To The Word – Day 109

₁“Mmušo wa Modimo o ka swantšhwa ka mongserapa yo a kilego a tloga e sa le ka meso go yo thwala banna ba go tlo šoma ka serapeng sa gagwe sa merara. ₂Ya re ge a seno kwana le bašomi ka tefo ya mehleng, e lego papetlana ya silibera ka letšatši, a ba romela go yo šoma ka serapeng sa gagwe sa merara. ₃A tloga gape ka nako ya senyane mosong, a ya lepatlelong la motse, gomme a bona banna ba bangwe ba eme fao ba sa dire selo. ₄A re go bona: ‘Le lena sepelang le yo šoma ka serapeng sa ka; ke tla le lefa ka mo go lebanego.’ Gomme ba ya. ₅A tloga gape ka nako ya lesome le metšo ye mebedi le ka nako ya boraro mathapama a dira ka wona mokgwa woo. ₆Ge a boelela ka nako ye e ka bago ya bohlano mathapama a hwetša banna ba bangwe ba eme. A ba botšiša a re: ‘Le reng le hlwele letšatši ka moka le eme fa le sa dire selo?’ ₇Bona ba mo fetola ba re: ‘Ke ka gobane ga se ra thwalwa ke motho.’ Yena a re go bona: ‘Le lena sepelang le yo šoma ka serapeng sa ka sa merara.’

₈“Ka phirimane mongserapa a laela molebeledi wa bašomedi ba gagwe a re: ‘Bitša bašomedi ba ka o ba fe meputso ya bona. O thome ka bale ba go thwalwa morago, o feleletše ka bale ba go thwalwa pele.’ ₉Bale ba go thwalwa ka nako ya bohlano mathapama mongwe le mongwe wa bona a lefša papetlana ya silibera. ₁₀Ge go etla bale ba go thwalwa pele ba gopola gore ba tlilo putswa go feta fao; eupša le bona mongwe le mongwe a fiwa papetlana ya silibera. ₁₁Ge ba e tšea ba e galala go mothwadi wa bona ba re: ₁₂‘Banna ba ba go thwalwa morago ba šomile iri e tee fela, mola rena re šomile letšatši ka moka re tšhungwa ke phišo ya lona; eupša o ba lefile go lekana le rena!’

₁₃“Mongserapa a fetola yo mongwe wa bona a re: ‘Mogwera, ga ke go hlalefetše. Ga ke re o kwane le nna ka papetlana e tee ya silibera? ₁₄Tšea tšhelete ya gago o sepele. Gape yo wa go thwalwa morago ke rata go mo lefa go lekana le wena. ₁₅Kgane ga gwa ntshwanela go dira se ke se ratago ka se e lego sa ka, goba o ntomolela mahlo ka gobane ke lokile?’ ”

₁₆Jesu a feleletša ka go re: “Seo se šupa gore ba mafelelo e tla ba ba mathomo, gomme ba mathomo ya ba ba mafelelo.”

₁₇Ge ba le leetong la go ya Jerusalema, Jesu a biletša barutiwa ba gagwe ba lesome le metšo ye mebedi ka thoko, gomme a bolela le bona ba ntše ba swere tsela a re: ₁₈“Theeletšang, re rotogela Jerusalema moo Morwamotho a tlago gafelwa go baprista ba bagolo le boramangwalo, mme bona ba mo ahlolela lehu. ₁₉Ba tla mo gafela go baditšhaba ba ba tlago mo kwera, ba mo otla ka tshelane, ba mmapola sefapanong; eupša ka letšatši la boraro Modimo o tla mo tsoša bahung.”

₂₀Ya ba mosadi wa Sebediose o batamela Jesu a na le barwa ba gagwe, a khunama pele ga gagwe a na le se a nyakago go mo kgopela sona.

₂₁Jesu a mmotšiša a re: “O nyakang?”

Yena a mo fetola a re: “Nke o nkholofetše gore barwa ba ba ka ba babedi ba tla dula kgauswi le wena mohla o le Kgoši, mongwe ka letsogong la go ja, mongwe ka go la nngele.”

₂₂Jesu a botša barwa bao a re: “Ga le tsebe se le se kgopelago. Kgane le ka kgona go meletša ditlaišo tša go swana le tše ke yogo tlaišwa ka tšona kgauswinyana?”

Ba mo fetola ba re: “Ee, re ka kgona.”

₂₃Jesu a re go bona: “Go tlaišwa bjalo ka nna gona le tla tlaišwa, eupša ge e le go dula ka letsogong la ka la go ja le ka go la nngele ga se taba ye e laolwago ke nna; go lebane bao ba go lokišeditšwego ke Tate.”

₂₄Ge barutiwa ba bangwe ba lesome ba ekwa taba yeo ba befelelwa banna bao ba babedi. ₂₅Ka gona Jesu a ba bitša ka moka, a re go bona: “Le a tseba gore babuši ba ditšhaba tša lefase ba a di gatelela, baetapele ba tšona sa bona ke go di buša ka sehlogo. ₂₆Lena go lena go se ke gwa ba bjalo. Yo a nyakago go ba yo mogolo mo go lena e swanetše go ba mohlanka wa lena, ₂₇le yo a nyakago go ba mohlomphegi mo go lena e swanetše go ba lekgoba la lena – ₂₈go swana le Morwamotho yo a sego a tlela go hlankelwa, eupša a tletšego go hlankela batho le go ikgafela go bolawa, gore e be seloba sa ba bantši.”

₂₉Ge Jesu le barutiwa ba gagwe ba tloga Jeriko lešaba le legolo le ile la mo latela. ₃₀Banna ba babedi ba difofu ba ba bego ba dutše ka thoko ga tsela ba kwa gore Jesu o a feta. Ka gona ba goa ba re: “Morena, Morwa wa Dafida, re šokele!”

₃₁Lešaba la ba kgalema la ba botša gore ba homole. Eupša ba goa le go feta pele ba re: “Morena, Morwa wa Dafida, re šokele!”

₃₂Jesu a ema, a ba bitša. A ba botšiša a re: “Le nyaka gore ke le direle eng?”

₃₃Bona ba re: “Morena, re kgopela gore o re foufolle!”

₃₄Jesu a ba kwela bohloko, a ba kgwatha mahlo; ba napa ba boela ba bona, gomme ba mo latela.

₁E rile ge Jesu le barutiwa ba gagwe ba batamela Jerusalema, ba fihlile Betfage, Thabeng ya Mehlware, Jesu a roma barutiwa ba gagwe ba babedi, ₂a ba laela a re: “Eyang motseng wola le lebanego le wona, gomme ge le fihla le tla hwetša pokolo e tlemilwe e na le pokolwana ya yona. Le e tlemolle, le di tliše go nna. ₃Ge motho a ka le botšiša, le mmotše le re: ‘Morena o a di nyaka,’ gomme o tla napa a le neela tšona.”

₄Seo se diregile gore go phethege se se boletšwego ke moprofeta mola a re:

₅“Botšang motse wa Sione le re:

₆Ka gona barutiwa bale ba ya, ba dira se Jesu a ba boditšego sona. ₇Ba tliša pokolo yela le pokolwana ya yona; ba bea diaparo tša bona godimo ga tšona, mme Jesu a namela. ₈Batho ba bantšintši ba ala diaparo tša bona mo tseleng, mola ba bangwe ba rema makala a mehlare ba a ala tseleng. ₉Lešaba le le bego le etile Jesu pele le le le bego le mo šetše morago la goa la re: “A go tumišwe Morwa wa Dafida! A go retwe yo a tlago a romilwe ke Morena! A go retwe Yogodimodimo magodimong!”

₁₀Ge Jesu a tsena Jerusalema motse ka moka wa biloga. Batho ba botšišana ba re: “Ke mang yola?”

₁₁Lešaba la ba fetola la re: “Ke moprofeta Jesu wa Nasaretha kua Galilea.”

₁₂Jesu a ya Tempeleng mme a raka bohle ba ba rekago le ba ba rekišago ka moo. A menola ditafola tša ba ba rekanyago ditšhelete, le ditulo tša ba ba rekišago maeba, ₁₃mme a re go bona: “Mangwalo a Makgethwa a re: ‘Ngwako wa ka o tla bitšwa ngwako wa thapelo.’ Eupša lena le o dira legolo la bahlakodi!”

₁₄Difofu le digole tša tla go yena ka moo Tempeleng, gomme yena a ba fodiša. ₁₅Baprista ba bagolo le boramangwalo ba befelwa ge ba bona dilo tše di makatšago tše a bego a di dira, le bana ba goa ka Tempeleng ba re: “A go tumišwe Morwa wa Dafida!” ₁₆Ka gona ba botšiša Jesu ba re: “Na o kwa gore ba reng?”

Yena a ba fetola a re: “Ee, ke a ba kwa. Kgane ga se la ka la bala mo Mangwalo a Makgethwa a rego: ‘O ithetišitše bana le masea’?”

₁₇A ba tlogela a tšwa motseng a ya Bethania, a lala gona.

₁₈Ge Jesu a boela motseng mosong wa le le latelago, a kwa a swerwe ke tlala. ₁₉A bona mogo ka thoko ga tsela gomme a ya go wona, eupša a hwetša o se na selo ntle le matlakala. Ka gona a re go wona: “O ka se sa tsoga o entšwe dienywa!” Gateetee mohlare wola wa omelela.

₂₀Ge barutiwa ba gagwe ba di bona ba tlabega ba re: “Go tlile bjang gore mogo wo o omelele ka pela ka tsela ye?”

₂₁Jesu a ba fetola a re: “Ruri, ke le botša gore ge le dumela ka dipelo tša lena ka moka, le tla kgona go dira se ke se dirilego mogo wo. E sego sona fela, eupša le go botša thaba ye la re: ‘Tloga fa o yo itahlela ka lewatleng,’ gomme go tla ba bjalo. ₂₂Ge le dumela le tla fiwa se sengwe le se sengwe se le se kgopelago ka thapelo.”

₂₃Jesu a boela Tempeleng. Ya re ge a ruta batho, baprista ba bagolo le bagolo ba setšhaba ba tla go yena ba mmotšiša ba re: “O romilwe ke mang go dira dilo tše? Gona ke mang yo a go boditšego gore o di dire?”

₂₄Jesu a ba fetola a re: “Le nna ke tla le botšiša taba e tee, gomme ge le ka mphetola ke tla le botša gore ke romilwe ke mang go dira dilo tše. ₂₅Johanese o be a laetšwe ke mang go kolobetša – ke Modimo goba ke batho?”

Ba sebelana ba re: “Ge re ka re: ‘O be a laetšwe ke Modimo,’ o tla re botšiša a re: ‘Bjale ke ka lebaka lang le se la mo dumela?’ ₂₆Ge re ka re: ‘O be a laetšwe ke batho,’ gona batho ba tla re tšwa ka gobane ka moka ga bona ba tšea Johanese gore e be e le moprofeta.” ₂₇Ka gona ba fetola Jesu ba re: “Ga re tsebe.”

Gomme yena a re go bona: “Gona le nna nka se le botše gore ke romilwe ke mang go dira dilo tše.”

₂₈“Bjale le reng ka taba ye? Go kile gwa ba le monna yo mongwe yo a bego a na le barwa ba babedi. A ya go yo mogolo a re: ‘Ngwanaka, sepela o yo šoma ka serapeng sa ka sa merara lehono.’ ₂₉Morwagwe a mo fetola a re: ‘Ga ke nyake,’ eupša ka morago a itshola, a ya. ₃₀Ke moka tatagwe a ya go morwagwe yo monnyane, le yena a mmotša sela a se boditšego yo mogolo. Yena a re: ‘Go lokile, tate,’ eupša a se ke a ya. ₃₁Ke mang go ba babedi bao yo a dirilego se tatagwe a bego a mo kgopetše sona?”

Ba mo fetola ba re: “Ke yo mogolo.”

Ka gona Jesu a re go bona: “Ruri, ke le botša gore balekgetho le digwebakathobalo ba tla le tsenela pele legodimong, ₃₂ka gobane Johanese Mokolobetši o tlile go lena a le laetša tsela ya nnete, fela lena la se mo dumele, a dumelwa ke balekgetho le digwebakathobalo. Le ka morago mola le di bone la se ke la itshola la mo dumela.”

₃₃Jesu a re go bona: “Ekwang se sengwe seswantšho: Go kile gwa ba le monglapa yo mongwe yo a bego a bjetše merara. A e ageletša ka legora, a epa molete moo wa go pitlela diterebe ka maoto, a aga le tora ya tlhapetšo, a hirišetša balemi merara, ke moka a tšea leeto. ₃₄Ge nako ya go fula diterebe e fihla, a roma bahlanka ba gagwe go balemi bale gore ba yo mo tšeela diterebe tše e swanetšego go ba tša gagwe. ₃₅Eupša balemi ba swara bahlanka bale ba gagwe, ba itia yo mongwe, ba bolaya yo mongwe, gomme yo mongwe ba mo keketa ka maswika. ₃₆A buša a roma bahlanka ba bangwe ba go feta bale ba go rongwa pele, gomme le bona ba ba dira tšona tšela ba di dirilego ba pele. ₃₇Mafelelong a roma morwa wa gagwe a re: ‘Morwa wa ka yena ba tla mo hlompha.’ ₃₈Eupša balemi bale ge ba bona morwa wa gagwe ba lakana ba re: ‘Mojalefa šo. Etlang re mmolayeng gore re tle re tšee lefa la gagwe!’ ₃₉Ke moka ba mo swara, ba mo kgoromeletša ka ntle ga serapa, ba mmolaya.

₄₀“Bjale mohla mong wa serapa a etla, balemi bao o tla ba dirang?”

₄₁Bona ba mo fetola ba re: “Banna bao ba babe o tla ba bolaya gasehlogo, gomme serapa seo sa merara a se hirišetša ba bangwe bao ka nako ya puno ba tlago mo fa diterebe tše e swanetšego go ba tša gagwe.”

₄₂Jesu a ba botšiša a re: “Na ga se la ka la bala ka Mangwalong a Makgethwa mo go thwego:

₄₃“Ka gona ke le botša gore le tla amogwa mmušo wa Modimo, wa fiwa setšhaba se se tlago enywa dienywa ka tshwanelo.

₄₄“Yo a ka welago leswika leo godimo o tla pšhatlagana; le yo leswika leo le ka mo welago godimo le tla mo šila.”

₄₅Ge baprista ba bagolo le Bafarisei ba ekwa diswantšho tša Jesu, ba lemoga gore o ra bona. ₄₆Ka gona ba rata go mo swara, eupša ba boifa lešaba leo le bego le tšea gore Jesu ke moprofeta.

₁Jesu a buša a ruta batho ka diswantšho a re: ₂“Mmušo wa Modimo o ka swantšhwa ka kgoši ye nngwe ye e kilego ya direla morwa wa yona monyanya wa lenyalo. ₃A roma bahlanka ba gagwe gore ba yo bitša balaletšwa gore ba tle monyanyeng woo, eupša bona ba gana go tla. ₄Ka gona a roma bahlanka ba bangwe a ba laela gore ba yo botša balaletšwa ba re: ‘Monyanya wa ka o lokišitšwe; dipholo tša ka le diruiwa tše di nontšhitšwego di hlabilwe, gomme dilo tšohle di lokišitšwe. Etlang monyanyeng!’ ₅Eupša balaletšwa ba se ke ba mo šetša, ba ikela medirong ya bona: yo mongwe a ikela tšhemong ya gagwe, yo mongwe a ikela kgwebong ya gagwe, ₆mola ba bangwe ba swara bahlanka bale ba ba tlaiša, ba ba bolaya. ₇Kgoši a befelwa, a roma bahlabani ba gagwe go yo bolaya babolai bao le go yo tšhuma motse wa bona. ₈Ke moka a re go bahlanka ba gagwe: ‘Monyanya wona o lokišitšwe, eupša balaletšwa ba be ba se ba o swanela. ₉Bjale eyang ditseleng tše dikgolo tša motse le bitše batho bohle ba le ka ba hwetšago.’ ₁₀Ka gona bahlanka ba ya ditseleng ba kgobokanya bohle bao ba ba hwetšago fao, ba go loka le ba go se loke, gomme ntlo ya monyanya ya tlala batho.

₁₁“Ge kgoši a tsena go tlo bona baeng bao ba gagwe, a hwetša go na le motho yo mongwe yo a sego a apara diaparo tša lenyalo. ₁₂A mmotšiša a re: ‘Mogweraka, o tsene bjang ka mo o se wa apara bjalo ka motho ge a eya monyanyeng?’ Eupša motho yoo a no homola. ₁₃Ke mo kgoši a laetšego bahlanka ba gagwe a re: ‘Mo tlemeng maoto le matsogo le mo lahleleng ka kua ntlentle leswiswing. Moo o tla lla a lomanya meno.’ ”

₁₄Jesu a feleletša ka go re: “Ba ba laleditšwego ke ba bantši, eupša ba ba kgethilwego ga ba nene.”

₁₅Ke moka Bafarisei ba yo lakana go rea Jesu ka potšišo. ₁₆Ba roma barutiwa ba bangwe ba bona go yena ba na le batho ba bangwe ba ba emago le ba ga Heroda, ba fihla ba re: “Moruti, re a tseba gore o motho wa therešo mabapi le tšeo Modimo a nyakago gore motho a di dire, o se na taba le gore batho ba gopolang, ka gobane ga o lebelele maemo a motho. ₁₇Bjale re botše gore wena taba ye o e bona bjang. Na ke tshwanelo gore re ntšhetše Kesare metšhelo, goba ga se tshwanelo?”

₁₈Fela Jesu o be a lemogile bokgopo bja bona, ka gona a re go bona: “Baikaketši tenang! Le ntheelang? ₁₉Mpontšheng tšhelete ya motšhelo!”

Ba mo tlišetša yona, ₂₀gomme yena a ba botšiša a re: “Seswantšho se ke sa mang le leina le?”

₂₁Ba mo fetola ba re: “Ke tša Kesare.”

Ke moka Jesu a re go bona: “Gona ntšhetšang Kesare tše e lego tša Kesare, le Modimo le mo ntšhetše tše e lego tša Modimo.”

₂₂Ge ba ekwa a realo ba tlabega, gomme ba se sa mo tshwenya, ba sepela.

₂₃Ka lona letšatši leo Basadusei ba bangwe ba tla go Jesu. Gape ke bona ba ba rego bahu ba ka se tsoge. ₂₄Ba re go yena: “Moruti, Moshe o itše ge monna a ka hwa a se na bana, morathoagwe a tsenele mosadi wa mohu a tsošetše mogolwagwe lapa. ₂₅Bjale mo go rena go be go na le barwa ba motho ba ba šupago. Wa mathomo a nyala, eupša a hwa a se na bana; ka gona mohlologadi wa gagwe a šala a tsenelwa ke morathoagwe. ₂₆Le go wa bobedi gwa ba bjalo, le go wa boraro, go fihlela le go wa bošupa. ₂₇Mafelelong mosadi yola le yena a hwa. ₂₈Bjale mohla bahu ba tsoga mosadi yoo e tla ba wa ofe, ka ge ka moka ga bona ba be ba mo tsenetše?”

₂₉Jesu a ba fetola a re: “Le a phoša! Ke ka lebaka la gore le sa tsebe Mangwalo a Makgethwa le maatla a Modimo. ₃₀Gobane mohla bahu ba tsoga ba ka se nyale, ba ka se nyalwe – ba tla swana le barongwa ba legodimong. ₃₁Bjale mabapi le go tsoga ga bahu, na ga se la ka la bala se Modimo a le boditšego sona? ₃₂Gape o itše: ‘Ke nna Modimo wa Abrahama, Modimo wa Isaka, le Modimo wa Jakobo.’ Ke Modimo wa ba ba phelago, e sego wa ba ba hwilego.”

₃₃Ge lešaba le ekwa a realo la kgotsa thuto yeo ya gagwe.

₃₄Ge Bafarisei ba ekwa gore Jesu o ile a thiba Basadusei melomo, ba kgobokana, ₃₅gomme yo mongwe wa bona yo e bego e le ramangwalo a leka go mo rea ka go mmotšiša a re: ₃₆“Moruti, molao wo mogologolo melaong ya Moshe ke ofe?”

₃₇Jesu a mo fetola a re: “Ke wa go re: ‘O rate Morena Modimo wa gago ka pelo ya gago ka moka, le ka moya wa gago ka moka, le ka tlhaologanyo ya gago ka moka.’ ₃₈Woo ke wona molao wo mogologolo wo bohlokwahlokwa. ₃₉Wa bobedi wo o lekanago le wona o re: ‘O rate bangwekawena bjalo ka ge o ithata.’ ₄₀Melao ka moka ya Moshe le dithuto tša baprofeta di akaretšwa ke melao yeo ye mebedi.”

₄₁Ge Bafarisei ba sa kgobokane, Jesu a ba botšiša a re: ₄₂“Na le reng ka Mesia? Ke setlogolo sa mang?”

Bona ba mo fetola ba re: “Ke setlogolo sa Dafida.”

₄₃Jesu a ba botšiša a re: “Bjale ke ka lebaka lang Moya wa Modimo o ile wa tutuetša Dafida gore a mmitše ‘Morena’? Gobane Dafida o rile:

₄₆Gwa se be le yo a kgonago go mo fetola, gomme go tloga ka lona tšatši leo gwa se be le yo a bago le sebete sa go mmotšiša selo.

₁Jesu a botša lešaba le barutiwa ba gagwe a re: ₂“Tokelo ya go hlatholla melao ya Moshe e filwe boramangwalo le Bafarisei. ₃Ka gona le phethe tšohle tše ba le botšago tšona, le di latele, fela le se ke la dira tše ba di dirago, ka gobane ga ba dire go ya ka mo ba rutago batho ka gona. ₄Ba beela batho melao ye methata ba ba botša gore ba e phethe, etšwe bona ba sa rate go dira selo go ba fefolela yona. ₅Tšohle tše ba di dirago ba di direla gore ba bonwe ke batho. Mapantana ao a ngwadilwego ditemana tša Mangwalo a Makgethwa ba a aparago diphatleng le matsogong, ba a dira a diphaphathi, le mašaphu a diaparo tša bona ba a dira a matelele. ₆Menyanyeng le ka disinagogeng ba rata madulo a ka pele. ₇Motho wa bona o rata go dumedišwa ka tlhompho mapatlelong a motse le go bitšwa ‘Moruti’. ₈Lena le se ke la bitšwa ka la ‘Moruti’, ka gobane ka moka ga lena le bana ba motho, gomme Moruti wa lena ke o tee. ₉Le gona le se ke la bitša motho mo lefaseng la re ‘Tate’, ka gobane Tatagolena ke o tee, o legodimong. ₁₀Le gona motho wa lena a se ke a bitšwa ‘Moetapele’, ka gobane moetapele wa lena ke o tee, e lego Mesia. ₁₁Yo mogolo mo go lena e be mohlanka wa lena. ₁₂Yo a ikgodišago o tla kokobetšwa, mme yo a ikokobetšago o tla godišwa.”

₁₃“Le ba madimabe, lena boramangwalo le lena Bafarisei, baikaketši tenang, gobane legodimo le le tswalela batho ka ntle, mola le lena le sa tsene, ebile le sa dumelele bao ba nyakago go tsena.

₁₅“Le ba madimabe, lena boramangwalo le lena Bafarisei, baikaketši tenang, gobane le tshela mawatle la putla dinaganaga gore le yo sokolla motho o tee, gomme ge le mo sokolotše le mo dire gore e be yo a swanelago hele go le feta gabedi.

₁₆“Le ba madimabe, lena le nyakago go hlahla batho etšwe le foufetše, gobane le re: ‘Ge motho a ka ena ka Tempele ga go tshwenye, eupša ge a ka ena ka gauta ye e lego ka Tempeleng, gona o itlemile.’ ₁₇Ditlaela tše di foufetšego tenang, se bohlokwa ke eng? A ke gauta goba ke Tempele ye gauta ye e bago ye kgethwa ka yona? ₁₈Le gona le re: ‘Ge motho a ka ena ka aletare ga go tshwenye; eupša ge a ka ena ka sehlabelo se se lego moo aletareng, gona o itlemile.’ ₁₉Difofu tenang, se bohlokwa ke eng? Ke sehlabelo, goba ke aletare yeo sehlabelo e bago se sekgethwa ka yona? ₂₀Ka gona, ge motho a ka ena ka aletare, o ena ka yona le ka tšohle tše di lego godimo ga yona; ₂₁le ge a ka ena ka Tempele, o ena ka yona le ka Modimo, e lego yena a dulago ka go yona; ₂₂gomme ge motho a ka ena ka legodimo, o ena ka setulo sa bogoši sa Modimo le ka yoo a dutšego go sona.

₂₃“Le ba madimabe, lena boramangwalo le lena Bafarisei, baikaketši tenang, gobane le abela Modimo karolo ya lesome ya dikhonofolo le ya leotša le ya mphogo, eupša le hlokomologa tše bohlokwa tše melao e di rutago, e lego toka le lešoko le botshephegi. Tše ke tšona tše le swanetšego go di phetha le sa hlokomologe tše dingwe tšeo. ₂₄Lena le nyakago go hlahla batho etšwe le foufetše, le hlokometše kudu go phetha melao ye e amanago le ditaba tše di sego bohlokwa, bjalo ka go ntšha selabe ka senong, eupša melao ye bohlokwahlokwa ya Modimo le a e tshela.

₂₅“Le ba madimabe, lena boramangwalo le lena Bafarisei, baikaketši tenang, gobane le hlatswa senwelo sa lena le mogopo ka ntle, mola dijo le dino tše di lego ka gare e le tše le di hweditšego ka šiši le ka megabaru. ₂₆Mofarisei wa sefofu tena! Hlatswa senwelo ka gare pele, gomme le ka ntle se tla hlatswega.

₂₇“Le ba madimabe, lena boramangwalo le lena Bafarisei, baikaketši tenang, gobane le swana le mabitla ao a tloditšwego ka motaga, ao ka ntle a bonalago e le a mabotse, mola ka gare a tletše mašapo a bahu le go bola. ₂₈Le lena le bjalo: le bonala le le ba ba lokilego, mola ka dipelong tša lena le tletše boikaketši le bokgopo.”

₂₉“Le ba madimabe, lena boramangwalo le lena Bafarisei, baikaketši tenang, gobane le beela mabitla ao baprofeta ba bolokilwego ka go ona maswika, la kgabiša le digopotšo tša bao ba ilego ba phela ka go loka; ₃₀gomme le re ge le ka be le phetše mehleng ya borakgolokhukhu ba lena, le ka be le se la dira tše ba di dirilego, la bolaya baprofeta. ₃₁Ka gona lena beng le ipega gore le ditlogolo tša bao ba bolailego baprofeta. ₃₂Bjale ge, tšwelang pele le phethe se se thomilwego ke borakgolokhukhu ba lena! ₃₃Lena dinoga, mafotwana a dinoga tenang! Le tla phologa bjang go ahlolelwa heleng? ₃₄Ke ka lebaka leo ke le botšago gore ke tlilo le romela baprofeta le borabohlale le baruti. Ba bangwe ba bona le tla ba bolaya, bangwe la ba bapola sefapanong, bangwe la ba otla ka tshelane ka disinagogeng, la ba lelekiša le metse. ₃₅Ya ba gona ge le ithweša molato wa go bolaya bohle ba ba lokilego, go tloga ka moloki, Abele, go fihla ka Sakaria, morwa wa Berekia, yo le mmolaetšego gare ga Tempele le aletare. ₃₆Ruri, ke le botša gore batho ba mehleng yeno ba tla otlelwa dipolao tšeo ka moka.”

₃₇“Joo, Jerusalema, joo, Jerusalema, wena o bolayago baprofeta gape o keketago ka maswika bao Modimo a ba romilego go wena, ke gakae ke ratile go phutha badudi ba gago bjalo ka kgogo ge e phutha matswiana a yona ka diphego tša yona, eupša o gana? ₃₈Ka gona Modimo o tla ngala Tempele ya gago ya šala e le lešope. ₃₉Ke le botša gore go tloga bjale le ka se sa mpona go fihlela ge le re: ‘A go retwe yo a tlago a romilwe ke Morena!’ ”

₁Ge Jesu a tloga Tempeleng barutiwa ba gagwe ba ile ba tla go yena go mo šupetša meago ya Tempele. ₂Jesu a re go bona: “Ga ke re meago ye ka moka le a e bona? Ruri, ke le botša gore ga go leswika le le tlago šala le hlatlagane le le lengwe mme la se kgerešwe.”

₃E rile ge Jesu a dutše Thabeng ya Mehlware, barutiwa ba gagwe ba tla ba mmotšiša thopeng ba re: “Re botše gore dilo tšeo ka moka di tla direga neng, le gore re tla bona ka eng ge o boa, le gore ke mafelelo a lefase.”

₄Jesu a ba fetola a re: “Le itlhokomele gore le se forwe ke motho. ₅Batho ba bantši ba tla tla ba re ba bolelela nna, motho a re: ‘Ke nnaena Mesia.’ Gomme ba tla fora ba bantši. ₆Le tla kwa mekgoši ya ntwa le dipego tša ntwa; eupša le se ke la tshwenyega, gobane tšeo di swanetše go no hlaga, fela e tla be e sešo ya ba mafelelo. ₇Ditšhaba di tla hlaselana, le mebušo e tla tsogelana maatla, le ditlala le go šikinyega ga lefase kua le kua di tla ba gona. ₈Dilo tšeo ka moka di tla ba bjalo ka mathomo a lešoko la pelego.

₉“Ya ba gona ba le gafelago bao ba tlago le otla ba le bolaya. Le tla hloiwa ke ditšhaba ka moka ka lebaka la ge le dumela go nna. ₁₀Mehleng yeo ba bantši ba tla kgeloga; ba tla ekana ba hloyana. ₁₁Go tla tšwelela baprofeta ba bantši ba maaka gomme ba fora batho ba bantši. ₁₂Ka lebaka la go ata ga bokgopo lerato la ba bantši le tla fokotšega. ₁₃Eupša yo a ka kgotlelelago go iša mafelelong o tla phologa. ₁₄Gomme Taba ye Botse ye ya mmušo wa Modimo e tla begwa lefaseng ka moka gore ditšhaba ka moka di e kwe; e be gona go tlago mafelelo a lefase.”

₁₅“Le tla bona ‘Bohlola bjo bo tlontlollago Tempele’, bjo bo boletšwego ke moprofeta Daniele, bo eme ka felong mo go kgethwa.” (A mmadi a kwešiše gore bohlola bjoo ke eng.) ₁₆“Ke moka bao ba tla bego ba le nageng ya Judea ba tšhabele dithabeng. ₁₇Yo a tlago be a le godimo ga ngwako wa gagwe a se ke a fologela ka ngwakong go yo tšea se e lego sa gagwe. ₁₈Yo a tlago be a le mašemong a se ke a boela go yo tšea seaparo sa gagwe gae. ₁₉Ba madimabe mehleng yeo ke bao e tla bego e le baimana le batswetši. ₂₀Le rapeleng Modimo gore go tšhaba moo ga lena go se ke gwa ba marega goba ka letšatši la Sabatha. ₂₁Gobane masetlapelo a mehla yeo e tla ba a a šiišago ao a se a kago a bonwa go tloga mola lefase la bago gona go fihlela gonabjale, gape a ka se sa tsogago a bile gona. ₂₂Eupša Modimo o šetše a ikemišeditše go fokotša matšatši a masetlapelo ao; ge a ka be a ka se a fokotše, go ka be go ka se phologe motho. Modimo o tla a fokotša ka lebaka la bao a ba kgethilego.

₂₃“Mehleng yeo ge motho a ka re go lena: ‘Bonang, Mesia šo!’ goba a re: ‘Bonang, šole!’ le se ke la mo kgolwa. ₂₄BoMesia ba maaka le baprofeta ba maaka ba tla tšwelela; ba tla dira matete a magolo le dimakatšo gore, ge go kgonega, ba fore le batho bao Modimo a ba kgethilego. ₂₅Le tsebe gore ke le boditše pele di direga.

₂₆“Ka gona ge batho ba ka le botša ba re: ‘Mesia o kua lešokeng!’ le se ke la ya gona; le ge ba ka re: ‘Bonang, o iphihlile ka phapošing!’ le se ke la ba kgolwa. ₂₇Gobane Morwamotho o tla tla bjalo ka legadima le le pekenyago le etšwa ka bohlabela le eya ka bodikela.

₂₈“Gape mo go lego setoto go kgobokana manong.”

₂₉“Masetlapelo a mehleng yeo a tla re a sa tšo feta, letšatši la fifala, ngwedi wa se sa taga, dinaledi tša arošwa tseleng ya tšona mme tša wela fase di etšwa godimo. ₃₀Go tla bonagala se sengwenyana legodimong sa go šupa gore Morwamotho o etla, gomme ditšhaba tšohle tša lefase di tla lla ge di mmona a etla ka maru a legodimo, a na le maatla a magolo le letago le legolo. ₃₁Phalafala ye kgolo e tla letšwa, gomme Morwamotho o tla roma barongwa ba gagwe ka mathokong ka mane a lefase go yo kgobokanya ba a ba kgethilego, ba tlišwa ba etšwa gohle lefaseng.”

₃₂“Swantšhang ka mogo: Ge makala a wona a eba a boleta, a hloga matlakala, le tseba gore selemo se kgauswi. ₃₃Le lena ge le bona tšeo ka moka di direga, le tsebe gore nako ya go tla ga Morwamotho e batametše, e kgauswikgauswi. ₃₄Ruri, ke le botša gore dilo tše ka moka di tla hlaga batho ba ba phelago gonabjale ba sešo ba hwa ka moka. ₃₅Legodimo le lefase di tla fela, eupša tše ke di boletšego tšona e tla no fela e le nnete.”

₃₆“Ge e le letšatši le nako ya gona ga go yo a di tsebago – le barongwa ba legodimong le yena Morwa ga ba di tsebe, di tsebja ke Tatagwe fela. ₃₇Go tla ga Morwamotho go tla swana le se se ilego sa hlaga mehleng ya Noa. ₃₈Mehleng ya pele ga meetsefula batho ba be ba eja, ba enwa, ba nyala goba ba nyalwa, gwa ba gwa fihla letšatši lela Noa a tla tsena ka leselawatleng; ₃₉le ge go le bjalo ba be ba sa lemoge gore go diregang, go fihlela meetsefula a etla a ba tšea ka moka. Le mohla Morwamotho a etla go tla ba bjalo. ₄₀Mehleng yeo banneng ba babedi ba ba tlago be ba šoma tšhemong, go tla tšewa yo mongwe, gwa šadišwa yo mongwe. ₄₁Basading ba babedi ba ba tla bego ba šila lwaleng, go tla tšewa yo mongwe, gwa šadišwa yo mongwe.

₄₂“Ka gona le dule le itokišitše, ka gobane ga le tsebe letšatši le Morena wa lena a tlago tla ka lona. ₄₃Ge mongmotse a ka be a tsebile gore lehodu le tla tla neng, ruri, a ka be a se a robala a lesa lehodu le thuba ngwako wa gagwe. ₄₄Ka gona le lena le dule le itokišitše, ka gobane Morwamotho o tla tla ka nako ye le sa gopolego gore a ka tla ka yona.”

₄₅“Bjale mohlanka wa go botega yo bohlale ke ofe? Ke yo mong wa gagwe a mmeilego mohlokomedi wa bahlanka ba gagwe gore a ba fe dijo ka nako ya go ja. ₄₆Go lehlogonolo mohlanka yoo mong wa gagwe a tlago mo hwetša a dira bjalo ge a boa. ₄₇Ruri, ke le botša gore mong wa gagwe o tla mmea mohlokomedi wa tšohle tše a nago le tšona. ₄₈Eupša mohlanka ge e le yo mobe, ka pelong o tla re: ‘Mong wa ka o diegile go boa,’ ₄₉gomme a thoma go itia bahlankakayena le go ja le go nwa le matagwa. ₅₀Ke moka mong wa mohlanka yoo a boa ka letšatši le mohlanka a sa mo naganego ka lona le ka nako ye a sa e tsebego. ₅₁Mong wa gagwe o tla mo kgaola ditho, a ba a mo dira se se dirwago baikaketši. O tla lla a lomanya meno.”

₁“Mehleng yeo mmušo wa Modimo o tla swantšhwa ka dikgarebe tše lesome tše di kilego tša tšea mabone a tšona, tša yo gahlanetša monyadi. ₂Tše tlhano tša tšona e be e le ditlaela, tše tlhano e le tše bohlale. ₃Tša ditlaela tša tšea mabone a tšona, eupša tša se ke tša duta makhura, ₄mola tšela tše bohlale tšona di tšea mabone di duta le makhura ka dibjana. ₅Monyadi a diega, ka gona dikgarebe tšela tša potuma, tša robala.

₆“Bošegogare gwa kwala mokgoši motho a re: ‘Monyadi šoowe! Etšwang le mo gahlanetše!’ ₇Dikgarebe tšela tše lesome tša tsoga, tša lokiša mabone a tšona. ₈Tšela tša ditlaela tša re go tše bohlale: ‘Nke le re topeletše makhura ka gobane mabone a rena a a tima.’ ₉Tšela tše bohlale tša ba fetola tša re: ‘Aowa, ga re na makhura a a ka lekanego rena le lena. Go kaone ge le ka yo ithekela go barekiši.’ ₁₀Ya re ba sa ile go reka, monyadi a šala a fihla. Bale ba bahlano ba ba bego ba itokišitše ba tsena le yena ka monyanyeng, gomme lemati la tswalelwa.

₁₁“Ka morago gwa fihla bale ba bangwe ba re: ‘Morena, morena, re bulele!’ ₁₂Monyadi yena a ba araba ka go re: ‘Aowa, ga ke le tsebe.’ ”

₁₃Gomme Jesu a feleletša ka go re: “Ka gona le dule le itokišitše, ka gobane ga le tsebe letšatši le nako ya go tla ga Morwamotho.”

₁₄“Mehleng yeo mmušo wa Modimo o tla swantšhwa ka monna yo a bego a nyaka go tšea leeto. A bitša bahlanka ba gagwe gomme a ba bea bahlokomedi ba thoto ya gagwe. ₁₅Mongwe a mo fa dipapetlana tše tlhano tša gauta, mongwe a mo fa tše pedi, mongwe a mo fa e tee. A fa yo mongwe le yo mongwe wa bona ka moo yena a mo tsebago a kgona ka gona. Ke moka a tšea leeto. ₁₆Mohlanka yola wa go fiwa dipapetlana tše tlhano a tloga le semeetseng a yo gweba ka tšhelete yeo, gomme ya mo tswalela dipapetlana tše dingwe tše tlhano. ₁₇Le yola wa go neelwa dipapetlana tše pedi a tswalelwa tše dingwe tše pedi. ₁₈Yola wa go neelwa papetlana e tee yena a yo epa molete, a fihla tšhelete yela ya mong wa gagwe.

₁₉“Ge go fetile nako ye telele mong wa bahlanka bale a boa gomme a ba botšiša gore ba dirileng ka tšhelete yela ya gagwe. ₂₀Mohlanka yola a bego a neetšwe dipapetlana tše tlhano tša gauta a batamela a mo neela tšela tše dingwe tše tlhano, a re: ‘Morena, o be o nneetše dipapetlana tše tlhano; bjale bona, tše dingwe tše tlhano tše ke di tswadišitšego tšona šedi.’ ₂₁Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego. Ka gona ke tla go bea mohlokomedi wa tše dintši. Tsena ka gae o tle o ipshine le nna!’

₂₂“Ke moka gwa batamela mohlanka yola wa go neelwa dipapetlana tše pedi tša gauta, mme a re: ‘Morena, o be o nneetše dipapetlana tše pedi; bjale bona, tše dingwe tše pedi tše ke di tswadišitšego tšona šedi.’ ₂₃Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego, ka gona ke tla go bea mohlokomedi wa tše dintši. Tsena ka gae o tle o ipshine le nna!’

₂₄“Ka morago gwa batamela mohlanka yola a bego a neetšwe papetlana e tee ya gauta, mme a re: ‘Ke tsebile gore o motho wa serumolani, o buna mo o sego wa bjala gona, o kgobela mabele a o sego wa ka wa a gaša. ₂₅Ka ge ke be ke boifa, ke ile ka tloga ka yo epela tšhelete ya gago. Bjale še yona.’

₂₆“Mong wa gagwe a re: ‘Mohlanka yo mobe wa sebodu towe! Kganthe o tsebile gore ke buna mo ke sego ka bjala gona, ke kgobela mabele a ke sego ka ka ka a gaša? ₂₇Gona nkabe o ile wa iša tšhelete ya ka polokelong, gomme ge ke boa nkabe ke hweditše tšhelete ya ka le tswala ya yona. ₂₈Bjale ge, mo amogeng papetlana yeo le e fe yola a nago le dipapetlana tše lesome. ₂₉Gobane mang le mang yo a nago le sa gagwe o tla okeletšwa, gomme a ba le tše dintši le go feta; eupša yo a se nago sa gagwe le bonnyane bjo a nago le bjona o tla bo amogwa. ₃₀Lefeelana le la mohlanka lona le lahleleng ka kua ntlentle leswiswing, moo a tlago lla a lomanya meno.’

₃₁“Mohla Morwamotho a etla e le Kgoši a na le barongwa ka moka, o tla dula setulong sa gagwe sa bogoši, ₃₂gomme ditšhaba ka moka di tla kgoboketšwa pele ga gagwe. Yena o tla ba kgethologanya bjalo ka modiši ge a kgethologanya dinku le dipudi. ₃₃Dinku o tla di bea ka letsogong la go ja, dipudi tšona a di bea ka go la nngele. ₃₄Ke moka o tla re go batho ba ba lego ka letsogong la go ja: ‘Etlang, lena le šegofaditšwego ke Tate! Etlang ke le iše legodimong le le le lokišeditšwego go tloga mola lefase le hlolwa. ₃₅Gobane ke ile ka re ke swerwe ke tlala, la mpha dijo; ka re ke nyorilwe, la mpha sa go nwa; ka re ke le mošele, la nkamogela ka malapeng a lena; ₃₆ka re ke hloka diaparo, la mpha tšona; ka re ke babja, la tla la mpona; ke le kgolegong, la nketela.’

₃₇“Baloki ba tla mmotšiša ba re: ‘Morena, ke neng mo re ilego ra go bona o swerwe ke tlala mme ra go fa dijo, goba o nyorilwe, ra go fa sa go nwa? ₃₈Ke neng mo re ilego ra go bona o le mošele, gomme ra go amogela ka malapeng a rena, goba o hloka diaparo, ra go fa tšona? ₃₉Ke neng mo re ilego ra go bona o babja goba o le kgolegong, mme ra go etela?’ ₄₀Kgoši o tla ba fetola a re: ‘Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!’

₄₁“Ka morago o tla re go bao ba lego ka letsogong la gagwe la nngele: ‘Tlogang mo go nna, barogakwa tenang, le ye mollong wo o sa timego wo o goleditšwego Diabolose le barongwa ba gagwe! ₄₂Gobane ke ile ka re ke swerwe ke tlala, la se mphe dijo; ke nyorilwe, la se mphe sa go nwa; ₄₃ka re ke le mošele, la se nkamogele ka malapeng a lena; ka re ke hloka diaparo, la se mphe tšona; ka re ke babja, ke le kgolegong, la se nketele.’

₄₄“Bona ba tla mo fetola ba re: ‘Morena, ke neng mo re ilego ra go bona o swerwe ke tlala, goba o nyorilwe, goba o le mošele, goba o hloka diaparo, goba o babja, goba o le kgolegong, gomme ra se go thuše?’ ₄₅Yena o tla ba fetola a re: ‘Ruri, ke le botša gore ge le be le sa direle yo mongwe wa banyatšegi ba, ke gona ge le be le sa direle nna.’ ₄₆Gomme bona ba tla ya go otlwa ka go sa felego, baloki bona ba tla ya go phelela sa ruri.”