To The Word – Day 110

₁E rile ge Jesu a feditše go anega ditaba tšeo ka moka a re go barutiwa ba gagwe: ₂“Le a tseba gore ka morago ga matšatši a mabedi e tla ba Monyanya wa Paseka, gomme Morwamotho o tla gafelwa batho go bapolwa sefapanong.”

₃Ke moka baprista ba bagolo le bagolo ba setšhaba ba kopana mošate ga Khayafase, Moprista yo Mogologolo, ₄gomme ba lakana go swara Jesu ka bohwirihwiri gore ba tle ba mmolaye. ₅Ba re: “E se be ka nako ya monyanya, gore setšhaba se se ke sa tsoša mpherefere.”

₆Jesu o be a le motseng wa Bethania, ka ga Simone, monna yo a bego a kile a swarwa ke bolwetši bja letlalo bja go mo tšhilafatša. ₇Ya re Jesu a sa ja, mosadi yo mongwe a tla go yena a swere sedibelo sa leswika le le bitšwago alapastere se swere senkgabose sa theko ye kgolo, gomme a se tšhela Jesu hlogong. ₈Barutiwa ge ba mmona a dira bjalo ba selekega ba re: “Senkgabose se se senyetšwang? ₉Se ka be se rekilwe ka tšhelete ye ntši gomme yona ya fiwa badiidi!”

₁₀Jesu, ka go tseba se ba se bolelago, a re go bona: “Le tshwenyetšang mosadi yo? Gape o nthakgile. ₁₁Gobane badiidi le na le bona ka mehla, eupša nna le ka se be le nna ka mehla. ₁₂Ka go tšhela senkgabose se mmeleng wa ka o ntokišeditše go bolokwa. ₁₃Ruri, ke le botša gore gohle lefaseng mo Ebangedi ye e tlago begwa gona, go tla bolelwa le se mosadi yo a se dirilego, e le gore a fele a gopolwa.”

₁₄Ke moka yo mongwe wa barutiwa ba Jesu ba lesome le metšo ye mebedi, yo leina la gagwe e bego e le Judase Iskariote, a ya go baprista ba bagolo, ₁₅a ba botšiša a re: “Le tla mphang ge nka le gafela Jesu?” Bona ba mo fa dipapetlana tše masome a mararo tša silibera. ₁₆Go tloga yona nakong yeo Judase a thoma go nyaka nako ye e lebanego ya go gafela Jesu diatleng tša bona.

₁₇Ka letšatši la pele la Monyanya wa Dinkgwa tše di se nago komelo, barutiwa ba Jesu ba tla go yena ba mmotšiša ba re: “O nyaka gore re yo go lokišetša dijo tša Paseka kae?”

₁₈Jesu a ba fetola a re: “Eyang go monna yo mongwe kua motseng, gomme le fihle le mmotše le re: ‘Moruti o re: Nako ya ka e batametše. Nna le barutiwa ba ka re tlilo ja Paseka ka ga gago.’ ”

₁₉Barutiwa bale ba dira ka mo Jesu a ba laetšego ka gona, ba lokiša dijo tša Paseka.

₂₀Ya re mantšiboa Jesu le barutiwa ba gagwe ba lesome le metšo ye mebedi ba dula fase gore ba je. ₂₁Ge ba eja, Jesu a re: “Ruri, ke le botša gore yo mongwe wa lena o tla nkeka.”

₂₂Barutiwa ba gagwe ba nyama kudu, gomme ba mmotšiša ka o tee ka o tee ba re: “Kgane o ra nna, Morena?”

₂₃Jesu a ba fetola a re: “Yo a šebago le nna ka thiswaneng ke yena a tlago nkeka. ₂₄Morwamotho go tloga gona o tla tloga, ka ge Mangwalo a Makgethwa a realo, eupša go madimabe yo a ekago Morwamotho! Go ka be go bile kaone ge motho yoo a ka be a se a tswalwa!”

₂₅Judase, yena yo a bego a tlilo mo eka, a re: “Kgane o ra nna, Moruti?”

Jesu a mo fetola a re: “Go bjalo.”

₂₆Ya re ge ba eja, Jesu a tšea senkgwa, a tumiša Modimo, a mo leboga, a se ngwathaganya, a se fa barutiwa ba gagwe a re: “Tšeang le jeng, se ke mmele wa ka.”

₂₇A tšea le senwelo, a leboga Modimo, a ba neela sona a re: “Se nweng ka moka ga lena; ₂₈se ke madi a ka ao a tiišetšago kgwerano ya Modimo, ao a tšhollelwago ba bantši gore ba lebalelwe dibe. ₂₉Ke a le botša, nka se sa nwa beine ye go fihlela mohla ke enwa ye mpsha le lena legodimong.”

₃₀Ge ba seno opela sefela sa tumišo, ba tšwa ba ya Thabeng ya Mehlware.

₃₁Ya ba Jesu o re go bona: “Ka moka ga lena bošegong bjo le tla ntšhabela, ka gobane Mangwalo a Makgethwa a re: ‘Ke tla bolaya modiši, gomme dinku tša gagwe tša šwalalana.’ ₃₂Eupša e tla re ge ke tsogile bahung, ka le tlogela pele go ya Galilea.”

₃₃Petrose a mo fetola a re: “Le ge bohle ba ka go tlogela, nna nka se tsoge ke go tlogetše!”

₃₄Jesu a re go yena: “Ruri, ke go botša gore gona bošegong bjo, pele mokoko o lla, o tla be o ntatotše gararo.”

₃₅Petrose a mo fetola a re: “Nna nka se tsoge ke go latotše, le ge eba e ka ba gore ke hwe le wena!”

Le barutiwa ba bangwe ka moka ba realo.

₃₆Ka morago Jesu a ya le barutiwa ba gagwe lefelong le lengwe le le bitšwago Getsemane, gomme a re go bona: “Dulang mo ge ke sa ya go rapela mola.” ₃₇A tloga le Petrose le barwa ba Sebediose ka babedi. A thoma go nyama le go tlalelwa, ₃₈gomme a re go bona: “Ke nyamile la go hwa. Dulang mo le letele le nna.”

₃₉Ke moka a ya pejana, a itahlela fase ka sefahlego, a rapela a re: “Tate, ge go kgonega, senwelo se sa tlaišego a se mphete ka thoko. Fela go se phethege ya ka thato, go upše go phethege ya gago.”

₄₀A boela go barutiwa bale ba gagwe ba bararo, gomme a ba hwetša ba robetše. A re go Petrose: “Na le paletšwe ke go itiša le nna lebakanyana fela? ₄₁Letelang le rapele, gore le se lekwe. Ge e le maikemišetšo ona le nawo, fela le a palelwa.”

₄₂A ya go rapela la bobedi a re: “Tate, ge go sa kgonege gore senwelo se sa tlaišego se mphete ka thoko ke sa se nwe, a go phethege thato ya gago.” ₄₃Ge a boela go barutiwa ba gagwe a ba hwetša ba robetše gape, ka gobane ba be ba potuma kudu.

₄₄A ba tlogela gape a yo rapela la boraro, a boeletša ona mantšu ale. ₄₅A gomela go barutiwa bale ba gagwe mme a re go bona: “Na le sa robetše, le a khutša? Nako e fihlile ya gore Morwamotho a gafelwe diatleng tša badiradibe. ₄₆Emang, re sepeleng! Bonang, monna yo a nkekago o šetše a batametše.”

₄₇E rile ge Jesu a sa bolela gwa fihla Judase, e lego yo mongwe wa barutiwa ba gagwe ba lesome le metšo ye mebedi. O be a na le lekoko le legolo le le itlhamilego ka ditšhoša le melamo, le romilwe ke baprista ba bagolo le bagolo ba setšhaba. ₄₈Moeki o be a lakane le lekoko leo a re: “Monna yo ke tlago mo atla, ke yena. Le mo swareng!”

₄₉Judase a ya go Jesu ntle le go dikadika, a mo lotšha a re: “Thobela, Moruti!” Gomme a mo atla.

₅₀Jesu a mo araba a re: “Mogwera, dira se o se tletšego mo!”

Ke moo lekoko le batametšego Jesu la mo swara la mo tiiša. ₅₁Yo mongwe wa bao ba bego ba na le Jesu a hwanyolla tšhoša ya gagwe, a rema mohlanka wa Moprista yo Mogologolo a mo kgaola tsebe. ₅₂Jesu a re go yena: “Bušetša tšhoša ya gago madulong a yona. Bohle ba ba lwago ka tšhoša ba tla bolawa ka tšhoša. ₅₃Kgane o gopola gore ga ke kgone go kgopela Tate, mme yena a akgofa a nthomela dihlopha tše di fetago tše lesome le tše pedi tša madira a barongwa? ₅₄Fela ge nka dira bjalo, Mangwalo a Makgethwa a a rego se ke se se swanetšego go direga, a ka phethega bjang?”

₅₅Ya ba yona nako yeo Jesu a botšišago lekoko leo a re: “Le reng le tlile ka ditšhoša le melamo go ntshwara mo nkego ke nna mohlakodi? Tšatši le lengwe le le lengwe ke be ke dula le batho ke ba ruta ka Tempeleng, gomme le sa ntshware. ₅₆Fela tšohle tše di diregile gore go phethege tše di ngwadilwego ke baprofeta ka Mangwalong a Makgethwa.”

Ke moka barutiwa ba gagwe bohle ba mo tlogela ba tšhaba.

₅₇Bale ba go swara Jesu ba mo iša ga Khayafase, Moprista yo Mogologolo, moo go bego go kgobokane boramangwalo le bagolo ba setšhaba. ₅₈Petrose a ba latela a le kgojana, go ba go yo fihla ka lapeng ga Moprista yo Mogologolo. A tsena ka lapeng gomme a dula fase le baleti gore a bone gore go tla feletša kae ka Jesu. ₅₉Baprista ba bagolo le Kgorokgolo ka moka ba leka go phara Jesu ka bohlatse bja maaka gore ba tle ba mmolaye, ₆₀eupša ba bo hloka, le ge go be go etla dihlatse tše dintši tša maaka. Mafelelong gwa tla dihlatse tše pedi ₆₁tša re: “Monna yo o rile a ka kgereša Tempele ya Modimo mme a e aga gape ka matšatši a mararo.”

₆₂Moprista yo Mogologolo a emelela a re go Jesu: “Na ga o iphetolele? O reng ka se ba go beago molato ka sona?” ₆₃Eupša Jesu a no ikhomolela. Moprista yo Mogologolo a mmotšiša gape a re: “Ke go eniša ka Modimo yo a phelago gore o re botše ge eba o Mesia, Morwa wa Modimo.”

₆₄Jesu a mo fetola a re: “O a bolela. Eupša ke le botša gore go tloga bjale le tla bona Morwamotho a dutše ka letsogong la go ja la Ramaatlaohle a etla ka maru!”

₆₅Ke moo Moprista yo Mogologolo a gagotšego diaparo tša gagwe a re: “O nyefotše Modimo! Dihlatse re sa di iša kae? Le ikwetše ka bolena ge a nyefola Modimo! ₆₆Bjale le reng ka yena?”

Ba fetola ba re: “O swanetšwe ke lehu!”

₆₇Ke moka ba mo tshwela ka mare sefahlegong, ba mo itia ka matswele, ba bangwe ba mo faphola ka dintahle, ₆₈ba re: “Mesia, ka ge o le moprofeta, re botše gore o itiilwe ke mang!”

₆₉Petrose o be a dutše ka lapeng. Modiredi yo mongwe wa mosetsana a tla go yena a re: “Le wena o be o na le Jesu wa Galilea.”

₇₀Eupša Petrose a latola batho bohle ba mo kwa a re: “Se o se bolelago nna ga ke se tsebe!” ₇₁Ya re ge a eya seferong sa lapa, yo mongwe modiredi wa mosetsana a mmona gomme a botša ba ba bego ba le moo a re: “Monna yo le yena o be a na le Jesu wa Nasaretha.”

₇₂Gapegape Petrose a latola a ena a re: “Nna monna yola ga ke mo tsebe!”

₇₃Ka morago ga nakonyana banna ba ba bego ba le moo ba tla go Petrose ba re: “Ruri, le wena o yo mongwe wa bona, gobane le polelo ya gago e a go lahla!”

₇₄Ke moka Petrose a thoma go rogana le go ikana a re: “Monna yola ga ke mo tsebe!”

Mokoko wa napa wa lla. ₇₅Ya ba Petrose o elelwa sela Jesu a mmoditšego sona mola a re: “Pele ga ge mokoko o lla, o tla be o ntatotše gararo.” A napa a tšwela ka ntle a lla gabohloko.

₁Ya re ge go esa baprista ba bagolo ka moka le bagolo ba setšhaba ba lakana Jesu gore ba mmolaye. ₂Ba mo tlema ka diketane, ba tloga naye, ba yo mo gafela Mmušiši Pilato.

₃Judase yola wa go mo eka, ge a ekwa gore Jesu o ahloletšwe lehu, a itshola mme a bušetša dipapetlana tšela tše masome a mararo tša silibera go baprista ba bagolo le bagolo ba setšhaba a re: ₄“Ke dirile sebe ka go eka motho yo a se nago molato gore a bolawe.”

Bona ba mo fetola ka go re: “Yeo ga se taba ya rena – ke dibonwakewena!”

₅Judase a lahlela dipapetlana tšela ka Tempeleng, mme a tloga a yo ikgama.

₆Baprista ba bagolo ba topa dipapetlana tšeo ba re: “Ye ke tšhelete ye e rekilego lehu la motho, gomme ga se ra dumelelwa go e tšhela ka polokelong ya Tempele.” ₇Ge ba seno rerišana ka yona ba reka tšhemo ya mmopi wa dipitša, ya ba serapa sa go bolokela bašele. ₈Ke ka lebaka leo setsha seo le lehono se sa bitšwago “Tšhemo ya Madi”.

₉Ya ba ge go phethega sela sa go bolelwa ke moprofeta Jeremia mola a re: “Ba tšere dipapetlana tše masome a mararo tša silibera, tšhelete ye Baisraele ba bego ba kwane go mo reka ka yona, ₁₀ba reka tšhemo ya mmopi wa dipitša ka yona, ka moo Morena a bego a ntaetše.”

₁₁Jesu a ema pele ga mmušiši, gomme yena a mmotšiša a re: “Na ke wena kgoši ya Bajuda?”

Jesu a mo fetola a re: “O a bolela.” ₁₂Eupša a se ke a fetola selo go tše baprista ba bagolo le bagolo ba setšhaba ba mo pharago ka tšona.

₁₃Pilato a ba a re go yena: “Na ga o kwe tše ba go pharago ka tšona?”

₁₄Eupša Jesu a se ke a fetola selo, mo mmušiši a ilego a ba a makala kudu.

₁₅Ka Monyanya wa Paseka mmušiši o be a tlwaetše go lokolla mogolegwa yo lešaba le kganyogago gore le lokollelwe yena. ₁₆Ka nako yeo go be go na le mogolegwa yo mongwe wa go tsebega ka bosenyi yo leina la gagwe e bego e le Jesu Barabase. ₁₇Bjale ge lešaba le kgobokane, Pilato a le botšiša a re: “A le nyaka gore ke le lokollele ofe: Jesu Barabase, goba Jesu yo a bitšwago Kriste?” ₁₈Gape o be a realo ka gobane a tseba gore ba gafetše Jesu go yena ka lebaka la mona.

₁₉Ya re ge Pilato a dutše sedulong sa kahlolo, mosadi wa gagwe a mo romela molaetša wo o rego: “O se ke wa ba wa tsena taba ya monna yoo wa go se be le molato, gobane ke letše ke lorile toro ye e šiišago ka yena.”

₂₀Baprista ba bagolo le bagolo ba setšhaba ba hlohleletša lešaba gore le kgopele Pilato gore a ba lokollele Barabase mme a bolaye Jesu. ₂₁Pilato a botšiša lešaba a re: “Ke ofe mo go ba babedi ba yo le nyakago gore ke le lokollele yena?”

Bona ba mo fetola ba re: “Barabase!”

₂₂Pilato a ba botšiša a re: “Bjale ke direng ka Jesu yo a bitšwago Kriste?”

Ka moka ga bona ba re: “A a bapolwe sefapanong!”

₂₃Pilato a ba botšiša a re: “Etse ke molato ofe wo a obilego?”

Bona ba goa le go feta ba re: “A a bapolwe sefapanong!”

₂₄Ge Pilato a bona gore ga go thuše selo le gore go ka no tsoga mpherefere, a tšea meetse, a hlapa diatla lešaba le mmona, gomme a re: “Nna ga ke na molato lehung la monna yo. Ke dibonwakelena!”

₂₅Lešaba ka moka la fetola la re: “Lehu la monna yo e tla ba dibonwakerena le bana ba rena!”

₂₆Ke moo Pilato a ba lokolletšego Barabase; gomme ge Jesu a seno itiwa ka tshelane ka taelo ya gagwe, a mo gafela go bapolwa sefapanong.

₂₇Bahlabani ba Pilato ba iša Jesu ka ntlong ya mmušiši gomme sekgao ka moka sa bahlabani sa mmokanela. ₂₈Ba mo apola diaparo tša gagwe, ba mo apeša seaparo se sehubedu. ₂₉Ba loga kgare ya meetlwa, ba mo rweša yona, mme ba mo swariša lepara ka letsogo la go ja. Ke moka ba khunama pele ga gagwe, ba mo gegea ba re: “Re a lotšha, kgoši ya Bajuda!” ₃₀Ba mo tshwela ka mare, ba tšea lepara lela ba mo itia hlogo ka lona. ₃₁Ba re go mo gegea ba mo apola seaparo sela, ba mo apeša diaparo tša gagwe. Ke moka ba mo iša go bapolwa sefapanong.

₃₂Ya re ge ba etšwa ba gahlana le monna yo mongwe wa Sirene yo leina la gagwe e bego e le Simone, ba mo gapeletša go rwalela Jesu sefapano. ₃₃Ba fihla felo mo gongwe mo go bitšwago Golgotha, e lego go re “Felo ga Legata”. ₃₄Fao ba neela Jesu beine ye e hlakantšwego le selo sa go galaka; eupša ya re ge a e kwele, a gana go e nwa.

₃₅Ge ba seno mmapola sefapanong ba abelana diaparo tša gagwe ka go tema. ₃₆Ke moka ba dula fao ba mo leta. ₃₇Ka godimo ga hlogo ya gagwe gwa ngwalwa molato wo a pharilwego ka wona wa go re: “Yo ke Jesu, Kgoši ya Bajuda.” ₃₈Bahlakodi ba babedi ba bapolwa le yena, yo mongwe a le ka letsogong la gagwe la go ja, mola yo mongwe a le ka go la nngele.

₃₉Batho ba ba bego ba feta ka tsela ba be ba šišinya dihlogo, ba nyefola Jesu ba re: ₄₀“Owaa, wena wa go kgereša Tempele mme wa e tsoša ka matšatši a mararo! Itlhakodiše ge eba o Morwa wa Modimo! Theoga moo sefapanong!”

₄₁Baprista ba bagolo le boramangwalo le bagolo ba setšhaba le bona ba mo kwera bjalo ba re: ₄₂“O phološitše ba bangwe, fela yena ga a kgone go iphološa! Ga ke re ke yena kgoši ya Israele? A a theoge mo sefapanong gonabjale, gomme re tla dumela go yena! ₄₃O be a botile Modimo, bjale a a mo phološe, ge eba o a mo rata. Gobane o be a re ke yena Morwa wa Modimo!”

₄₄Le bona bahlakodi bale ba go bapolwa le yena ba mo roga bjalo.

₄₅Go tloga ka nako ya lesome le metšo ye mebedi mosegare go fihlela ka nako ya boraro mathapama, naga ka moka ya aparelwa ke leswiswi. ₄₆Ya re ka nako ye e ka bago ya boraro mathapama, Jesu a goelela kudu a re: “Eli, Eli, lama sabagtani?” Ke go re: “Modimo wa ka, Modimo wa ka, o ntlogeletšeng?”

₄₇Ba bangwe ba ba bego ba eme fao ba mo kwa, gomme ba re: “O bitša Eliya!” ₄₈Yo mongwe wa bona a kitima a yo tšea motšitla, a o ina ka beineng ye bodila, a o hlomela patlaneng, a o bea molomong wa gagwe.

₄₉Bale ba bangwe ba re: “Lesa, re bone ge eba Eliya o tla tla a mo hlakodiša!”

₅₀Jesu a buša a goelela kudu, ya ba o a ikhwela.

₅₁Ke moka seširo sa ka Tempeleng sa gagoga ka bogare, go tloga godimo go fihla fase. Lefase la šikinyega, maswika a pharoga, ₅₂mabitla a bulega, gomme badumedi ba bantši bao ba bego ba ithobaletše ba tsoga. ₅₃Ba tšwa mabitleng, gomme ya re ge Jesu a tsogile bahung, ba ya Motseng wo Mokgethwa, ba bonwa ke batho ba bantši.

₅₄Molaodi wa bahlabani gotee le bahlabani bale ba go leta Jesu, ge ba bona lefase le šikinyega le tše dingwe tše di diregilego, ba tšhoga kudu ba re: “Ka nnete motho yo e be e le Morwa wa Modimo!”

₅₅Go be go na le basadi ba bantši moo, ba lebeletše ba le kgojana, e le ba ba bego ba latela Jesu mme ba mo hlokomela go tloga mola a etšwa Galilea. ₅₆Mo go bona go be go na le Maria Magadalena le Maria, mmagoJakobose le Josefa, le mosadi wa Sebediose.

₅₇E rile mantšiboa gwa tla monna yo mongwe wa mohumi wa go tšwa Arimathea. Leina la gagwe e be e le Josefa, le yena e le morutiwa wa Jesu. ₅₈A ya go Pilato, a fihla a mo kgopela setopo sa Jesu. Pilato a laela gore a se fiwe. ₅₉Ka gona Josefa a se tšea, a se phuthela ka lešela le le hlwekilego, ₆₀a se bea ka lebitleng la gagwe, le a bego a sa tšo le gwaya leswikeng. Ke moka a kgokološetša leswika le legolo mojako wa lebitla mme a sepela. ₆₁Maria Magadalena le Maria yola yo mongwe ba be ba dutše moo ba lebane le lebitla.

₆₂Ka letšatši le le latelago, e lego la Sabatha, baprista ba bagolo le Bafarisei ba kopana ga Pilato, ₆₃ba re go yena: “Morena, re sa gopola gore sehwirihwiri sela mola se sa phela se kile sa re: ‘Ke tla tsoga bahung ka letšatši la boraro.’ ₆₄Ka gona, laela gore lebitla la gagwe le letwe go fihlela ka letšatši la boraro, gore barutiwa ba gagwe ba tle ba se ke ba mo utswa, mme ba botša batho gore o tsogile bahung. Bohwirihwiri bjoo bo ka feta le bjola bja pele.”

₆₅Pilato a ba fetola a re: “Tšeang baleti le yo leta lebitla ka tlhokomelo.”

₆₆Ke moka ba ya lebitleng, ba fihla ba kiba leswika lela sekibo sa mmušiši, gomme ba tlogela baleti moo.

₁E rile ge Sabatha e seno feta, mosong wa letšatši la Sontaga, Maria Magadalena le Maria yola yo mongwe ba ya go hlola lebitla. ₂Gateetee lefase la šikinyega ka maatla; morongwa wa Morena a theoga legodimong, a tla a pshikološa leswika lela a le tloša, a dula godimo ga lona. ₃O be a bonala a le bjalo ka legadima, le diaparo tša gagwe di re twaa bjalo ka lehlwa. ₄Ka lebaka la go tšhošwa ke morongwa yoo baleti bale ba thothomela, ba feleletša ba le bjalo ka ge nke ba hwile.

₅Morongwa a re go basadi bale: “Le se ke la boifa; ke a tseba gore le nyaka Jesu yo a bego a bapotšwe sefapanong. ₆Ga a gona mo, o tsogile bahung bjalo ka ge a ile a bolela. Etlang le bone mo a bego a robaditšwe gona. ₇Napang le itlhaganele, le yo tsebiša barutiwa ba gagwe le re: ‘O tsogile bahung, gomme bjale o le thaka pele go ya Galilea; ke moo le tlago mmona gona.’ Ke wona molaetša wo ke le tlišeditšego wona.”

₈Ke moka ba tloga moo lebitleng ba itlhaganetše ba tšhogile, fela ba thabile kudu, gomme ba kitimela go yo begela barutiwa ba gagwe.

₉Gateetee Jesu a gahlana le bona a re: “Dumelang!” Bona ba mmatamela, ba mo swara maoto, ba mo khunamela. ₁₀Yena a re go bona: “Se boifeng! Sepelang le yo botša banabešo gore ba ye Galilea, moo ba tlago mpona gona.”

₁₁E rile ge basadi bale ba sepela, bahlabani ba bangwe bao ba bego ba letile lebitla ba ya motseng, ba fihla ba botša baprista ba bagolo tšohle tše di diregilego. ₁₂Baprista ba bagolo ba kopana le bagolo ba setšhaba mme ba lakana gore ba fe bahlabani bale tšhelete ye ntši, ₁₃gomme ba re: “Le bolele gore barutiwa ba gagwe ba tlile bošego ba mo utswa lena le sa ile ka boroko. ₁₄Ge mmušiši a ka kwa taba ye, rena re tla mmea pelwanatšhwaana ra ba ra šetša gore le lena le se tsene bothateng.”

₁₅Baleti bao ba ile ba tšea tšhelete yeo mme ba dira ka mo ba boditšwego ka gona, gomme le lehono pego yeo e sa le ka moo e ilego ya phatlalatšwa ka gona Bajudeng.

₁₆Barutiwa bale ba lesome le o tee ba ya Galilea, thabeng yela Jesu a bego a ba laetše gore ba ye go yona. ₁₇Ge ba mmona, ba mo khunamela, le ge ba bangwe ba bona ba be ba belaela. ₁₈Jesu a ba batamela, a re go bona: “Ke filwe maatla ohle legodimong le lefaseng. ₁₉Ka gona eyang go ba ditšhaba tšohle, le ba dire barutiwa ba ka: le ba kolobetše ka leina la Tate, le la Morwa, le la Moya wo Mokgethwa, ₂₀le ba rute go phetha tšohle tše ke le laetšego tšona. Tsebang gore ke tla ba le lena ka mehla go fihla mohla lefase le fela.”