Moya wo Mokgethwa – Letšatši la 8

Mongwadi wa pesalome ye ke Kgoši Dafida, yo mongwe wa banna ba go tsebega kudu ka go Testamente ye Tala le rakgolokhukhu wa Jesu. Dafida ke monna yo Samuele a boletšego ka yena a re: “…Yena o tla inyakela monna yo a mo kgahlago …” (1 Samuele 13:14) gomme ka yena go ngwetšwe: “Samuele a tšea lenaka la makhura a mohlware gomme a tlotša Dafida … Ka bjako moya wa Morena wa laola Dafida mme wa ba le yena go tloga ka letšatši leo” (1 Samuele 16:13).

Go a tsebega gore Dafida e be e se motho yo a phethagetšego. Lega go le bjalo, a matlafaditšwe ke Moya, ya ba mohlabani yo bogale yo a bušitšego Israele go letago la Modimo mengwaga ye 40, gomme mafelelong a pušo ya gagwe o be a fihleletše khutšo. Le ge a thomile bjalo ka modiši yo a ikokobeditšego, a diša mehlape ya tatagwe, a dumela go bogolo bja Modimo ka pelo ya gagwe ke moka. O be a le sereti sa tutuetšo le moopedi yo a tšholletšego pelo ya gagwe ka moka go Modimo diretong tša gagwe go dipesalome moo rena, gape, re kago kgwathwa ke maatla a Moya go yena. Re itemogela bobotse bja dipesalome bjalo ka ge di bonagatša borapedi bja Dafida le go ithekga ga gagwe go Modimo, le potego ya Modimo go yena. Re lemoga gore re na le dikgopolo le dinyakwa tša go swana.

Dipesalome di re nea tsebo ya nnete ya gore ke eng se se dirilego Dafida “monna yo a kgahlago Modimo” (Ditiro 13:22). Le ge a be a le kgoši ye kgolo, ga se a lebala gore e be e le ka Modimo fela gore a buše; a bona tšohle bophelong bja gagwe a di filwe ke Modimo: “Modimo yo ke botšhabelo bja ka bjo maatla; o nthuša go phela ke se na bosodi” (2 Samuele 22:33). Go sa šetšwe tše ka moka, o be a na le nnete ka mafokodi a gagwe le tlhoko ya go ipolela dibe tša gagwe, go lebalelwa ke Modimo, le go mpshafatšwa: “Buša o mphe lethabo la motho yo o mo phološitšego, mme o dire gore ke rate go go theeletša” (Pesalome 51:12). Ga se a ke a ipona a le boemong bjo bo fapenego le bja ba bangwe, a swanelwa ke tshwaro e fapanego go tšwa go Modimo.

Temaneng ya lehono Dafida o tlalelong o kgopela Modimo go se tšee Moya wo Mokgethwa go yena, a phuphuthela mogau wa Gagwe morago ga go otsa le Batseba le go bolaya monna wa gagwe. O kgopela Morena tebalelo le tsošološo. Moya wo Mokgethwa o bohlokwa go se, ka gobane ke Yena yo a ahlolelago sebe pele le go kgontšha tshokologo le go ipolela go Modimo, go tliša tebalelo ya Gagwe le mpshafatšo.

Maabane re ahlaahlile tlhoko ya rena ya maatla a mpshafatšo ya Moya wo Mokgethwa go fetoša mafelo maphelong a rena. Lehono re ithuta go tšwa go Dafida gore sebe se baka lepheko magareng ga rena le Modimo le le thibelago kgolo ya rena le lethabo la rena, le gore Moya wo Mokgethwa o re thuša go lemoga lepheko le le go hwetša tebalelo le tsošološo.