TITOSE 3

₁O gopotše badumedi gore ba ikokobetše go balaodi le babuši, ba ba theeletše, ba ikemišetše go dira tše dibotse ka mehla, ₂ba se senye motho leina, ba se rumolane, e be ba botho, mme ka mehla ba bonale e le ba boleta go bohle. ₃Gobane le rena re kile ra ba mašilo, ra ba le lenyatšo, ra aroga, ra laolwa ke ditumo le mathabo a mehutahuta. Re be re phela bokgopong le lehufeng; re be re hloilwe, le rena re hloyane. ₄Eupša e rile ge botho bja Modimo, Mophološi wa rena, le go rata batho ga gagwe di bonala, ₅a re hlakodiša. E be e se ka lebaka la mediro ye e lokilego ye re e dirilego, eupša e be e le ka lebaka la kgaugelo ya gagwe ge a re hlakodiša. O re hlakodišitše ka go hlatswiwa ga rena ra tswalwa lefsa, ra ba ra fiwa bophelo bjo bofsa ka Moya wo Mokgethwa. ₆Modimo o re tšhetše Moya wa gagwe ka bontši ka Jesu Kriste, Mophološi wa rena, ₇gore ka kgaugelo ya gagwe re tle re lokafatšwe gomme re rue bophelo bjo bo sa felego bjo re bo holofetšego. ₈Moo ke nnete.

Ke rata gore taba tše o di bolele o tiišitše, gore ba ba dumelago go Modimo ba kgothalele go dira mediro ye mebotse ye e loketšego gape e holago mang le mang. ₉O kgaogane le dikgang tša botlaela, le mananeo a borakgolokhukhu, le diphapano, le dintwa mabapi le melao ya Moshe. Tšohle tšeo ga di na mohola, ke tša lefeela. ₁₀Moaroganyi o mo kgale gatee goba gabedi, e be o mo tlogela ka seripa. ₁₁O a tseba gore motho yo mobjalo o arogile, gomme ka sebe seo sa gagwe o a itahla.

₁₂Ge ke romile Artemase goba Tigikose go wena, o itlhaganele o tle go nna kua Nikopolise, ka gobane ke ikemišeditše go yo jela marega gona. ₁₃O leke ka mo o ka kgonago ka gona go thuša Tsenase, ramangwalo, le Apolose go tšea leeto la bona, gomme o bone gore ba na le tšohle tše ba tlago di nyaka. ₁₄Batho ba gaborena ba swanetše go itlwaetša go dira mediro ye mebotse, gore ba tle ba kgone go thuša ka tše di tlogago di nyakega; ba se ke ba phela bophelo bjo bo se nago mohola.

₁₅Ka moka ba ba nago le nna mo ba a go dumediša. O dumediše badumedikarena ba ba re ratago.

A Modimo a le gaugele bohle.