Moya wo Mokgethwa – Letšatši la 13

Ke bile le makgolo yo bohlale yo a nthutilego gore go bolela maaka go nyamiša Modimo, go thabiša diabolo le gore ba tla tseba nnete. O be a nepile. Ge nnete e utollwa morago ga ge batho ba be ba botšana maaka, go tshephana go a fela tswalanong ya bona, e ka ba magareng ga bagwera, monna le mosadi, motswadi le ngwana, mongmošomo le mošomedi, mmušo le badudi ba naga – ge e le gabotse boemong bofe goba bofe bophelong bjo bo kago akanywa moo nnete e ganwago. Ke diabolo fela yo a segago.

Tswalano magareng ga Tate, Morwa le Moya wo Mokgethwa e theilwe go nnete. Ge re nagana ka go ba le tswalano le Modimo, e swanetše e be ya potego gomme go direga seo se swanago. Re hloka Moya wo Mokgethwa go re hlahla maemong a mantši a go fapanafapana ao re itemogelago wona maphelong a rena a letšatši le letšatši. Se se a re hlwekiša ka go re kgontšha go dula re phafogile le go lekola matswalo a rena, gomme se tliša tokologo, le khutšo dipelong tša rena: “Ge le phetha tše ke le rutago tšona, gona le barutiwa ba ka ka nnete; le tla tseba nnete, gomme nnete ke yona e tlago le lokolla” (Johanese 8:31-32).

Nnete e sehloeng sa lenaneo la dimelo tše di nyakegago tša potego gomme e bohlokwa go motho yo mongwe le yo mongwe tswalanong e bohlokwa, eupša ke tšhitišo go bao ba sa e bolelego. Go boima go ka phela gabotse le batho ba bangwe ge ba sa bolele nnete gomme se se thibela tshepo.

Jesu o gatelela dilo tše pedi tša motheo temaneng lehono: kobamelo le nnete – ditayo tše di lego bohlokwa go pheleng ka potego. Se se amana bjang le Moya wo Mokgethwa? Moya wo Mokgethwa ke “Moya wa nnete” wo o re ahlolago ge re dirile gabotse goba re fošitše, eupša ke Yo mongwe yo a kopantšego karolo ye nngwe le ye nngwe ya Jesu go ba nneteng: seprofeto mabapi le go bowa ga Gagwe, mathomo a Gagwe, teko ya Gagwe ke diabolo leganateng, tsogo ya Gagwe le thotogelo. Maatla a Moya wo Mokgethwa a kgontšhitše Jesu go dira mehlolo, go tsopola Mangwalo le go ruta ka bohlale bjo bo ka sa lakanyetšwego.

Mohlomongwe mohlala wo mmotse wa maatla a Gagwe o hwetšwa go Jesu ge a tsoša Lasarose bahung – ka nnete se re hloka go se tshepha kudu ge re dumela go tsogeng ga Jesu bahung le, ka go latela, ga rena. Re netefaletša ke Mangwalo: “Gomme ge Moya wa Modimo yo a tsošitšego Jesu bahung o phela ka gare ga lena, gona Modimo yo a tsošitšego Kriste bahung, le mebele ya lena ye e hwago o tla e phediša ka Moya wa gagwe wo o phelago ka gare ga lena” (Baroma 8:11).