Moya wo Mokgethwa – Letšatši la 5

Ge re sepetša dimpša tša rena, ka nako ye nngwe re ikhwetša ka gare ga boemo bja kgateletšago, ge mpša ye re e sepetšago e befela ge e kopana le ye nngwe goba tše dingwe le beng ba tšona bao ba di sepetšago. Go bjalo ka ge eka ga e thabele go bona tše dingwe di sepela tseleng ya “yona” gomme e gogela morago le go thoma go “bolela” le rena ka go ngunanguna ga go itira moloki, ga go se kwešišege, e le gare e ipelaetša, e re gapeletša go ema le go bolela le yona ka boleta, goba go e gomiša re boele morago, ka kholofelo ya gore e tla lebala “thogako” ye e kwišišegago. Go molaleng gore, seabe sa yona ge re be re sepela se a hlobaetša le go hlohla, go swana kudu le se Bileamo a itemogetšego sona ka pokolo ya gagwe tseleng ya go ya Moaba; phapano ke gore Modimo o boletše le yena ka pokolo go emiša morero wa gagwe o fošagetšego.

Re bona ka fao Moya wa Modimo o šomilego go Dafida le Joshafate, dikgoši tše pedi, eupša go mo kwa Yena a bolela ka Bileamo, moloi, le ka pokolo ya gagwe, phoofolo ya go se bolele, ke selo se se sa letelwago. Ke pokolo ye e bonago morongwa wa Morena gomme e gana go sepela go ya pele, lekga la pele ya phamogela ka tšhemong, lekga la bobedi ya kgobola leeto la Bileamo ka leboto, gomme lekga la boraro ya patlama fase, lekga le lengwe le le lengwe e thibela Bileamo go ya pele. Ge a e betha lekga la boraro, re bala gore, “Ke moo Morena a dirilego gore pokolo e bolele, gomme ya re go Bileamo: ‘Ke go dirile eng ge o mphethile gararo bjale?’ … ‘A ga se nna pokolo ya gago ye o e nametšego ka mehla go fihlela lehono? Kgane nkile ka tlwaela go go swara ka mokgwa wo?’ … Ke mo Morena a dirilego gore Bileamo a bone morongwa yola a eme fao a emišitše tšhoša” (Numeri 22:28,30-31). “Ke ka lebaka lang o bethile pokolo ya gago gararo ka tsela ye? Ke tlile go go thibela tsela, ka gore ga wa swanela go tšea leeto le … ‘Ge e ka be e se ya šikologa, nkabe ke go bolaile mme yona ka e lesa ya phela.’ Bileamo a mo fetola a re: ‘Ke dirile sebe …’ ” (Numeri 22:32-34).

Re lemoga gore Modimo ga a lekanyetšwe ge A nyaka go fihliša molaetša wa Gagwe gomme O bolela ka maemo a sa tlwaelegago, a go hloka Modimo, ka tlholo, ka badiredi bja Gagwe le ka Bibele. Bileamo o gokeditšwe ke moputso o mmotse wo o bego o fiwa ke Balaka, kgoši ya Moaba, bjalo ka tefo ya go rogaka Baisraele. Le ge Bileamo a be a boditšwe ke Modimo go se sepele le batseta ba Moaba le go se rogake Baisraele ka gobane ba be ba šegofaditšwe, o sepetše le bona, gomme ka lebaka la tiragalo ye ya go makatša ya pokolo ya gagwe gore a feleletše a dira se Morena a mo laetšego. Morago re botšwa gore: “… gomme a bona setšhaba sa Israele se hlomile mešaša, kgoro ka kgoro. Moya wa Modimo wa mo tsena, gomme a hlaba sereto a re … ‘Yo a šegofatšago Baisraele o tla šegofatšwa, yo a ba rogakago le yena o tla rogakwa’ ” (Numeri 24:2,9). A Modimo wa go makatša!