To The Word – Day 108

₁Morena o rile: “Ke be ke emetše gore setšhaba sa ka se nkgopele keletšo, eupša sona sa se nkgopele. Ke be ke letetše gore ba nkhwetše, eupša bona ba se nnyake. Ge nkabe setšhaba se se nthapele, ke be ke tla se fetola ka re: ‘Ke nna yo, ke tla le thuša.’ Fela bona ba ile ba se ke ba nthapela. ₂Ka mehla ke be ke itokišeditše go amogela setšhaba se sa ka sa go ngangabala, se se dirago tše mpe gape se itšeelago ka tsela ya sona. ₃Ba fela ba nthumola ba sa lewe ke dihlong. Ba dira dihlabelo tša medimo ya diswantšho ka dirapeng tše ba rego ke tše dikgethwa, gomme ba tšhuma le diorelo godimo ga dialetare tša medimo yeo ya diswantšho. ₄Ba khukhuna le mabitla, ba lala ka maweng gore ba bolele le meoya ya bahu. Ba ja kolobe, ba nwa le moro wa nama ya go bola ya dihlabelo. ₅Ba re go batho ba bangwe: ‘Emang gona moo, le se ke la re batamela! Rena re ba bakgethwa – ga se la swanela go re kgoma!’ Nna batho ba babjalo ba a nkgalefiša, nka se lese go ba tukela bogale bjalo ka mollo wo o sa timego.

₆“Ke šetše ke feditše le pelo ka moo ke tlago ba otla ka gona, gomme ke ngwadile kotlo yeo ya bona. Nka se ba lese ba tšwela pele ka tsela ye, eupša ke tla ba otla ka mo go lekanego ₇dibe tša bona le tša borakgolokhukhu ba bona. Ba tšhumetše medimo ya diswantšho diorelo dithabeng, mme ba nkgoboša ka go direla medimo yeo dihlabelo mebotong. Ka gona ke tla ba otla ka mo go lekanego tše ba di dirilego mabakeng a a fetilego.”

₈Morena o re: “Ga go motho yo a lahlago ntšhuhla ka moka ya diterebe ge e sa na le diterebe tše di lokilego; a ka upša a dira beine ka tšona. Le nna setšhaba sa ka nka se se lahle ka moka – ke tla phološa ba ba ntlhankelago. ₉Ke tla dira gore kgorong ya Juda go tšwe ditlogolo, gomme tšona di tla tšea naga ya ka ya dithaba. Batho ba ka ba ke ba kgethilego, ba ba ntlhankelago, ba tla dula moo. ₁₀Ba tla nkhunamela gomme ba yo fudiša dihuswane tša bona molaleng wa Sharone ka bodikela, le dikgomo tša bona Moeding wa Matshwenyego ka bohlabela.

₁₁“Eupša go lena le ntlogetšego, lena le itebatšago Sione, thaba ya ka ye kgethwa, gomme le tlišetšago Gade, modimo wa mahlatse, dikabelo tša dijo, le tšhollelago Meni, modimo wa tše di hlagelago motho, dikabelo tša seno, go ka se be bjalo. ₁₂Se se tlago le hlagela ke go bolawa ka tšhoša, ka gobane mola ke le bitša ga se la nkaraba, le mola ke bolela ga se la theeletša. Le ile la dira tše mpe mme la ikgethela tše di sa nkgahlego. ₁₃Ke ka lebaka leo ke le botšago gore bao ba ntlhankelago ba tla ba le dijo le dino tše di lekanego, eupša lena le tla bolawa ke tlala la swarwa le ke lenyora. Ba tla thaba, eupša lena le tla lewa ke dihlong. ₁₄Ba tla duduetša ba thabile, eupša lena le tla lla le nyamile, la golola le ekwa bohloko. ₁₅Ba ke ba kgethilego ba tla rogaka ka maina a lena. Nna, Morena, Mong wa bohle, ke tla le bolaya. Eupša bahlanka ba ka bona ke tla ba thea leina le lefsa. ₁₆Nageng ya lena yo a kgopelago tšhegofatšo o tla kgopela go šegofatšwa ka leina la ka, nna Modimo, Mmotegi. Yo a enago o tla ena ka leina la ka, nna Modimo, Mmotegi. Matshwenyego a lena a mabakeng a a fetilego ke tla be ke a lebetše, ke se sa a gopola.”

₁₇Morena o re: “Ke hlola legodimo le lefase le lefsa. Ditiragalo tše di fetilego di tla lebalelwa sa ruri. ₁₈Thabang go ya go ile le hlabe mekgolokwane ka lebaka la tše ke di hlolago. Jerusalema ye mpsha ye ke e hlolago e tla tlala lethabo, gomme batho ba yona ba tla ipshina. ₁₉Le nna ka noši ke tla goa ka lethabo ka lebaka la Jerusalema ka thabela batho ba yona. Go ka se kwagale motho yo a llago goba yo a hlabago mokgoši fao. ₂₀Bana ba ka se sa hwa e sa le masea, gomme batho ba tla phela go fihlela e eba diputswa. Ba ba tlago fihlela lekgolo la mengwaga ba tla tšewa gore e sa le ba bafsa. Yo a hwago pele ga moo e tla be e le gore o rogakilwe ka lebaka la dibe tša gagwe. _21-22Motho o tla aga ntlo, a dula ka go yona – ya se dulwe ke yo mongwe; a bjala merara, a ja dikenywa tša yona – tša se lewe ke yo mongwe. Batho bao ba ka ke ba kgethilego ba tla phela nako ye telele bjalo ka mehlare. Ba tla ipshina ka tšeo ba di šometšego. ₂₃Ba tla atlega mešomong ya bona, le bana ba bona ba ka se welwe ke dikotsi. Ke setšhaba sa ka; ke tla ba šegofatša gammogo le ditlogolo tša bona. ₂₄E tla re pele ba thoma go rapela ka ba araba; ya re ba sa rapela ka phetha tše ba di kgopelago. ₂₅Phiri e tla fula le kwanyana; tau ya fula bjang bjalo ka kgomo, le noga e ka se sa loma. Sione, thabeng ya ka ye kgethwa, go ka se dirwe tše mpe goba gwa gobatšanwa.”

₁Morena o re: “Legodimo ke setulo sa ka sa bogoši, mme lefase ke bogato bja ka. Ka gona, ke ntlo mang ye le kago nkagela yona? Ke ngwako mang wo le kago nkagela ka dula ka go wona? ₂Etse ke nna ka noši ke hlodilego legodimo le lefase, mme tša ba gona! Batho ba ba nkgahlago ke ba ba ikokobetšago gape ba itsholago, ke ba ba phethago melao ya ka.

₃“Setšhaba se dira dihlabelo se sa ntšhetše. Ka gona, yo a dirago sehlabelo ka poo go nna o swana le yo a bolayago yo mongwe; yo a dirago sehlabelo ka kwanyana o swana le yo a robago mpša molala; yo a neelago kabelo ya bupi o swana le yo a dirago sehlabelo ka madi a kolobe; yo a ntšhumelago seorelo o swana le yo a khunamelago modimo wa seswantšho. Ba dira tše ba di ratago, gomme ba kgahlwa ke go khunamela medimo ya diswantšho ya go sišimiša. ₄Ka gona ke tla dira gore ba welwe ke masetlapelo le dilo tše ba di tšhabago, ka gobane mola ke ba bitša ga go yo a ilego a nkaraba, goba a theeletša mola ke bolela. Ba ile ba dira tše mpe mme ba ikgethela tše di sa nkgahlego.”

₅Theeletšang se Morena a se bolelago, lena le phethago melao ya gagwe: “Ka ge le ntheeletša ba bangwe ba gabolena ba le hloile mme ba a le kgetholla. Ba a le kwera ba re: ‘Nke Morena a bontšhe bogolo bja gagwe gomme a le phološe, gore re tle re le bone le thabile!’ Eupša ke bona beng ba ba tlago lewa ke dihlong! ₆Theeletšang! Lešata lela le kwagalago motseng, modumo wola o tšwago ka Tempeleng, ke modumo wa Morena ge a lefiša manaba a gagwe ka lebaka la tše ba di dirilego!

₇“Jerusalema e swana le mosadi wa go no belega a se a ka a šokwa, yo a tswalago morwa a se a ka a kwa bohloko. ₈Kgane o gona yo a kilego a kwa goba a bona taba ya mohuta woo? Na badudi ba naga ba kile ba tswalwa ka tšatši le tee? Goba setšhaba sona se kile sa hlolega ka nako e tee? Jerusalema e ka se šokwe go ya kae pele setšhaba se tswalwa. ₉Kgane le gopola gore nka thoma modiro wa go belegiša mme ka se o feleletše? A nka dira gore Jerusalema e thome go belega ka buša ka thiba popelo?” Go botšiša Morena Modimo.

₁₂Morena o re: “Ke tla le tlišetša boiketlo bjo bo sa kgaotšego, bjo bo swanago le noka ge e dula e ela meetse; mahumo a ditšhaba a tla elela go lena bjalo ka noka ye e falalago. Le tla swana le ngwana yo a nyantšhwago ke mmagwe, a pepulwa, a farwa difarong. ₁₃Ke tla le homotša kwa Jerusalema, bjalo ka mosadi ge a homotša ngwana wa gagwe. ₁₄Ge le bona tšeo di direga le tla thaba. Le tla phela gabotse bjalo ka bjang bjo bofsa. Ke moo nna, Morena, ke tlago bontšha bahlanka ba ka maatla a ka ka go ba hlakodiša, ka ba ka ba bontšha ka moo ke galefetšego manaba a ka ka gona.”

₁₅Morena o tla tla ka mollo le ka dikoloi tša gagwe tša ntwa tša lebelo bjalo ka ledimo, gore a tle a laetše ka moo a tukelago manaba a gagwe bogale ka gona. ₁₆O tla itefeletša ka batho bohle ba lefase. Ba a ba bonago molato o tla ba bolaya ka tšhoša le ka mollo, mme go tla hwa ba bantši.

₁₇Morena o re: “Bao ba itlhwekišago ka moo moetapele wa bona a ba botšago ka gona, gore ba yo khunamela medimo ya diswantšho ka dirapeng tše ba rego ke tše dikgethwa, bao ba jago kolobe le magotlo le tše dingwe dilo tša go šišimiša, ba tla bolawa mmogo. ₁₈Ke tseba megopolo ya bona le ditiro tša bona. Nako e etla yeo ka yona ke tlago kgoboketša ditšhaba tšohle tše di bolelago maleme a mehutahuta. Ge ba kgobokana ba tla bona maatla a ka, ₁₉gomme ba tseba gore ke nna ke ba otlago.

“Eupša mašaledi a bona a mangwe ke tla a roma ditšhabeng le bathong ba mabopong a kgole ba ba sešogo ba kwa setumo sa ka, le gona ba sešogo ba bona maatla a ka: Ke tla ba roma Tarshishe, Libia, Lidia le bakgoni ba yona ba mesebe, le Tubale, le Gerike. Ba tla begela ditšhaba tšeo bogoši bja ka. ₂₀Ba tla tliša banna ba gabolena ka moka ba etšwa ditšhabeng ba abetšwe nna. Ba tla ba tliša thabeng ya ka ye kgethwa kwa Jerusalema ba ba nameditše dipere le dimeila le dikamela le dikoloi tša ntwa le dikoloi tše dingwe, go no swana le Baisraele ge ba tliša dikabelo tša bupi Tempeleng ka dibjana tše di hlwekilego. ₂₁Ba bangwe ba bona ke tla ba bea baprista le Balefi.

₂₂“Bjalo ka ge legodimo le lefsa le lefase le lefsa tše ke di hlolago e tla ba tša neng le neng di hlokometšwe ke nna, ka wona mokgwa wo mobjalo ditlogolo tša lena le leina la lena e tla ba tša go ya go ile. ₂₃Ka monyanya wo mongwe le wo mongwe wa Lebalana le ka Sabatha se sengwe le se sengwe batho ba ditšhaba tšohle ba tla tla go nkhunamela ka Tempeleng ya ka Jerusalema.” O realo, Morena. ₂₄“Ge ba tloga ba tla bona ditopo tša bao ba ilego ba ntsogela maatla. Diboko tše di di jago di ka se tsoge di hwile, le mollo wo o di tšhumago o ka se tsoge o timilwe. Go bona ditopo tšeo go tla šišimiša batho ka moka.”