Moya wo Mokgethwa – Letšatši la 21

Lehono Paulose o hlaloša gabotse se mmušo wa Modimo e lego sona: boemo bja toko, khutšo le lethabo Moyeng wo Mokgethwa. Tsepelelo e go dilo tša Moya tše di tlišago bophelo le lethabo le go re lokolla go ipshina ka bophelo bjo feletšego. Ga bo go dilo tša nama. Moya wo Mokgethwa o re kgontšha go phela ka tsela ye e kgahlago Modimo, ye e ka thabelago ke ba bangwe.

Ka dinako tše dingwe batho ba na le go nagana gore mmušo wa Modimo ke selo sa nama: melao mabapi le dijo le dino tše di bakago dingangišano le kahlolo. Go nagana ka tsela ye go a re šitiša bjalo ka ge go dirile batho ba nako ya Jesu. Ba be ba lebeletše go tla ga mmušo wo ba kago o bona gomme ba sa kwešiše dithutišo tša Jesu tša gore “mmušo wa Modimo o ka gare go wena” (Lukase 17:21) — selo se se thomago lefaseng gomme gwa ipshinwa ka sona Moyeng.

Go Mateu 6:33, Jesu o ruta gore: “Lena sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona.” Selo sa rena sa pele bophelong ke sa moya: Modimo o tla re abela dinywakwa tša rena tša nama, ge re dira gore A tle pele bophelong bja rena. Go ya ka nna, ke a makala le go tlala ka lethabo ge ke gadima morago go ditsela tše ntši tše Modimo a nkabetšego ka tšona bophelong bja ka, ka dinako tše dingwe ntle le gore ke di rapelele!

Re a lebalelwa le go hlwekišwa ke madi a Kriste gomme re phela maatleng a Moya wo Mokgethwa, gomme re na le tšohle tše re swanetšego go di thabela! Re ka fa Morena se sengwe le se sengwe se se dirago gore re tšhoge, nolege moko goba re gateletšege, re se tlogele le Yena, gomme re dumelele Moya go re hlahla go ya pele go se se re loketšego. “Ka ge bjale re lokafaditšwe ka tumelo, re boelantšwe le Modimo ke Jesu Kriste, Morena wa rena. Ke yena a re filego mahlogonolo a Modimo ka tumelo ya rena ao bjale re phelago ka ona. Ke ka lebaka leo re ikgantšhago ka letago la gagwe le re le holofetšego” (Baroma 5:1-2).

Re ketikile gabotse Moya wo Mokgethwa kgwedi ye ge re be re hlohlomiša maatla a Gagwe a magolo ao a apareditšego bobedi diTestamente ye Tala le ye Mpsha, gomme bjalo ka ge re utolotše bodiredi bja Gagwe bjo bo lego gona go le ka mošomo wa Modimo Tate le Jesu Kriste, a tliša lethabo le bophelo ge A hlatsetša lerato le mogau tša Modimo ka Morwa.

Ake tsebo ye e godiše temogo ya rena ya Moya wo Mokgethwa maphelong a rena, le go re hlohleletša go phelela Kriste ka sebete maatleng a Gagwe letšatši le letšatši.