Moya wo Mokgethwa – Letšatši la 18

Dikenywa ke dilo tša go kganyogega. Ge o šegofaditšwe ka mohlare wa dikenywa ka serapeng, o tla tseba lethabo le le hwetšwago go boneng dikenywa di gola go tloga e sa le mahlogedi a mannyane a matala go ba ditšweletšwa tše bonagalago, tše ntši, gape le kgotsofalo ya go ja go butšwa ga tšona gwa meetse a bose. Kgoketšo ya tšona gantši e tutueditše borakgabo go thala diswantšho tša tšona, mola ba bagwe ba thabela fela go di ja morago ga go leta matšatši a mantši gore di butšwe!

Eupša go thweng ka dikenywa tše di tšwago go Moya wo Mokgethwa? Go Mokriste, mohlomongwe se ke papišo ya maleba ya selo se se goketšago kudu le go kgotsofatša kudu. Dikenywa tša Moya di tšweletšwa fela go bao ba tsebilego Jesu bjalo ka Morena le Mophološi, ka gobane Moya o šoma ka gare go bona. Mang le mang a ka hwetša dikenywa tša tlhago ka go dikga mohlareng goba ka go di reka lebenkeleng, eupša ga re kgone go tšweletša dikenywa tša Moya ka gare go rena.

Lerato, lethabo, khutšo, bopelotelele, botho, loka, potego, boleta, le boitshwaro ke dipharologantšho tša semelo tše di hwetšwago go Jesu ka Noši gomme ke tšona tše A di tšweletšago ka go rena. Jesu o boditše barutiwa ba Gagwe: “Ke le fa molao wo mofsa, wa gore le ratane. Bjalo ka ge ke le ratile, le lena le rataneng. Ge le ratana ke mo batho ba tlago tseba gore le barutiwa ba ka” (Johanese 13:34-35). Se ke selo se sebotse kudu, ka ge re nyaka go lemogwa go ba ba Jesu, ka gobane O tšere sebe sa rena gomme a re apeša ka toko ya Gagwe – eupša ga go bonolo. Jakobose o re hlohla ka gore, “Banabešo, na mogo o ka enywa dihlware goba morara wa enywa mago? Le sediba sa meetse a letswai se ka se tšwe meetse a mabose” (Jakobose 3:12).

Re a hlohleletšwa, lega go le bjalo, ge rena, le ba bangwe, re kgona go bona dika tše dibotse tše di golago ka gare ga rena, eupša bjalo ka ge dikenywa tša tlhago di tšea nako go gola, le dikenywa tša Moya wo Mokgethwa ga di tšwelele ka bošego bjo tee, gomme re swanetše go se nolege moko ka tšwelelo ya tšona ya go nanya ka gare go rena.

Jesu o rile: “Dienywa tše dibotse di kgewa mohlareng wo mobotse; tše e sego tše dibotse di kgewa mohlareng wo o sego wo mobotse. Mohlare o tsebja ka dienywa tše o di enywago” (Mateu 12:33). Se se re ruta gore, bjalo ka balatedi ba nnete ba Kriste, dikenywa tša rena di swanetše go ekiša Yena gomme re ipona re thoma go ekiša kudu diabolo, re hloka go hlahloba leswa boemo bja rena; ka gobane ka dinako tše dingwe re na le go iketla le go se lemoge gore re theletše; goba re ka ba re tšere letago la Modimo ra ipha lona gomme boikgogomošo bo tšere taolo. Le ge re lokolotšwe maatleng a sebe, re sa na le bokgoni bja go ka dira sebe gomme re hloka go se bolela go Morena ka pela ge re fetša go wa, gore re kgone gape go ineela go Modimo ka Jesu gomme re laolwe ke Moya.

“Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle” (1 Johanese 1:9).