To The Word – Day 157

₁Go ja nthathana ya molatšana o iketlile

go phala go ja dimakhura ka lapeng la diphapano.

₂Mohlanka yo bohlale o laola ngwanamalešadihlong,

ya ba mojabohwa le barwa ba monglapa.

₃Silibera e hlwekišwa ka go tološwa ka pitšeng;

gauta e hlwekišwa ka go tološwa moubelong,

kganthe pelo ya motho yona e hlahlobja ke Morena.

₄Modiratšempe o theeletša polelo tše mpe,

wa maaka o hlwaela lesebo tsebe.

₅Mokweramodiidi o nyefola Mmopi wa gagwe,

mothabelamadimabe a mongwe a ka se phonyokge kotlo.

₆Ditlogolwana ke diala tša diputswa,

barwa le bona ba itheta ka botatabo.

₇Polelo ye botse e rona lešilo,

maaka le ona a rona mokgomana.

₈Tsogolekobong mofi wa lona o re ke pheko,

o re le mo kgontšha tše a di dirago.

₉Molebalelaphošo ke wa go nyaka kwano;

motsošološaphošo yena o lweša bantšhanasainong.

₁₀Monatlhaologanyo o kwa kgalemo,

lešilo lona le palela le thupa tše lekgolo.

₁₁Yo kgopo o kgonetše go tsoša mmudubudu,

eupša o tla otlwa gasehlogo.

₁₂Go gahlana le bere ye e hlakotšwego bana

go phala go gahlana le lešilo le tša bošilo bja lona.

₁₃Yo a lefetšago botse ka bobe,

bobe bo ka se tloge ka ga gagwe.

₁₄Go rumolana go swana le go phulela meetse mosele;

wena o tloge ntwa e sešo ya thoma.

₁₅Wa go lokafatša yo kgopo le wa go tšwa moloki

ba šišimiša Morena ka babedi.

₁₆Go thušang go fa lešilo tšhelete ya go lefela thuto,

mola le sa nyake thušo?

₁₇Mogwera ke yo a go botegelago ka nako tšohle;

morwarragomotho o ema naye mathateng.

₁₈Mohlokatlhaologanyo o itlema go lefela motho melato

ge mongmelato a palelwa;

o ikana go lefela yo a jetšego molato mpeng.

₁₉Yo a ratago go kgopiša batho o rata diphapano;

yo a ikgogomošago o a ipolaya.

₂₀Senokwane ga se atlege;

mpheane le yena o wela kotsing.

₂₁Motswalasetlatla o rwele bothata;

tatagolešilo ga a na lethabo.

₂₂Motho wa go thakgala ke yo a phetšego gabotse;

wa go nolega moko yena ga a na maatla.

₂₃Yo kgopo o amogela tsogolekobong

gore go menolwe toka.

₂₄Monatlhaologanyo o ikemišetša go dira tša bohlale,

lešilo lona ga le na maikemišetšo.

₂₅Ngwana yo e lego setlaela o nyamiša tatagwe,

o kweša mmagwe bohloko bjo bogolo.

₂₆Go lefiša mohlokamolato ga se gwa loka;

go betha mokgomana ga go a lebana.

₂₇Motsebi ga se wa go balabala,

wa go se felafele pelo ke yena wa kwešišo.

₂₈Le lešilo ge le ikhomoletše le ka sengwa yo bohlale;

ge le momile molomo go ka thwe le ne tlhaologanyo.

₁Tšhikanoši ke wa go nyaka go dira boithatelo,

o gana maele ka moka a mabotse.

₂Setlatla ga se tshwenyegele go kwešiša ba bangwe,

se rata fela go bolela tše se di naganago.

₃Bokgopo bo sepela le lenyatšo,

tlhomphologo e sepela le kgobogo.

₄Polelo ya yo bohlale e ka teba bjalo ka bodiba;

e ka ba bjalo ka noka ye e elago,

e ka ba mothopo wa bohlale.

₅Go emelela monamolato tshekong,

e le ge o lahla mohlokamolato, ke phošo.

₆Polelo tša setlatla di hlola phapano,

di se bakela go itiwa.

₇Lešilo le ipolaya ka dipolelo tša lona,

le tanywa ka tše le di bolelago.

₈Lesebo la mpheane le bose,

le etša seakolo se se kwametšwago.

₉Motho wa sebodu ke yo mobe,

o bjalo ka motšitlanyi.

₁₀Morena o bjalo ka tora ye e tiilego yeo moloki a ka tšhabelago go yona a bolokega.

₁₁Mohumi o bona lehumo la gagwe e le motse wo o ageleditšwego,

e le morako wo mogolo wo o mo šireleditšego.

₁₂Go ikgogomoša ke go ikiša tahlegong;

ge o nyaka go hlompšha o ikokobetše.

₁₃Yo a arabago a se a kwa potšišo o dira tša bošilo

le tša go rumolana.

₁₄Monakgotlelelo ga a fekeetšwe ke bolwetši,

eupša ge a nolegile moko a ka swarelela bjang?

₁₅Monatlhaologanyo o fišegela go tseba;

yo bohlale o dula a hlwaetše tša tsebo tsebe.

₁₆Mpho e phulela moabi wa yona tsela,

e mo fihliša go ba ba nago le maatla.

₁₇Mmolelapele tshekong o a kgolwa,

go fihlela ge go etla wa go mo sekišiša.

₁₈Taba ya banna ba maatla ba ba lwago ka kgorong ya tsheko

e ka ahlolwa ka go direlwa matengwa.

₁₉Ngwanabomotho a kgopišwa,

ga a tsenege,

o feta le motse wo o ageleditšwego ka go se tsenege,

wa fapana naye, o gana poelano.

₂₀Motho a ka iphediša ka tše a di bolelago,

a ka ikhweletša dijo ka go ba seboledi.

₂₁Lehu le bophelo di laolwa ke go bolela ga motho;

yo a bolelago kudu o tla ikobela.

₂₂Yo a nyetšego mosadi ke yo lehlogonolo,

o thabelwa ke Morena.

₂₃Sa modiidi ke go kgopela,

fela mohumi a fetole ka sekgapho.

₂₄Bagwera ba bangwe ba a lahletšana,

ba bangwe bona ba tshephagala

go feta bana ba motho.

₁Modiidi yo a hlokago bosodi o phala moradia wa lešilo.

₂Mahlahla a mohlokatsebo ga a na mohola;

lephakuphaku le a lahletša.

₃Motho o itahla ka botlatla bja gagwe,

gomme a sole Morena.

₄Lehumo le gokela motho bagwera ba bantši;

modiidi yena o tšhabelwa ke wa gagwe mogwera.

₅Hlatse ya maaka ga e pheme kotlo,

ramaaka ga a ke a phonyokga.

₆Ba bantši ba leka go ithatiša ba bagolo;

yo a sa timanego batho ba ikgweranya naye.

₇Modiidi o hloiwa le ke banababo,

bagwera ba gagwe le bona ba mo katologa le go feta.

Le ge a ithapeletša go bona, ga go thuše selo.

₈Moithati o katanela go hwetša bohlale,

moitapišetšakwešišo le yena o a atlega.

₉Hlatse ya maaka ga e pheme kotlo;

ramaaka yena o tla bolawa.

₁₀Go phela ka matsaka go rona lešilo,

lekgoba lona ge le laola bakgomana le ronwa le go feta.

₁₁Motho yo bohlale o pelotelele;

bothakga bja gagwe ke ge a sa latišiše dikgopi.

₁₂Kgalefo ya kgoši e etša go bopa ga tau,

kgaugelo ya gagwe yona nke ke phoka bjanyeng.

₁₃Ngwana yo e lego setlaela o tsenya tatagwe mathateng;

mosadi wa go ngamola hlogo ke kgwara bjalo ka meetse

a a rothago tlhakeng ya go dutla.

₁₄Lapa le lehumo ke bohwa bja go tšwa go batswadi ba motho,

mosadi wa go loka yena o tšwa go Morena.

₁₅Bobodu bo robatša motho boroko bjo bogolo,

sebodu se phela se bolawa ke tlala.

₁₆Yo a phethago taelo tša Morena o a itota;

yo a sa di šetšego yena o a ipolaya.

₁₇Yo a fago modiidi selo o adima Morena,

gomme Morena o tla mo putsa.

₁₈O kgale ngwanagago go sa holofetša,

fela o se galefe wa go mmolaya.

₁₉Mofelafelapelo o tla ipona;

wa mo hlakodiša gatee,

o tla swanela go mo hlakodiša gape.

₂₀Theeletša maele, o eletšege,

gore ka moso o be yo bohlale.

₂₁Motho a ka no ikemišetša dilo tše di fapafapanego,

fela thato go phethega ya Morena.

₂₂Se se rategago mothong ke lerato la kilaphetogo;

go ba ramaaka go phalwa ke go diila.

₂₃Yo a boifago Morena o a atlega;

o robala a sa hlobaele,

a sa welwe ke madimabe.

₂₄Sebodu se ngwatha bogobe ka mogopong,

fela sa tšwafa go iša seatla ka ganong.

₂₅Otla mokodutli, e be go lemoša mohlokatsebo go tša bophelo;

mohlalefi wa go kgalwa o hlalefa le go feta.

₂₆Motlaišatatagwe le morakammagwe

ke mohlabišadihlong wa manyala.

₂₇Ngwanaka, ge o ka ithiba ditsebe ge o rutwa,

o ka se be le tsebo.

₂₈Hlatse ye mpe e menola toka.

Yo kgopo o kgabakgaba bokgopo ka ganong.

₂₉Bakodutli ba beetšwe kotlo,

mašilo le ona a beetšwe go itiwa mokokotlo.

₁Ke be ke letile Morena ka tlhologelo,

mme a ntlhwaela tsebe,

a nkwa ge ke mo llela.

₂A nntšha moleteng wa tahlego,

moo tebetebeng ya leraga,

a mpea sebong,

a ntshepediša mo go omilego.

₃A mpha kopelo ye mpsha,

sereto sa Modimo wa rena.

Ba bantši ba tla re go kwa kopelo ya ka ba gakgamala, ba tshepha Morena.

₄Go lehlogonolo motho yo a tshephilego Morena,

yo a sa fadišego baikgogomoši,

goba ba ba itharetšago ka bofora.

₅Morena Modimo wa ka,

mehlolo ye o e dirilego ga e kaaka.

Merero ya gago ke ya go re hola.

Moswananago ga a gona.

Ge nka re ke a e anega goba ke bolela ka yona,

e ka mpatla ka bontši bja yona.

₆Wena ga o kgahlwe ke dihlabelo le dikabelo tša bupi;

ga o nyake dihlabelo tša go tšhungwa ka moka,

goba dihlabelo tša go tloša dibe.

Bakeng sa tšeo o mphile ditsebe tša go kwa.

₇Ke ka lebaka leo nna ke rilego:

“Bona, ke ikemišeditše go phetha tše ke di laetšwego ka pukung ya melao ya gago.

₈Ke thabela go dira tše di kgahlago wena, Modimo wa ka.

Melao ya gago e ka pelong ya ka.”

₉Ge phuthego e kgobokane ka bontši,

ke e anegela taba ye botse ya gore o mphološitše.

O a tseba, Morena,

gore nka se lese go e anegela.

₁₀Ga se ka uta gore ke phološitšwe ke wena.

Ka mehla ke anega tša potego ya gago le phološo.

Ge phuthego ya gago e kgobokane ka bontši,

ke be ke sa lese go e begela tša leratorato la gago le tša potego ya gago.

₁₁Morena, etse o ka se lese go ntšhokela;

o tla fela o ntotile ka lerato le potego ya gago.

₁₂Ke dikaneditšwe ke mathata a mantši –

ke a mantši mo ke šitwago go a bala!

Makgopo a ka a ntshwere,

mme ga ke sa kgona go bona tsela.

A feta le meriri ya ka ka bontši,

mme ke nolegile moko.

₁₃Hle, Morena, ntlhatlole!

Itlhaganele o nthuše!

₁₄A ba inyatše ba itshesengwe bohle ba ba lekago go mpolaya.

A ba katakate ba gobogile ba ba ntlholelago mathata.

₁₅A ba gakantšhwe ke go fenywa ba ba rego go nna: “Agaa! Swine!”

₁₆Bohle ba ba go nyakago a ba thabe ba gobele ka ge e le ba gago.

Bohle ba ba hloloselago go phološwa ke wena a ka mehla ba re:

“Morena ke yo mogolo!”

₁₇Nnaena ke mohlaki ebile ke mohloki,

eupša wena, Mong wa ka, ga o ntebale.

Ke wena Mothuši wa ka le Mophološi wa ka;

se diege, hle, Modimo wa ka!

₁Go lehlogonolo motho yo a hlokomelago bahlaki;

Morena o tla mo hlakodiša mohla a wetšego mathateng.

₂Morena o tla mo šireletša a mo phediša;

o tla mo letla mo nageng ye;

a ka se mo lahletše manabeng.

₃Ge a babja, Morena o tla mo thekga,

a mo fodišetša sa ruri.

₄Nna ke ile ka re:

“Morena, ntšhokele o mphodiše,

le ge ke go fošeditše.”

₅Manaba a ka a mpolela a mphelela pelo, a re:

“E bago o tla hwa neng, a lebalwa?”

₆Motho wa bona ge a etla go ntlhola o a ikgakantšha;

o tlela fela go bona seemo sa ka se sebe,

se e rego ge a etšwa a se phatlalatše ka ntle.

₇Bohle ba ba ntlhoilego ba a ntsheba.

Ka dipelo ba ntlhobogile,

₈ba re: “O babja la go hwa;

ge a rapaletše bjalo a ka se sa tsoga.”

₉Ke hlanametšwe le ke yo ke bego ke re ke mogweragwera,

yo ke bego ke ntšhana naye sa inong,

yo a bego a eja le nna mogopong o tee.

₁₀Ntšhokele, Morena, o mphodiše,

mme nna ke tla itefeletša go bona.

₁₁Ge lenaba la ka le ka se mphenye,

ke mo ke tlago tseba gore ke a go kgahla.

₁₂O nthekga ka ge ke se na bosodi;

o dula o mpeile kgauswi le wena.

₁₃A go tumišwe Morena Modimo wa Israele,

go tloga neng le neng,

le go iša go sa felego.

Amene! Amene!