Moya wo Mokgethwa – Letšatši la 9

Ge re lebelela thapelo ya Eliya go 1 Dikgoši 18:36, re bona gore ke ka lebaka la eng e be e le yo mongwe wa baprofeta ba bagolo ba Israele: “Morena Modimo wa ka … o Modimo mo Israele”; o be a ikokobeditše: “Ke mohlanka wa gago”; a botega: “ke dirile dilo ka moka tše o ntaetšego tšona”; gape a hloka boithati: “gore batho ba ba go tsebe”. Eliya o ikarabetše ka mo go sa belaetšego go pitšo ya Modimo ka bophelo bja gagwe gomme Morena a bolela le yena le go šoma ka maatla ka yena ka Moya wa Gagwe. Lega go le bjalo go sa šetšwe tswalano ya kgauswi ye Eliya a bego a na le yona le Modimo, bophelo bja gagwe kua Israele bo be bo kweša bohloko ka gobane Kgoši Ahaba o be a mo tšea bjalo ka lenaba la gagwe. Ahaba o be a bona Eliya bjalo ka morwadi wa ditaba tše mpe, bjalo ka batho ba bantši lehono, a sa dumele gore ke sebe sa gagwe se se sa kgaotšego le go khunamela medingwana tše di tlišitšego diprofeto tša kahlolo go yena le Israele go tšwa go Modimo, ka Eliya. Modimo le ga bjale ga a kgotlelele sebe.

Ahaba o be a ikarabela go Modimo le Eliya, eupša o be a nyetše Isebele, moheitene, gomme a tšwela pele go latela dikeletšo tša gagwe le go khunamela medingwana le yena, gomme a gana lentšu la Modimo ka Eliya. Bjalo ka ge e be e le morapedi wa medingwana gomme a laola baprofeta ba 850 ba Baale le Ashera, o be ka mehla a mo aroša. Se ke mohlala wa maleba wa gore ke ka lebaka la eng, mengwagakgolo morago, Paulose a boditše badumedi, “Le se ke la gogišana le bahlokatumelo, gobane toka e ka sepedišana bjang le go se loke? Kgane seetša le leswiswi tšona di ka dudišana?” (2 Bakorinte6:14). Se se sa šoma le lehono.

Ke semaka gore mohlolo wa Eliya o bohlokwa kudu le go makatša e be e le go fenya baprofeta ba Baale Thabeng ya Karmele, gomme ka go realo a kgodiše batho gore Morena ke Modimo wa kgonthe. Letšatši la fihla ge Ahaba a kgobokanya baprofeta ba maaka le batho Thabeng ya Karmele, bjalo ka ge Eliya a laetše, gomme Eliya a botšiša batho: “Le tla lesa neng go ba diphiri tša mekokamebedi? Ge Morena e le Modimo, mo khunameleng; eupša ge Baale e le Modimo, gona khunamelang yena!” (1 Dikgoši 18:21). A laela baprofeta ba Baale gore a be bona ba pele go aga aletare le go hlaba poo go direla Baale sehlabelo go yona; le yena a hlaba poo go direla Morena sehlabelo morago ga bona. Ba be ba sa dumelellwa go tšhuma mollo ka noši bjalo ka ge tlhohlo e be e le go bona gore ke ofe modimo yo a nago le maatla a go tšhuma sehlabelo, le go hlatsetša gore ke Modimo.

Letšatši ka moka baprofeta ba maaka ba goeletša Baale, le go itshega ka ditšhoša, ba emetše lefeela gore a ba arabe, gomme a sa ba arabe; eupša ge Eliya a rapela gore Modimo a tšhume sehlabelo seo a se lokišitšego. Modimo a romela mollo le semeetseng gomme sa tšhuma sehlabelo: “Ge batho ba bona seo ba itahlela fase ka difahlego, ba goa ba re: ‘Morena ke yena Modimo! Morena ke yena Modimo!’ ” (1 Dikgoši 18:39).