To The Word – Day 113

₁Ka ngwaga wa makgolo a mane le masome a seswai ka morago ga ge setšhaba sa Israele se hudugile Egepeta, ngwageng wa bone wa ge Solomone a buša Israele, ka kgwedi ya bobedi, kgwedi ya Sibe, Solomone a thoma go aga Tempele. ₂Ka gare e be e le dimetara tše 27,6 botelele, le tše 9,2 bophara, le tše 13,8 bogodimo. ₃Phapoši ya matsenong e be e le ka pele e le dimetara tše 4,6 go iša ka gare le dimetara tše 9,2 bophara, e na le bophara bja go lekana le bja Tempele ka moka. ₄Maboto a Tempele a be a diretšwe mašoba a a pheketšwego ka maphekwana. _5-6Go kgohlagana le leboto ka ntle ka mahlakoreng le ka morago ga Tempele go be go agilwe ngwako wa mabato a mararo go ya godimo. Lebato la ka fase e be e le la bophara bja dimetara tše 2,3, la gare e le la bophara bja dimetara tše 2,8, gomme la ka godimo e le la dimetara tše 3,2 bophara. Leboto la Tempele godimo ga lebato le lengwe le le lengwe e be e le le lesesenyane go la ka fase ga lona, gore mabato a kgone go dula go lona ntle le go thekgwa ka dikokwane.

₇Matlapa ao Tempele e bego e agilwe ka ona a be a betlilwe kua bobetlelong, ka gona ga se gwa ka gwa ba le lešata le le dirwago ka dinotwana, ditšhisela, goba dikgerekgere tše dingwe tša tshipi ge Tempele e agwa.

₈Mojako wa lebato la ka fase la ngwako o be o le ka lehlakoreng la ka borwa la Tempele, gomme go na le manamelo a ntikodiko a go ya lebatong la bobedi le la boraro. ₉Ya re ge Kgoši Solomone a feditše go aga Tempele, a tsenya siling ya dikota le diphaphathi tša mosedere. ₁₀Ngwako wa go kgohlagana le Tempele o be o na le mabato a go ba le maboto a dimetara tše 2,3 bogodimo. O ile wa agwa go kgomagana le maboto a Tempele, gomme wa swaraganywa le maboto ao ka dikota tša mosedere.

₁₁Morena a re go Solomone: ₁₂“Ge o ka phetha melao le ditaelo tša ka ka moka, ke tla phetha se ke se tshephišitšego Dafida, tatago. ₁₃Ke tla dula gare ga setšhaba sa ka sa Israele, gomme nka se tsoge ke se tlogetše.”

₁₄Ka gona Solomone a fetša go aga Tempele.

₁₅Maboto a ka gare a be a manegilwe ka diphaphathi tša mosedere go tloga lebatong go iša silinyeng, gomme lebato le dirilwe ka mophaene. ₁₆Phapoši ya ka gare, ye e bitšwago Felo mo Gokgethwakgethwa, e ile ya agwa kua mosego ga Tempele. E be e le ya dimetara tše 9,2 botelele, mme e kgaotšwe ka diphaphathi tša mosedere tše di tlogago lebatong di fihla silinyeng. ₁₇Phapoši ye e lego pele ga Felo mo Gokgethwakgethwa e be e le ya dimetara tše 18,4 botelele. ₁₈Diphaphathi tša mosedere di be di kgabišitšwe ka diswantšho tša mesehlo ya maraka le tša matšoba a a sego a khukhuša; bokagare ka moka bo be bo manegilwe ka dipapetla tša mosedere, gore maswika a maboto a se ke a bonala.

₁₉Kua mosego ga Tempele go be go agilwe phapoši ya ka gare gore go tle go bewe Polokelo ya Kgwerano ya Morena ka gona. ₂₀Phapoši yeo ya ka gare e be e le ya dimetara tše 9,2 botelele, tše 9,2 bophara, le tše 9,2 bogodimo, ka moka e manegilwe ka gauta ye e sego ya tswakwa. Aletare ye e bego e le ka pele ga phapoši yeo e be e manegilwe ka diphaphathi tša mosedere. ₂₁Bokagare bja Tempele bo be bo manegilwe ka gauta ye e sego ya tswakwa, gomme diketane tša gauta di lekeleditšwe go putla mojako wa phapoši yeo ya ka gare, ye le yona e bego e manegilwe ka gauta. ₂₂Bokagare ka moka bja Tempele bo be bo manegilwe ka gauta, gotee le aletare ye e bego e le Felong mo Gokgethwakgethwa.

₂₃Bakerubi ba babedi ba be ba betlilwe ka kota tša mohlware gomme ba beilwe ka Felo mo Gokgethwakgethwa, yo mongwe le yo mongwe wa bona e le wa dimetara tše 4,6 go ya godimo. _24-26Bobedi bja bona ba be ba lekana ba bile ba swana. Yo mongwe le yo mongwe o be a na le mafego a mabedi, lefego le lengwe le le lengwe e le la dimetara tša 2,3 botelele, ka go realo sebaka sa go tloga ntlheng ya lefego le lengwe go ya go le lengwe e le dimetara tše 4,6. ₂₇Ba ile ba bewa go bapela ka Felo mo Gokgethwakgethwa, gore mafego a mabedi a bona ao a phurulogetšego ka gare a kgwathane gare ga phapoši, mme a mangwe a mabedi ao a phurulogetšego ka ntle a kgwathe maboto. ₂₈Bakerubi bao ba babedi ba be ba manegilwe ka gauta.

₂₉Maboto a phapoši ye kgolo le a phapoši ya ka gare ka moka a be a kgabišitšwe ka diswantšho tše di sehlilwego tša bakerubi le tša mehlare ya mepalema, le tša matšoba a a sego a khukhuša. ₃₀Lebato le lona le be le manegilwe ka gauta.

₃₁Mamati a mabedi a go betlwa ka dikota tša mohlware a be a tsentšwe mojakong wa Felo mo Gokgethwakgethwa; dikota tša mojako ka godimo di be di dirile ntlha. ₃₂Mamati a be a kgabišitšwe ka diswantšho tše di sehlilwego tša bakerubi le tša mepalema le tša matšoba a a sego a khukhuša. Mamati le bakerubi le mepalema di be di manegilwe ka gauta. ₃₃Mojako wa phapoši ye kgolo o ile wa betlelwa dikota tše nne tša mohlware mme tša dira dikhutlo tše nne. ₃₄Go ile gwa ba le mamatipedi a mabedi a mophaene a a dikologago ka dipinagare, ₃₅gomme a kgabišitšwe ka mesehlo ya bakerubi le ya mepalema le ya matšoba a a sego a khukhuša. Mesehlo yeo e be e manegilwe ka gauta ye tshesenyane.

₃₆Go ile gwa agwa kgoro ya ka gare pele ga Tempele. Kgoro yeo e be e dikologilwe ke maboto a a nago le molokoloko wa dikota tša mosedere godimo ga molokoloko wo mongwe le wo mongwe wa boraro wa matlapa a a betlilwego.

₃₇Motheo wa Tempele o ile wa thewa ka kgwedi ya Sibe, ngwageng wa bone wa pušo ya Solomone. ₃₈Ka kgwedi ya seswai, kgwedi ya Bulo, ngwageng wa lesome le motšo o tee wa pušo ya Solomone, Tempele ya phethwa ka gohle, ka wona mokgwa woo e bego e akantšwe ka gona. E be e tšere Solomone mengwaga ye e šupago go e aga.

₁Solomone o ile a ikagela le ngwako, gomme wona wa mo tšea mengwaga ye lesome le ye meraro. _2-3Ngwako wa sethokgwa sa Lebanone e be e le wa dimetara tše 46 botelele le dimetara tše 23 bophara le dimetara tše 13,8 bogodimo. O be o na le melokoloko ye meraro ya dikokwane tša mosedere, molokolokong wo mongwe le wo mongwe e le tše lesome le metšo ye mehlano, mme mapheko a mosedere a di phekile. Siling e be e le ya mosedere e putla diphapoši tša polokelo tše di bego di thekgilwe ke dikokwane tšeo. ₄Mabotong a ka mahlakoreng go be go na le melokoloko ye meraro ya mafasetere. ₅Mejako le mafasetere di be di na le dikota tša dikhutlo tše nne, gomme melokoloko yeo ye meraro ya mafasetere lebotong le lengwe le le lengwe e be e lebane le ya ka lehlakoreng le lengwe.

₆Phapoši ya Dikokwane e be e le ya dimetara tše 23 botelele le dimetara tše 13,8 bophara. E be e na le mathudi ao a thekgilwego ke dikokwane ka pele.

₇Phapoši ya Setulo sa Bogoši, ye gape e bego e bitšwa Phapoši ya Kahlolo, moo Solomone a bego a ahlolela melato gona, e be e na le maboto ao a pipilwego ka diphaphathi tša mosedere go tloga lebatong go fihlela mahlomong.

₈Ngwako wa Solomone ka kgorong ye nngwe ka morago ga Phapoši ya Kahlolo o be o agilwe bjalo ka meago ye mengwe. O ile a agela le mosadi wa gagwe, morwedi wa kgoši ya Egepeta, ngwako wa mohuta woo.

₉Meago ye ka moka, gotee le kgoro ye kgolo, e be e agilwe ka matlapa a mabotsebotse go tloga metheong go fihla tlhakeng. Matlapa ao a be a betlilwe bobetlelong mme a ripilwe ka tekanyo, bokagare le bokantle bja wona bo redimošitšwe ka disaga. ₁₀Metheo e be e agilwe ka matlapa a mabotse a magolo, a mangwe a ona e le a dimetara tše 4,7 botelele, mme a mangwe e le a dimetara tše 3,7 botelele. ₁₁Godimo ga ona go be go na le matlapa a mangwe a mabotse a ripilwe ka tekanyo, le dikota tša mosedere. ₁₂Kgoro ye kgolo ye e bego e dikologile Tempele, le kgoro ya ka gare ga Tempele, le phapoši ya matsenong a Tempele di be di na le maboto a molokoloko wa dikota tša mosedere godimo ga molokoloko wo mongwe le wo mongwe wa boraro wa matlapa a a betlilwego.

₁₃Kgoši Solomone a laela gore go bitšwe monna yo mongwe yo leina la gagwe e bego e le Hiramo, a dula motseng wa Tirose. ₁₄Yena e be e le sekgwari sa mediro ya mphiri. Tatagwe, yo a bego a šetše a hlokafetše, e be e le wa Tirose, mme le yena e bile sekgwari medirong ya mphiri; mmagoHiramo e be e le wa kgoro ya Naftali. Hiramo e be e le makgone yo bohlale wa tsebo. O ile a dumela kgopelo ya Kgoši Solomone ya gore a tle a hlokomele mediro ka moka ya mphiri.

₁₅Hiramo o ile a dira dikokwane tše pedi tša mphiri, ye nngwe le ye nngwe ya ba ya dimetara tše 8,3 bogodimo le dimetara tše 5,5 tikologo. ₁₆A dira le dihlogwana tše pedi tša mphiri, ye nngwe le ye nngwe ya ba ya dimetara tše 2,3 bogodimo, gore di tle di bewe godimo ga dikokwane. ₁₇Karolo ya ka godimodimo ya kokwane ye nngwe le ye nngwe e be e kgabišitšwe ka diketane tše di logagantšwego, ₁₈le melokoloko ye mebedi ya digarenata tša mphiri.

₁₉Dihlogwana tšeo di be di bopegile bjalo ka matšoba, e le tša dimetara tše 1,8 bogodimo, ₂₀gomme di beilwe karolong ya kgokolo ye e bego e le ka godimo ga diketane. Go be go na le digarenate tše makgolo a mabedi ka melokoloko ye mebedi go rarela hlogwana ye nngwe le ye nngwe.

₂₁Hiramo a bea dikokwane tšeo tše pedi tša mphiri pele ga mojako wa Tempele; ya ka lehlakoreng la ka borwa ya rewa leina la Jakine, gomme ya ka leboa ya rewa leina la Boase. ₂₂Dihlogwana tša go bopega bjalo ka matšoba tša mphiri di be di le godimo ga dikokwane.

Ka gona mošomo wa go dira dikokwane wa phethwa.

₂₃Hiramo a bopa legopo la nthetelego la mphiri, ya ba la dimetara tše 2,3 go iša fase, le dimetara tše 4,6 boahlamo, le dimetara tše 13,8 bontikodiko. ₂₄Go rarela morumo wa legopo ka fase go be go na le melokoloko ye mebedi ya maraka a mphiri e le a lesome disentimetareng tše dingwe le tše dingwe tše 46, a bopeletšwe e le selo se tee le legopo. ₂₅Legopo le be le rwelwe ke dikgomo tše lesome le tše pedi tša mphiri tše di bego di lebeletše ka mathoko ohle: tše tharo di lebeletše leboa, tše tharo bodikela, tše tharo borwa, tše tharo bohlabela. ₂₆Mphiri wa legopo o be o na le bokoto bja dimilimetara tše 74. Morumo wa lona o be o swana le morumo wa nkgo, o ahlamela ka ntle bjalo ka matlakala a letšoba. Legopo le be le swara dilitara tše dikete tše masome a mane le tše nne.

₂₇Hiramo a dira le dikoloyana tša mphiri tše lesome; ye nngwe le ye nngwe e be e le ya dimetara tše 1,8 botelele le dimetara tše 1,8 bophara le dimetara tše 1,4 bogodimo. ₂₈Di be di dirilwe ka diphaphathi tše di bego di hlomilwe ka diforeimeng; ₂₉diphaphathi di be di na le diswantšho tša ditau le tša dikgomo le tša bakerubi, gomme godimo ga diforeime, ka godimo le ka fase ga ditau le dikgomo, go be go na le diswantšho tša dinkokoma tša dikgare. ₃₀Koloyana ye nngwe le ye nngwe e be e na le maotwana a mphiri a mane le diase tša mphiri. Dikhutlong tše nne go be go na le dikokwane tša mphiri tša go thekga sebjana; dikokwane di be di kgabišitšwe ka diswantšho tša dinkokoma tša dikgare. ₃₁Ka godimo go be go na le foreime ya nthetelego ya go swarelela sebjana. Yona e be e tšwelelela ka godimo disentimetara tše 46 go tloga godimo ga koloyana, mme e tsenelela disentimetara tše 23 ka gare ga yona. E be e na le mesehlo go e dikologa. Diphaphathi tša dikoloyana di be di lekalekana ka mathoko ohle e se dinthetelego. ₃₂Maotwana a dikoloyana tšeo e be e le a disentimetara tše 69 bogodimo; a be a le ka fase ga diphaphathi, gomme diase e le selo se tee le dikoloyana. ₃₃Maotwana ao a be a swana le maotwana a koloi ya ntwa; diase tša ona, dirime, dipeke le dihapo – ka moka e le tša mphiri. ₃₄Go be go na le dikokwane tše nne dikhutlong tša ka fase tša koloyana ye nngwe le ye nngwe tše e bego e le selo se tee le koloyana. ₃₅Go be go na le morumo wa disentimetara tše 23 go rarela karolo ya ka godimo ya koloyana ye nngwe le ye nngwe; dikokwane tša wona le diphaphathi e be e le selo se tee le koloyana. ₃₆Dikokwane le diphaphathi di be di kgabišitšwe ka diswantšho tše di sehlilwego tša bakerubi le tša ditau le tša mehlare ya mepalema, mo gongwe le mo gongwe mo go bego go na le sebaka sa tšona, gotee le tša dikgare go dikologa. ₃₇Ke ka moo dikoloyana di ilego tša dirwa ka gona; ka moka di be di bopilwe go swana, gomme di lekana.

₃₈Hiramo a dira le dibjana tše lesome, koloyana ye nngwe le ye nngwe ya ba le sa yona. Sebjana se sengwe le se sengwe e be e le sa dimetara tše 1,8 boahlamo, gomme se swara dilitara tše 880. ₃₉A bea dikoloyana tše tlhano ka lehlakoreng la ka borwa la Tempele, gomme tše dingwe tše tlhano a di bea ka lehlakoreng la ka leboa; legopo a le bea sekhutlong sa ka borwabohlabela.

_40-45Hiramo a dira le dipitša, digarafo le meruswi. A phetha modiro wo Kgoši Solomone a bego a mo file wona wa Tempele ya Morena. Tše a di dirilego šedi:

Ditlabakelo tše ka moka tša Tempele tše Hiramo a di diretšego Kgoši Solomone e be e le tša mphiri wo o phadimišitšwego. ₄₆Kgoši o ile a laela gore ka moka di bopše bobopelong gare ga Sukote le Tsaretane, ka moeding wa Jordane. ₄₇Solomone ga se a ka a dira gore ditlabakelo tšeo tša mphiri di elwe boima, ka gobane e be e le tše ntši kudu, ka gona boima bja tšona ga se bja ka bja tsebja.

₄₈Solomone a laela le gore Tempele e direlwe ditlabakelo tša gauta: aletare, tafola ya dinkgwa tše di abelwago Modimo, ₄₉dihlomamabone tše lesome tše di bego di tsemilwe pele ga Felo mo Gokgethwakgethwa, tše tlhano ka lehlakoreng la ka borwa le tše tlhano ka go la ka leboa; matšoba, mabone le ditlao; ₅₀meruswana, ditimamabone, meruswi, dipane tša seorelo, le dibjana tša magala; le digono tša mamati a ka Felo mo Gokgethwakgethwa le tša mamati a ka ntle a Tempele. Ditlabakelo tše ka moka di be di dirilwe ka gauta.

₅₁Ge Kgoši Solomone a feditše modiro ka moka wa Tempele, o ile a bea dilo tšohle tše Dafida, tatagwe, a bego a di abetše Morena, ka diphapošing tša polokelo tša Tempele – silibera, gauta le dilo tše dingwe.

₁Kgoši Solomone a bitša bagolo ka moka ba Israele le baetapele ba dikgoro le mantona a dikgorwana gore ba tle go yena Jerusalema, ba tle ba tšee Polokelo ya Kgwerano ya Morena kua Sione, motseng wa Dafida, ba e tliše Tempeleng. ₂Ka moka ba kgobokana nakong ya Monyanya wa Mešaša kgweding ya bošupa ya Etanime. ₃Ge bagolo ka moka ba Israele ba fihla, baprista ba rwala Polokelo ya Kgwerano ₄ba e iša Tempeleng. Balefi le baprista ba thothela le Tente ya bodulo bja Morena le ditlabakelo tša yona ka moka Tempeleng. ₅Kgoši Solomone le setšhaba ka moka sa Israele ba kgobokana pele ga Polokelo ya Kgwerano, gomme ba dira dihlabelo ka dihuswane le dikgomo tše ntši – ya ba tše ntši kudu mo di bego di ka se balwe. ₆Ya ba gona baprista ba rwalago Polokelo ya Kgwerano ba e tsenya ka Tempeleng, ba e bea mo e swanetšego go dula gona ka Felo mo Gokgethwakgethwa, ka fase ga mafego a bakerubi. ₇Mafego a bona a a phurulogilego a khupetša Polokelo le mapara ao e bego e rwalwa ka ona. ₈Dintlha tša mapara di be di bonala fela ge motho a eme go lebana thwii le Felo mo Gokgethwakgethwa, e sego ge a eme mo gongwe. Mapara ao a sa le moo le lehono. ₉Go be go se na selo se sengwe ka gare ga Polokelo ya Kgwerano ntle le matlapa a mabedi ao Moshe a bego a a beile ka fao kua thabeng ya Sinai, ge Morena a dira kgwerano le setšhaba sa Israele ge se etšwa Egepeta.

₁₀Ge baprista ba etšwa ka Tempeleng, gateetee Tempele ya tlala leru ₁₁la seetša se se fahlago sa letago la Morena, gomme ba se kgone go boela ka gare go yo dira mešomo ya bona. ₁₂Ke moo Solomone a rapetšego a re:

₁₄Ya re setšhaba se sa eme fao, Kgoši Solomone a retologa a lebana naso, gomme a se šegofatša. ₁₅A re: “Retang Morena Modimo wa Israele! O phethile se a se holofeditšego tate, Dafida, mola a re: ₁₆‘Go tloga ka nako yela ke ntšha setšhaba sa ka Egepeta ga se ka ka ka kgetha motse wo mongwe mo nageng ya Israele ka moka wo go wona go kago agwa tempele ye nkago khunamelwa go yona. Eupša ke kgethile wena, Dafida, gore o buše setšhaba sa ka.’ ”

₁₇Solomone a tšwela pele a re: “Tate, Dafida, o ile a gopola go aga tempele moo go tlago khunamelwa Morena Modimo wa Israele, ₁₈eupša Morena a re go yena: ‘Ke gabotse ge o nyaka go nkagela tempele, ₁₉fela e ka se agwe ke wena. Ke morwa wa gago, morwa yo a tlago tswalwa ke wena, yo a tlago aga tempele ya ka.’

₂₀“Gomme bjale Morena o phethile se a mo holofeditšego sona. Ke hlahlame tate ka ba kgoši ya Israele, gomme ke agile Tempele yeo go yona go tlago khunamelwa Morena Modimo wa Israele. ₂₁Ebile ke beakantše lefelo ka Tempeleng la Polokelo ya Kgwerano ye e swerego matlapa a kgwerano ye Morena a e dirilego le borakgolokhukhu ba rena ge a ba ntšha Egepeta.”

₂₂Ka morago Solomone a ya a ema pele ga aletare setšhaba ka moka se mo lebeletše, a emiša matsogo ₂₃a rapela a re: “Morena Modimo wa Israele, ga go modimo yo a swanago le wena godimo legodimong le fase lefaseng! O botegela kgwerano ya gago le setšhaba sa gago gomme wa se rata ka leratorato ge se phela se go hlompha ka dipelo tša sona ka moka. ₂₄O phethile se o se holofeditšego tate, Dafida; lehono lentšu le lengwe le le lengwe le phethagaditšwe. ₂₅Gomme bjale, Morena Modimo wa Israele, ke rapela gore o phethe le sela o se holofeditšego tate mola o mmotša gore ka mehla go tla ba le yo mongwe wa ditlogolo tša gagwe yo a bušago naga ya Israele, ge fela ba ka go theeletša gabotse go no swana le yena. ₂₆Bjale ge, wena Modimo wa Israele, hle, phethagatša tšohle tše o di holofeditšego tate, Dafida, mohlanka wa gago.

₂₇“Fela kgane o ka kgona go dula lefaseng, wena Modimo? Le lona legodimo la godimodimo ga se la go lekana, mme bjale Tempele ye ke e agilego ye yona e ka go lekana bjang? ₂₈Morena Modimo wa ka, ke nna mohlanka wa gago. Theetša thapelo le sello sa ka, gomme o phethe tše ke go kgopelago tšona lehono. ₂₉Diša Tempele ye bošego le mosegare, lona lefelo le o le kgethilego gore o khunamelwe go lona. O nkwe ge ke rapela ke lebeletše Tempeleng ye. ₃₀O kwe dithapelo tša ka le dikgopelo tša setšhaba sa gago ge se rapela se lebeletše lefelong le. O re kwe legaeng la gago legodimong, gomme o re lebalele.

₃₁“Ge motho a ka belaelwa gore o phošeditše yo mongwe gomme a tlišwa aletareng ya gago ka mo Tempeleng ye gore a tle a ene gore ga a ne molato, ₃₂wena Morena, o theetše o le legodimong gomme o ahlole bahlanka ba gago. O otle yo a nago le molato ka mo go mo swanetšego, gomme o lokolle yo a se nago molato.

₃₃“Ge setšhaba sa gago sa Israele se fentšwe ke manaba a sona ka gobane se dirile dibe pele ga gago, gomme ge ba sokologela go wena, ba bolela ba ipobola gore o Modimo wa bona, mme ba etla mo Tempeleng ye, ba go rapela ba re o ba lebalele, ₃₄o ba theetše o le legodimong. O lebalele setšhaba sa gago dibe tša sona, gomme o ba boetše nageng ye o e filego borakgolokhukhu ba bona.

₃₅“Ge o sa neše pula ka gobane setšhaba sa gago se dirile dibe pele ga gago, gomme ge ba sokologa dibeng tša bona ka gobane o ba otla, ba lebelela Tempeleng ye, ba go rapela, mme ba ipobola gore o Modimo wa bona, ₃₆o ba theetše o le legodimong. O lebalele kgoši le setšhaba sa Israele dibe tša bona. O ba rute go dira se se lokilego. Gomme hle, Morena, o neše pula mo nageng ye ya gago ye o e filego setšhaba sa gago gore e be lefa la sona go ya go ile.

₃₇“Ge go wele tlala goba bolwetši bja leuba nageng, goba ge mabele a tšhungwa ke diphefo goba a lewa ke phori goba segongwane goba bojane, goba ge setšhaba sa gago se hlaselwa ke manaba a sona, goba ge go le bolwetši bjo bošoro goba bjo bongwenyana gare ga bona, ₃₈o theetše dithapelo tša bona. Ge yo mongwe wa setšhaba sa gago sa Israele a ka otlollela matsogo Tempeleng ye a rapela a kgopela ka pelo ye e nyamilego kudu, ₃₉o kwe thapelo ya gagwe. O ba theetše o le bodulong bja gago legodimong, o ba lebalele, gomme o ba thuše. Ke wena o nnoši o tsebago boitsholo bjo bo lego ka pelong ya motho. O sware motho yo mongwe le yo mongwe ka mo go mo swanetšego, ₄₀gore setšhaba sa gago se tle se go theetše ka dinako ka moka tša ge se sa dula nageng ye o e filego borakgolokhukhu ba rena.

_41-42“Ge motho o šele yo a dulago nageng ya kgole a ka kwa go tuma ga gago le dilo tše kgolo tše o di diretšego setšhaba sa gago, gomme a tla go go khunamela le go rapela mo Tempeleng ye, ₄₃o theetše thapelo ya gagwe o le legodimong, moo o dulago gona. O dire se a go kgopelago sona, gore ditšhaba tša lefase ka moka di tle di go tsebe mme di go theetše, bjalo ka setšhaba sa gago sa Israele. Ke moo di tlago tseba gore Tempele ye ke e agilego ke felo mo o swanetšego go khunamelwa gona.

₄₄“Ge o laela setšhaba sa gago gore se yo lwa le manaba a sona, gomme se go rapela mo gongwe le mo gongwe mo se lego gona se lebeletše motseng wo o o kgethilego wo le Tempeleng ye ke go agetšego yona ye, ₄₅o theetše dithapelo tša sona. O ba kwe o le legodimong, gomme o dire gore ba fenye.

₄₆“Ge setšhaba sa gago se dira dibe pele ga gago – gape ga go motho yo a sa dirego sebe – gomme ya re ge o befetšwe wa ba gafela manabeng a bona gomme bathopi bao ba bona ba ba iša nageng ye nngwe, ya kgole goba ya kgauswi, ₄₇o theetše dithapelo tša bona. Ge ba ka itshola ba le moo nageng yeo gomme ba go rapela, ba ipolela gore ba dirile dibe, ba phošitše, ba na le molato, o kwe dithapelo tša bona, hle, Morena. ₄₈Ge mo nageng yeo ba ka sokologa ka dipelo tša bona ka moka le ka moya wa bona ka moka, gomme ba go rapela ba lebeletše nageng ye o e filego borakgolokhukhu ba rena ye, motseng wo o o kgethilego wo, le Tempeleng ye ke go agetšego yona ye, ₄₉gona o theetše dithapelo tša bona. O ba kwe o le bodulong bja gago legodimong ge ba go kgopela tebalelo, gomme o ba šokele. ₅₀O ba lebalele dibe tša bona le dikarogo tšohle tša bona, gomme o dire gore manaba a bona a ba sware ka botho. ₅₁Ke setšhaba sa gago se o se ntšhitšego Egepeta, mola moubeng wo o fišago wa go tološa tshipi.

₅₂“A ka mehla o lebelele setšhaba sa gago sa Israele le kgoši ya sona ka botho ge ba go kgopela, gomme o kwe thapelo ya bona nako ye nngwe le ye nngwe ge ba go llela. ₅₃O ba kgethile gare ga ditšhaba ka moka gore e be ba gago, bjalo ka ge o ba boditše ka mohlanka wa gago, Moshe, ge wena, Morena, Mong wa rena, o ntšha borakgolokhukhu ba rena Egepeta.”

₅₄Ge Solomone a feditše go rapela Morena, a emelela mo a bego a khunamile a emišitše matsogo pele ga aletare. ₅₅A hlaboša lentšu a šegofatša setšhaba ka moka se se bego se kgobokane fao a re: ₅₆“Retang Morena yo a filego setšhaba sa gagwe khutšo, bjalo ka ge a boletše. Ditshephišo tše botse ka moka tše a di boletšego ka mohlanka wa gagwe, Moshe, o di phethile. ₅₇A Morena Modimo wa rena a be le rena bjalo ka ge a bile le borakgolokhukhu ba rena; a a se ke a tsoga a re tlogetše goba a re lahla; ₅₈a a re dire gore re mo theetše, gore ka mehla re tle re phele ka mo a nyakago re phela ka gona, gomme re phethe melao le ditaelo ka moka tše a di filego borakgolokhukhu ba rena. ₅₉A Morena Modimo wa rena a gopole thapelo ye bošego le mosegare, gotee le dilo tše ke mo kgopetšego tšona lehono. A ka mehla a šokele setšhaba sa Israele le kgoši ya sona, a ba fe tše ba di nyakago letšatši le lengwe le le lengwe. ₆₀Ka gona ditšhaba ka moka tša lefase di tla tseba gore ke Morena fela e lego Modimo – ga go na le yo mongwe gape. ₆₁A lena, setšhaba sa gagwe, ka mehla le botegeleng Morena Modimo wa rena, le phethe melao le ditaelo tša gagwe ka moka, bjalo ka lehono.”

₆₂Ke moo Kgoši Solomone le Baisraele ka moka ba ba bego ba na le yena ba diretšego Morena dihlabelo. ₆₃Yena a dira dihlabelo ka dikgomo tše dikete tše masome a mabedi le tše pedi le dihuswane tše dikete tše lekgolo le tše masome a mabedi e le dihlabelo tša kagišano. Ka gona kgoši le setšhaba ka moka ba kgethwafatša Tempele. ₆₄Ka lona letšatši leo a kgethwafatša le bogare bja kgoro, e lego sekgoba se se lego pele ga Tempele, gomme moo a dira dihlabelo tša go tšhungwa ka moka, le dikabelo tša bupi, a di dira le ka makhura a diruiwa tša dihlabelo tša kagišano. O ile a dira dihlabelo tšeo moo ka gobane aletare ya mphiri e be e le ye nnyane go ka swara dihlabelo tšeo ka moka.

₆₅Gona moo Tempeleng Solomone le setšhaba ka moka sa Israele ba keteka Monyanya wa Mešaša matšatši a a šupago. Go be go tlile lešaba le lentši la batho ba go tšwa kgole bjalo ka sefateng sa Hamate, go yo fihla mollwaneng wa Egepeta. ₆₆Ka letšatši la seswai Solomone a bušetša setšhaba magaeng a sona. Ka moka ba mo reta ba ya gae ba thabile ka lebaka la tšohle tše Morena a šegofaditšego mohlanka wa gagwe, Dafida, le setšhaba sa gagwe sa Israele ka tšona.

₁Ge Kgoši Solomone a feditše go aga Tempele le mošate le se sengwe le se sengwe se a bego a nyaka go se dira, ₂Morena a iponagatša go yena gape, bjalo ka ge a be a ile a iponagatša go yena kua Gibeone. ₃A re go yena: “Ke kwele thapelo ya gago. Ke kgethwafaditše Tempele ye o e agilego gore e be felo mo ke swanetšego go khunamelwa gona go ya go ile. Ke tla e diša gomme ka e hlokomela ka dinako tšohle. ₄Ge o ka ntlhankela ka potego le botshephegi bjalo ka Dafida, tatago, ge o ka phetha melao ya ka mme wa dira tšohle tše ke go laelago tšona, ₅ke tla phetha se ke se holofeditšego Dafida, tatago, mola ke mmotša gore naga ya Israele ka mehla e tla bušwa ke ditlogolo tša gagwe. ₆Eupša ge wena goba ditlogolo tša gago le ka ntlhanogela, ge le ka nyatša melao le ditaelo tše ke le filego tšona, gomme la khunamela medimo e šele, ₇ke moo ke tlago tloša setšhaba sa ka sa Israele nageng ye ke se filego yona. Ke tla tlogela le yona Tempele ye ke e kgethwafaleditšego gore e be lefelo le ke swanetšego go khunamelwa go lona. Batho mo gohle ba tla kwera naga ya Israele gomme ba e nyatša. ₈Tempele ye e tla ba marope, gomme yo mongwe le yo mongwe yo a fetago mo o tla gakgamala a kgotsa ka molodi, a botšiša a re: ‘Ke ka lebaka lang Morena a dirile naga ye le Tempele ye ka mokgwa wo?’ ₉Batho ba tla mo fetola ba re: ‘Ke ka gobane ba tlogetše Morena Modimo wa bona, yo a ntšhitšego borakgolokhukhu ba bona Egepeta. Ba ile ba kgomarela medimo ye mengwe ba e khunamela ba e hlankela. Ke ka lona lebaka leo Morena a ba tlišeditšego madimabe a.’ ”

₁₀Solomone o tšere mengwaga ye masome a mabedi a aga Tempele le mošate, ga gagwe. ₁₁Kgoši Hiramo wa Tirose a mo thuša ka mesedere le mephaene le gauta ka moo a bego a nyaka ka gona. Ge mošomo wo o feditšwe, Kgoši Solomone a fa Hiramo metse ye masome a mabedi seleteng sa Galilea. ₁₂Hiramo a ya go e bona, fela a se ke a e rata. ₁₃Ka gona a re go Solomone: “Warra, a ke metse mang ye o mphilego yona?” Ka lebaka leo tikologo yeo e sa bitšwa Kabule. ₁₄Hiramo o be a rometše Solomone dikilokramo tše dikete tše tharo le makgolo a a selelago tša gauta.

₁₅Kgoši Solomone o ile a gapeletša batho go aga Tempele le mošate, le go lekelelanya naga ka thokong ya ka bohlabela ya motse, le go aga morako wa motse. Le gona a gapeletša batho go tsošološa motse wa Hatsore le wa Megido le wa Gesere. ₁₆Kgoši ya Egepeta e be e kile ya hlasela motse wa Gesere mme ya o thopa, ya bolaya Bakanana ba ba bego ba dula moo, gomme ya o tšhuma. Ka morago ya o fa morwedi wa yona ge a nyalwa ke Solomone, ₁₇mme Solomone a o tsošološa. Kgoši Solomone a gapeletša batho le go tsošološa Bethe-Horone ya ka Tlase, ₁₈le Baalate le Tamare kua lešokeng la Juda, ₁₉le metse ka moka ya go bolokela, le metse ya banamedi ba dipere le ya ba dikoloi tša gagwe tša ntwa, le tše dingwe tše a bego a nyaka go di aga Jerusalema, le kua Lebanone, le mo gongwe le mo gongwe mmušong wa gagwe. _20-21Moo medirong ya gagwe Solomone o be a gapeletša ditlogolo tša batho ba Kanana bao Baisraele ba bego ba se ba ba bolaya ge ba thopa naga ya bona. Bona e be e le Baamore, Bahete, Baperise, Bahibe le Bajebuse, bao ditlogolo tša bona e sa lego makgoba le lehono. ₂₂Fela Solomone a se ke a dira Baisraele makgoba; bona a ba dira bahlabani, bahlankedi, balaodi ba madira, barwaladikotse, balaodi ba dikoloi tša ntwa, le banamedi ba dipere.

₂₃Go be go na le balaodi ba bagolo ba makgolo a mahlano le masome a mahlano ba ba bego ba hlokometše baagi ba Solomone.

₂₄Solomone o ile a lekelelanya naga ya ka bohlabela bja motse ka morago ga ge mosadi wa gagwe, morwedi wa kgoši ya Egepeta, a tlogile motseng wa Dafida a ile mošate wo Solomone a mo agetšego wona.

₂₅Gararo ka ngwaga Solomone o be a dira dihlabelo tša go tšhungwa ka moka le dihlabelo tša kagišano aletareng ye a bego a e agetše Morena. Le gona o be a tšhumela Morena seorelo. Ke ka mo a bego a phetha modiro wa Tempeleng.

₂₆Kgoši Solomone o be a dira le maselawatle kua Etsione-Gebere, kgauswi le Elate, lebopong la kgogometšana ya Akaba, kua nageng ya Edomo. ₂₇Kgoši Hiramo a romela banna ba bangwe ba tsebo ba ba bego ba šoma maselawatleng a gagwe gore ba yo šoma le banna ba Solomone. ₂₈Bona ba sepela ka maselawatle ba ya nageng ya Ofire, gomme ba tlišetša Solomone gauta ya dikilokramo tše dikete tše lesome le tše pedi le makgolo a a selelago.

₁Kgošigadi ya Sheba e ile ya kwa go tuma ga Solomone, gomme ya tla Jerusalema go tlo mo leka ka dipotšišo tše thata. ₂A tla le bafelegetši ba gagwe ba bantši, gotee le dikamela tše di rwelego dinoko le magakabje le gauta ye ntšintši. Ge a kopana le Solomone a mmotšiša dipotšišo ka moka tše a bego a di gopotše. ₃Solomone a di fetola ka moka; gwa se be le ye e mo šitago. ₄Kgošigadi ya Sheba a kwa bohlale bja Solomone gomme a bona le mošate wo a o agilego. ₅A bona dijo tše di solwago tafoleng ya Solomone, le ka moo bakgomana ba gagwe ba dulago ka go latelana ka gona, le ka moo badiredi ba gagwe ba solelago batho dijo tafoleng, le diaparo tša go swana tše ba di aparago, le bao ba tlišago dino, le dihlabelo tše a di dirago ka Tempeleng. A šala a eme madi a maketše. ₆A re go Kgoši Solomone: “Tše ke di kwelego nageng ya gešo ka mediro ya gago le ka bohlale bja gago ke therešo! ₇Fela ke be nka se kgolwe mola ke se ke ka tla go tlo iponela tšohle ka bonna. Eupša tše ke di kwelego le go ba seripa ga se seripa sa dilo tše; bohlale bja gago le lehumo la gago di feta kudu seo ke se kwelego. ₈Ba mahlatse ke basadi ba gago! Gomme bahlankedi ba gago le bona ba na le mahlatse ka ge ba phela ba go hlankela mme ba ekwa dipolelo tša gago tša bohlale! ₉A go retwe Morena Modimo wa gago! O laeditše ka mo o mo kgahlago ka gona ka go go bea kgoši ya Israele. Ka gobane Morena o rata Baisraele go ya go ile, o go beile kgoši ya bona gore o tle o phethe molao le toka.”

₁₀O ile a fa Kgoši Solomone dimpho tšela a bego a tlile natšo: gauta ya dikilokramo tše dikete tše tharo le makgolo a a selelago, le dinoko tše ntšintši, le magakabje. O be a mo file dinoko tše ntšintši go feta tše di ilego tša hlwa di sa tlišwa Jerusalema.

₁₁Maselawatle a Hiramo, ale a go tliša gauta ye e tšwago Ofire, a ile a tla le dikota tše ntšintši tša mojunipere le magakabje. ₁₂Solomone a dira maitshwarelelo manamelong ka Tempeleng le ka ngwakong wa gagwe ka dikota tšeo, a dira le diharepa le dikgapa tša baopedi. E be e le dikota tše botsebotse tša mojunipere tše di bego di se tša ka tša tlišwa Israele; ga go dikota tše di swanago natšo tše di ilego tša tsoga di bonwe gape.

₁₃Kgoši Solomone o ile a fa kgošigadi ya Sheba se sengwe le se sengwe se a ilego a se kgopela, go sa balwe le dimpho tše dingwe tša mehleng tše a bego a mo file tšona ka bontši. Ke moka kgošigadi le bafelegetši ba gagwe ba boela nageng ya Sheba.

₁₄Ngwaga ka ngwaga Kgoši Solomone o be a tlišetšwa gauta ya dikilokramo tše e ka bago tše dikete tše masome a mabedi ₁₅go tlaleletša metšhelo ye e bego e lefša ke bagwebi, le dipoelo tša kgwebo, le diloba tše di bego di lefša ke magoši a Arabia le babušiši ba dilete tša Israele.

₁₆Solomone o ile a dira dikotse tše kgolo tše makgolo a mabedi, gomme ye nngwe le ye nngwe a e manega ka gauta ya dikilokramo tše e ka bago tše di šupago. ₁₇A dira le dikotse tše nnyane tše makgolo a mararo, gomme a manega ye nngwe le ye nngwe ya tšona ka gauta ya kilokramo e tee le seripa. Dikotse tšeo ka moka di ile tša bewa ka Ngwakong wa sethokgwa sa Lebanone.

₁₈A betla le setulo se segolo sa bogoši se se manegilwego ka gauta ye botsebotse ye e hlometšwego diripana tša meno a tlou. _19-20Go be go na le manamelo a a selelago go rotogela setulong seo, go na le seswantšhobopša sa tau mafelelong a lenamelo le lengwe le le lengwe, ka moka e le ditau tše lesome le tše pedi. Ka morago ga setulo go be go na le diswantšhobopša tša dihlogo tša dipowana, gomme ka thoko ye nngwe le ye nngwe ya matsogo a sona ka mabedi go na le seswantšhobopša sa tau. Go be go se gwa ka gwa betlwa setulo sa bogoši sa go swana le sona mebušong ka moka.

₂₁Dinwelo tša Solomone ka moka di be di dirilwe ka gauta, le ditlabakelo ka moka tša ka Ngwakong wa sethokgwa sa Lebanone e be e le tša gauta ye e sego ya tswakwa. Ga go silibera ye e ilego ya šomišwa, ka gobane mehleng ya Solomone silibera e be e se selo se bohlokwa. ₂₂O be a na le maselawatle a magolo a a bego a sepela le maselawatle a Hiramo. Ka morago ga mengwaga ye meraro maselawatle a gagwe a be a boela gae a tliša gauta, silibera, meno a ditlou, dikgabo le ditšhwene.

₂₃Kgoši Solomone o be a humile ebile e le yo bohlale go feta magoši ka moka, ₂₄gomme batho ka moka ba lefase ba nyaka go tlo mmona gore ba kwe bohlale bjo Modimo a mo filego bjona. ₂₅Yo mongwe le yo mongwe yo a tlago o be a mo tlela le mpho – dilo tša silibera, goba tša gauta, goba diaparo, goba dibetša, goba dinoko, goba dipere, goba dimeila. Go be go eba ka mokgwa woo ngwaga wo mongwe le wo mongwe.

₂₆Solomone o be a na le dikoloi tša ntwa tše sekete le makgolo a mane, le banamedi ba dipere ba dikete tše lesome le tše pedi. O ile a bea banamedi ba dipere Jerusalema le metseng ye e bego e na le dikoloi tša ntwa. ₂₇Nakong ya ge a buša, silibera Jerusalema e be e le ye ntši bjalo ka maswika, le mesedere e tletše bjalo ka mego ya nagengtlase. ₂₈Dipere tša Solomone di be di rekwa Mutsri le Silisia ke barekedi ba kgoši mme tša tlišwa Israele. ₂₉Dikoloi tša ntwa tšona di be di rekwa Egepeta. Barekedi bao ba be ba rekišetša le magoši a Bahete le a Basiria dipere le dikoloi tša ntwa, ba rekiša koloi ya ntwa dipapetlana tša silibera tše makgolo a a selelago, gomme pere ba e rekiša tše makgolo le masome a mahlano.