Moya wo Mokgethwa – Letšatši la 10

“Ga ke sa kgona, Morena. Tšea moya wa ka; ga ke phale …” Ge e ba re boletše mantšu a goba re tseba yo mongwe yo a boletšego, re ka ba le tsebo ya ka fao Eliya a bego a ikwa ka gona. Go bao ba sa kago ba ikwa bjalo, go utolla gore Eliya o ikwa ka tsela ye le ge a be a itemogetše phenyo kua Karmele, gomme kudukudu morago ga ge Modimo a arabile thapelo ya gagwe ka maatla kudu, se se bonala se makatša. Ke ka lebaka la eng nkgwete ye, yo ka sebete a emego kgahlanong le Ahaba, a bitša mollo go tšwa legodimong, a rapela ka katlego gore pula e fediše komelelo, gape a filwe maatla a phagametšego tlhago go ka kitima go feta karikana ya Ahaba, a ikwe a se na mohola mo a nyakago go hwa? Ga go motho yo  a se nago maikwelo a fošagetšego, le ge a atlegile goba a fihleletše dilo tše kgolo tša Modimo. Kgatelelo ya monagano, manyami, bodutu le go lapa gantši di ba gona morago ga maiteko a magolo le boikgafo.

Bontši bja tše di gateletše Eliya nakong ye. Modimo o itlhatsetše go batho ka yena, gomme phenyo e kgolo e fentšwe, eupša ga ya fetola go botega ga Israele kudu bjalo ka ge Eliya a be a holofetše, ka ge Isebele a be a sa na le khuetšo e maatla ya bobe. Eliya o be a nyamile kudu, gape a oketša letšhogo go mathata a gagwe ge Isebele a ena go mmolaya letšatsi le le latelago, morago ge ge a kwele gore Eliya o bolaile baprofeta ba gagwe ba 850. Gomme ke kae moo moprofeta wa mafelelo wa kgonthe, ka ge a dumela, a kago hwetša khomotšo ge a le ka tlase ga kgatelelo e bjalo? “Ka bjako morongwa a mo kgwatha a re: ‘Tsoga o je.’ Eliya a lebelela ka gohle, gomme a bona senkgwa se se bešitšwego maswikeng a a tšhumilwego ka mollo, le legapana la meetse kgauswi le hlogo ya gagwe. Morongwa wa Morena a boa mme a mo tsoša la bobedi …” (1 Dikgoši 19:5-7). Ka nako ya gagwe ya tlhoko, Modimo ga a kwešiša fela, eupša a bontšha gore o Hlokomela ka dilo tše di kago bonwa; A lemoga go lapa ga Eliya le tlala gomme, kua leganateng, a mo abela dinyakwa tša gagwe ka lerato. O ka dupelela senkgwa?

Ka maatla a mpshafaditšwego a sepela go ya Thabeng ya Horebe ye e lego dikilometara tša go feta tše 300. Fao, ka leweng, “ka bjako Morena a mmotšiša a re: Eliya, a o dira eng mo?” (1 Dikgoši 19:9). O ile a ikimolla ka go rolela morwalo wa gagwe go Modimo le go tsepelela go Yena gape. Ka dinako tše dingwe re lahlagelwa ke go tsepelela go phišego ya rena go Morena le go ipha tšeo ge e le gabotse e lego tša Gagwe. Gomme re hloka tekatekano ya go ka tsošološwa. Modimo gape o nea Eliya se a se hlokago: e se mošomo o mongwe o boima gore a o dire, eupša go e na le seo boitemogelo bjo kgahlišago bja Gagwe, moo a tšwelelago go Yena ka noši: “Morena a feta a etilwe pele ke ledimo le legolo le le bego le pharola dithaba, le pšhatlaganya marako, eupša Morena o be a se moo phefong yeo. Ledimo le ile la se hlwe le tšutla, gomme ka morago gwa ba le tšhišinyego ya lefase, eupša Morena o be a se moo tšhišinyegong yeo. Ka morago ga tšhišinyego gwa ba le mollo, eupša Morena o be a se moo mollong woo. Gomme ka morago ga mollo gwa kwala lentšu la Morena a bolelela fase mola go ile tuu. Ge Eliya a ekwa lentšu leo, a ipipa sefahlego ka seaparo sa gagwe gomme a tšwa a ema mojakong wa lewa” (1 Dikgoši 19:11-13).

Ka Ientšu la go bolelela fase, Modimo a mo matlafaletša morero wa gagwe wo o bego o se wa fela. Go a kgahliša!