Moya wo Mokgethwa – Letšatši la 19

Bokriste ga se bja mafšega. Bakriste ba bitšwa go “Se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong” (Baroma 12:2). Se ke tlhohlo e kgolo, ka ge Bakriste ba swanetše go kgetha ka mafolofolo go sepela ka Moya gore ba phele maphelo a boikokobetšo, a go obamela, a lerato ao a tletšego mogau le toko le go fediša ditsela tša sebe, ge e le ka nnete le kopanelo le Modimo ka tebalelo go Kriste. Re dira se gobane “Modimo ke seetša, gomme mo go yena ga go na leswiswi le gatee. Bjale ge re re re ba tee le yena etšwe re dutše leswiswing, re a aketša, ga re phethe thato ya Modimo. Eupša ge re phela seetšeng bjalo ka yena ge a le seetšeng, gona re ba tee seng sa rena, gomme madi a Jesu, Morwagwe, a re hlatswa dibe tšohle” (1 Johanese 1:5-7).

Re phela lefaseng le tletšego ka lehloyo, manyami, ntwa, go fela pelo le go kgotsofatša dikganyo – dilo ka moka tše di lego kgahlanong le le go thulana le dika le dikenywa tša Moya. Bjalo ka Bakriste, re phela thulanong ya go se fele le tlhago ya rena ya sebe ge re leka go phela ka lerato la Jesu dipelong tša rena, re hlahla ke Moya, re ikemešeditše go obamela Lentšu la Modimo. Le Paulose o ikwetše thulano ye ka gare go yena, ye re e bonago mantšung a gagwe: “Gobane ke a tseba gore mo go nna ga go dule se se lokilego – ke ra nameng ya ka. Ka gore le ge ke nyaka go dira tše di lokilego, ga ke kgone. Ga ke dire tše di lokilego tše ke nyakago go di dira, eupša tše dimpe tše ke sa nyakego go di dira, ke a di dira” (Baroma 7:18-19).

E ka ba go na le yo a sa tsebego se? Re hwetša lethabo la go sepela ka go dumelelana le Moya maphelong a rena ge A re kgontšha go amogela ka potego boemo bja rena le go gola ka bjona. Phenyo ya go sepela ka go dumelelana le Moya ke tswalano ye e fotogafetogago A re dumelelago go ba le yona le Modimo Tate, ka Jesu Morwa; e se ka gobane re ba pethagetšego, eupša ka gobane re lebaletšwe le go ineela go Yena.

Ka go šoma ga Gagwe ka go rena, re thoma go bona phetogo maphelong a rena a tlhago. Go tloga ka nako ye re amogelago bofokodi bja rena le nyako ya rena ya Moya wo Mokgethwa ka thapelo, re amogela bogona bja Gagwe maphelong a rena; O re tutuetša go ba le nako le Modimo gomme go re thuša go aga maphelo a rena a semoya; tumelelo ya Modimo go ditokišetšo tša rena e ba bohlokwa go rena; re a fetoga le go ikemišetša go dumelela Yena go fetoša dinyakwa tša rena. Ge re bona dikarabo tša dithapelo tša rena, re hwetša lethabo la go rapela go ya ka thato ya Gagwe.

Se bohlokwa kudu, se se matlafatša tswalano ya rena le Yena le go re dira gore re nyake go ba kgauswi le Yena; re lemoga dilo tše fošagetšego tše di re lekago, goba di re gomaretšego. Moya o re matlafatša go kgetha se se lokilego go se fošagetšego, lerato go lehloyo, kgaugelo goba kahlolo le go re putsa ka boitemogelo bja bophelo bjo feletšego bjo Jesu a hlokafetšego go bo tliša go bohle bao ba mo latelago.