Bohlale le botlatla
1Bohlale o ikagetše ngwako,
a o betlela dikokwane tše di šupago.
2O hlabile dikgomo,
o natefišitše beine ya gagwe,
o adile bojelo.
3O romile bahlanka ba gagwe ba banenyana
gore ba yo hlaeletša batho ba le serokameng sa motse ba re:
4“Etlang mono, lena le sa lemogego tša bophelo!”
Go bahlokatlhaologanyo a re:
5“Etlang,
re jeng dijo tše ke le apeetšego tšona,
re nweng le beine ye ke e natefišitšego.
6Tlogelang bošilo,
gomme le tla phela.
Tšeang ka tsela ya temogo.”
7Mokgalamogegei o ikobela mahlapa;
mosolayokgopo o ipakela maroga.
8O se kgale mogegei,
o tla go hloya;
o kgale mohlalefi,
o tla go rata.
9Ruta mohlalefi,
o tla hlalefa le go feta;
ruta moloki,
temogo ya gagwe e tla oketšega.
10Mathomo a bohlale ke go boifa Morena;
go tseba Mokgethwa ke yona temogo.
11Ge o na le bohlale o tla phela galelele,
o tla okeletšwa mengwaga ya go phela.
12Bohlale bja gago bo hola wena mong,
go gegea ga gago go tla babela wena.
13Mmabotlatla ke mosadi wa lešatana,
ke semaumau sa go se tsebe selo.
14O kokomala mojako wa ngwako wa gagwe,
setulong se se lego serokameng sa motse.
15O hlaeletša bafeti ba tsela,
ba ba ikelago mo ba yago gona, o re:
16“Etlang mono,
lena le sa lemogego tša bophelo!”
Go bahlokatlhaologanyo a re:
17“Meetse go tsefa a a utswitšwego,
le selewathopeng se a natefa.”
18Mašilo ga a tsebe
ge lehu le a laletše moo,
le gore baeng ba gagwe ba theogetše
fasefase bodulabahu.
