Moya wo Mokgethwa – Letšatši la 6

Maabane, re ahlaahlile boitemogelo bja Bileamo le pokolo ya gagwe, le phišego ya gagwe ya go tšea leeto go ya Moaba ge Modimo a mo thibetše go ka rogaka Baisraele. Re ka ba re maketše gore a ka nagana gore moputso wa kgoši ya lefase o kganyogega kudu go e na le go obamela Modimo, yo a putsago kudu bao ba mmotegelago, eupša go itirela boithatelo le megabaru go ka senya kahlolo e botse. Re ka dumela gore go boima go beela ka thoko thato ya rena le ditokišetšo ge Modimo a re bitša gore re botege go Yena; gomme go swana le Bileamo le pokolo ya gagwe, ka nako ye nngwe re omanya motho yo ka yena Morena a lekago go re fihlelela, ka gobane re palela ke go bona seswantšho sa nnete.

Lehono, lega go le bjalo, re tsepelela go moprofeta yo a sa kago a dumelela thato ya gagwe go ka mo šitiša go merero ya Modimo ka yena kua Israele le Juda. Mika o be a botegela Morena, gomme a thabišwa ke go ba le maatla le toka tša Moya wa Gagwe go yena. Modimo o šomišitše Mika go lwantšha sebe sa batho ba Gagwe kua Israele le Juda. Sebe se se iponagaditše bjalo ka go hloka toka, go se be le botho, bootswa, go se botego borapeding. Lega go le bjalo, a bolela gabotse ka lerato le legolo la Modimo le mogau go bao ba fetogago le go botega go Yena, le go rata ba bangwe.

Mika a itemogela kholofelo le khutšo ka gobane a lemogile gore maatla a gagwe a tšwa go Moya wa Morena, gomme a thaba kudu gore Modimo o bile le mogau le maatla go lebalela bao ba itsholelago dibe tša bona: “Ke ofe Modimo wa go swana le wena Morena, yo a swarelago mašaledi a setšhaba sa gago makgopo a bona, yo a sa ba otlelego dibe tša bona? Wena ga o galefele sa ruri, eupša o thabela go re rata ka lerato le le sa fetogego” (Mika 7:18).

A re ahlaahle se se lego bohlokwa go rena: go thabela toko le khutšo bjalo ka Mika, goba, bjalo ka Bileamo, pušo ya phišego, maatla, le lehumo tšeo di re foufatšago ge Morena a leka go re hlahla tseleng ya maleba, gomme ka go realo go thibela dikarabo tša Gagwe go thapelo. Ga re nyake gore Yena a eme pele ga rena ka tšhoša go re thibela ge re ya kgahlanong le thato ya Gagwe!

“Mathomo a bohlale ke go boifa Morena; go tseba Mokgethwa ke yona temogo” (Diema 9:10). Ga re kgone ka dinako ka moka go kwa Morena a bolela le rena ka go hlaboša lentšu, eupša ge re gola tsebong le kwešišong ya Lentšu la Gagwe, Bibele, re utolla gore re ka kgona go lemoga thato ya Gagwe le go kgona go sepela ka boikokobetšo le Yena ka toko, ka maatla a Moya.