To The Word – Day 114

₁Solomone o ile a rata basadi ba šele ba bantši. Ntle le morwedi wa kgoši ya Egepeta o ile a nyala basadi ba Bahete le basadi ba go tšwa Moaba le Amone le Edomo le Sidone. ₂A ba kgomarela le ge Morena a be a laetše Baisraele gore ba se ke ba nyalelana le ditšhaba tšeo, ka gobane ba ka kgelošetša Baisraele medimong ye mengwe. ₃Solomone o ile a nyala barwedi ba magoši ba makgolo a a šupago, a ba a ba le metlabo ye makgolo a mararo. Ba mo aroša go Modimo, ₄gomme ka nako ye a tšofala ba be ba šetše ba mo gogetše medimong e šele. O be a sa khunamele Morena Modimo wa gagwe ka botlalo, a sa swane le Dafida, tatagwe. ₅O be a khunamela Astarte, modimo wo motshadi wa Basidone, le Milkomo, modimo yo a hlaswegago wa Baamone. ₆A dira dibe pele ga Morena, gomme a se ke a mo latela ka pelo ka moka, a se swane le Dafida, tatagwe. ₇A aga ntotoma ye go yona go khunamelwago Kemoshe, modimo yo a šišimišago wa Bamoaba, le ye go khunamelwago Milkomo, modimo yo a selekišago wa Baamone, godimo ga thaba ka bohlabela bja Jerusalema. ₈A aga le dintotoma tša moo basadi ba gagwe ba šele ba bego ba tšhuma diorelo, gomme ba direla medimo ya bona dihlabelo.

_9-10Le ge Morena Modimo wa Israele a be a iponagaditše go Solomone gabedi gomme a mo laetše gore a se ke a khunamela medimo e šele, Solomone o ile a se ke a theetša Morena, eupša a mo hlanogela. Ka gona Morena a befelelwa Solomone ₁₁gomme a re go yena: “Ka gobane o lahlile kgwerano ya ka ka boomo gomme wa nyatša ditaelo tša ka, ruri, ke tla go amoga mmušo ka o neela yo mongwe wa bahlankedi ba gago. ₁₂Fela, ka lebaka la Dafida, tatago, nka se dire taba yeo o sa phela, eupša ke tla e dira ge go buša morwa wa gago. ₁₃Gomme nka se mo amoge mmušo ka moka; ke tla mo šadišetša kgoro e tee ka lebaka la Dafida, mohlanka wa ka, le ka lebaka la Jerusalema, motse wo ke ikgethetšego wona.”

₁₄Ka gona Morena a dira Hadade, mokgomana wa Edomo, lenaba la Solomone. _15-16Mehleng ya pele, mola Dafida a fentše batho ba Edomo, Joaba, molaodi wa madira a gagwe, o ile a ya moo go yo boloka bahu. Yena le banna ba gagwe ba dula moo Edomo dikgwedi tše di selelago, gomme ka nako yeo ba bolaya banna bohle fao, ₁₇ntle le Hadade le bahlanka ba bangwe ba tatagwe ba Baedomo, bao ba ilego ba tšhabela Egepeta. Mehleng yeo Hadade e be e sa le ngwana. ₁₈Ba ile ba tloga Midiane ba ya Parane, gomme moo banna ba bangwe ba ba tlatša. Ke moka ba sepela ba yo fihla Egepeta, gomme fao ba ya go kgoši. Yena a fa Hadade naga le ngwako le dijo. ₁₉Hadade a kgahla kgoši kudu mo kgoši a ilego a mo fa mosadi. Mosadi yoo e be e le moratho wa Mohumagadi Tagpenese, mosadi wa gagwe. ₂₀Yena a belegela Hadade morwa, Genubate, yo a ilego a godišwa ke mohumagadi mošate, moo a bego a dula le barwa ba kgoši.

₂₁Ge Hadade a ekwa a le Egepeta gore Dafida o ithobaletše, le gore Joaba, molaodi wa madira, le yena o hwile, a kgopela kgoši a re: “A ke boele nageng ya gešo.”

₂₂Kgoši a mmotšiša a re: “Ke eng se o se hlokago mo go nna ge e bile o nyaka go boela ga geno?”

Hadade a fetola kgoši a re: “Aowa, ga ke hloke selo; fela eno ntesa ke sepele.” Gomme a boela nageng ya gabo.

Ge Hadade e le kgoši ya Edomo o be a hlaswa Baisraele, a ba tlišetša mathata.

₂₃Modimo o ile a dira le Resone, morwa wa Eliada, lenaba la Solomone. Resone o be a tšo tšhaba go mong wa gagwe, Kgoši Hadade-Esere wa Tsoba, ₂₄gomme a kgobokanya banna ba bangwe ya ba lekoko la bašwahledi, mme yena ya ba moetapele wa lona. Seo se diregile ka morago ga ge Dafida a bolaile Hadade-Esere le bathuši ba gagwe ba Basiria. Resone le banna ba gagwe ba ile ba tloga ba yo dula Damaskose, moo banna ba gagwe ba ilego ba mmea kgoši. ₂₅E bile lenaba la Israele mehleng ya Solomone.

₂₆Monna yo mongwe yo e ilego ya ba lenaba la Solomone e be e le yo mongwe wa bahlankedi ba gagwe, Jerobeamo, morwa wa Nebate, wa Tsereda kua Efraime. Mmagwe e be e le mohlologadi yo leina la gagwe e bego e le Tserua. ₂₇Ditaba tša mpherefere wa gagwe šedi:

Solomone o be a lekelelanya naga ka bohlabela bja Jerusalema a bile a thiba nthoba morakong wa motse wa Dafida. ₂₈Jerobeamo e be e le lesogana la seroto, gomme ge Solomone a bona ka moo a šomago kudu ka gona, a mmea mohlokomedi wa mediro ka moka ya kgapeletšo nageng ya kgoro ya Manase le ya Efraime. ₂₉Ka letšatši le lengwe ge Jerobeamo a etšwa Jerusalema, moprofeta Ahia wa Shilo a gahlana naye a nnoši tseleng kua nageng. ₃₀Ahia a apola seaparo se sefsa se a bego a se apere, a se gagoganya diripana tše lesome le tše pedi, ₃₁gomme a re go Jerobeamo: “Itšeele diripana tše lesome, ka gobane Morena Modimo wa Israele o re go wena: ‘Ke tlilo gagola bogoši diatleng tša Solomone, gomme wena ka go fa dikgoro tše lesome. ₃₂Solomone o tla šala le kgoro e tee ka lebaka la Dafida, mohlanka wa ka, le ka lebaka la Jerusalema, motse wo ke ikgethetšego wona nageng ya Israele ka moka. ₃₃Ke tlile go dira seo ka gobane Solomone o ntlhanogetše a khunamela medimo e šele: Astarte, modimo wo motshadi wa Basidone; Kemoshe, modimo wa Bamoaba, le Milkomo, modimo wa Baamone. Solomone ga se a dira se ke se nyakago; o dirile dibe pele ga ka, gomme ga se a phetha melao le ditaelo tša ka, ka gona a se swane le Dafida, tatagwe. ₃₄Fela nka se amoge Solomone bogoši ka moka, gomme ke tla dira gore a fele a buša bophelong bja gagwe ka moka. Taba yeo ke tla e dira ka lebaka la Dafida, mohlanka wa ka, yo ke mo kgethilego le gona a phethilego melao le ditaelo tša ka. ₃₅Ke tla amoga morwa wa Solomone bogoši gomme wena ka go fa dikgoro tše lesome, ₃₆eupša morwa wa Solomone ke tla mo fa kgoro e tee, gore ka mehla ke tle ke be le lehlasetšana la Dafida, mohlanka wa ka, mo Jerusalema, motse wo ke ikgethetšego gore ke khunamelwe go wona. ₃₇Jerobeamo, wena ke tla go bea kgoši ya Israele, gomme wa buša naga ka moka ye o e nyakago. ₃₈Ge o ka dira tšohle tše ke go laelago tšona, wa phetha melao ya ka, gomme wa dira tše ke di nyakago ka go phetha ditaelo tša ka, wa swana le Dafida, mohlanka wa ka, ke tla ba le wena ka mehla. Ke tla go bea kgoši ya Israele gomme ka dira gore le ditlogolo tša gago di tle di buše legatong la gago, bjalo ka ge ke diretše Dafida. ₃₉Ka lebaka la sebe sa Solomone ke tla kokobetša ditlogolo tša Dafida, fela nka se di kokobeletše sa ruri.’ ”

₄₀Ka fao Solomone a leka go bolaya Jerobeamo, eupša yena a tšhabela go Kgoši Shishake wa Egepeta gomme a dula moo go fihlela Solomone a ehwa.

₄₁Tše dingwe tše Solomone a di dirilego, bophelo le bohlale bja gagwe, ka moka di ngwadilwe mo go Ditaba tša Solomone. ₄₂E bile kgoši ya naga ya Israele ka moka Jerusalema mengwaga ye masome a mane. ₄₃A ithobalela mme a bolokwa motseng wa Dafida, gomme morwa wa gagwe, Rehabeamo, a mo hlatlama bogošing.

₁Rehabeamo o ile a ya Shekeme, moo batho ka moka ba ka leboa la Israele ba bego ba kgobokane go tlo mmea kgoši. ₂Ge Jerobeamo, morwa wa Nebate, yo a bego a tšhabile Kgoši Solomone mme a le Egepeta, a ekwa ditaba tše, a tloga fao a boela gae. ₃Batho ba dikgoro tša ka leboa ba roma batseta go yo mmitša, gomme ba ya go Rehabeamo mmogo ba re go yena: ₄“Tatago, Solomone, o be a re swere ka makgwakgwa gomme a re rwešitše merwalo ye boima. Ge o ka re fokoletša merwalo ye gomme wa re phediša ka boiketlo, re tla fela re le batho ba gago.”

₅Yena a ba fetola a re: “Le boeng ge go fetile matšatši a mararo.” Ka gona ba tloga.

₆Kgoši Rehabeamo a boledišana le bakgalabje ba e bego e le baeletši ba tatagwe Solomone a ba botšiša a re: “A le nkeletša gore ke arabe batho ba bjang?”

₇Bona ba mo fetola ba re: “Ge o nyaka go ba kgoši ya setšhaba se le go se direla, o bolele le bona ka botho, gomme ka mehla ba tla go hlankela ka potego.”

₈Eupša yena a tšeiša keletšo yeo ya bakgalabje phefo, gomme a ikela go masogana ao a gotšego nao a bjale e bego e le baeletši ba gagwe. ₉A ba botšiša a re: “A batho ba ba nkgopelago gore ke ba fokoletše merwalo ke reng go bona?”

₁₀Ba mo fetola ba re: “Sese se o swanetšego go ba botša sona: ‘Monwana wa ka wo monnyane ke wo mokoto go feta letheka la tate!’ ₁₁O ba botše o re: ‘Tate o be a le rwešitše merwalo ye boima; nna ke tla e dira ye boima go feta moo. O be a le otla ka kgati; nna ke tla le otlaka ka tshelane!’ ”

₁₂Ka letšatši la boraro Jerobeamo le setšhaba ka moka ba boela go Kgoši Rehabeamo, bjalo ka ge a be a ba laetše. ₁₃Kgoši a nyatša keletšo yela ya bakgalabje gomme a bolela le setšhaba ka bogale, ₁₄ka moo masogana a bego a mo eleditše ka gona. O ile a re: “Tate o be a le rwešitše merwalo ye boima; nna ke tla e dira ye boima go feta moo. O be a le otla ka kgati; nna ke tla le otlaka ka tshelane!” ₁₅Morena o be a dirile gore go be ka mokgwa woo gore a tle a phethagatše se a bego a se boditše Jerobeamo, morwa wa Nebate, ka moprofeta Ahia wa Shilo. Lebaka ke lona leo ge kgoši a ile a hlokomologa se setšhaba se bego se se kgopetše.

₁₆Ge setšhaba se bona gore kgoši ga a kwane le se ba se kgopelago, ba goa ba re: “Ga re sa iša felo ka Dafida le lapa la gagwe! Ba kile ba re direla eng? Banna ba Israele, a re yeng gae! A lapa la Dafida le itebalebele!”

Ka gona batho ba Israele ba ya ga gabobona, ₁₇ba lesa Rehabeamo e le kgoši ya batho ba naga ya Juda fela.

₁₈Ka morago Kgoši Rehabeamo a roma Adoniramo, yo a bego a hlokometše mediro ya kgapeletšo, gore a ye go Baisraele, eupša ba mmolaya ka maswika. Ge Rehabeamo a bona seo a tshela ka tswati a namela koloi ya gagwe ya ntwa, gomme a tšhabela Jerusalema. ₁₉E sa le go tloga ka yona nako yeo batho ba Mmušo wa ka Leboa wa Israele ba lwa le ba mmušo wa Dafida.

₂₀Ge batho ba Israele ka moka ba ekwa gore Jerobeamo o tšo boa Egepeta, ba ile ba kgobokana, ba mmitša gomme ba mmea kgoši ya Israele. E bile fela ba kgoro ya Juda ba ba ilego ba no šala ba botegela ditlogolo tša Dafida.

₂₁Ge Rehabeamo a fihla Jerusalema, o ile a rapa bahlabani ba dikete tše lekgolo le tše masome a seswai ba bogalegale kgorong ya Juda le ya Benjamene. O be a ikemišeditše go yo lwa le dikgoro tša ka leboa tša Israele gore e be kgoši ya tšona gape. ₂₂Eupša Modimo a botša moprofeta Shemaya ₂₃gore a botše Rehabeamo le batho ka moka ba kgoro ya Juda le ya Benjamene le ba ba šetšego gare ga bona a re: ₂₄“Le se ke la hlasela bomorwarragolena, batho ba Israele. Ikeleng gae ka moka ga lena. Se se diregilego ke thato ya ka.” Ka moka ba ile ba phetha se Morena a se laetšego, ba boela gae.

₂₅Kgoši Jerobeamo wa Israele o ile a tsošološa motse wa Shekeme, nageng ya dithaba ya Efraime, gomme a dula moo lebakanyana. Ka morago a tloga moo gomme a yo tsošološa motse wa Penuele. _26-27O ile a ipotša a re: “Ka moo go lego ka gona bjale, ge batho ba ka ba ka fela ba eya Jerusalema go yo direla Morena dihlabelo ka Tempeleng, ba tla botegela Kgoši Rehabeamo gape gomme nna ba mpolaya.”

₂₈Ge a gopodišitše taba ye a dira dipowana tše pedi tša gauta, gomme a re go batho ba gagwe: “Ke kgale le bolawa ke mosepelo wa go ya Jerusalema go yo rapela. Lena batho ba Israele, še medimo ya lena ye e le ntšhitšego Egepeta!” ₂₉O ile a bea powana ye nngwe kua Bethele mme ye nngwe a e bea Dane. ₃₀Gomme batho ba dira seboka go yo rapela kua Bethele le kua Dane. ₃₁Jerobeamo a ba a aga dintotoma tše go tšona go khunamelwago medimo ya diswantšho, gomme a kgetha baprista bathong ba e bego e se ba kgoro ya Lefi.

₃₂Jerobeamo a ba a hloma letšatši la monyanya wa sedumedi ya ba la lesome le metšo ye mehlano la kgwedi ya seswai, monyanya wa go swana le wa kua Juda. A direla dipowana tšela tša gauta dihlabelo godimo ga aletare ya kua Bethele, gomme gona moo a bea baprista ba go hlankela medimo ya diswantšho dintotomeng tše a bego a di agile. ₃₃Gomme ka letšatši la lesome le metšo ye mehlano la kgwedi ya seswai, letšatši le le bego le beilwe ke yena mong, a ya Bethele mme a fihla a dira sehlabelo aletareng e le go beela batho ba Israele letšatši la monyanya.

₁Moprofeta yo mongwe yo a tšwago Juda a tla Bethele a laetšwe ke Morena, gomme a fihla gona Jerobeamo a sa eme aletareng go dira sehlabelo. ₂A rogaka aletare ka moo a bego a laetšwe ke Morena a re: “Aletare, aletare tena, Morena o re: ‘Bona, leloko la Dafida le tla belega morwa yo a tlago bitšwa Josia. Godimo ga gago o tla bolaela baprista ba ba hlankelago medimo ya diswantšho kua dintotomeng, ba ba dirago dihlabelo godimo ga gago, mme o tla tšhumela mašapo a batho godimo ga gago.’ ” ₃Moprofeta a tšwela pele a re: “Aletare ye e tla kgerešwa, gomme melora ye e lego godimo ga yona e tla gašanywa. Seo e tla ba sešupo sa gore Morena o boletše ka nna.”

₄Ge Kgoši Jerobeamo a ekwa seo, a mo šupa ka monwana a re: “Swarang monna yoo!” Gatee fela letsogo la kgoši la hwa gomme a šitwa ke go le boetša morago. ₅Aletare yela ya kgerega ka bjako gomme melora ya gašanywa fase, bjalo ka ge moprofeta a boletše ka leina la Morena. ₆Kgoši Jerobeamo a re go moprofeta: “Hle, mphophothele go Morena Modimo wa gago o nthapelele yena, o mo kgopele gore a mphodiše letsogo!”

Moprofeta a rapela Morena, gomme letsogo la kgoši la fola. ₇Ke moo kgoši a itšego go moprofeta: “A re ye ka gae o yo ja dijo. Ke tla go putsetša se o se dirilego.”

₈Moprofeta a mo fetola a re: “Le ge o ka nkarolela thoto ya gago ka bogare, nka se ye nago. Nka se je dijo goba ka nwa meetse felo fa. ₉Morena o ntaetše gore ke se ke ka ja goba ka nwa selo, le gore ke se ke ka boela gae ka tsela ye ke tlilego ka yona.” ₁₀Ka gona o ile a se ke a boa ka tsela ye a tlilego ka yona, eupša a tšea ka tsela ye nngwe.

₁₁Mehleng yeo go be go na le moprofeta yo mongwe wa mokgalabje a dula Bethele. Barwa ba gagwe ba ile ba tla ba mmotša se moprofeta yoo wa Juda a se dirilego Bethele tšatši leo, le se a se boditšego Kgoši Jerobeamo. ₁₂Moprofeta yoo a ba botšiša a re: “A o tšere ka tsela efe ge a tloga?” Ba mo laetša tsela ya gona ₁₃gomme a ba botša gore ba mo saleletše pokolo ya gagwe. Ba mo saleletša yona, gomme a e namela, ₁₄a wela tsela yela a šala moprofeta yola wa Juda morago, gomme a mo hwetša a dutše ka fase ga mohlare wa moeike. A mmotšiša a re: “A ke wena moprofeta wa go tšwa Juda?”

Monna yola a mo fetola a re: “Ke nna.”

₁₅A re go yena: “A re ye gae o yo ja le nna.”

₁₆Eupša moprofeta yo wa go tšwa Juda a mo fetola a re: “Nka se boele le wena gageno goba ka ya ka ga gago. Nka se je goba ka nwa selo le wena mo, ₁₇ka gobane Morena o ntaetše gore ke se ke ka ja goba ka nwa selo, le gore ke se ke ka boela gae ka tsela ye ke tlilego ka yona.”

₁₈Ke moo moprofeta yoo wa mokgalabje wa Bethele a itšego go yena: “Le nna ke moprofeta bjalo ka wena, gomme ka taelo ya Morena morongwa o mpoditše gore ke go iše ga ka gomme ke go sware gabotse.” Fela moprofeta yoo wa mokgalabje o be a bolela maaka.

₁₉Ka gona moprofeta wa Juda a ya ga moprofeta wa mokgalabje gomme a ja dijo naye. ₂₀Ya re ba sa ja, Morena a fa moprofeta wa mokgalabje molaetša wa go ya go moprofeta wa Juda, ₂₁gomme yoo a goelela a re: “Morena o re o mo nyaditše, ga se wa dira se a go laetšego sona. ₂₂O boile wa ja dijo felo fa a go laetšego gore o se ke wa ja gona. Ka lebaka la taba ye o tla bolawa, gomme setopo sa gago se ka se bolokwe ka lebitleng la lapa leno.”

₂₃Ge ba fetša go ja, moprofeta wa mokgalabje a saletša pokolo ya moprofeta wa Juda, ₂₄gomme moprofeta wa Juda a tloga. Tseleng a gahlana le tau gomme ya mmolaya. Setopo sa gagwe sa rapalala moo tseleng, pokolo le tau yela di se emeleditše. ₂₅Banna ba bangwe ba re ba feta moo ba se bona; ba bona le tau yeo e eme fao. Ba fetela Bethele gomme ba fihla ba bega se ba se bonego.

₂₆Ge moprofeta yola wa mokgalabje a ekwa taba yeo, a re: “Yoo ke moprofeta yo a nyaditšego taelo ya Morena! Ka gona Morena o mo gafetše tau gore e mo hlasele e mmolaye, bjalo ka ge Morena a boletše.” ₂₇Gomme a re go barwa ba gagwe: “Saletšang pokolo ya ka.” Ba e saletša, ₂₈mme a e namela a tloga; a hwetša setopo sa moprofeta yola se rapaletše tseleng, pokolo le tau yela di sa se emeleditše. Tau e be e se ya ja setopo goba ya hlasela pokolo. ₂₉Moprofeta yoo a tšea setopo sela a se nametša pokolo yeo, gomme a se bušetša Bethele gore a tle a mmoloke mme a mo ilele. ₃₀A mmoloka ka lebitleng labo, gomme yena le barwa ba gagwe ba mo ilela ba re: “Joo, ngwanešo, joo!” ₃₁Ka morago ga poloko moprofeta a re go barwa ba gagwe: “Ge ke hwile le mpoloke ka mo lebitleng le, gomme le mpee kgauswi le yena. ₃₂Mantšu ao moprofeta yo a boletšego ka taelo ya Morena a rogaka aletare ya Bethele le mafelo ka moka a tirelo dintotomeng tšeo go tšona go bego go khunamelwa medimo ya diswantšho metseng ya Samaria, ruri a tla phethagala.”

₃₃Kgoši Jerobeamo wa Israele o ile a no fela a ganeletše ditseleng tša gagwe tše mpe, gomme a no fela a sa kgetha baprista malapeng ao e bego e se a kgoro ya Lefi gore ba direle dialetareng tše a di agilego dintotomeng tšeo go tšona go khunamelwago medimo ya diswantšho. Yo mongwe le yo mongwe yo a nyakago o be a mmea moprista. ₃₄Sebe se sa gagwe se ile sa uša mmušo wa gagwe, sa ba sa hlolela leloko labo go fedišwa.

₁Ka yona nako yeo morwa wa Kgoši Jerobeamo, Abia, a babja. ₂Jerobeamo a re go mosadi wa gagwe: “Hle, apara diaparo tša go ikgakantšha gore o se ke wa tsebja, gomme o ye Shilo, moo go dulago moprofeta Ahia yola a kilego a re ke tla ba kgoši ya Israele. ₃O mo yele le dinkgwa tše lesome le dikuku le legapa la todi ya dinose. O tla go botša se se tlago hlagela ngwana yo.”

₄Ka gona mosadi a ya lapeng la Ahia kua Shilo. Ahia o be a šetše a foufetše ka lebaka la botšofadi. ₅Morena o be a mmoditše gore mosadi wa Jerobeamo o tseleng go tlo mmotšiša ka morwa wa gagwe yo a babjago. Gomme Morena a botša Ahia gore a reng.

Mosadi wa Jerobeamo ge a fihla o be a ikgakantšhitše. ₆Eupša ge Ahia a mo kwa a tsena ka sefero, a re: “Tsena, ke a tseba gore o mosadi wa Jerobeamo. Ke ka lebaka lang o ikgakantšha? Ke laetšwe go go tsebiša ditaba tše mpe. ₇Sepela o botše Jerobeamo gore Morena Modimo wa Israele o re: ‘Ke go dirile yo mogolo setšhabeng ka go bea mmuši wa setšhaba sa ka sa Israele. ₈Ke gagotše mmušo diatleng tša ditlogolo tša Dafida gomme ka o fa wena. Eupša ga se wa ba bjalo ka mohlanka wa ka, Dafida, yo a bego a mpotegela ka botlalo, a phetha ditaelo tša ka, gomme a dira fela tše di lokilego. ₉O dirile dibe tše kgolokgolo go feta bao ba bušitšego pele ga gago. O ntahlile gomme wa mpefediša ka go dira medimo ya diswantšho le diswantšhobopša tša tshipi mme wa e khunamela. ₁₀Ka lebaka la seo ke tla tliša bošula lapeng la gago, ka bolaya ditlogolo tša gago ka moka ga tšona. Ke tla swielela lapa leno ka moka bjalo ka motho a swiela boloko. ₁₁Meloko yeno ye e hwelago mo motseng e tla lewa ke dimpša, gomme ba ba hwelago kua nageng ba tla lewa ke manong. Ke realo, nna, Morena.’ ”

₁₂Ahia a tšwela pele a botša mosadi wa Jerobeamo a re: “Bjale boela gae. Ge o seno tsena motseng ngwana wa gago o tla hwa. ₁₃Batho ba Israele ka moka ba tla mo llela, mme ba mmoloka. E tla ba yena a nnoši wa lapa la Jerobeamo yo a tlago bolokwa, ka gobane ke yena fela yo Morena Modimo wa Israele a bonego se sebotse go yena. ₁₄Morena o tla bea kgoši mo Israele ye e tlago fediša lapa la Jerobeamo ka pelapela, ntle le go senya sebaka. ₁₅Morena o tla otla Israele, gomme Israele e tla tekateka bjalo ka lehlakanoka moeleng. O tla tomola batho ba Israele nageng ye botse ye a e filego borakgolokhukhu ba bona, a ba šwalalanyetša ka mošola wa noka ya Yufratese, ka gobane ba mmefedišitše ka go hloma dikota tša borapedi. ₁₆Morena o tla gafa Israele ka gobane Jerobeamo o dirile sebe, a diriša le batho ba Israele dibe.”

₁₇Mosadi wa Jerobeamo o ile a boela Tirtsa. Ya re ge a tsena ka ngwakong, ngwana a hwa. ₁₈Batho ba Israele ba mo llela gomme ba mmoloka, bjalo ka ge Morena a boletše ka mohlanka wa gagwe, moprofeta Ahia.

₁₉Tše dingwe tše Jerobeamo a di dirilego, dintwa tše a di lwelego le ka moo a bušitšego ka gona, ka moka di ngwadilwe mo go Ditaba tša magoši a Israele. ₂₀Jerobeamo o bušitše mengwaga ye masome a mabedi le metšo ye mebedi. A ithobalela le botatagwe, mme Nadaba, morwa wa gagwe, a mo hlatlama bogošing.

₂₁Rehabeamo, morwa wa Solomone, o be a na le mengwaga ye masome a mane le motšo o tee ge e eba kgoši ya Juda, gomme a buša mengwaga ye lesome le ye e šupago Jerusalema, motse wo Morena a o kgethilego nageng ka moka ya Israele gore e be felo mo a swanetšego go khunamelwa gona. MmagoRehabeamo e be e le Naama wa Amone.

₂₂Batho ba Juda ba dira dibe pele ga Morena, ba mo rumola go feta borakgolokhukhu ba bona ka dibe tše bona ba di dirilego. ₂₃Ba ikagela dintotoma tše go tšona ba khunamelago medimo ya diswantšho, ba hloma le dikokwane tša maswika tša borapedi le dikota tša borapedi kua mebotong ye e phagamego, le ka fase ga mehlare ya merithi ye megolo. ₂₄Le gona go be go na le digwebakathobalo tša banna mafelong a go khunamela medimo ya diswantšho nageng ya Juda. Batho ba Juda ba be ba dira makgapa ka moka a a bego a dirwa ke ditšhaba tše Morena a di lelekilego nageng yeo ge Baisraele ba goroga.

₂₅Ka ngwaga wa bohlano wa pušo ya Rehabeamo, Kgoši Shishake wa Egepeta a hlasela Jerusalema. ₂₆A tšea matlotlo ka moka a ka Tempeleng le a mošate; a tšea dilo ka moka, gammogo le dikotse tša gauta tšela Solomone a bego a di dirile. ₂₇Legatong la tšona, Kgoši Rehabeamo a dira dikotse tša mphiri gomme a di nea balaodi ba baleti ba masoro a mošate. ₂₈Nako ye nngwe le ye nngwe ge kgoši a eya Tempeleng, baleti ba be ba tšea dikotse tšeo gomme ba di boetša ka phapošing ya baleti.

₂₉Tše dingwe tše Kgoši Rehabeamo a di dirilego di ngwadilwe mo go Ditaba tša magoši a Juda. ₃₀Mehleng yeo ka moka Rehabeamo le Jerobeamo ba be ba fela ba elwa seng sa bona. ₃₁Rehabeamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Abia, a mo hlatlama bogošing.

₁Ka ngwaga wa lesome le metšo ye seswai wa pušo ya Kgoši Jerobeamo wa Israele, Abia e ile ya ba kgoši ya Juda, ₂gomme a buša mengwaga ye meraro Jerusalema. Mmagwe e be e le Maaka, morwedi wa Absalomo. ₃A dira tšona dibe tšela tatagwe a bego a di dira, gomme a se ke a botegela Morena Modimo wa gagwe ka botlalo, bjalo ka rakgolokhukhu wa gagwe, Dafida. ₄Eupša ka lebaka la Dafida, Morena Modimo wa Abia a mo fa lebone Jerusalema, e lego morwa gore a mo hlatlame, le gore a tiiše motse wa Jerusalema. ₅Morena o ile a dira seo ka gobane Dafida o be a dirile tše di kgahlago yena Morena. Bophelong bja gagwe ka moka o be a se a ka a tshela tše Morena a bego a mo laetše tšona, ge e se fela tabeng ya Uria, Mohete. ₆Abia le Jerobeamo ba be ba fela ba elwa nakong ka moka ya pušo ya Abia. ₇Tše dingwe tše Abia a di dirilego di ngwadilwe mo go Ditaba tša magoši a Juda.

₈Abia a ithobalela le botatagwe, gomme a bolokwa motseng wa Dafida, mme Asa, morwa wa gagwe, a mo hlatlama bogošing.

₉Ngwageng wa masome a mabedi wa pušo ya Jerobeamo wa Israele, Asa e ile ya ba kgoši ya Juda, ₁₀gomme a buša mengwaga ye masome a mane le motšo o tee Jerusalema. Makgolwagwe e be e le Maaka, morwedi wa Absalomo. ₁₁Asa a dira tše di kgahlago Morena, a etša Dafida, rakgolokhukhu wa gagwe. ₁₂A raka digwebakathobalo ka moka tša banna le tša basadi nageng ya Juda mafelong a tirelo a medimo ya diswantšho, a tloša le medingwana ya diswantšho ye bao ba bušitšego pele ga gagwe ba bego ba e dirile. ₁₃O ile a amoga Maaka, makgolwagwe, maemo a bohumagadi, ka gobane o be a betlile seswantšho se se šišimišago sa Ashera, modimo wo motshadi. Asa a rema seswantšho seo gomme a se tšhuma moeding wa Kidrone. ₁₄Le ge Asa a ile a se ke a phušola dintotoma tšeo go tšona go bego go khunamelwa medimo ya diswantšho, o ile a botegela Morena bophelong bja gagwe ka moka. ₁₅Tšohle tše tatagwe a bego a di abetše Morena o ile a di bea ka Tempeleng, gotee le dilo tša gauta le tša silibera tše yena mong a bego a di file Morena.

₁₆Kgoši Asa wa Juda le Kgoši Basha wa Israele ba be ba fela ba elwa nakong ka moka ya pušo ya bona. ₁₇Basha o ile a hlasela Juda gomme a thoma go tiiša Rama gore a tle a thibele batho go ya Juda le go tšwa gona. ₁₈Ka gona Kgoši Asa a tšea silibera yohle gotee le gauta ka moka ye e bego e šetše ka ngwakong wa polokelo wa Tempele le wa mošate, a e romela ka bahlankedi ba gagwe Damaskose go Kgoši Benhadade wa Siria, morwa wa Tabrimone, setlogolo sa Hesione. A re ba mmotše ba re: ₁₉“A re tsošološe kwano yela ya botatagorena. Silibera ye le gauta ye ke mpho ya gago. Bjale lesa go kwana le Kgoši Basha wa Israele gore a tle a gapeletšege go ntšha madira a gagwe nageng ya ka.”

₂₀Kgoši Benhadade a dumela se Asa a se kgopelago, gomme a romela balaodi ba gagwe ba madira le madira a bona go yo hlasela metse ya Israele. Ba thopa Iyone, Dane, Abele-Bethe-Maaka, tikologo yohle ya kgauswi le letsha la Genesarete, le naga ka moka ya Naftali. ₂₁Ge kgoši Basha a ekwa se se diregilego, a lesa go tiiša Rama gomme a boela Tirtsa.

₂₂Ke moka Kgoši Asa a laela gore yo mongwe le yo mongwe nageng ka moka ya Juda a thothe maswika le dikota tše Basha a bego a tiiša Rama ka tšona. Asa a tiiša Mitsepa, a tiiša le Geba, motse wo o lego nageng ya Benjamene, ka dilo tšeo.

₂₃Tše dingwe tše Kgoši Asa a di dirilego, ditiro tša bogale bja gagwe le metse ye a e tiišitšego, ka moka di ngwadilwe mo go Ditaba tša magoši a Juda. Fela botšofading bja gagwe o ile a swarwa ke bolwetši bja maoto. ₂₄Asa a ithobalela le botatagwe, gomme a bolokwa mabitleng a bona motseng wa Dafida, mme Joshafate, morwa wa gagwe, a mo hlatlama bogošing.

₂₅Ngwageng wa bobedi wa pušo ya Kgoši Asa wa Juda, Nadaba, morwa wa Kgoši Jerobeamo, e ile ya ba kgoši ya Israele, gomme a buša mengwaga ye mebedi. ₂₆A dira dibe pele ga Morena go no swana le tatagwe, a diriša le batho ba Israele dibe.

₂₇Basha, morwa wa Ahia, wa kgoro ya Isakara, a logela Nadaba maanomabe mme a mmolaya ge Nadaba le madira a gagwe ba dikaneditše motse wa Gibetone kua Filistia. ₂₈Taba yeo e diregile ngwageng wa boraro wa pušo ya Kgoši Asa wa Juda. Ka gona Basha a hlatlama Nadaba bogošing bja Israele. ₂₉A napa a thoma go bolaya batho ka moka ba lapa la Jerobeamo. Ba lapa ka moka la Jerobeamo ba bolawa go ya ka seo Morena a se boletšego ka mohlanka wa gagwe, moporofeta Ahia wa Shilo; a se ke a šadiša le o tee. ₃₀Seo se ile sa direga ka gobane Jerobeamo a be a befedišitše Morena Modimo wa Israele ka dibe tše a ilego a di dira, le tše a ilego a di diriša batho ba Israele.

₃₁Tše dingwe tše Nadaba a di dirilego di ngwadilwe mo go Ditaba tša magoši a Israele. ₃₂Kgoši Asa wa Juda le Kgoši Basha wa Israele ba be ba fela ba elwa nakong ka moka ya ge ba buša.

₃₃Ngwageng wa boraro wa pušo ya Kgoši Asa wa Juda, Basha, morwa wa Ahia, e ile ya ba kgoši ya Israele ka moka, gomme a buša a le Tirtsa mengwaga ye masome a mabedi le metšo ye mene. ₃₄A dira dibe pele ga Morena go no swana le Jerobeamo, a diriša le batho ba Israele dibe.