To The Word – Day 115

₁Morena a bolela le moprofeta Jehu, morwa wa Hanani, a re a botše Basha a re: ₂“O be o se selo, eupša ke go beile moetapele wa batho ba ka ba Israele. Gomme bjale o dirile bjalo ka Jerobeamo, wa diriša le batho ba ka dibe. Dibe tša bona di mpefedišitše, ₃ka gona ke tla go swielela le ba lapa la gago bjalo ka ge ke swieletše Jerobeamo. ₄Ba lapa la gago ba ba hwelago mo motseng ba tla lewa ke dimpša, mme ba ba hwelago kua nageng ba tla lewa ke manong.”

₅Tše dingwe tše Basha a di dirilego le ditiro tša bogale bja gagwe ka moka di ngwadilwe mo go Ditaba tša magoši a Israele. ₆Basha a ithobalela le botatagwe, gomme a bolokwa Tirtsa, mme Ela, morwa wa gagwe, a mo hlatlama bogošing.

₇Molaetša wo wa Morena mabapi le Basha le lapa la gagwe o ile wa tlišwa ke moprofeta Jehu ka lebaka la dibe tše Basha a bego a di dirile pele ga Morena. O ile a befediša Morena e sego fela ka tše mpe tše a di dirilego go swana le Kgoši Jerobeamo, eupša le ka lebaka la gore o ile a bolaya ba lapa la Jerobeamo ka moka.

₈Ngwageng wa masome a mabedi a metšo ye e selelago wa pušo ya Asa wa Juda, Ela, morwa wa Basha, ya ba kgoši ya Israele, gomme a buša a le Tirtsa mengwaga ye mebedi. ₉Simri, mohlankedi yo mongwe wa gagwe yo a bego a laola sekgao se sengwe sa dikoloi tša ntwa, a loga maanomabe a go bolaya Kgoši Ela. Ka letšatši le lengwe Ela o be a enwa a šetše a tagwa kua Tirtsa, lapeng la Artsa, yo a bego a hlokometše mošate. ₁₀Simri a tsena ka ngwakong woo, a mmolaya, mme a mo hlatlama bogošing. Taba ye e diregile ngwageng wa masome a mabedi a metšo ye e šupago wa pušo ya Kgoši Asa wa Juda.

₁₁Ge Simri a seno dula setulong sa bogoši o ile a bolaya batho ka moka ba lapa la Basha. Moloko wo mongwe le wo mongwe wa monna le bao ba bego ba ka lefeletša ba lapa la gagwe le bagwera ba bona ba bolawa. ₁₂Ka gona Simri a bolaya ba lapa ka moka la Basha go ya ka se Morena a se boletšego ka moprofeta Jehu a lwantšha Basha. ₁₃Ka lebaka la go khunamela medingwana ya diswantšho ga bona le ka lebaka la go diriša batho ba Israele dibe, Basha le morwa wa gagwe, Ela, ba be ba befedišitše Morena Modimo wa Israele. ₁₄Tše dingwe tše Ela a di dirilego di ngwadilwe mo go Ditaba tša magoši a Israele.

₁₅Ngwageng wa masome a mabedi a metšo ye e šupago wa pušo ya Kgoši Asa wa Juda, Simri a buša Israele a le Tirtsa matšatši a a šupago. Madira a Israele a be a dikaneditše motse wa Gibetone kua Filistia, ₁₆gomme ge ba ekwa gore Simri o logetše kgoši maanomabe mme o mmolaile, ba bea Omri, molaodi wa bona, kgoši ya batho ba Israele ka lona letšatši leo kua mešašeng. ₁₇Omri le madira a gagwe ba tloga Gibetone mme ba yo dikanetša Tirtsa. ₁₈Ge Simri a bona gore motse o wele, a tsena ka sebong sa ka gare sa mošate, a tšhuma ngwako wa mošate a le ka gare ga wona, mme a bolawa ke mollo woo. ₁₉Taba yeo e hlotšwe ke dibe tša gagwe. A dira tše mpe pele ga Morena, a diriša le batho ba Israele dibe go no swana le Jerobeamo. ₂₀Tše dingwe tše Simri a di dirilego, gotee le maanomabe a gagwe, di ngwadilwe mo go Ditaba tša magoši a Israele.

₂₁Batho ba Israele ba be ba tšwile diripa tše pedi: Ba bangwe ba be ba nyaka go bea Tibni, morwa wa Ginate, kgoši, ba bangwe ba nyaka Omri. ₂₂Mafelelong bao ba nyakago Omri ba oketšega. Tibni a hwa gomme Omri ya ba kgoši. ₂₃Ka gona ngwageng wa masome a mararo a motšo o tee wa pušo ya Kgoši Asa wa Juda, Omri ya ba kgoši ya Israele, gomme a buša mengwaga ye lesome le ye mebedi. A buša a le Tirtsa mengwaga ye e selelago, ₂₄gomme ka morago a reka mmoto wa Samaria go monna yo a bitšwago Shemere ka dipapetlana tše dikete tše di selelago tša silibera. Omri a aga motse moo, gomme a o rea leina la Samaria, a o reela Shemere, yo e bego e le mong wa mmoto woo pele.

₂₅Omri o ile a dira dibe pele ga Morena go feta bohle ba ba bušitšego pele ga gagwe. ₂₆Go no swana le Jerobeamo o ile a befediša Morena Modimo wa Israele ka dibe tša gagwe, le ka go diriša batho dibe ka go khunamela medingwana ya diswantšho ga bona. ₂₇Tše dingwe tše Omri a di dirilego le ditiro tša bogale bja gagwe di ngwadilwe mo go Ditaba tša magoši a Israele. ₂₈Omri a ithobalela le botatagwe, mme a bolokwa Samaria, gomme Ahaba, morwagwe, a mo hlatlama bogošing.

₂₉Ngwageng wa masome a mararo a metšo ye seswai wa pušo ya Kgoši Asa wa Juda, Ahaba, morwa wa Omri, ya ba kgoši ya Israele, gomme a buša mengwaga ye masome a mabedi le metšo ye mebedi a le Samaria. ₃₀A dira dibe pele ga Morena go feta bohle ba ba bušitšego pele ga gagwe. ₃₁A dira dibe bjalo ka Kgoši Jerobeamo gomme yena a fetelela mme a nyala Isebele, morwedi wa Kgoši Etbaale wa Sidone, gomme a khunamela Baale a mo hlankela. ₃₂A agela Baale tempele kua Samaria gomme a mo direla aletare, a e bea ka moo tempeleng. ₃₃A hloma le kota ya borapedi. A dira dilo tše ntši a befediša Morena Modimo wa Israele go feta magoši ka moka a Israele ao a bušitšego pele ga gagwe. ₃₄Mehleng ya ge a buša, Hiele wa Bethele o ile a tsošološa Jeriko. Bjalo ka ge Morena a be a boletše ka Joshua, morwa wa Nunu, Hiele a hwelwa ke morwa wa leitšibolo, Abiramo, ge a bea motheo wa morako wa Jeriko, a ba a hwelwa ke morwagwe wa mafelelo, Segube, ge a aga dikgoro tša motse.

₁Moprofeta yo a bitšwago Eliya wa Tishbe kua Gileade o ile a re go Kgoši Ahaba: “Ke ena ka Morena, Modimo yo a phelago wa Israele, yo ke mo hlankelago, gore mo mengwageng ye go ka se be le phoka goba pula ge e se ge di laetšwe ke nna.”

₂Ke moo Morena a itšego go Eliya: ₃“Tloga felo fa o ye bohlabela mme o utame kgauswi le nokana ya Kerite, ka bohlabela bja Jordane. ₄O nwe meetse nokaneng yeo, gomme ke laetše magokobu gore a go tlišetše dijo fao.”

₅Eliya a phetha taelo yeo ya Morena gomme a ya a dula nokaneng ya Kerite. ₆A nwa meetse nokaneng yeo, gomme magokobu a mo tlišetša senkgwa le nama mosong wo mongwe le wo mongwe le mantšiboeng a mangwe le a mangwe. ₇Ka morago ga nako nokana yela ya pšha ka lebaka la go hlokega ga pula.

₈Ke moka Morena a re go Eliya: ₉“Bjale yaa motseng wa Tsarepate kgauswi le Sidone gomme o dule gona. Ke laetše mohlologadi yo mongwe yo a dulago gona gore a go fe dijo.” ₁₀Ka gona Eliya a ya Tsarepate, gomme ge a fihla kgorong ya motse, a bona mohlologadi a topelela dikgonyana. A re go yena: “Hle, sepela o yo nkgela meetse ka segwana.” ₁₁Gomme ge a eya go a ga, Eliya a mo goeletša a re: “Hle, o nape o ntlele le lerathana la senkgwa!”

₁₂Mohlologadi a mo fetola a re: “Ke ena ka Morena Modimo wa gago yo a phelago gore ga ke na le senkgwa le se sennyane. Selo se ke nago le sona ke fela legoswana la butswana ka serotwaneng, le lerothi la makhura a mohlware ka moetaneng. Ke tlile mo gore ke tle ke topelele dikgonyana ke di iše ka gae, gomme ke yo bo apeela nna le morwa wa ka. Re tla re go ja dijonyana tšeo ya ba moka, ra ikhwela ka tlala.”

₁₃Eliya a re go yena: “O se ke wa tshwenyega. Sepela o yo apea dijo tšeo tša gago. Eupša pele o nkapeele senkgwana ka tše o nago natšo, o ntlišetše sona, gomme ka morago o ikapeele le morwago tše di šetšego. ₁₄Gobane Morena Modimo wa Israele o re: ‘Serotwana sa gago se ka se hloke bupi, le moetana wa gago o ka se fele makhura pele ga ge letšatši leo nna, Morena, ke nešago pula ka lona le fihla.’ ”

₁₅Mohlologadi a ya a dira ka moo Eliya a mmoditšego ka gona, gomme yena le morwagwe le Eliya ba ba le dijo tše di lekanego letšatši ka letšatši nako ye telele. ₁₆Bjalo ka ge Morena a boletše ka Eliya, serotwana se ile sa se ke sa hloka bupi, le moetana wa se fele makhura.

₁₇Ka morago ga lebaka mosadi yoo wa mohlologadi, yena monglapa, a babjetšwa ke morwa yola; bolwetši bja befa go ya pele, a ba a hwa. ₁₈Mohlologadi a re go Eliya: “Monna wa Modimo, bona se o ntirile sona! A o tlile mo gore o gopotše Modimo dibe tša ka mme o hlolele ngwanake lehu?”

₁₉Eliya a re: “Nneele mošemanyana yo.” A mo tšea difarong tša mmagwe, a mo kuka a rotogela le yena ka phapošing ya ka godimo ye a bego a dula ka go yona, mme a mo kwaetša malaong a gagwe. ₂₀Ke moka a rapela ka go hlaboša lentšu a re: “Morena Modimo wa ka, ke ka lebaka lang o dirile mohlologadi yo taba ye šoro ka mokgwa wo? E bile yo botho go nna le ge ke le motho o šele. Bjale o ka napa wa bolaya morwa wa gagwe?” ₂₁Ke moo Eliya a patlamego gararo godimo ga mošemanyana yola mme a rapela a re: “Morena Modimo wa ka, dira gore ngwana yo a boele a phele!” ₂₂Morena a kwa thapelo ya Eliya; ngwana a thoma go buša moya gape mme a phela.

₂₃Eliya a tšea mošemane a theogela le yena ka mola mmagwe a bego a le ka gona a mo neela yena, a re: “Bona, morwago o a phela!”

₂₄Mmagwe a mo fetola a re: “Bjale ke a tseba gore o monna wa Modimo, le gore se Morena a se bolelago ka wena ke therešo.”

₁Ka morago ga lebaka, ngwageng wa boraro wa komelelo, Morena a re go Eliya: “Sepela o iponatše go Kgoši Ahaba, gomme ke tla neša pula.” ₂Ka gona Eliya a tloga.

Tlala nageng ya Samaria e be e le ye kgolo kudu, ₃ka gona Ahaba a bitša Obadia, yo a bego a hlokometše mošate. Obadia o be a botegela Morena kudu, ₄gomme ge Isebele a bolaya baprofeta ba Morena, Obadia o ile a tšea ba lekgolo ba bona a ba uta ka maweng ka dihlopha tše pedi tša ba masome a mahlano, gomme a fela a ba fa dijo le meetse. ₅Ahaba a re go Obadia: “A re sepele le naga re ye methopong ka moka le dinokeng ka moka. Mohlomongwe re ka hweletša dipere le dimeila bjang bja go di phediša, gore re se gapeletšego go bolaya diruiwa tša rena tše dingwe.” ₆Ba arolelana naga, ba kwana mo mongwe le mongwe a swanetšego go yo hlola gona. Ahaba a leba thokong ye nngwe, Obadia le yena a leba thokong ye nngwe.

₇Ge Obadia a le tseleng, ka bjako a gahlana le Eliya. A mo tseba, a itahlela fase ka sefahlego mme a mmotšiša a re: “Eliya, mong wa ka, a ruri ke wena?”

₈Eliya a mo fetola a re: “Ee, ke nna. Sepela o yo botša kgoši, mong wa gago, gore ke mo.”

₉Obadia a mo fetola a re: “Ke dirile eng ge o nkgafela diatleng tša Kgoši Ahaba gore a mpolaye? ₁₀Ke ena ka Modimo yo a phelago, yena Modimo wa gago, gore ga go naga yeo kgoši a sego a ka a roma batseta go yo go nyaka go yona. Ge mmuši wa naga yeo a bega gore ga o gona nageng ya gagwe, mmuši yoo o be a enišwa le setšhaba sa gagwe gore ka kgonthe ga wa hwetšwa fao. ₁₁Gomme bjale o nyaka gore ke ye ke mmotše gore o gona mo? ₁₂Go tla direga eng ge nka re ge ke seno tloga mo moya wa Morena wa go iša lefelong le lengwe le le sa tsebjego? Gomme ge ke botša Ahaba gore o mo eupša a se ke a go hwetša, o tla mpolaya. Gopola gore ke botegetše Morena go tloga bofseng bja ka. ₁₃A ga se wa kwa gore mola Isebele a bolaya baprofeta ba Morena ke ile ka uta ba lekgolo ba bona ka maweng ka dihlopha tše pedi tša ba masome a a fetšago seatla, ka ba fa dijo le meetse? ₁₄Ka gona o ka napa wa ntaela gore ke yo botša kgoši gore o mo? O tla mpolaya!”

₁₅Eliya a mo fetola a re: “Ka Morena Ramaatlaohle yo ke mo hlankelago, ruri ke tla iponatša go kgoši lehono.”

₁₆Ka gona Obadia a ya go Kgoši Ahaba a fihla a mmotša, gomme Ahaba a tloga a yo gahlanetša Eliya. ₁₇Ge Ahaba a mmona a re: “Kganthe ke wena, moferekanyi wa Israele tena!”

₁₈Eliya a mo fetola a re: “Moferekanyi ga se nna – ke wena le lapa la tatago. Le tlogetše ditaelo tša Morena mme la khunamela medimo ya diswantšho ya Baale. ₁₉Bjale laela batho ba Israele ka moka gore ba tle ba kopane le nna kua thabeng ya Karmele. Le baprofeta ba Baale ba makgolo a mane le masome a mahlano, le ba Ashera, modimo wo motshadi, ba makgolo a mane ba ba hlokometšwego ke Mohumagadi Isebele le bona ba tle.”

₂₀Ka gona Ahaba a bitša Baisraele ka moka le baprofeta ba Baale gore ba tle ba kopane thabeng ya Karmele. ₂₁Eliya a batamela batho a re: “Le tla lesa neng go ba diphiri tša mekokamebedi? Ge Morena e le Modimo, mo khunameleng; eupša ge Baale e le Modimo, gona khunamelang yena!” Fela batho ba se ke ba re selo. ₂₂Ke moo Eliya a itšego: “Ke nna moprofeta ke nnoši wa Morena yo ke šetšego, eupša go na le baprofeta ba Baale ba makgolo a mane le masome a mahlano. ₂₃Tlišang dipoo tše pedi; a baprofeta ba Baale ba kgethe e tee, ba e bolaye, ba e phakologanye, gomme ba e bee godimo ga dikgong, eupša ba se ke ba gotetša mollo. Le nna ke tla dira ka wona mokgwa woo ka poo yela ye nngwe. ₂₄Ka morago baprofeta ba Baale ba rapele modimo wa bona, mme nna ke tla rapela Morena, gomme yo a arabago ka go romela mollo, ke yena Modimo.”

Batho ba goa ba re: “Go lokile!”

₂₅Ke gona Eliya a itšego go baprofeta ba Baale: “Ka ge le le ba bantši, ikgetheleng poo, go thome lena go hlaba. Le rapeleng modimo wa lena, eupša le se ke la gotetša dikgong.”

₂₆Ba tšea poo yela ba ikgethetšego yona, ba e dira ka mo go kwanwego ka gona, gomme ba rapela Baale go fihlela mosegare wo mogolo. Ba goa ba re: “Re arabe, Baale!” Gomme ba fela ba bina ba dikologa aletare ye ba e agilego. Fela gwa se be le karabo le ge e le modungwana wo o tšwago go yena.

₂₇Mosegare wo mogolo Eliya a thoma go ba gegea a re: “Goeletšang kudu ka gobane ke modimo! Mohlomongwe o sa ile le menagano goba o sa ile kgakala, mo gongwe o sa ile maeto! Goba mohlomongwe o robetše mme go nyakega gore le mo tsoše!” ₂₈Ka gona baprofeta bao ba rapela ba hlaboša mantšu kudu, ba ba ba itshega ka ditšhoša le ka marumo go ya ka tlwaelo ya tumelo ya bona, go fihlela ba ela madi. ₂₉Ge letšatši le tshela mokokotlo wa kgomo ba thoma go fafatla ba tladitše mašata go fihlela mathapama ka nako ya sehlabelo sa mantšiboa, fela gwa se be le karabo le ge e le modungwana wo o kwalago, gwa se direge selo.

₃₀Ke moo Eliya a itšego go batho: “Mpatameleng!” Gomme ka moka ba mmokanela. A thoma go aga aletare ya Morena ye e bego e phušotšwe. ₃₁A tšea matlapa a lesome le a mabedi, go ya ka dikgoro tše lesome le tše pedi tše di reetšwego barwa ba Jakobo, monna yola Morena a itšego o tla bitšwa Israele. ₃₂Ka matlapa ao a tsošološa aletare ya tirelo ya Morena. A epa molete go e dikologa, ya ba molete wo o ka tšhelwago dilitara tše lesome le tše tlhano tša meetse. ₃₃Ka morago a bea dikgong aletareng, a phakologanya poo gomme a e bea godimo ga dikgong tšeo. ₃₄A re: “Tlatšang meeta ye mene ka meetse gomme le a tšheleng godimo ga sehlabelo le godimo ga dikgong.” Ba dira bjalo, gomme a re: “Tšhelang gape!” Mme ba dira ka moo a bolelago. A re: “A tšheleng la boraro” – gomme ba dira bjalo. ₃₅Meetse a elela ka mathoko a aletare gomme a tlala molete wola.

₃₆Ka nako ya kabelo ya bupi ya mantšiboa moprofeta Eliya a ya aletareng gomme a rapela a re: “Hle, Morena, Modimo wa Abrahama le Isaka le Jakobo, a go tsebje lehono gore wena o Modimo wa Israele, le gore nna ke mohlanka wa gago, mme tše ka moka ke di dirile ka taelo ya gago. ₃₇Nkarabe, Morena, nkarabe, gore batho ba ba tle ba tsebe gore wena, Morena, o Modimo, le gore o ba boetša go wena.”

₃₈Morena a theoša mollo gomme wa tšhuma sehlabelo le dikgong le matlapa le mobu, mme wa latswalatswetša le meetse ale a ka moleteng. ₃₉Ge batho ba bona seo ba itahlela fase ka difahlego, ba goa ba re: “Morena ke yena Modimo! Morena ke yena Modimo!”

₄₀Eliya a ba laela a re: “Swarang baprofeta ba Baale! Le se ke la lesa le o tee wa bona a tšhaba!” Batho ba ba swara ka moka, gomme Eliya a ba eta pele ba theogela nokeng ya Kishone mme ba fihla ba ba bolaya.

₄₁Ke moo Eliya a itšego go Kgoši Ahaba: “Bjale sepela o yo ja. Ke kwa modumo wa pula.” ₄₂Ya re Ahaba a sa ile go ja, Eliya a namelela godimodimo ga thaba ya Karmele moo a ilego a kotama, a tsenya hlogo gare ga matolo. ₄₃A re go mohlanka wa gagwe: “Sepela o yo lebelela ka thoko ya lewatle.”

Mohlanka a ya a ba a boa mme a re: “Ga se ka bona selo.” Eliya o ile a mo roma gašupa gore a ye a lebelele. ₄₄Ka lekga la bošupa a boa a re: “Ke bone lerunyana le lennyane le le sa fetego seatla sa motho le rotoga lewatleng.”

Eliya a laela mohlanka wa gagwe a re: “Yaa go Kgoši Ahaba o mmotše gore a namele koloi ya gagwe ya ntwa mme a boele gae pele ga ge pula e mo thibela.”

₄₅Ya re ba sa bolela legodimo la pipša ke maru a maso, phefo ya thoma go tšutla, gomme pula ye kgolo ya na. Ahaba a namela koloi ya gagwe mme a wela tsela ya go boela morago Jesriele. ₄₆Eliya a tlelwa ke maatla a Morena; a tlema diaparo tša gagwe lethekeng gomme a kitima pele ga Ahaba leeto ka moka la go ya Jesriele.

₁Kgoši Ahaba a botša mosadi wa gagwe, Isebele, tšohle tše Eliya a di dirilego, le ka moo a bolailego baprofeta ka moka ba Baale ka tšhoša. ₂Isebele a romela molaetša go Eliya a re: “A medimo e mpolaye thoo ge ka nako ye ka moswane nka se go dire sona sela o se dirilego baprofeta.” ₃Eliya a boifa mme a tšhaba, gore a se ke a tla a bolawa; a tšea mohlanka wa gagwe mme a ya Beresheba kua Juda.

A tlogela mohlanka yoo moo, ₄a tsena lešokeng mme a sepela letšatši ka moka. A fihla mohlašaneng gomme a dula fase moriting wa wona mme a duma ge a ka hwa. A rapela a re: “Ga ke sa kgona, Morena. Tšea moya wa ka; ga ke phale botate ka selo.”

₅A rapalala ka moo fase ga mohlašana, gomme a swarwa ke boroko. Ka bjako morongwa a mo kgwatha a re: “Tsoga o je.” ₆Eliya a lebelela ka gohle, gomme a bona senkgwa se se bešitšwego maswikeng a a tšhumilwego ka mollo, le legapana la meetse kgauswi le hlogo ya gagwe. A ja, a nwa, mme a robala gape. ₇Morongwa wa Morena a boa mme a mo tsoša la bobedi a re: “Tsoga o je, gore leeto le se tlo go palela.” ₈Eliya a tsoga, a ja, a nwa, gomme dijo tšeo tša mo fa maatla a a lekanego go sepela matšatši a masome a mane go ya Sinai, thabeng ya Modimo. ₉Moo a fihla a tsena ka leweng gore a lale a robetše ka gona.

Ka bjako Morena a mmotšiša a re: “Eliya, a o dira eng mo?”

₁₀Eliya a mo fetola a re: “Morena Modimo Ramaatlaohle, ke hlanketše wena ka mehla, wena o nnoši. Batho ba Israele bona ba lahlile kgwerano ya bona le wena; ba phušotše dialetare tša gago, le gona ba bolaile baprofeta ba gago ka moka. Ke nna ke nnoši yo ke šetšego, mme le nna ba leka go mpolaya!”

₁₁Morena a re go yena: “Tšwaa mme o eme pele ga ka godimo ga thaba.” Morena a feta a etilwe pele ke ledimo le legolo le le bego le pharola dithaba, le pšhatlaganya marako, eupša Morena o be a se moo phefong yeo. Ledimo le ile la se hlwe le tšutla, gomme ka morago gwa ba le tšhišinyego ya lefase, eupša Morena o be a se moo tšhišinyegong yeo. ₁₂Ka morago ga tšhišinyego gwa ba le mollo, eupša Morena o be a se moo mollong woo. Gomme ka morago ga mollo gwa kwala lentšu la Morena a bolelela fase mola go ile tuu.

₁₃Ge Eliya a ekwa lentšu leo, a ipipa sefahlego ka seaparo sa gagwe gomme a tšwa a ema mojakong wa lewa. Lentšu la re go yena: “Eliya, a o dira eng mo?”

₁₄A fetola a re: “Morena Modimo Ramaatlaohle, ke hlanketše wena ka mehla, wena o nnoši. Batho ba Israele bona ba lahlile kgwerano ya bona le wena; ba phušotše dialetare tša gago, le gona ba bolaile baprofeta ba gago ka moka. Ke nna ke nnoši yo ke šetšego, mme le nna ba leka go mpolaya!”

₁₅Morena a re: “Boela lešokeng kgauswi le Damaskose, ka morago o tsene motseng gomme o tlotše Hasaele e be kgoši ya Siria; ₁₆o tlotše le Jehu, morwa wa Nimshi, e be kgoši ya Israele, o be o tlotše le Elisha, morwa wa Shafate, wa Abele-Mehola, gore a go hlatlame e be moprofeta. ₁₇Yo a ka phologago mme a se bolawe ke Hasaele o tla bolawa ke Jehu, gomme yo a phologago go Jehu o tla bolawa ke Elisha. ₁₈Le ge go le bjalo ke tla šadiša batho ba dikete tše di šupago mo Israele, bohle ba ba mpotegelago mme ba sego ba obamela Baale goba ba atla seswantšhobopša sa gagwe.”

₁₉Eliya o ile a tloga gomme a hwetša Elisha a lema ka sepane sa dipholo; go be go na le dipane tše lesome le se tee pele ga gagwe, mme yena a lema ka sa mafelelo. Eliya a apola seaparo sa gagwe mme a se apeša Elisha. ₂₀Ke moo Elisha a tlogetšego dipholo tša gagwe, a kitima ka morago ga Eliya, a re: “A ke yo laela tate le mme gomme ka morago ke tla sepela nago.”

Eliya a mo fetola a re: “Go lokile, boela morago. Ga ke go thibele.”

₂₁Ke gona Elisha a boetšego sepaneng sa gagwe sa dipholo, a di hlaba, gomme a apea nama ya tšona, mollo a o gotša ka dilo tša go lema. A fa magagabo nama yela, gomme ba e ja. Ka morago a tloga a latela Eliya ya ba mothuši wa gagwe.

₁Dintwa le diphapano mo go lena di hlolwa ke eng? Na ga di hlolwe ke ditumo tše di dulago di elwa ka dipelong tša lena? ₂Le duma dilo, fela ga le di hwetše, gomme le ikemišetše go bolaya; le duma dilo, eupša ga le kgone go di hwetša, ka gona le a fapana la lwa. Ga le hwetše se le se nyakago, ka gobane ga le se kgopele go Modimo. ₃Ge le kgopela selo ga le se fiwe, ka gobane ga le kgopele gabotse; le kgopela go kgotsofatša ditumo tša lena. ₄Bakgelogi tenang! Kgane ga le tsebe gore go rata tša lefase ke go itira lenaba la Modimo? Gape yo a nyakago go rata tša lefase o itira lenaba la Modimo. ₅Kgane le gopola gore Mangwalo a Makgethwa ga a rereše ge a re: “Modimo o rata moya wo a re tsentšego wona kudukudu”? ₆Eupša kgaugelo ya gagwe go rena e feta lerato leo. Bjalo ka ge Mangwalo a Makgethwa a bolela: “Modimo o gana baikgogomoši, eupša baikokobetši bona o ba direla tše dibotse.”

₇Bjale ge, ikokobetšeng go Modimo. Elwang le Diabolose, gomme yena o tla le tšhaba. ₈Batamelang Modimo, gomme le yena o tla le batamela. Hee, lena badiradibe, lesang go dira dibe! Itlhwekišeng dipelo, mapelopedi tenang! ₉Hlomogang dipelo le hloname le lle; lesego la lena a le fetoge sello, lethabo le fetoge manyami. ₁₀Ikokobetšeng go Morena, gomme yena o tla le godiša.

₁₁Banabešo, le se ke la bolelana gampe. Yo a bolelago modumedikayena gampe goba a mo solago o bolela molao wa Moshe gampe ebile o a o sola. Gomme ge o o sola gona ga o sa o phetha, o mosodi wa wona. ₁₂Etse mmei wa molao le mosodi wa batho ke o tee; ke yena yo a kgonago go phološa le go senya. Bjale wena o mang, o ka solago mongwekawena?

₁₃Theeletšang mo, lena le rego: “Lehono goba gosasa re tla ya motseng wa boketekete mo re tlago dika re le gona ngwaga ka moka re gweba re bolaya tšhelete.” ₁₄Etse tša la gosasa le bophelo bja lona ga le di tsebe. Le dio swana le kgodi ye e pipago lebakanyana, ka morago e apoge. ₁₅Ebile le ka upše le re: “Ge Morena a ratile re tla tsoga re dira se goba sela.” ₁₆Eupša lena le ikgantšha ka matepe; kgantšho yohle ya mohuta woo ke ye mpe.

₁₇Bjale ge, motho ge a tseba se se lokilego se a kago se dira eupša a se se dire, o dira sebe.

₁Theeletšang mo, lena bahumi: Llang le golole ka lebaka la mahlomola ao a tlilogo le wela. ₂Mahumo a lena a bodile, diaparo tša lena di llwe ke tšhwele. ₃Gauta ya lena le silibera di llwe ke makgalwa, gomme makgalwa ao a tšona e tla ba bohlatse bja go le tšwa, a tla le ja dinama bjalo ka mollo. Le kgobetše mahumo mehleng yeno ya bofelo. ₄Le gana go lefa badiredi ba ba le bunelago mašemo. Ekwang ge ba lla, gomme dillo tša bona di fihlile tsebeng tša Morena Ramaatlaohle. ₅Bophelo bja lena mo lefaseng e bile bja mabose le maipshino fela. Le inontšheditše letšatši leo ka lona le tlago hlabja bjalo ka pudi. ₆Le tšwile ba ba se nago molato la ba bolaya, bona ba sa itwele.

₇Ka gona, banabešo, le se fele pelo Morena a be a tle. Bonang ka mo molemi a sa felego pelo ka gona ge a letetše gore tšhemo ya gagwe e ntšhe dibjalo tše a di nyakago. O letela pula tša lehlabula le tša selemo a sa fele pelo. ₈Le lena le se fele pelo. Le tie maatla gobane Letšatši la go tla ga Morena le kgauswi.

₉Banabešo, le se ke la tsotana, gore Modimo a se tlo le sekiša. Gape Moahlodi o kgauswi le go tla. ₁₀Banabešo, baprofeta ba ba bego ba romilwe ke Modimo go tlo bega molaetša wa gagwe a e be mohlala wo le o latelago wa go kgotlelela le go se fele pelo ga lena. ₁₁Rena re bona ba ba ilego ba kgotlelela e le ba lehlogonolo. Tša kgotlelelo ya Jobo le di kwele, gomme le tseba le ka mo Morena a ilego a mo hlakodiša melekong ya gagwe ka gona. Gobane Morena o tletše kgaugelo le kwelobohloko.

₁₂Go feta tšeo ka moka, banabešo, le se ke la ikana, le ge e ka ba ka legodimo, goba ka lefase, goba ka se sengwe. Sa lena e be “ee”, ge eba le dumela, goba “aowa”, ge eba le gana, gomme ke mo le ka se kego la sekišwa ke Modimo.

₁₃Ge yo mongwe wa lena a le mathateng, a rapele. Ge a thabile, a opele ditumišo. ₁₄Ge yo mongwe wa lena a lwala, a bitše bagolo ba phuthego ba tle ba mo rapelele, ba mo tlotše ka makhura a mohlware, ka ge ba laetšwe ke Morena. ₁₅Thapelo yeo ya go rapelwa ka tumelo e tla fodiša molwetši; Morena o tla mo tsoša bolwetšing, gomme ge a dirile dibe o tla mo swarela tšona. ₁₆Ka gona, le ipolele dibe seng sa lena gomme le rapelelaneng, gore le tle le fodišwe. Thapelo ya moloki e na le maatla a magolo. ₁₇Eliya e be e le motho wa nama bjalo ka rena. O kile a rapela a kgothetše gore pula e se ne, gomme ka nnete pula ya se ne nageng mengwaga ye meraro le seripa. ₁₈A boelela a rapela, gomme leratadima la tšholla pula, lefase la mediša dibjalo tša lona.

₁₉Banabešo, ge yo mongwe wa lena a ka timelelwa ke tsela ya therešo, gomme yo mongwe a mmušetša go yona, ₂₀le tsebe gore yo a sokollago modiradibe tseleng ya gagwe ye e mo timeditšego, o phološa modiradibe yoo lehung, gomme o dira gore a swarelwe dibe tše dintši.