Moya wo Mokgethwa – Letšatši la 11

Go tloga mathomong a nako, motho o be a kgahlwa ke maatla gomme a leka go a laola go ka fihlelela katlego bophelong. Se se bonala maitekong a sa kgaotšego a taolo, tumo le go ba le dithoto. Ka mehla re phela re nyaka se sengwe, goba motho yo mongwe, yo mogolo wa go ba le maatla go feta rena yo a ka re thušago, eupša gantši re dira kgetho ye e fošagetšego. Ge re be re efa šedi Mangwalo a re a sekasekilego go fihla ga bjale, go wona re ka ba re lemogile gore maatla a motho ge e le gabotse ga se a ka a mo kgontšha go fihlelela ditebanyo tša gagwe. Goliate ga se a fenye ntwa go Bafilista. Isebele ga se a ka a swara Eliya. Ge e le gabotse, motho ga a na sephetho ge dilo tše di tlago pele bophelong bja gagwe di fapane le tša Modimo: “Gobane se batho ba lefase ba bonago e le sa bohlale, Modimo yena o bona e le sa bošilo” (1 Bakorinte 3:19).

Temaneng ya lehono re bona tsela ya Modimo ye e thomago go molaetša wa Gagwe go Serubabele ka Sakaria le go lentšu la Gagwe go Hosea pele ga yona. Mantšu a Gagwe a khomotšo le go hlohleletša a na le ditšhegofatšo tše pedi ge A tshephiša go phethagatša dilo tša kgonthe go Serubabele ka Moya wa Gagwe. Bogona bja gagwe bo tla tloša mathata a a tšwelelago pele ga gagwe bjalo ka thaba ye maatla, gomme o tla itemogela lethabo la go phethagatša mošomo. O nea Sakaria pono ya sehlomabone sa gauta se se tukago se sa kgaotše gomme se tšhelwa ka makhura go tšwa go polokelo ya makhura ye e sa lekanyetšwago: sešupo sa tšhollelo ye e sa kgaotšego ya Moya wa Gagwe, wo o fiwago ntle le tekanyetšo, go ba matlafatša go fihlelela mošomo wa bona. Ge e le gore e sa le wa ba le mošomo o mogolo wo o swanetšego go o dira ge o be o šetše o ikwa o lapile le go nolega moko gomme go na le batho ba mmalwa ba ba ka go thušago, o tla thabela boleng bja tshepišo ye.

Serubabele o be a na le Moya wo Mokgethwa go mo kgontšha go hlokomela bathopša bao ba bego ba boile go tšwa Babilonia go tlo aga leswa tempele le setšhaba sa bona. Ka gobane e be e le ba mmalwa, ba lapišitšwe ke go sotlwa ke manaba a bona le go nolega moko ka bogolo bja mošomo wo ba bego ba swanetše go o dira, ba ikwa ba fokola le go diila gomme ba sa lokela mošomo. A re hlohleletšege gore Modimo ga a ithekge go maatla a motho; ge e le gabotse, “maatla a Gagwe a tiile kudu mo go ba ba fokolago” (2 Bakorinte 12:9). Moya wa Gagwe o matlafatša badiidi, bafokodi, baikokobetši le mašaledi.