To The Word – Day 135

₁Nna, Paulose, ke mohlanka wa Modimo le moapostola wa Jesu Kriste.

Ke romilwe gore bao Modimo a ba kgethilego ke ba sokollele tumelong, le gore ba tsebe nnete gabotse ye e rutwago ke sedumedi sa gaborena, ₂sona se ithekgilego ka go holofela bophelo bjo bo sa felego. Modimo yo a sa bolelego maaka o re holofeditše bjona go tloga le go tloga, ₃gomme ka nako ya gona a bo utolla ka molaetša wa gagwe. Wona wa fiwa nna, gomme nna ka o bega ke laetšwe ke Modimo, Mophološi wa rena.

₄Go wena, Titose, morwa wa ka wa mmakgonthe tumelong ye e lego ya rena ka moka, ke re:

Nke Modimo, Tatagorena, le Kriste Jesu, Mophološi wa rena, ba go gaugele, ba go fe khutšo.

₅Ke go tlogetše Kreta gore o beakanye dilo tše di bego di sa nyaka go dirwa, le gore o bee bagolo ba phuthego motseng wo mongwe le wo mongwe, go ya ka ditaelo tše ke go filego tšona tša go re: ₆Mogolo wa phuthego a se be le bosodi; e be monna wa mosadi o tee, wa bana ba e lego badumedi, e sego ba ba gobogilego ka bophaga le lenyatšo batswading. ₇Gobane moetapele yoo wa kereke, ka ge e le mohlokomedi wa phuthego ya Modimo, o swanetše go hloka bosodi; e se be moiponi, goba sefelapelwana, goba setagwa, goba serumolani, goba sehwirihwiri tšheleteng. ₈A e be motho wa go amogela basepedi ka ga gagwe, le morati wa tše di lokilego. E be wa go nagana gabotse, wa go loka, yo mokgethwa, wa go itshwara ka tlhaologanyo. ₉A itshwarelele ka molaetša wo wa go tshepega wa go dumelelana le thuto ya nnete. Ke mo a ka kgonago go kgothatša batho ka thuto ya nnete le go bontšha baganetši phošo ya bona.

₁₀Gobane go na le ba bantši, gagolo ba go tšwa tumelong ya Sejuda, ba e lego bomaganagobušwa, bommalelengwana le bafori. ₁₁Bona bao ba swanetše go thibja melomo, ka gobane ba pšhatla malapa ka go ruta batho tše e sego tšona, e le ge ba gabile go ikgobokeletša tšhelete ka bohwirihwiri. ₁₂Mokreta yo mongwe, yo e bego e le moprofeta wa gabobona, yo a ilego a re: “Bakreta e sa le ba tloga e le bafeane, e le diphoofolo, e le dijagobe tša dibodu,” ₁₃o be a rereša. Ka lebaka leo, o ba kgale e le ruri, gore ba be le tumelo ya nnete, ₁₄gomme ba se sa šetša dinonwane tša Sejuda le melao ya batho ba ba lahlilego therešo. ₁₅Go bao ba hlwekilego tšohle di hlwekile, eupša go bao ba tšhilafetšego gape ba sa dumelego ga go se se hlwekilego, gobane menagano ya bona le matswalo a bona di tšhilafetše. ₁₆Ba ipotša gore ba tseba Modimo, eupša mediro ya bona e a ba ganetša. Ba hloilwe, ga ba kwe, gomme ga go modiro wo mobotse wo ba loketšego go o dira.

₁Wena o rute tše di dumelelanago le thuto ya nnete. ₂Bakgalabje o ba laye gore ba nagane gabotse, e be ba ba hlomphegago, ba go itshwara ka tlhaologanyo; ba be le tumelo ya nnete le lerato la nnete le kgotlelelo ya nnete. ₃Le bakgekolo o ba laye gore ba itshware ka mo go swanetšego bakgethwa. Ba se ke ba ba le lesebo, goba ba laolwa ke bjala. E be ba go ruta tše di lokilego, ₄gore ba kgothaletše mathari go rata banna ba bona le bana ba bona, ₅le gore ba itshware ka tlhaologanyo le bohlweki, le gore e be ba ba hlokomelago malapa a bona, ba ba ikokobetšago go banna ba bona, gore go se be le motho yo a gobošago molaetša wa Modimo.

₆Le masogana o a kgothatše bjalo, gore ba be le maitshwaro a mabotse. ₇Mo go tšohle wena mong o be mohlala wo mobotse. O phegele go ruta batho therešo ka tlhompho. ₈Thuto ya gago e be ya nnete, e be ye e se nago bosodi, gore ba ba sa emego nago ba lewe ke dihlong ge ba hloka bobe bjo ba kago re phara bjona.

₉Makgoba a ikokobetše go beng ba ona le go ba kgahliša dilong ka moka. Ba se ke ba ba ngangiša. ₁₀Ba se ke ba ba utswetša. Ba upše ba ipontšhe gore dilong tšohle ba a tshepega, gore mo go tšohle ba dire gore thuto ya Modimo, Mophološi wa rena, e kgahliše.

₁₁Gobane Modimo o utolotše kgaugelo ya gagwe ye e kgontšhago batho ka moka go phološwa. ₁₂Ke yona ye e re rutago gore re tlogele go phela bophelo bjo bo hlokomologago Modimo, le go laolwa ke ditumo tša lefaseng, gomme mehleng yeno re phele re itshwere ka tlhaologanyo, re le ba ba lokilego, ba borapedi, ₁₃re ntše re letetše se re se holofelago sa go re thabiša, mohla letago la Modimo wa rena yo mogolo, yena Mophološi wa rena, Jesu Kriste, le tšwelela. ₁₄Yena o ikgafetše rena gore a re hlakodiše bokgopong bjohle le gore a re dire setšhaba se se hlwekilego, se e lego sa gagwe a le noši, se se fišegelago go dira mediro ye mebotse.

₁₅O bege o realo, o ntše o kgothatša batho o bile o ba kgalema ka maatla ohle a o a filwego. Go se be le yo a go nyatšago.

₁O gopotše badumedi gore ba ikokobetše go balaodi le babuši, ba ba theeletše, ba ikemišetše go dira tše dibotse ka mehla, ₂ba se senye motho leina, ba se rumolane, e be ba botho, mme ka mehla ba bonale e le ba boleta go bohle. ₃Gobane le rena re kile ra ba mašilo, ra ba le lenyatšo, ra aroga, ra laolwa ke ditumo le mathabo a mehutahuta. Re be re phela bokgopong le lehufeng; re be re hloilwe, le rena re hloyane. ₄Eupša e rile ge botho bja Modimo, Mophološi wa rena, le go rata batho ga gagwe di bonala, ₅a re hlakodiša. E be e se ka lebaka la mediro ye e lokilego ye re e dirilego, eupša e be e le ka lebaka la kgaugelo ya gagwe ge a re hlakodiša. O re hlakodišitše ka go hlatswiwa ga rena ra tswalwa lefsa, ra ba ra fiwa bophelo bjo bofsa ka Moya wo Mokgethwa. ₆Modimo o re tšhetše Moya wa gagwe ka bontši ka Jesu Kriste, Mophološi wa rena, ₇gore ka kgaugelo ya gagwe re tle re lokafatšwe gomme re rue bophelo bjo bo sa felego bjo re bo holofetšego. ₈Moo ke nnete.

Ke rata gore taba tše o di bolele o tiišitše, gore ba ba dumelago go Modimo ba kgothalele go dira mediro ye mebotse ye e loketšego gape e holago mang le mang. ₉O kgaogane le dikgang tša botlaela, le mananeo a borakgolokhukhu, le diphapano, le dintwa mabapi le melao ya Moshe. Tšohle tšeo ga di na mohola, ke tša lefeela. ₁₀Moaroganyi o mo kgale gatee goba gabedi, e be o mo tlogela ka seripa. ₁₁O a tseba gore motho yo mobjalo o arogile, gomme ka sebe seo sa gagwe o a itahla.

₁₂Ge ke romile Artemase goba Tigikose go wena, o itlhaganele o tle go nna kua Nikopolise, ka gobane ke ikemišeditše go yo jela marega gona. ₁₃O leke ka mo o ka kgonago ka gona go thuša Tsenase, ramangwalo, le Apolose go tšea leeto la bona, gomme o bone gore ba na le tšohle tše ba tlago di nyaka. ₁₄Batho ba gaborena ba swanetše go itlwaetša go dira mediro ye mebotse, gore ba tle ba kgone go thuša ka tše di tlogago di nyakega; ba se ke ba phela bophelo bjo bo se nago mohola.

₁₅Ka moka ba ba nago le nna mo ba a go dumediša. O dumediše badumedikarena ba ba re ratago.

A Modimo a le gaugele bohle.