongwaledi, le Pedaya, Molefi. Hanane, morwa wa Sakure, le setlogolo sa Matania, yena ya ba mothuši wa bona. Go be go tsebega gore banna bao ba a tshephega ge ba abela Balefi ba bangwe dijo.

₁₄Hle, Modimo wa ka, o nkgopole mabapi le dilo tše. O se ke wa lesa mediro ye ya lerato ye ke e diretšego Tempele le tirelo ya yona e phumoga.

₁₅Matšatšing ao ke ile ka bona batho nageng ya Juda ba pitla diterebe ka maoto ka letšatši la Sabatha. Ba bangwe ba be ba nametša dipokolo tša bona mabele, beine, diterebe, mago, gotee le dilo tše dingwe, ba di tliša Jerusalema; ka ba kgala gore ba se rekiše selo ka Sabatha. ₁₆Banna ba bangwe ba Tirose ba be ba dula Jerusalema, gomme ba tliša dihlapi le dilo tša mehutahuta motseng, ba di rekišetša batho ba Juda ka Sabatha. ₁₇Ka sola baetapele ba Bajuda ka re: “Le reng le dira taba ye mpe ye? Le tšhilafatša letšatši la Sabatha. ₁₈Se ke sona se borakgololokhukhu ba lena ba se dirilego, gomme Modimo wa rena a tlišetša rena le motse wo wa rena dilo tše mpe tše. Bjale lena le sa okeletša Baisraele bogale bja Modimo ka go tšhilafatša Sabatha!”

₁₉Ka gona ka laela gore masoro a motse a tswalelwe mathomong a Sabatha se sengwe le se sengwe, ge leswiswana le thoma go swara, gomme a se ke a bulwa gape go fihlela ge Sabatha se fetile. Ka bea banna ba ka ba bangwe masorong go hlokomela gore go se tsenywe selo motseng ka letšatši la Sabatha. ₂₀Ke gakaenyana moo babapatši ba dilo tša mehutahuta ba ilego ba lala ka ntle ga morako wa motse e le Labohlano. ₂₁Ka ba kgala ka re: “Le reng le lala ka ntle ga morako? Ge le ka boeletša ke tla le tloša ka kgang.” Go tloga mohlang woo ba napa ba se sa boa ka letšatši la Sabatha. ₂₂Ka laela Balefi gore ba itlhwekiše, le gore ba yo leta masoro gomme ba hlokomele gore Sabatha e hlomphiwe.

Hle, Modimo, le mo tabeng ye o nkgopole, mme o ntšhokele ka lerato la gago le legolo.

₂₃Ka nako yeo ka lemoga le gore banna ba bangwe ba Bajuda ba nyetše basadi ba Baashdode, ba Baamone, le ba Bamoaba. ₂₄Bana ba bona ba bangwe ba be ba bolela Seashdode goba dipolelo tše dingwe, gomme ba sa kgone polelo ya rena. ₂₅Ka omanya banna bao, ka ba rogaka, ka betha ba bangwe ba bona, ka ba tumola le meriri. Ka re ba ene ka leina la Modimo gore bona goba bana ba bona ba ka se sa tsoga ba nyalelane le ba ditšhaba di šele. ₂₆Ka re: “Ke basadi ba ditšhaba di šele ba ba ilego ba diriša Solomone dibe. Ditšhabeng ka moka go be go se kgoši ye e lekanago le yena. Modimo o be a mo rata gomme a mo dirile kgoši ya Israele ka moka, le ge go le bjalo a dira sebe se. ₂₇Kgane le rena re dire tše mpe tše le di dirago, re se botegele Modimo wa rena ka go nyala basadi ba šele?”

₂₈Joyada e be e le morwa wa Eliashibe, Moprista yo Mogolo, eupša morwa yo mongwe wa Joyada a nyala morwedi wa Sanbalate wa motse wa Bethe-Horone; ka gona ka raka Joyada Jerusalema.

₂₉Hle, Modimo, gopola ka moo batho bao ba tšhilafaditšego boprista le kgwerano ye o e dirilego le baprista le Balefi.

₃₀Ka mokgwa woo ka hlwekiša setšhaba ka se lahliša dilo tšohle tša ditšhaba di šele. Ka beela baprista le Balefi melawana, gore yo mongwe le yo mongwe a tle a tsebe mošomo wa gagwe. ₃₁Ka laela gore batho ba tliše dikgong tša go gotša mollo wa go tšhuma dihlabelo ka dinako tše di beilwego, le gore ba tliše dikabelo tša bona tša mabele a a bunwago pele le dikenywa tše di butšwago pele.

O gopole dilo tše ka moka, hle, Modimo, gomme o ntire tše botse.