DIEMA 29

₁Senganga, sešitabakgadi,

se tla hwa sa hwelela ka bjako.

₂Ge baloki e eba baetapele setšhaba se a hlalala;

ge bakgopo e eba baetapele setšhaba se a golola.

₃Moratabohlale o thabiša tatagwe;

yo a kitimago le digwebakathobalo yena o a itobiša.

₄Ge kgoši e buša ka toka, naga e a lala,

eupša ge e tšhediša batho metšhelo ye boima,

e bolaya setšhaba.

₅Yo a kuruetšago mogwera o mo theela molaba.

₆Yo kgopo o tanywa ke dibe tša gagwe,

moloki yena o ikopelela a thabile.

₇Moloki o tseba ditokelo tša badiidi,

yo kgopo yena ditokelo tše bjalo ga a di tsebe.

₈Bakodutli ba hlola mpherefere motseng,

ba bohlale bona ba kokobetša kgalefo.

₉Ge yo bohlale a sekišana le setlaela,

sona se a mo roga,

sa mo sega se sa fetše.

₁₀Ba go rata go tšholla madi ba hloile mohlokabosodi,

baloki bona ba a mo šireletša.

₁₁Setlaela se hlatša kgalefo ya sona,

yo bohlale yena o thekga ditho, a e bipa.

₁₂Ge mmuši a theeletša ditaba tša maaka,

bahlanka ba gagwe ka moka ba fetelwa ke bokgopo.

₁₃Modiidi le mohlakiši wa gagwe ba swana ka selo se tee –

bobedi ba kgontšhwa ke Morena go phela.

₁₄Ge kgoši e šetša gore badiidi ba direlwe ka toka,

e tla buša nako ye telele.

₁₅Thupa le go kgalwa di a hlalefiša;

ngwana wa go itaola o leša mmagwe dihlong.

₁₆Ge bakgopo e le baetapele,

bosenyi bo a ata;

baloki ba tla ba bona ge ba phuhlama.

₁₇O kgale ngwana wa gago ka thupa, o tla ikhutša;

ka moso o tla go thabiša.

₁₈Ge setšhaba se se sa begelwa thato ya Modimo, se tšwa tseleng.

Go lehlogonolo yo a phethago melao ya Modimo.

₁₉Lekgoba ga le kgalwe ka molomo fela,

gobane le ge le kwešiša se le se botšwago,

le ka no se phethe.

₂₀Go na le kholofelo ya gore lešilo le ka kaonafala

go phala motšhogaaboletše.

₂₁Lekgoba le le fepetšwago go tloga bjaneng,

le feleletša le tšwile ka diatleng.

₂₂Motho wa pelwana ye nnyane o hlola diphapano;

sefelapelwana se dira dibe tše dintši.

₂₃Moikgogomoši o ipakela go kokobetšwa;

moikokobetši yena o a hlompšha.

₂₄Moabelanalelehodu tše di utswitšwego

ke wa go se itlhokomele –

o re go kwa moutswetšwa a rogaka,

a no ikhomolela.

₂₅Go tšhaba batho e ka ba sefu;

yo a botago Morena yena o lotegile.

₂₆Ba bantši ba nyaka go ratwa ke kgoši;

ke go Morena fela mo motho a ka hwetšago toka.

₂₇Motho yo a sego a loka o šišingwa ke baloki,

le moloki o šišingwa ke yo kgopo.