Tlaišego, tsogo le lerato la Bakriste – letšatši la 10
Tsogo e re kgontšha go neela kudu
(Di)temana ya Bibele
2 BAKORINTE 8
Kholofelo ye Jesu a re neilego yona ka tsogo e re kgontšha go hlokomela ba bangwe. Yo mongwe le yo mongwe wa rena o na le boikarabelo bja go abelana ka tokologo e mpsha yeo Jesu a re neilego yona le batho ba bangwe – tokologo ya kholofelo.
O ka se dira bjang seo? Ka go nea kholofelo go batho bao o kopanago le bona!
Nagana nakwana, naa o dira phapano maphelong a batho ba bangwe?
Charles Schulz, mongwadi wa diswantšho tša metlae tša Peanuts, o ngwetše tše di latelago:
Ipotšiše dipotšišo tše di latelago:
– Ngwala maina a batho ba bahlano ba go huma le dinala lefaseng.
– Ngwala maina a mahlano a boMasebotsana ba Amerika ba morago bjale (goba boMasebotsana ba Afrika Borwa).
– Ngwala maina a mahlano a bathopa-sefoka sa Nobel.
– Ngwala maina dibapadi ka moka tše di thopilego Oscar mengwageng ye lesome ya go feta.
O rile go tla ba boima go batho ba bantši go araba dipotšišo tše, ka gobane ga re gopole gabonolo diphihlelelo tša nako e fetilego. Le ge batho ba, ka nako ye nngwe, e be e le ba bakaonekaone lefapheng la bona, re lebetše diphihlelelo tša bona. Ditheto go bafenyi ba di a fokotšega gomme ka dinako tše dingwe, ba hlokafala ba se na bagwera! Ge pontšho e fedile, ke bona fela ba ba šalago ba thabetše difoka tša bona.
Le ge go le bjalo, Charles Schulz o tšwela pele go bolela gore go na le dipotšišo tše dingwe tše mmalwa tše re ka di arabago gabonolo:
– Ngwala maina a barutiši ba mmalwa bao ba bilego le seabe se segolo bophelong bja gago.
– Ngwala maina a bagwera ba gago ba bararo bao ba go thušitšego dinakong tše boima.
– Ngwala maina a batho ba bahlano bao ba go rutilego selo se o se gopolago.
– Ngwala maina a bagwera ba bahlano bao o thabelago go ba le bona.
Ke ka lebaka la eng go le bonolo go bontši bja rena go araba dipotšišo tše?
Ka gobane ba ke batho bao ba fetotšego maphelo goba ba re neilego kholofelo!
Batho ba ba dirago phapano bophelong bja gago ga se bao setšhaba se rego ba atlegile. Batho ba o ba gopolago ke bao ba go hlokometšego!
Re swanetše go ithuta go dira phapano maphelong a batho. Re tla atlega fela ge re ithuta go hlokomela le go aga ditswalano. Ka tsela ye o dirago gore batho ba ikwe ka gona go bohlokwa go e na le go dula o nepile.
