Moya wo Mokgethwa – Letšatši la 20

Ka mantšu a kgonthišetšo re thoma palo ya rena lehono. Bjalo ka Bakriste, re filwe paseporoto ya go phela gabotse ka gobane re “bapotše tlhago ya rena ya sebe ka diphišego le dikganyogo tša yona” gomme ga bjale re hlahlwa ke Moya wo Mokgethwa ka gare go rena. Se ga se re gore re lahlegelwa ke mafolofolo a rena go mathabo a bophelo, eupša gore maatla e išwe go dilo ka moka tše lokilego, go re dumelela lethabo le sa tswakwago. Re kgonthišetšwa khutšo le kgotsofalo ka gobane lethabo la rena ga le kgotsofatšwe ke sebe le thulano. Re ka nagana ge Paulose a re gopotša gore re swanetše “go gata ka mošito o tee le Moya”.

Ge re gata ka mošito o tee le motho, re leka ka gohle go sepela ka lebelo la go swana le la gagwe – ga re šalele morago goba go kitima pele. Paulose o eletša se ka gobane ke selo sa tlhago, ge dilo di sepela gabotse, go “dula gomme ra thekga ditho” gomme ra šalela morago go ditokišetšo tša Modimo go rena; goba ka lehlakoreng le lengwe, go itebogiša ka tšwelopele e botse le go leka go thomiša ka noši, ka ntle ga tlhahlo ya Moya. Ge re lahlegelwa ke go gata ka mošito o tee le Moya, re ba kotsing ya go lahlegelwa ke lethabo la rena le maatla a rena.

Paulose o ngwaletše Bagalata lebakeng le lengwe ge a lemoga phetogo, “Bjale lethabo lela la lena le feletše kae?” (Bagalata 4:15); gomme go le lengwe, “Etse le be le swere gabotse bjang! Bjale ke mang wa go le tlogediša nnete? O le kgonne bjang? Nnete ga se la e tlogedišwa ke Modimo yo a le bitšago” (Bagalata 5:7-8).

Ge re leka go eta Moya pele, diabolo o tsena dilo gare ka gobane re tšwile tseleng. Se se bolela go sebe se Paulose a bolelago ka sona: boikgogomošo, kganyogo, tumo. Re ipona re le ba bakone go buti goba sesi wa rena, gomme re leka go gatela pele, go sa šetšwe thato ya Modimo. Palelo ye e tšwelelago e tliša manyami, le go baka dikgohlano magareng ga badumedi, ka ge go sena yo a šetšago Morena. Se ke ka lebaka leo Paulose a rego, “Motho a se dire selo ka bojato goba ka go nyaka boikgantšho bja lefeela, eupša ka boikokobetšo a ipone a phalwa ke ba bangwe. A se šetše fela tša go ikhola, eupša a šetše tša go hola ba bangwe” (Bafilipi 2:3-4).

Ge badumedi ba ikokobetša go Morena, Moya o hlatloša khutšo le botee magareng ga bona, go sa šetšwe maemo, gomme ba a thekgana. Ge Moya o sa šetšwe, go ba le diphapano le lehloyo tšeo di neago diabolo monyetla wa go hlasela ka diteko tša mehutahuta tša go se lemogege, go akaretša ditokelo, ditšhitišo, mabaka a go se kwagale le tlhakatlhakano, tše di re gogelago go yena.

Nnete ke gore ka thušo ya Moya re thabiša Modimo, gomme ntle le wona re thabiša diabolo, ka gona “a re sepeleng ka mošito o tee le Moya”.