Moya wo Mokgethwa – Letšatši la 4

Gopola ka se o kago se nagana ge o be o bogetše ditaba thelebišeneng gomme go tsebgaditšwe gore madira a Isarele a ile ntweng ntle le dibetša go yo šireletša naga kgahlanong le mohlasedi, gomme ba beile, kua pele ga madira, sehlopha sa baopedi go tumiša Modimo ge ba dutše ba le tseleng.

Maabane re kwele ka fao Dafida a dumetšego gore phenyo ya gagwe kgahlanong le Goliate e be e le ya Morena, gomme ge Joshafate a be a le kgoši ya Juda, Moya wo Mokgethwa wa mo matlafatša go bontšha kgonthe ye ya go swana. Lehono re bona kgoši ye e boifago Modimo e ya ntweng le madira a gagwe ba sa swara dibetša, eupša ka sehlopha sa baopedi ba ba eteletše pele gomme ba tumiša Modimo ka maatla a bona ka moka.

Re bala gore,“Morena a ba le Joshafate ka gobane bophelo bja gagwe bo be bo swana le bja tatagwe bja mathomong. O be a sa khunamele Baale …” (2 Dikronika 17:3-4). Joshafate a lemoga gore go se tsebe Lentšu la Modimo magareng ga batho ba gagwe go dirile gore ba diile moyeng, gomme a roma bahlankedi le baprista go ruta batho Molao wa Modimo. Se se bile le seabe se segolo moo “Morena a dira gore batho ba mebušo ka moka ya dinaga tše di bapilego le naga ya Juda ba boife …” (2 Dikronika 17:10) gomme Joshafate a ba yo maatla gomme a huma, gomme gwa ba le khutšo ge a tšwela pele go ruta batho ditsela tša Morena.

Gomme a befediša Modimo gomme a ipakela mathata. A dumelela morwa wa gagwe go nyala morwedi wa Ahaba, gomme a ikgwerantšha le kgoši ye a lahlilego moprofeta wa nnete wa Modimo, Mika, gomme a ba ka lehlakoreng la bao ba bego ba mmotša se a bego a nyaka go se kwa. Le ge Joshafate a lemogile ditekanyetšo tša maaka tša Ahaba le go mo kgala (2 Dikronika 18:7), o be a ikhwetša a apere diaparo tša gagwe tša bogoši a thušana le yena ntweng, a hlaselwa gabonolo ke lenaba. Eupša ge a llela Morena gore a mo phološe, Modimo o be a botega gomme a mo phološa, eupša a tlogela Ahaba yo a bego a apere diaparo tša go gakantšha gore a gobatšwe o šoro ke motsi wo o mo hlabilego mahlakanong a seaparo sa gagwe sa boitšhireletšo (2 Dikronika 18:33).

Batho ba go boifa Modimo ba dira diphošo ka dinako tše dingwe ge dipelo tša bona di gokeletšwa go botegeleng Modimo ke tikologo ya bobe lefaseng. Lega go le bjalo, Modimo o šomela go loka ga batho ba Gagwe gomme tsela ye ya go ithuta e dirile gore Joshafate a tshephe Modimo le go feta. A kgothaletša batho ba gagwe gore “Tshephang Morena Modimo wa lena, gomme le tla tia …” ge ba sepela, ntle le dibetša, ba ya ntweng kgahlanong le madira a mantši a Bamoaba, Baamone le a Baedomo. Ba tshepha Modimo ka phenyo gomme ba mo tumiša, gomme A tsenya manaba a bona kgakanegong, gomme a lwa seng sa bona.

Ke mo go botse ge ba ile “ba boela Jerusalema ka megobo, ka gobane Morena o be a fentše manaba a bona” (2 Dikronika 20:27).